Obadiah Laibu Thukhun Lui a Laibu tompen ahi. A Bung omlou in a Tang kia 21 tan om hi. Thukhun Lui a Zawlnei neu Laibu sawmlehnihte lak a Obadiah Laibu chituamna bel Edom toh kisai a Pathian thupawt ahih ziak ahi. Hiai Edom mite tuh Jakob sanggampa Esau suante ahi uh.

LAIBU GELHTU LEH HUAI HUN A GAMSUNG DINMUN

Obadiah Laibu gelhtu Zawlnei Obadiah ahi (1:1). Obadiah min khiakna bel “Toupa sikha” chih ahi. Zawlnei Obadiah tungtang tampi theih ahi kei. Jerusalem, Judah leh Zion a gen mun deuh ziak in (t.10-12, 17, 21) Judah gam a teng, Elija leh Elishate hun lai a mi, hi dia gintak ahi. Hiai Laibu kigelh hun ah ngaihdan kibang lou hi. Khenkhat in BC 848-840 kikal vel hiding a chih lai un a khente’n BC 587 vel hiding chi uhi. Tamzawte’ gintakdan in BC 840 vel a kigelh hi ding, chih ahi. Huai bel, a sung a thu kigente leh Zawlnei Obadiah thupuak Edom manthat ding kigente ziak deuh ahi.

Edom mite ahihleh Thukhun Lui hun a Judah gam simlam Tuipi Si (Dead Sea) zul a khosa, Esau suante, ahi uh (Gen.36:1). Jakob leh Esau kisiatna in a suante uh a-khang a-khang in kikhensak hi. Jakob suan Israelte Aigupta sal apan hong paikik lai un hiai Edom mite’n a gam uh ana tawnsak utlou uhi (Num. 20:14-21). Huai kia hilou in, Kumpi Solomon ana dou uh a (1 Kum.11:14-25), Kumpi Jehoshaphat ana dal sawm uh a, himahleh, lohsam uhi (2 Kro. 20:22). Kumpi Jehoram tung ah leng ana hel ngei uhi (2 Kro.21:8). Israelte Aigupta sal a tan sung un Edom mite’n kivaihawmna hoihtak ana tungding khin uh a, a Khopi ding un Petra zang uhi (Gen. 36:31-39). Obadiah thupuak tangtunna ding in BC Kumzabi 5na hunlai in Nabatians namte’n Edom vadou in zou uh a, huchi in a Khopi uh Petra apan nohkhia uhi. Edom mite taizak uh a, tamtak Palestine simlam ah khosa uhi. Huai mun ah Idumia (Grik pau in) mite chi a minloh in om uhi. Babulon khut a Jerusalem a puksiat lai in (BC 586), a sanggampa uh Jakob a muhdah ziak un, Babulon gum in pang uhi. Huai nung kum 400 vel zoh in Maccabis mite khut ah Idumiate pukse nawn uh a huai hun apan gentham ding omlou uhi. A omsun tawmchikte’n Judate paidan peuh koppih in khosa uhi. ThuKhun Thak hun a Kumpi Herod kichi, Bethlehem leh a kim a naupang kum 2 nuailam thah dia thupetu, Idumia mi ahi. Huchi in, Rome Kumpi Titus khut ah AD 70 in Judah toh puklut khawm uhi. Huai nung in khovel khangthu ah Edom mite kigenkha nawn lou hi. Zawlnei Obadiah genkholhna dungzui in nam mangthang hong himai uhi (t.10, 18).

ZAWLNEI OBADIAH THUPUAK

Edom tungtang a Zawlnei Obadiah in Pathian apan thu a muh hiai ahi. Namte lak ah Edom hihneu ahi ding a, nakpitak a muhsit in a om ding. A lungtang kisaktheihna ziak in muvanlai bang in sangpi ah lengtou mahleh huai apan kaihkhiaksuk ahi ding, chih Toupa’ thupawt ahi (t.2-4). A unau Jakob tung a a hiamgam ziak un zumna in Edom mite khuh ding a, tangtawn a hihmanthat in om ding uhi (t.10). Huai ding in Toupa Ni a naita (t.15). Huai hun chiang in, Edom adia puksiatna leh manthatna ahi ding a, himahleh, Toupa’n Jakob suan Israelte hihsiangthou ding a (t.17), Edom mite lak ah mei leh meikuang bang ahi ding uhi (t.18). Huchi in, Edom gam nam dangte lak ah hawmzak ahi ding (t.19-20), chih ahi. Huai ziak in, Zawlnei Obadiah thupuak tuh khelhna ziak a Edom tung a manthatna hong tung ding leh Israel tundingna ding thu ahi.

Pathian in bang ziak a Edom gawt a mangthangsak ding ahia?

Lungtang kisathei a neih ziak in (t.3)
Israel tung a a gamtat gilou ziak in (t.10)
Judah in haksatna a tuah lai a ana kipah ziak in (t.12)
Judah tung a neksiatna ziak in (t.13)
Judah suakta sunte hihmang dia a lamtan ziak in (t.14)
LAIBU SUNGTHU LEH A KILEPDAN

Obadiah Laibu in Edom tung a Pathian thukhenna hong tungpah ding leh tunung a Israel tundingnawnna ding thu tomkim in taklang hi. Tang bul ah (t.1) Obadiah in Toupa apan namte lak a kidouna hong tung ding thu mengmuhna a mu ahihdan kigen hi. Huai zoh in Edom kisaktheihna leh gitlouhna ziak a Pathian thukhenna hong tung ding ahihdan kigen nawn hi (t.2-9). Edom gawt a om na ding ziak bangzah hiam t.10-14 kikal ah kigen beh hi. Huaite tuh, unau kal a ginomlouhna ziak bang (t.10-11), Pathian nam tel Judah tung a siatna hongtun chiang a ana kipahpih (t.12-13), chih leh, Judah melmate panpih (t.10-11, 13-14), chihte ahi. Toupa Ni kichi, Pathian thukhenna namte tung a hong tung ding t.15-21 kikal ah kimu hi. A masa in, Edom tung a thukhenna hong tung ding kigen a (t.15-16), huai zoh in Israel tunding a om ding thu kigen zompah hi (t.17-21).

LAIBU THUTUN:

1. EDOM TUNG A PATHIAN THUKHENNA (t.1-14)

1.1. Edom gawtna (t.1-9)

1.2. Edom gitlouhna leh khelhna (t.10-14)

2. TOUPA NI- NAMTE TUNG A PATHIAN THUKHENNA (t. 15-16)

3. ISRAEL TUNDING-NAWNNA (t. 17-18)

4. EDOM GAM KIHAWMNA (t. 19-21)

OBADIAH LAIBU APAN SIN DING
1. Pathian huat mahmah khelhna tuh lungtang kisathei ahi. Kisatheite tuh Toupa’n a dou naknak hi (2 Sm. 22:28; Pau. 16:5). Lungtang kisatheipu leh nam kisathei hihkhak ding thil lauhuai mahmah ahi. Pathian melma suahtheihna ahi a pilvang mahmah ni.

2. Edom leh Judah (Israel) unau kihoutheihlouhna in haksatna leh buaina tamveitak a tut ban ah Edom adi’n manthatna ahi. Unau kal kituahlouhna, inkuan sung kilemlouhna, leh nam sung buaina in a poimoh lou haksatna leh siatna tampi hon tun ding hi. Pangkhawm thei ding a Pathian khut a kituklut chiat ding ahi.

3. Edom in Pathian nam tel Judah (Israel) a dou gige ziak in Pathian in a tung ah thukhenna lauhuai tungsak a, huchi in, khovel mai ah nam mangthang hong suak uhi. Huchimah bang in, Pathian nasem midiktatte leh Pathian mizatte doutu/langpang hihkhak ding thil lauhuai mahmah ahi. Pilvang mahmah ni.