MOSI, ISRAELTE’ HONKHEPA LEH TAKSAP PEPA
JESU, JENTELTE’ HONDAMPA LEH TAKSAP PEPA Thupatna:
Hotkhiakna vanzat poimoh masapen Mosi ahi, huai ding in Pathian in kisakhol sak hi. Aigupta Kumpi Pharo in Israel tate sal in man a, a tate uh pasal naupangte thahsak in nasatak in gelgawt hi (Eks. 1:11, 13-16). Pathian in a mite kahna leh mauna husa za in Aiguptate khut nuai akipan honkhe ding in a hong paisuk hi (Eks. 3:7-8). Huchi in Mosi tuh Israel tate saltanna akipan honkhepa ding in a sep hi.

1. Hotkhiakna dia kisak-kholhna:
Mosi pian hun lai in pasal naupang ahihman in huai hun lai a kumpi vaihawmna dan bang a thah ding ahi a, lau in kha thum sung a nu’n sel hi. A selguk theih nawn louh tak in phaiphek bawm bawl in Nile luipang ah a sel nawn hi. Pharo tanu in vamukha a melhoihtak ahih ziak in a la a amah tapa hiding in a kemta hi. Pharo insung ah Mosi hong khanglian a Aigupta pilna tengteng sinsak in om hi. Himahleh kum 40 mi ahih in ni khat a chipihte veh ding in a pawtkhia hi. Mi khat Aigupta mi toh kisuallai a va mu a, va phelh in Aigupta mi a that kha zezen hi (Eks. 2:12). A chipih mite’n Pathian in honkhia ahihdan thei ding un a gingta a himahleh a thei kei uhi. Hun bangtan hiam nung in Midian gam ah a taimang a a vatam nilouh a, zi leh tapa nih va nei hi. Kum 40 dang khit in gamdai Sinai tang ah, meikuang in Mosi kiang ah Pathian kilak a, Aigupta gam a Israel tate gimthuakna akipan honkhe ding in thupiak a bawl hi. A saltanna mun uh Aigupta akipan a pikhe ding, gamchiam Kanan a lutpih ding in Mosi a sep hi. Mosi hinkhua in a totkhak lampite ah Pathian hotkhiakna lamdang leh Tuipi san kanna thute muh in om hi.

2. Paikanna:
Pathian mite saltanna mun Aigupta apan pikhiak ahihna ding un, Pharo lungtang a khauh mahmah ziak in gawtna chi sawm piak in om uhi. Pathian in Mosi tungtawn in huai gawtna chi sawm in Aiguptate gawt hi. Gawtna chi kuana tan inleng a lungtang uh khauh mahmah lai ahihman in Pathian gawtna nanung pen tapa piang masapen thahna ah hotkhiakna nna sem thei pan hi. Pathian thupiak, “Aigupta gam ah piang masa tengteng a si ding uh” (Eks. 11:5), himahleh Israel tate ading in bel Pathian hotkhiakna ahi. Pathian thupiak bang in, belamnou gensiat bei a that ding ua huai sisan kongbiang ah a tat ding uh. Huchi in zankim lai in Pathian a hong pai ding a sisan kitatlouhna in a lut in piang masa naupang a that zel ding hi. Huchi ahihziak in, Jehovah Pathian in Aigupta gam a piang masa naupangte zankim lai in a that vek a Israel tate bel a kongbiang ua sisan kitat a om ziak in a paikan zel hi. Huai nitak in Israel tate tengteng in kawnggaksa, khedap bunsa a pawtkhe mai ding a mansa in om uhi (Eks. 12:11). Sisan kitatna kongbiang neite insung ah mi bangchibang teng a gilou leh khial om mahleh hotdam in a om zel uhi.

1 Korinth bung 5 ah Paul in, paikan kichi sisan kia hilou in Jesu Khrist mahmah leng ahi chi hi. Tuni’n eite Jesu Khrist sisan a chiamtehna tang in Khrist sung ah i om hi (1Kor. 1:30). Khrist sung a i om ziak in eite hon tuamtu leh hon vengbittu Khrist ahi. Eksodas bung 12 ah, paikan suahtakna pen gan sisan ziak ahi a, tuni in i paikan suahtakna uh Jesu Khrist sisan ziak ahi. Israel tate thiltuahte tangthu phuahtawm ahikei a Pathian hehpihna nasep ahi. Tulai Khristiante ading in etsakna hoihtak leng ahi.

3. Aigupta apan suahtak taktakna:
Pathian hotdamna bukim in a huamkhak paikanna leh tuipi san kanna tungtawn in Israel tate Pathian vaihawmna akipan hotdam in om uhi. Amau Aigupta a tenlai un Aigupta pathiante bia in khelhna tampi a hih uhi (Ezek. 20:7-8). Aigupta mite toh akibang in Pathian diktatna vaihawmna thuakkhawm ua, Pathian diktatna ziak in sihna in atung uah vaihawm hi. Huai ziak in, Israel tate’n paikanna tungtawn a hotkhiakna poimoh uhi. Paikan belamnou pen a suahtakna ding ua chiamtehna a hi a, Pathian dikna a vaihawmna a maituah louhna ding un ahih ding uhi. Pathian vaihawmna kia hilou in muhtheih in Pharo vaihawmna nuai a khawsa leng ahi uhi. Paikan belamnou ziak a suahtakna kia a hun kei a, Aigupta gam nusia a paikhiak san vengveng a poimoh a huai ah suahtakna taktak om thei pan hi.

4. Pathian in taksapte pia:
Israel tate’n paikanna leh tuipi san kanna tungtawn in Aigupta pawtsan in gamdai ah lut uhi. Gamdai a a pai zelna uah Marah mun a tuntak un tuikha a dawn thei kei ua a min Marah a sa uhi (Eks. 15:23-25). Elim ah tuikhuk sawmlenih omna leh tumsing sawmsagih omna a tuntak un huai a tuite kiang ah a giak uhi (Eks. 15:27). Van apan nek ding manna piak in om uh a (Eks. 16:14-15, 31-32), suangpi a kipan in dawn ding tui piak in om uhi (Eks. 17:6). Pathian in Israel tate Sinai tangtung tan ah pitou hi. Hiai thil thawnpiak tengteng in a etsak ahihleh eite adia i taksap tengteng a hon piakna Khrist ah bukim in om hi. Pathian in a mite taksap a piakte lak ah chi nih en ni.

5. Van apan manna:
Eksodas bung 16 ah, Pathian in a mite hinna ann ding in manna pia hi. Kum sawmli sung vengveng gamdai a avak sung un manna ne in kivak uhi. Pathian in manna a piak chiang in a mite’n a pepa kua ahia chih phawk mahmah leuh chih a deih hi. A hihna uh leh a kisinsaknate khen sak zel a ut hi. Amalam in Aiguptate ahi ua, Aigupta lungsim apu uh, tun bel Toupa toh gamdai ah omkhawmta muntuam hita chih phawk ding in a deih hi. Bangteng hileh kikhekna bukim taktak neithei lou in, nuamsak hun om zel phun hun omzel in khawsa uh a, kipah hun sang in phunchiak hun hau zaw uhi. Pathian deihdan in bel lungkim tak in kipahdan thei uhenla van mite suak hial leuh deih hi, himahleh amaute’n van lam ngaih sang mah in Aigupta sabel ngai in chiak vengvung zel uhi.

6. Suangpi apan tuihing:
Van manna piak ahih ban ah gamkeu tui omlouhna mun a tun chiang un Pathian in thillamdang hihsak a suangpi akipan in tuihing dawn ding a limchi mahmah pia hi (Eks. 17:1-2). Pathian in Mosi kiang ah suangpi sat in chih thupiak a bawl hi (Eks. 17:6). Hiai khawngte’n a hon muhsak ahihleh eite’n khalam ann Khrist i nek khit chiang in Amah Khrist suangpi akipan a hong pawtkhia hinna tui i dawn ngai ahihdan hon musak hi. Huai ban ah, suangpi a kipan a tuihing hong pawtkhia in Khasiangthou leng a ensak hi. Jesu’n mi kuapeuh a dangtak leh ka kiang ah hong pai henla dawn hen a chi hi (Jn. 7:37-39). Huai ziak in, Mosi’ suangpi sat a tui hong kikhoh khia akipan in Khrist suangpi akipan hinna tui hong kikhoh khia tangte i hi chih hon theisak hi. Huchipi inleng Israel tate a phun ua Aigupta a ngai lailai uhi, eite leng i phun kha ding uh chih a lauhuai mahmah hi.

Thukhitna:
Thukhun lui hun in Pathian namtel Israelte’n Aigupta gam ah Pharo vaihawmna nuai ah saltang in Aiguptate lungsim bangbang pu in khawsa uhi. Saltanna a kipan a suahtakna ding un Pathian in Mosi zang in pikhia hi. Huchimah bang in, tu thukhun thak hun ah leng Setan vaihawmna nuai ah saltang in i omvek ua, setan lungsim bang pu in adeihlamte i koppih uhi. Huai saltanna akipan Jesu Khrist in hon suakta sakta a, i suakta uhi. Israelte’n Aigupta pawtsan a gamdai a hun a zatlai ua Kanan gamchiam bawngnawi leh khuaizu luannna gam ngaihtuah lou a; Aigupta lam lunggulhkikna a neih lailai uh haihuai mahmah abang hi. Ahihhang in eite’n leng hotdam i hihnung a bangziak a khovel thilte lunggulh a ngai law lailai nak i diam chih hon ngaihtuah sak mahmah hi. Khrist vaihawmna leh kipahman a hawm hun dingte kia ngaihtuah a, nunglam en Khristian hilou a mailam en a pai Khristian hidingte i hi zaw uhi.