(Romte 12:1-2; 2 Korinth 9:1-14; Luka 6:38; 2 Sam 24:24 cf; 1 Sam 2:30b)

Thupatna:
Jesu’n a thugenna ah thil dangte sang in sum thu toh kisai tam gen zaw pen a theih ahi. Asuite gen dan in, Tangthupha (gospel) lite a Jesu gentehna 38 (sawm thum-le-giat) te lak ah 16 te gen pen neihsate kepna leh sum-le-pai bangchi sai ding chih ahi. Jesu thugen tang 10 te lak a 1 (1 out of every 10 verses) te pen Jesu’n tangtak a sum toh kisai a genna ahi a, A gentehnate thum lak a khat 1/3 (1 out of every three parables) te sum kemtu (stewardship) muanhuai leh muanhuailou gentehna thu ahi hi.

Bible ah 500 sang a tamzaw zek thumna toh kisai akigen a, 500 val zek mah ginna toh kisai akigen a, ahihhang in sum leh neihsa toh kisai 2,000 sanga tawmzaw kigen hiin chiin asuite’n gen uh. Sum toh kisai /Thilpiak a nasepa Pathian pomtak Biakpiakna Laisiangthou gen leh a pete lungput dingdan anuai ah thu (point) tamlou in gen ni:

I. LAISIANGTHOU GENDAN
1. Biakpiakna toh kisai a lungsim putdan dik (Right motive of giving)
•Na khempeuh Pathian’ a ahi.
•Nang leh kei Pathian’ ate keem (stewards) dingte i hi uhi.
•Pathian in hoihtak leh lemthei tak a sum-le-pai a, A lalgam nasepna ding leh masawn nadia a geel (plan) zaw sawm-a-khat ahi (Malaki 3:6-10).
•Bible in thilpiak a gen dantak pen Biakna (giving is worship) chih ahi. Huai ziak in mun dang leh gam dang a ka kikhop khakna teng ah thohlawm donna pen biakna programme sung ah a koih ua, thohlawm don dek chiang in Pastor in, “thilpiak in Pathian i be phot ding uh” a chih khit chiang in thilpiak lakhawmte a hong kipan uhi. A thohlawm lakhawmte leng saptuam member khat peuh hilou in Upa Elder/Deacon te ahi zawmah uhi. Eigam ah bel thohlawm bawm neuchik san tiuhteuh Biakin sangkil ah tuanvaite’n ana dinpih tiuhteuh pawl bang leng muh in a om hi.
•Bible in thilpiak pe dia a hon lamet dantak zaw thumanna ahi.

2. Lungput diklou a thilpiak dan (Wrong motive of giving)
•Thilpiak ziak a Pathian deihsakna lei sawm (Buying favor of God)
•Midangte lungsim la (impress) nuam a piakna
•Saptuam sen-le-pante (bills) awlmohna a piakna
•It pipi leh thasial (grudging) kawm a, piaklouh theihlouh bang a ngai a piakna

II. LAISIANGTHOU IN PIAK DING LUNGPUT CHI NIH A GENTE
1. Hing biakpiakna (Rome 12:1)/ Pathian thumang a piakna (Obedience to God)
•Ut thut a piak hilou ding, ‘vualzawlna muh bang a akoih khol chiat’ a piakna (1 Kor. 16:2).
•‘Ka hihtheih hun deuh chian ka pe ding’ chih hilou a, ‘amau mahmah Toupa kiang a kipe masa phot a’ piak ding (2 Kor.8:5b).
•Tuh bangbang at ding chih thei a piak ding ‘pia un huchi in piak in na om ding uh’ (Luke 6:38, 2 Kor.5:17, 9:6-11) (reciprocal return).
2. Chi tuh bang bang at (reciprocal return) pen Toupa dan ahi
•TOUPA’ vualzawlna na muh bang in MIDANGTE vualzawl in ‘Tampi piak-a om mi peuhmah kiang ah tampi phut in a om ding; tampi kepsak kiang ah a tamsem a phut ding uh’ (Luka 12:48). “Piak khiatna in thupha hi”.
•Pathian in Bible a a gente muang in Ama thuchiam muang in a chih bang in pia in, ‘Min a tuh peuhmah huai mah a at nawn ngei ding hi’ (Galatia 6:7). Sum na tuh leh sum na at ding a, Itna na tuh leh itna na at ding hi. Huatna na tuh leh huatna na at ding hi. Thilphalna na tuh leh thil phalte apan na at ding hi.
•Sawm-a-khat zaw thupiak leh vualzawlna kithuah ahi (Malaki 3:10).

III. MAKEDONIA THILPIAK: Hehpihna piak (Neihman hilou phal man) 2 Kor.8:1.
•t2 ‘Haksatna thupi apan kipahna dimlet’ a pia uh
•t2 ‘Nakpitak a zawnna ua pan in, nakpitak a thawnpiak hauhna” toh pia uh
•t3 ‘A neih bang uh hilou in a neih sang ua thupi (tam) in’ thoh/pia uh
•t5 Mite ‘Lamet louh bang in Toupa kianga kipe masa in’ pia uh
•9:7 ‘A lungtang ua a tup bang zel un’ pia uh. Thilpiak zaw, utloupi leh phutluih bang a pelou in itna, kipak leh lungnel tak a piak ding ahi.
Sawm-a-khat leh Thilpiak a etteh huaite:
1. Sihzang Tedim gam a sanggamte’n sawm-a-khat pen diktak a a piak ziak un vual zawlna anak muh luat ziak un, hiai thuguk pen “I tanaute lou leng hilh ngam ding ahi kei” chi hial uhi. Amaute’n a insung gou bang in sawm-a-khat nei ua, khalam leh salam ah muhtheih in vualzawlna tang uhi!
2. Youngnak Saptuam (South Korea):
•North Korea akipat a galtai (refugees) nek ding neilou (penniless) 27 te’n 1947 in pan ua, kum 30 nung in leitung a Presbyterian Saptuam lian pen a gen in om uh.
•A kipat dan uh: Sum omlou/ Budget omlou pi in Biakin lam ding in thupuk uh. Nupi khat in, “Sum ka neikei hia’h ka kitenna zungbuh” chiin pia. Adang khat in, “Sum ka neikei, hia’h ka ankuan, midang a ka khel ding” chi in biakin lamna ding in pia nawn hi. Adang khat in, “Sum ka neikei, ahihhang in zanpuan (Blanket) [khat a neih] Biakin lamna ding in ka pia ding, ka invengpa a hong khanloh chiang in amah a, ka zang mai ding” a chi hi.

Toupa Pathian it a, thilpiak a hausa ding in hon vualzawl chiatta hen aw. Amen!