THUMASA: Saptuam’ ading in Khristian Thukizakna laibu manphatak ahi a, tamtakte’n khalam ann i ngahna ahi. Saptuam’ hunpi leh ni poimohte toh kituak in article suah ahizel a, ahunhun in saptuamte’n etna lam kibang i en theizel uhi. Tukha June, 2019 ading a saptuam’ seh ni poimohte lak a khat Naupangte’ Ni, June 2, 2019 (Pathianni masa) ah hong tu hi. Hundang ah leng poimoh i sak gige ahihlailai in tukha leh tuhun in naupangte leh naupang sinsaktute’ lam enthak lehang chi in Toupa’ min in ka hon chial hi. Naupangte leng khamangthang ahi uh a; Khrist Jesu a poimoh uhi. Mun tampi ah mission field a om a, ei innsung leh vengsung mahmah ah leng a om hi; tuabel naupangte ahi uhi. Ka ngaihtuah zel a, ka lauhthawngna a mangthei kei: Laktouhna Ni Thupi hong tung hileh; naupang bangzah nawtsiat in a om dia? I innsungte uah naupang bangzah amau kia in a om di ua? I sandeskulte uah naupang bangzah na kailai maimah ding ahi ua? Bangzah tan ahia nawtsiat i kiphalsak theih ding uh? Khat lel leng i nawse ngam dia hia? Ahi mahmah hi; van tung ah kipahna ni ahihlai in leitung ah kah leh mauni ahi ding hi. Himahleh kipahhuai i sa, Toupa’n tuni ahon piaklai man in! Naupangte adia lametna a omlai man in Toupa ka phat hi. Naupangte lak a Tanchinhoih puangzak theilai i hihman un Toupa i phat uhi. Tuni in hun i nei uhi; tuhun mahmah hotdamna hun ahi. Koi ah khamangthang a om a? Koi ah Tanchinhoih kiphamoh a om a? Unau, nang kam apan a zak kei leh za ngeilou ding hikha thei ahi. Tanchinhoih bel hotdamna dia Pathian’ thilhihtheihna ahih man in laulou leh ginglah lou in va gen in, Toupa’n a itna vak hon musak ding hi. Khrist adia ka seppih belampute, sinsaktute, nu-leh-pate; Toupa’n ei khut a Thuhing a koih, chimtak lou hial in, biakna munte ah, sandeskulte ah, i innsungte uah i puangzak ‘zihzeh’ ding uh. Melmapa’n i tate leh i naupangte tandet sawm ahihlam phawkthak ni hang! Noah hunlai bang in Pathian’ thangpaihna in Huntawpni ah khentuam neilou ding ahih man in, i it mahmah naupangte tua ni tuaksak lou ding in ahunlai in siit neilou in i pang ding uh. Hiai, simtute’ ading a Naupangte Ni thupuak ahi.

PATHIAN ZAHNGAIHNATE NGAIHSUN IN: PATHIAN POMTAK BIAKNA
Romte 12:1, Huchi in unaute aw, Pathian zahngaihna ziak in, kithoihna hing, siangthou leh Pathian lungtuak ding in na sapum uh lan ding in k’on ngen ahi; huai na biakna dan ding him uh ahi.

Saptuam’ thupi “Pathian Pomtak Biakna” leh changtel Romte 12:1 gingtute’ adia poimoh hi mai lou in aloutheilou bang in i ngaihsun hi. Ahihleh, naupangte’n bangchi’n Pathian’ pomtak biakna a pethei di ua, bangchi’n Pathian’ pomtak biakna ahithei di ua, chihte dotna poimoh hi in i mu hi. Tua ding in Rome laikhak toh kisai saulou enkik lehang i chi hi. Sawltaklian Paul laikhakte lak a a saupen leh hotdamna toh kisai akitelna pen ahi hi. Tua ban ah, khenpi nih in a khentheih a, khendan poimoh mahmah leng ahi hi. Bung 1 apan 11 sung ah hotdamna thu kiteltak in a muhtheih a; bung 12 apan 16 sung ah hotdamsate nuntak dingdan kalbi masate kiteltak in a muhtheih nawn hi. Huchi ahihman in, Romte bung 12 a chang khatna chang poimohtak ahong suak hi. Aziak bel, hiai chang in bung masa 11 te leh bung nanung 5 te a pehkhawm hi. Hiai chang tomchik in khatvei enkhawmlai le i chi hi.
Huchi in unaute aw… k’on ngen hi (BSI) / I beseech you therefore, brethren (KJV): Bung 1na apan bung 11na a agensate tengteng, bung 12:1 ah, a pansan ding in Sawltak Paul in hon zang hi. Thupiak khauhtak bang a genzawlou in a nemthei pen ding in ‘gingtute’ lak ah ‘ngetna’ bawl hi. Pathian zahngaihna ziak in (BSI) / by the mercies of God (KJV): Bung 1na apan 11 sung a kigensate tengteng thumal nih zang in hon taklang thak hi. Tua thumalte bel “Pathian zahngaihna(te)” chih ahi. kithoihna hing, siangthou leh Pathian lungtuak ding in na sapum uh lan ding in k’on ngen ahi (BSI)/ that ye present your bodies a living sacrifice, holy, acceptable unto God (KJV): Thukhunlui hun a kithoihnate bang hinawnlou in (aziakbel Khrist Jesu in tuabang kithoihnate Khros ah zouta ahih man in), ngaihdamna leh suahtakna ngahna ding kithoihna hinawnlou in, kiphutziak leh dan zuihkimna ding hilou in, lunggulhna taktak; kipahna taktak lahkhiatna leh biakpiakna hi ding in na sapumte uh leh na leitung hinkhuate uh Pathian’ kiang ah lankhia un. Tuabel, mimal’ deihdan a zat hinawnlou ding in, khovel lunggulhna sepsuahna hinawnlou ding in, leigou kholna hinawn lou ding in, Kha’ teentheihna leh thuneihna sapum hi ding in, khalam thilte sepsuahna sapum hiding in lankhia un chihna ahi.
Huai na biakna dan ding him uh ahi (BSI)/ which is your reasonable service (KJV)/ for this is the reasonable way for you to worship (ISV): Huchibang hinkhua bel leitung a i khualzin sung a i Biakna Dan (Principle of Worship) ding uh omsun ahi. Sapum latkhiatna ah bel sapum pansan a ngaihtuah, sepkhiat leh bawl tengteng telta ahih man in, gingtute ading in zek-zeklou/salam thil-khalam thil/khovel vai leh saptuam vai chihte khawng pansan in nasepdan tuamtuam leh hindan tuamtuam sapum khat ah omthei nawnlou chihna ahi.

Sawltak Paul in a gennop bel: Khrist Jesu tungtawna Pathian’ zahngaihna ngahta te na hih uleh; tua zahngaihna hon petu Pa Pathian kiang a na hihding ua kilawm leh poimoh tuh na sapumte uh niteng a Ama’ adia pomtak kithoihna hi ding a na latkhiat gige ding uh ahi, chih ahi. Tuabang ahihleh, Pathian’ pomtak biakna i piaktheihna ding un, amasa in Pathian’ zahngaihnate i ngaihsut thak uh poimoh hi. Pathian’ thangpaihna lauh ziak leh vaihawmna ni lauh ziak a utlou pipi leh kha tellou a biakna piaksawm i hihkhak ding uh lauhthawng huai i sa hi. Tuate tengteng sepgimthawnna hong suak ding a, Pathian’ pomtak leng hingeilou ding hi. Pathian’ zahngaihna; Khrist Jesu a suahtakna, mihing lui sihna leh hehpihna ziak liauliau a mihing thak suahna, khelh ngaihdamnate ngaihsun thak in, tua zah dong a hong it Pathian bangchi’n na be dia chih ngaihsun thak lehang i chi hi.

Naupangte’n zaw, a nu-le-pate uh, a sinsaktute uh leh amuhtheih uh gingtu upazawte omdan enton ding ahilel uhi, tuate lunggulhte leh gou hi a angaihte uh mah lunggulh a manpha hon satou zel ding ahilel uhi. Huchi kawmkawm in, i khitna ding in hiai anuai a dotnate kidong thak lehang i chi hi~

• I tate leh naupangte’n Pathian’ zahngaihna a sangta uhia?
• I tate leh naupangte’n kithoihna hing hithei ding in Pathian ah kipahna a neita uhia?
• I tate leh naupangte un Pathian’ vaihawmna leh thangpaihna lau a, it ding leh biak ding ahihdan ngaihsun kha ngeilou ahi duam?