Thumasa: Khristian Thukizakna simtute tengteng i Toupa leh Hondampa Jesu Khrist min manpha in Nute’ Ni/ Dorcas’ Day chibai kon buuk hi. KTZ Editorial Board in tukha a Article khat gelh dia hamphatna hon piak ziak un amaute tung ah Pathian min in kipahthu ka gen hi.

Nute’ Ni/Dorcas’ Day ei saptuam in kum bangzah hiam zatdan chituamtuam in i na zangta uhi. Atangpi in Biakin ah Nute toh kisai, a manphat dan uh, ahoih dan uh, a ithuai dan uleh a mohpuakna uh thupidante sermon leh a theisiam deuhte’n Nute kiang a itna leh deihsakna thilpiak piakni bang in kizang deuh hi. Nute’ Ni chih theih dia abul hon pankhetu Miss Anna Jarvis bang hong thoukik in hichibang a Nute’ pual a leitung pumpi a mite leh saptuam in a buaipih leh kipahpih dan hong muleh kipak mahmah ding in ka gingta hi. Nute’ ading biik a saptuam in hunseh bawl i zatzel uh ‘NU’ hikhinsate ading in manpha petmah a, phu uh leng ka sa hi. Nute’ angsung a ta khangliante, a damsawt peuh uleh Nute’ itna thukdan thei deuhdeuh ua hehpih semsem uhi. Nute ithuai in ngaihhuai uh a, amau a omlouh chiang un insung hawm mahmah hi. Insung lumsak a, salam khalam a inkuanpihte makaihna ah leng tanmun leh mohpuakna lianpi nei uhi. Tukum i thupi khennenna a hong kitaklang ‘Nu hihna a Pathian Pomtak biakna Koi a Pan Ding’ chih toh kisai kikum khawm ni.

I. TATE LEH TUTE LAK AH PATHIAN POMTAK BIAKNA PAT MASAK DING: Pathian in vualzawlna gil a gah goutan tate leh tute hon piak, amaute’ kul leh poimohte sutuah a, kem a, khoi piching ding a mohpuakna hon pia ahi chih thei in Laisiangthou hon sinsak dan enkhawm ni.
I Laisiangthou in, ‘Na tate uh phatuamngai tak in na sinsak ding ua, na inn ua na tutlai bang un, lampi a na pailai bang un, na luplai bang un, na thoh chiang bang un na genzel ding uhi. Huan, chiamtehna ding in na ban uah na vial ding ua, na mit kikal uah talgakna ding in a om ding ahi. Huan, na kongkhak biangte uah, na kongkhakte uah na gelh ding uh ahi’ chiin a na gen hi (Diut.6:7-9).

A. BANGCHI SINSAK DING? SINSAK DINGDAN CHINIH I EN DING:
a) Phatuamngai tak in (Diut.6:7a): ‘Phatuamngai’ i chih chiang in ei lunglut dan leh thanophuai i sakna tan lel hiam i tate’n thu hon mang ua, a hong phur hun kia uh hilou in, utthu genlouh, lungkia leh lametna tengle beikhinta mahleh, mi’ pahtak ding zong lou a, mite’n a sep utlouh nunga sep teiteina ahi chileng i genkhial kholkei ding. Mihing etdan a lametna beita, lungke dimdem a i omkhit nung nangawn a lametna hing hon pezel Pathian bangkim hihthei, amah adia a haksa omlou ahihdan phawk a phatuam ngai nawnsem a pan lakna ahi. “… mihing hih vuallouh Pathian hih theih a hi” a chi a (Lk.18:27). Tua bang a pan lading in Pathian in hon deih a lametna leh a thilhih theihna toh hon thuam ding a phatuamngai tak a tate tute lak a Pathian bia i hi chih ginomna toh kuhkal tak in a maute mitmuh ding in langsak ni.

b) Toupa thuzohna leh hilhna ah (Eph.6:4b): Tate ‘GOU’ a hihdan Sam laibu ah i mu hi.” Ngai in, tate tuh Toupa lak a i goutan ahi ua…” (Sam 127:3a). Mihingte’n khovel ah sumlepai, sana dangka, vanhoih leh mantam taktakte gou bang a ngaihtuah in i pibawl mahmah hi. Huan siamna, pilnate bangleng neih ut in tate tute ading, midangte sang a niamzaw a a khosak ding uh lau in sum tam pipi seng in lai i simsak hi. Hiaite tengteng hoihthou mah leh leitung a muatmang mai dingte a hi uh. Himahleh a mangtheilou Pathian in ‘GOU’ hon piakte amah deihdan, amah toh ton a i kep ding a hondeih leh thupiak ahi. Toupa thupiak leh hilhna bang a i kep kei leh mangthang ding uhi. “Toupa’n in a lam kei leh, a lamte’n a semgim thawn phet uhi: Toupa’n khopi a ven hoih kei leh, a vengmi a hak thawn lel ahi” (Sam 127:1). Huai ziak in i Toupa’n hon it mahmah ziak a haksatna leh mangbatna tawpkhawk a tuah in leng “Abba, Pa… nang thu hizaw hen” (Mk.14:36) a chih in nang leh kei adia hongthuak ziak in i hingtheita hi. I siam leh pilna suan ding a omkei, himahleh amah thupiak Laisiangthou a zuihding leh zuihlouh ding hon sinsakte bang a hing in amah pomtak biakna neih ding Pathian mah kipisak in sinsakna pia in langsak ni.

B. KOIMUN AH, BANG HUN LEH BANGCHIBANG A SINSAK DING? CHITHUM A KHEN IN I ENNAWN DING:
a) “… na in ua na tutlai bang un, ... na luplai bang un leh na thoh chiang un na gen ding uh a hi” chin a gen hi (Diut.6:7b,d): Tate sinsak ding in Nute’n ka mankei chihtheihna vual omlou hi. Bangziak in? i chihleh, Laisiangthou in chiangtak in hon hilh hi. Insung a tutlai, luplai leh thohchiang bang a leng sinsak ding hitel ahihchiang in ahun lou omlou, hunteng a sinsakna piak ding chihna ahi. Huchi a hihleh Nute i tate’n insung a i khohei gamtat dan ah Pathian biakna nei in hon mu uhia? chih kivel poimoh mahmah ding hon chisak hi. Pathian bia a phatnala sakhawm, athute sim a sutkhawm hun leh thumna hunte neih zel kiphamoh ding hi. Huan kampau kilawm, kamsiam, migi leh nunnem a mi houpih dan, gending leh genlouh ding tanpha khenkak thei ding a etton tham ching dia ei hinkhua, insung a hon mu ua i heisuk heitouh hon en gige uh ahi chih phawk in pilvang tak a sinsak kul petmah hi. Hana in a tapa Samuel in nawinek a tawp masiah a insung ah don in a kem a, a damsung teng Tangtawn Toupa nasem ding in sinsakna pia a, Tangtawn Toupa abia hi (1 Samuel 1:28). Nute aw, ngaihtuah mah dih uh, i tate/tute neu lualai uh sinsak theihnai kei i chihkhak zenzen leh zaw ngaihtuah khial ding i hi. Naungek ang a i pom in i kipah mel leh hehmel theithei hi. Huai ziak in khim ihmu dia i luppih chiang in Pathian muanhuai dan, a hon kep dan, amah hon itpa a hihdan leh biaktak Pathian hing amah kia a hih ban ah zankhua a hon veng a, zing khovak hon musak a hon thousak zel a hihdan thute in khimthei zel le uthuai na e! “... na nu’ sinsakna taisan ken” (Pau. 6:20) in a na chi hi. Tate neulai a kipan a sinsakna a taisanlouh ding uh Tangtawn daih ding sinsakna piak tuh i mohpuakna ahi. Sinsakna hoih i piak leh ei insung adin ahoih masa dia, tuaban ah saptuam, khotang leh minam pumpi adin hunkhetu leng hong hiding hi. Mosi Nu, Jakobed in a tapa Aigupta pilna tengteng a sinsak ban ah, sawtlou kal adia khelhna nopsakna kipahpih sang in Pathian mite toh suk gentheihna thuak a om telzawk utna lungsim neiding in a sinsak hi (Nas.7:22; Heb.11:25). Hunteng a sinsakna pia i hihman in leh tuamah Pathian i biakna ahih ziak in pilvangtak in i sinsak dan enpha thak ni.

b) “… lampi a na pailai un...” (Diut.6:7b): Tate sinsakna mun ding tuh insung kia hilou in kholak vakna mun leh mundang a hohna munte leng a hihvek ding ahi. Insung a theihtawp suah a sinsakna i piaknung in leng, polam a i vakkhiak hun a leng sinsakna piak ding Pathian deih dan a hi. Hiai in hon hilh nop tuh insung kia a tate’ etteh theih dia hin hilou in kholak i vak na mun, i lawmpolhte leh houlimna thute apan a amau etton ding ua omding ahi. Tuaban ah amau toh kholak pawtkhawm, houlimkawm a leng Pathian biakna neihtheih a hihdan sinsak ding ahi. Abraham leh a tapa Isak haltum thillat landing in a tonkhawm ua, a houlim uhi. Isak in a pa kiang ah, “pa, mei leh sing om a, haltum thillat ding belam koi a om ahia?” chi’in a dong hi. Abraham in Pathian muanhuai dan leh a thilhihtheih dan theichian lotel a hihman in khamuanhuai tak in dawng hi. “Ka tapa aw, Pathian mah in haltum thillat ding tua belam hon ngaihtuah tawmna ding ahi”, a chi hi (Gen.22:7-8). Pata a Pathian bedia kuan, tonkhawm a houlim tiptip chu nak nop nanchia! Nute aw, i tapa tanute leh tute toh hichibang in hun zangkhawm zel le setan in i insungte uah leh kholak pawtna ah leng mun neilou dia Pathian pomtak biakna neithei ding i hi. Nu pen kholak a pawtpawt insung a ta leh naute don manlou a pumbuai maimah i hihkhak ding lauhuai hi.

c) Chiamtehna ding in na khut uah bun unla, na taltang uah khim un. Na in kongbiangte uleh na kongpite uah tuate gelh un (Diut.6:8-9):
Nu hihna ah tate in sinsak ding dan Pathian in a ngaih poimoh pen tuh i omdan ahi. I niteng khosakna, i hinkhua a khut nasepte, gamtat khohei dan, i melpuak, hehmel leh kipah mel, i kampau zatdan bangkim a tate sinsakna kipia hi. Tuabang a sinsakna chiik leh hoih piak ding tuh utthu leh siam ziak hilou in mohpuakna nei i hi chih phawk in theihtawp suah a pan i lak kul mahmah hon chisak hi. Huai ziak in, pilvangtak a hinkhua siangthou Pathian deihdan zong in a mai ah kitulut thak ni. Huaiban ah i insung zepdan leh kepdan, insung van deihdan leh insung a i thiltaakte – thu hiam, lemlakte tengteng ban ah eimah taksa tung kizepna nikten puansilhte tanpha a sinsakna piakding Pathian deihdan ahi. I insung van neihte leh i kichei dante khawng in Pathian mel a langsak hia? Tulel a i hindan, khohei gamtat dante’n Pathian lungtuaklou a hihkhak ding zaw a deih huai kei, kivel pha thakthak ni. Laisiangthou in, “Na kivatna uh polam kivatna samphekte, dangka-eng khi ohte, puansilh a kivatte bang hilou in, lungtang a mihing thuguk lungsim thunuailut leh nunnem puansilh setheilou a kivat hizaw leh, huai tuh Pathian mitmuh in a manpha mahmah hi”, a chi hi (I Peter 3:3,4). I hinkhua a hoihlou chiinkhak omte paikhia ni in, a dik lampi Pathian mitmuh a manphate ching in kivan ni aw

II. PASALTE LEH IN KUANPIHTE LAK A PATHIAN POMTAK BIAKNA HINKHUA A SUKLATDING (I Peter 3:1; Eph. 5:22; Kol. 3:18): Numeite mahni pasalte thuthu a omding in Laisiangthou in hon hilh hi (I Peter 3:1). Numei tamtakten hiai thupiak theikhial in kitungvik khasek ua insung siatgawpna a pitu, khosak haksatna leh lungkhamna huaisetak tuntu bang kisuak khasek a poi mahmah hi. Pasalte, a siampen leh pilpen, a haupen leh changkang pen, a vaihawmsiam leh kizenpen hikei mah leh, amaute ziak a ‘Nu” hihna tangte a kihih man in amau thuthu a om tuh i biakna latsakna leng hipah mai hi. Tuaban ah zite Toupa kiang a kiniamkhiak bang a mahni pasalte kiang chiat a kiniamkhiak ding ahi. Hiai tuh numeite dinmun ding diktak i Laisiangthou hon sinsak dan ahi (Eph.5:22: Kol.3:18). Pasalte thuthu a omtheihna ding a poimoh mahmah thil nih ensuk ni:

a) THUMANNA: Laisiangthou a numei melhoih a ki-recordte lak a khat Jacob zi, Rakil thuman ziak a a inkuanpihte’n damna a muh dan uh sin ni. Jacob a zi leh tate toh a pu Laban inn a kipan a hong paikhiak lai un a zi Rakil in a pa’ insung milimte a guksak hi. Huai milimte it mahmah zaw ahi ding, a pa’n hong nungdelh a lakkik a sawmlai in leng sangawngsau van nuai a sel in a tutkhum a, a pa kiang ah ka numei’ ngeina in honpha a, ding theilou ka hi chi in kilawmtak in zuau a gen hi (Gen.31:19,34). Hiai milim pathian kepguk ziak ahi diam Sekem khopi a buaina huaisetak a tuah uh hon chisak hi. Himahleh Jacob leh a inkuanpihte Bethel a hongtun ua maitam doh dia Pathian in a sawllai in, aman a inkuanpihte leh a kiang a om tengteng kiang ah, “Na lak ua gamdang Pathian omte koihmang unla, kihih siangthou unla, na puansilhte uh kheng un… Bethel ah paitou in Pathian kiang ah maitam doh ni” chi hi… huchi in a inkuan pihte’n leng thumang tak in gamdang pathiante a khut ua om tengteng leh a bil ua bilbah a bah tengteng uh Jacob kiang ah a pia ua, Jacob in Sekem khokiang a tosaw nuai ah a phum hi (Gen. 35:2b-4). Hiai hun tak ahi a poimoh, Rakil in a pasal Jacob thupiak zahtak a milim pathiante, thumangtak a hon koihkhe dom mai chu, a inkuanpih tengteng damna leh melmate a kipan a Pathian humbitna thupitak a hong hi. A thupi ngei maw! Midang teng in gamdang pathiante koihkhe mahle uh, Rakil in koihkhe lou hileh maitam dohtheilou ding uhi. Tuzet in chu Jacob leh a inkuante’n lungmuangtak in Bethel ah maitam hondoh theita uhi (Gen.35:6). Nute aw, gamdang pathian bangzahtak kemkha in i kithei a? Pasalte leh inkuanpihte lak a Pathian pomtak biakna langsaktu di i hihlai in, pomtaklouh leh buaina tuntu i hihkhak ding lauhuai mahmah hi. Kivelpha thak chiat ni!

b) KINIAMKHIAKNA: ‘Kiniamkhiak’ kichi thumal in a gennop tuh mi kuahiam khat in amah tung a thuneitu om a tua thuneitu deihdan, hoihsak dan leh a lungtunna bangbang a sepkhiak ding, tung a thuneitu kia hilou, midang neu in lian taleh a kisukkhak pihte toh nna kisepsaktuah na ah, amah mimal deihdan leh utdan hilou a thumangtak a sepdi om bangbang thunuailut tak a sepkhiakna ahi. Nupi pasal neisa ‘ZI’ hisa peuhmahte Toupa kianga kiniamkhiak bang a mahni pasalte kiang a kiniamkhiak ding Laisiangthou hon hilh dan ahi (Eph.5:22). Hiai tuh numeite dinmun diktak leh pasalte kiang a biakna latsak ding Pathian thupiak ahi. Pasalte kiang a numeiten kiniamkhiak hinkhua a hon latsak chiang un a inkuansung mite’n a hon mu ua, huchi in insung ah kithutuahna om in, hauhsakna leh vualzawlna tuntu hong suak ua, bit leh lungmuangtak a Pathian biakna hing insung ah omthei hi. Pathian in Abraham a sapkhiak a, Haran a kipan Aigupta gam a honglut kuan in… a zi Sarah kiang ah, “Ngai in, numei melhoihtak na hi... Aigupta ten nang hon muh chiang un, hiai a zi eive, a chi ding ua: huan, kei a hon that mai ding uh, nang bel a hon hinghawi ding uh. Nang ziak a hoihtak a ka omtheihna di’n leh nang vang a ka hintheihna di’n, a sanggamnu ka hi, hehpihtak in chi zel in”, a chi hi (Gen. 12:11-13). Huchi in Aigupta gamsung a hong tung ngei ua, mite’n Sarah a muhchiang un melhoih a sa mahmah uhi. Kumpipa Faro’ uliante’n leng a mu ua, a melhoih dan kumpipa hilh in a insung ah Sarah pilut in om petmah hi. Sarah phun seselou, kitung vetlou in a pasal Abraham’ thu, thunuailut leh kingaihniamna toh mang in a zui hi. Sarah kiniamkhiakna ziak in kumpipa Faro, Abraham tung ah a siam mahmah a belamte, bawngtalte, sabiltungte, sabiltung nute, sangawngsaute, sila pasalte leh sila numeite a neihloh hi (Gen.12:16). Thunuailut leh kingaihniamna nasep in inkuan ading in vualzawlna tampi a tutloh hi. “Zite aw, Toupa ah a kilawm hun bangzel in na pasalte uh kiang ah kingainiam un” (Kol.3:18), chia i Laisiangthou in hon hilh bang in kingaihniamna toh pasalte thumang in Toupa biakna langsak ni aw.

THUKHITNA: Pathian in Pasalte tungtawn a vualzawlna gila gah goutan hon piak, tate leh tute laka Amah limsakna leh biakna sinsak ding leh hinkhua a latsak ding a deihdan a hi. Tuabang semkhethei a a Pomtak Biakna hunteng a thumanna leh kingaihniamna toh langkhesak thei ding in Pathian in simtute pha a sak bang in hon vualzawl chiat hen.