(Mark 15:40; Johan 19:17-30)

Thupatna:
Tukum Good Friday hun a Message gelh ding a heutute’n deih sakna hon piakna tung ah kipah thu ka gen masa hi. Jesu Khrist Khros thil lamdang hih theihna leh Khros phung a omten damna mu ahihdan sau lou i gelh ding. Good Friday i chih sek bangchidan a hong kipan hiam chih sau lou i gen masa ding hi.

I. Good Friday tangthu: Jesu Khrist in zan khovak zen in Tangtung ah thumna nei a, azing a paikhe suk a mipite lak a pan nungzui ding a tel leh Juda Iskariot, zuau san a khawng ding pa telkha hi. Hiai Juda Iskariot in Jesu Nungzui ahihna ngaineu in Toupa, Dangka sum itna ziak in, taisan in zuakkhia hi. Huchi in Siampute leh Laigelh mite’n Rome Sepaihte zang in man ua Gam ukpipa Pontius Pilate mai ah thu khensak ding in pi uhi. Pontius Pilate in etchetna nei in Jesu khelhna ding bangmah mulou hi, himahleh mihing mai etna ziak in Khros a kilhden ding in pekhia hi. Huchin sepaihte leh mipite’n Jesu chiamnuih bawlna leh muhsitna kampau toh thuah in konglai ah kai in, Linglukhu khuksak in om a, migilou mi nihte kikal ah Khros a kilhden in om hi. Huchin Jesu’n a Kha a khahtak in leitung pumpi khua mial in tuam in zinpi ling in, Jerusalem Temple puanzak kek paisuak hi. Hiai ni tuh Sintawpni (Friday) ahi. Huai ziak in Good Friday chih in i chiamteh uhi. Ahi tak a gen ding hileh tuh Black Friday chih awmtak ahi. Himahleh Jesu, khelhna neite khempeuh tatna piakna ni ahihman in good Friday i chih leng khiallou i hi.

Augustus William Hare in hichin na gen hi: - Cross kichi singkeu nih kikokalh a kilh khawm ahi; huai ah panpihtu bei, nialna om hetlou in Toupa kilhden in om hi; vuallel a bat lai in khovel sang in thupi zaw a, khovel tung ah vualzou a, zou tou zel lai ding hi” a chi hi.

John Stott in, “We live and die; Christ died and lived!” a chi hi. Thohnawnna makaih ding a Khros a hong si hi. Jesu sihna toh kisai Rome kumpi sepaihte thah hilou in, Khovel khelhna tatna ding a amah leh amah hong kipia – Rome sepaihte tungtawn a sepsuah aom ahi. A sih ding in hichin gen hi, genkholh a om bang in na tengteng – “Zoh ahita, chi’n a lu kunsuk in A kha a khahta” John 19:30.
II. Jesu Khros phung a omte dam uhi: “Khros phung ah Khros phung ah” chi a La i sak uh, huai Jesu Khros a sihna mah lunggulh leh deih taktak mah i hi na hia? I lungtang in lunggulh taktak mah hia chih i kidotna ahi. Khros phung tan va zui a Jesu sihna va theihpih mi lite hinkhua kikhekna leh mohpuakna a lakte uh i en ding.

1) Khros phung – Hinkhua khekna mun ahi: (Mary Magdalene)
Luke 8:2 ah hon hilh bang in Mary Magdalene tuh Jesu’n a sung a Dawi sagih a delh khiak sak nu ahi. Hun sawt tak Satan sal a tang nu ahi. Satan in a hinkhua subuai in, taksa tung leh kha lam ah nasa tak in subuai hi. Hiai mi nun khovel khosakna ah lamet ding om lou hi.

Jesu hong pai in hiai dawite hong delhkhiatsak hi. Jesu’n a koltanna akipan in suahtakna pia hi. Mary Magdalene hiai hun akipan in suakta a, hinkhua zalen mu in hinkhua kikhek suakta hi. Jesu toh kituahna in a hinkhua pumkhek a mihampha nu suak hi. Mi Khrist a om leh a utna mun hong kikhek a Jesu toh kinai gige nuamsa in, haksat hun tawp in leng a kiang ah va om pih ngap uhi. Khros phung ah a Toupa sihna tan zui ngap hi. (Cf. Acts 26:18).

2) Khros phung – Hinkhua Bawldikna mun ahi: (Salome)
Commentators khenkhat in Salome tuh Jesu nu sanggamnu, Zebedee zi ban ah Jakob leh Johan nu leng ahi chi uhi (Matt. 20:20-23). Aman a tate Jakob leh Johan te ading in Jesu kiang ah angsung theih huaitak in ngetna va bawl hi. A tate khual mahmah leh deihsak mahmah tuh ahi chih kilang hi. Atate ading in a hoihpen deihsak a himahleh Jesun “na thilnget theilou na hi a chihsan” (Matt. 20:20-24). “Ka nou dawn ding na dawn thei ding ua hia?” chihsan hi. Thil nget bang hihiam chih theichian loupi khawng a ngetna bawl khak ding lau huai lua – i tulai khovel ah pilvang kisam hi.

Hilhtheih, taihilh theih mite pen a kibawlpha ut mite hi uhi. Salome pen Jesu’n thuhilh a, non thilnget pen kei piak ding himawklou hi a chi. Lungsim a dangtakna, pilna lunggulh tatak lehang mi thuhilh leng poi i sa kei ding hi. Angsung khualna leh mahni kia kikhualna in midangte toh kigamlatna tun a hoihlou hi. Huai ziak in Jesu’n Salome angsung khual lawtentun lou ding in bawldikna pia hi. Angma sialna pai khia ni uh. Angma sialna in siatna tun hi.

3) Khros phung - kipumpiak hinkhua muhna mun ahi: (Mary, Jesu nu, Committed life).
Mary pen Jesu adia a nu ahi a, nolkhin theih hilou a, huchi’n Khros tung a omlai in “Numei, en in, na tapa chi a, a nungzui itpa hilh a, a nungzuipa kiang ah leng, “en in, na nu” a chi, mohpuakna piakkhiatna thupitak om a, huai akipan in nungzuipan a inn ah a nu pi hi chih ahi. Hiai in hon muh sak tuh Jesu nungzui kichi na pi a Inkuan limsak lou a, tenna ding mun a leng teng kha lou om theih hita chih hon musak hi. Mary leng a tapa toh om kha lou mawk hi. A tapa John in leng a nu limsak lou a Jesu nungzuitu muanhuai mahmah hi maithei hi. Mary leh John kiang a Toupa thu gen in Inkuan kilep dingdan diktak leh kizop dingdan diktak mah poimoh ngaih ahihdan kilang mahmah hi. Piangthak diktak ka hi chi napi a Insung mite leh i Christian hihpihte nasan it a kem thei lou i hih leh Jesu awlmohte kihilai lai ding a, Na inkuan sung vel pha in hon chilai lai hi. Haksatna nei a Khros phung a na dinpeuh mah leh na lampi hon khek ding ahi. Midang Pathian mite itna, kikholh nopna hon pia ding hi. Khros phung a om na in kuamah sangzaw, niamzaw chih omlou in kibang vek hi.
Jesu’n a neih teng pekhia- a pumpi Joseph Arimathea kiang ah pekhia, a neih sunsun A nu a sanggampa Johan kiang ah pekhia hi. Nang Jesu Khrist mikhialte tan dia a kipiak khiakna ni na zat toh kiton in amah ading in bang na pe dia?

4) Khros phung– Mohpuak-na lakna mun: (Johan, Nungzui a it chih a ompa)
Johan’ adin Khros phung a om a mohpuakna kipatna mun leh lakna mun ahi. Kibawl thakna mun, kihanthawn thakna mun leng a chih theih hi. Jesu Khrist nungzui dia na kisakna ah koimun ah mohpuakna na la masa a? Pathian pomtak biak piakna lan ding in koi mun ah na kipan khia a? Pathian Saptuamte kemtu ding a na kipat in koi mun ah moh puakna na mu a, lawm? Jesu Khros phung akipan na lak ahih kei aleh huai ah kipan thak ni.

Thukhitna:
“Khros phung tuh”-
1) Hinkhua khekna mun – Jesu na Toupa a na pom nai kei leh hiai mun kipatthakna mun ding a poimoh pen ahi
2) Hinkhua bawl dikna mun – I kiletsak leh kisaktheihna teng koih khia a, hiai Jesu khros bul a om a a thuakna koppih ding ahi
3) Kipumpiak hinkhua muhna mun ahi – Jesun i thuakna, i ginomna leh i haksatna a thei a huai te a hon din in hon vualzawl ngeingei ding hi. Jesun amah taksa pumpi mahmah leng mi dangte kiang ah pekhia ngam a, a nu it mahmah a sanggampa Johan khut ah pekhia hi. Amah kipumpiak bang in Jesu ading in bang na pe ta a?
4) Mohpuakna lakna mun –
Khros phung zuan a pai mi ten, Khros a kilhden a ompa thupiakte nialthei vual ahinawn kei. Amah itte it pih a, a hon thupiak bang sem khe ding a mohpuakna lakna mun ahi. Amah sik leh tang a khovel a theihpihtu nasem ding a mohpuakna hon piakte kitheih moh bawl theih vual ahi nawn kei hi. Mohpuakna la in i lungsim leh taksa pumpi ban in i neih leh lamte toh kipia in Pathian pomtak Biakna i lan ding uhi.