Tukum 2019 EBC saptuam thupi: “Pathian Pomtak Biakna” a hi a, May kha adia khennenna “Nu Hihna a Pathian Pomtak Biak Piakna” chih ahi. Hiai thupi pansan a noute toh houlim thei dia hamphatna honpia KTZ saitute tung leh hinna damna honpia Pathian tung ah kipahthu ka gen masa hi. Pathian biak ding tuh mihingte piansan leh hihding poimoh pen, tangtawn daih ahi (Eks. 20:3; Kil. 4:8-11). Huai ziak in, michih in Pathian biak ding, thildang kua/bangmah biak louh ding, Pathian nna kia sep ding ahi a, tuabang a Toupa bia a A’ nna sem nuamloute mangthang ding chih ahi zawmah hi (Luk. 4: 8; Deut. 6: 13; Isai 60: 12). I theihchiat bang un tu kha a Nute Ni/Dorcas Day zang i hihna uah nute kivelchian thak in, nu hihna tungtawn a Pathian pomtak biakna na zang thei zel i himah na uhia, chih kivelchian chiat poimoh mahmah i sa hi. Abiktak in, nu hihna i pomdan leh tua toh kisai mohpuaknate i sep dan uah Pathian a lungkim nadiam, chih kivelchian poimoh mahmah ding in i ngaihsun hi.

Pathian biakna i chih ahuap aza mahmah hi. Biakin leh innkuan a i biaknate a bei mai hilou in, mimal hinkho pumlum: i lungput, nasepte leh pumpi zatdan tanpha a huam hi. Biakna toh kisai ah polam nasepte: phatna lasak, thumna, thugen, baptisma, Toupa nitakan leh thohlawmte poimoh mah leh, tuate sanga poimoh zaw tuh lungtang tengteng, kha teng teng leh hatna tengteng a Pathian it ding leh, amah hon thupiak bang a kha leh thutak a amah biak ding, i pumpi mahmah zong latkhiak lai ding chih ahi (Is. 29:23; Mat. 15: 8; Diut. 6: 5; Joh. 4: 23; Rom. 12: 1). Mipi’ biak khawmnate ah paidan tuamtuam a om a, polam latdan apan biakna dik or diklou khenkhiak thil haksapi ahi. Aziak bel, polam muhtheih thilhihte himhim biakna diktak hihna (essence of true worship) ahikei uhi. Biakna diktak tuh Kha leh Thutak a biakna ahi a, tua lah mit a muhtheih ahi kei hi. Polam latdan a kilawm mahmah hinapi Pathian in a pomlouh biakna toh kisai thil tamtak a om hi (Isai. 1: 11-17; Gen. 4: 1-7; Mal. 1: 6-14; Amos 5: 21-23). Alehlam ah, mihing mitmuh a bangmah hilou, ahihhang a Pathian in manpha sa a apom mahmah a om zel hi (Mk. 12:41-44; Luk. 21:1-4). Huai ziak in, biakna dik leh Pathian pomtak biakna tuh polam latdan hizaw lou in, lungtang apan lungput leh hinkho zatdan, Pathian toh kizopna ban ah, Toupa’n mimal hon sapna, hon thopna, hon thupiak pomdan leh tuate sepkhiak dan ah a kinga mahmah chih theihchian mahmah ding ahi.

Huai ziak in, i thupi, “Nu hihna a Pathian pomtak biak piakna” ah zong, nu hihna toh kisai Pathian geeldan, Pathian tup leh ngim leh hon thupiakte theichian in, tuabang mah in pom in, i mohpuaknate kipaktak leh thanuamtak in sem lehang Pathian pomtak biak piakna ahi chih mangngilh louh ding ahi. Thupil khat in, “Nasep tuh biakna ahi” (work is worship) a chih dik vek kholkei mah leh, biakna leh nasep tuamkhen vilvel theih ahikei hi. Sam 100:2 ah, “Kipak kawm in Toupa bia (NIV)/nasem (NKJV)” chih ahi. Hiai a kizang Hebru thumal “abad” tuh bia (worhip) leh nasepsak (serve) chi a zat theih tuaktuak ahi. Huai omdan bel, biakna leh omdan gamtat/nasep kikhen theilou chihna ahi. Sawltak Paul in Romete kiang a, “na sapum uh lan ding in kon ngen” (Rom. 12:1) achih toh kibang mahmah ahi. Pathian pomtak biakna tuh a thu lel hilou a, omdan gamtat leh nasep a suklat ding chihna ahimai hi! Hiai toh kisai ah pilvanna ding a om mahmah hi. Bangteng ah mi hoih leh nu hoih hi in, i mohpuaknate thazohtak in sem kichi mah lehang zong, piangthaklou i hih leh bel, i nasepte genlouh eimah ngei zong Pathian adia pomtak lou kihi ngitnget chihna ahi (Joh. 14: 6; Heb. 10: 19, 20). Huai ziak in, nu hihna a Pathian pomtak biakna neih theihna ding in pianthakna, Jesu Khrist toh mimaltak a kizopna aloutheilou leh poimoh masapen ahi.

I theihchiat bang in innkuan, saptuam leh khotang ah Nute poimohna leh manphatna alian mahmah hi. Mi tengteng nu apan piang leh nu khoisa kepsa achih theih hi. Huai ziak in, nu mohpuakna alian a, atam a, haksat zong ahaksa mahmah hi. A pasal tunga mohpuakna, ta leh naute tunga mohpuakna, innsung leh pua kepna, nek leh tak saina, zin leh leng saina ban ah saptuam leh khotang ah zong nute’ tantuan mohpuakna atam mahmah hi! Ahitak in nute sang a nna hauzaw, tam semzaw leh sawt semzaw omlou ahi. Abiktak in ta leh nau kepna ngial ah sun leh zan khawl hun omlou a duty den ahi uhi. Himahleh, nute nasep tamtak loh bei nna ahihban ah kuamah pahtak loh lou ahi zawmah uhi. Bangteng hileh, pasal toh kisai ahizong, tate kepna toh kisai ahizong, saptuam toh kisai ahizong in, nute nasepte himhim Pathian biakna ahi chih amau zong a theih ua, midang in leng phawk pih ding ahi.

Huai ziak in, nute bangkim a pilvan a poimoh mahmah hi. Nu hihna toh kisai Pathian geldan, Pathian tup leh ngim leh thupiakte theihsiam a poimoh mahmah hi. Mahni pasal chiat bawl ding dan, ta leh nau kep leh etkol ding dan, zin leh leng sai ding dan leh kichei ding dan tanpha Pathian deih leh thupiak a om hi. Ei hoihsak dan hiam, mi hih dan hiam, hiai khovel dan bang a om mai lou a; Pathian deih dan leh thupiakte zong a theih sawm ding ahi. Nikte’n puansilh ban ah sapum kilawmnate asia ahipah kei hi. Huan, saptuam leh khotang a nna hoih sep zong a poimoh hun a omtham hi. Himahleh, huaite sanga poimoh zaw tuh Pathian thu bang a pasalte nuai a kitahlut ding, pasal ban a tate leh inkuante it ding, tagah gentheite hehpih ding, nasep taimak ding leh nna hoih sep a hauhsak ding ahi (Eph. 5:22-24; Kol.3:18; Pau.31:10-31). Tuabang Pathian deihna bang a i kalsuanna leh nasepte khempeuh biakna ahi chih mangngilh louh ding ahi. Huaiban ah, ei mimal hinkhua a Pathian thiltup leh thupiakte i zuih chiang a Amah pahtawi a thupina pia i hi chih theihsiam ding ahi. Hiai mah biakna diktak, Pathian pomtak biakna ahi. Toupa’n Nute tengteng hon vualzawl chiat hen!