Thupatna: Saptuam leh Mission (Church & Missions) i chih kikhen theilou Sakolbakteh (Scissor) toh kibang ahi. Saptuam in a tup ding poimoh pen tuh missions nna ahi a, missionary nasepna in a tup lianpen ding tuh khamangthang mat leh Saptuam phuhkhiak a kep piching ahih ding ahi. Missions chih thumal eipau bang tuk a i theih nalsa khat uh ahi. Atangpi in missions chih akigen chiang in Khamangthang chih thumal a hon ngaihtuah zomsak hi. Christian context ah mikhial mangthangte zonsuahna nasep genna leh Tanchinhoih puanzakna nasep genna ahi deuh hi. Himahleh a poi mahmah khat tuh missions chih akigen chiang in michihten eima mimal mohpuakna bang a lak haksa i sak uh ahi. Missions nasepna a kigen chiang a a kisaipih Department/ committee te piakbawlna bang ahih keileh saptuam a semtute ading deuh a koihna bang a om khanak hi. Missions nasepna nang ma mimal mohpuak a na ngaih theih nai keileh nang leng missions field khat toh kibang hilai ‘na himai thei ahi. Khamangthang matna nasep gingtu/piangthakte tengteng nasep leh mohpuakna ahi i chih lai in, a sepkhiakna lam ah i hihtheihdan a kibang kei ding hi. Huai ziak in tuni a i gennop pen tuh bang lam hiam bek a missions nasepna a kihel Khristian gingtu hih ding chih ahi. Missions nna sepkiakdan chituamtuam tampi a om ding hi. Himahleh hiai a nuai a point thumte te zang in missions nna sepkhiakna lam ah panna i nei khata hiam chih kivelchiat ni hang.

I. Kuankhiakna tungtawn a Mission Nasepna: Mission chih thumal a paubul tak in a gen tuh sawlkhia ahih keileh sawlkhiak a om chihna ahi. Kuahiam khat na poimoh mahmah semkhe ding a mohpuakna piakna genna ahi. FMPB te thupi khat tuh “Kuankhia in ahihlouh tawp in leng na tang ding sawl in” (Go or Send) chih ahi. Khamangthang matna nasepna a poimoh mahmah khat tuh khamangthang omna munte (gammial) a taksa mahmah a kuankhiakna ahi. Hiai ding in pilna siamna leh hihtheihna poimoh mahmah hi. Himahleh hiaite tunglam pek a poimoh zaw om tuh ITNA, VEINA leh PUAKGIK ahi. Nangmah na ki-it bang in na vengte it in chih omzia tuh ei mahmah leng ithuai i hihlam i kiphawk masak a poimoh hi. Khalam mangthang i hihlam kiphawk a, itna ziak a Pathian in a Tapa Jesu Khrist a hon tat ahihlam kiphawk taktakten amah hinna a manphat dan leh ithuai ahihdan kithei ua, tua bang bang in a pianpih midangte (vengte) ittheihna nei uhi; hiai tuh agape itna ahi. Ka muh dan in eite atam zaw ei leh ei leng ithuai i hihlam kiphawklou hihang. Huai ziak mah in i vengte leng ithuai ahihlam phawkkha lou, khamangthangte itna leh veina taktak neilou hihang (2Kor.5:11-15; Juda 22-23).

Laisiangthou in, “Buh lak ding atam a, himahleh a lading atawm hi” ana chi a, huai mah tuh tuni tan inleng a diktou lailai hi. Hun nanung a ding i hihtakna ah hiai nasepna thukin mahmah ahita chih phawk a hoih hi. Nou buklakna ding kha li omlai na chi ua, dak unla loukhawng en un; TU MAHMAH in lak ding in a min hi, chih ahihman in Jesu’n Pa’n kei hon sawl bang in ken leng noute ka hon sawl hi a chi hi. Isai bang a hiai ah ka om Toupa KEI hon sawl in chithei kuakua i om ua? Kuan in – “nang” a hon chihna ahi. John Paton in sihnung a asa thante neksiat a om sang in Tanchinhoih ziak a mi sasialnete nek a om utzaw ahihdan na gen in New Hebrides Islands ah missionary ding in ana kuankhia hi.

II. Thilpiak Tungtawn a Mission Nasepna: Missionary nasepna a poimoh mahmah khat tuh a sawlkhetu (Sending church/supporting organisation) ahi. Hiai ding in saptuam milipte leh missions agency i chihte ah kinga lian mahmah hi. Self supporting/ tent making ministry chih om thei mahleh a enkoltu omlou in haksatna lianpi om thei hi. Mission nasepna i chih ni khat hiam kha khat hiam leh kum khat khawnglel nasepna hilou a, khovel a saptuam a omsung teng ading a na poimohpen ahihman in kibulphuhna hoihtak aneih ding poimoh petmah hi. Ahunhun a Missionaryten (a kuankhiaten) nek ding leh silh leh teen ding a neih theihna ding uh leh damlouh hitaan tuah hun a ki-etkolna ding in sum-le-pai poimoh gige uhi. Huai kia hilou zi leh tate nei a, siamsinna toh kisai a loutheilou a om ding ban ah khamangthang matna ding in plan/project leh adangdang guan kul ahihman in sum-le-pai taksaplouhna ding in thilpiak petute/a chawmtuten a panpih uh poimoh mahmah hi. Paul in thilpiak toh kisai in Thessalonika saptuamte thilhih a phathuaidan thu a gen hi. Missionary na a sepna a taksap a neih thu ana gen a, huai a taksapte Philippi Saptuamten a huksakna tung uah a kipahna thu ana gen hi (Phil. 4:10-10). Tuabang thilpiak toh kisai in a tam leh a tawm thu ah hilou in, a petu lungsim/lungtang a kiphalna in thil hihthei mahmah ahi chih i theih ding ahi. I saptuam sung ah mi tampiten kiphalna taktak toh Missionaryte vak in pan nasatak in i la ua a kipahhuai mahmah hi. Huchih lai in thilpiak piakna chang thei nailou milip leng hunkhoppi mah om ding hihang. Tuate’n leng hiai nasepna gingtute ading a alou theilou mohpuakna i liangkou a hong kinga ahihman in phattuam ngaih suah a pan i lak thak uh poimoh mahmah hi. Na tuailai in sem in tumbang na vuai ding, na neihlai pia in beina hun hongtung ding, gal leh sa haksa in buaina’n hong lap ding, septheih lai sem in khua hong mial ding hi. Na neih a na kichin deuh chiang a piak ding na sawm leh neih hun leh kichin hun na nei ngeikei ding a, himahleh kiphal tak in na neih bangbang pe lechin tua in hong kipaksak zaw tham ding ahi. Bangkhat laksang in piak in lukhawng a nei zaw chih ahi. Pathian gam ading a i thilpiakte Pathian mai a gim namtui a zamtou ahi (Phil. 4:18). Piakkhiakna laklak a kisikna omlou pen tuh Pathian gam ading a piakkhiakna ahi. Pathian ading a thilpiak peuhmah a thawn a omlou ahi (Luka 6:38; Mal. 3:10). I neih leh i lamte tungtawn a a na semthei ding a hamphatna leh hun hoih a hon piak lai in nakpitak a sem ding in hanchiam thak chiat ni hang.

III. Thumna Tungtawn a Mission Nasepna: Missions nasepna kia hilou in Khristian hinkhua a poimoh mahmah khat tuh THUMNA ahi. Huai ziak in thumna tuh nakna ahi chih in om hial hi. Salam a i hin theihna ding a i nak (breath) a poimoh bang in Khalam a i hin theihna ding in i Thum (pray) uh poimoh hi. Abik tak in Missions nasepna ah Thumna i chih poimoh mahmah a loutheilou khat ahi. Pathian i houpih theihna omsun tuh hiai thumna ahi. Gingtute ading in galvan hoihpen leng ahi a, thumna tungtawn a galdouna tuh melma tung a vualzohna ahi. England kumpinu’n sepaih sangkhat sang in Pathian mizat John Knox thumna ka lauzaw a chi hial hi. Paul leh Silas-te suangkul tang a om lai un misiangthoute thumna ziak in lamdang tak a suahtak sak in a om uhi.
Tomchik ngaihtuah in Missions nasepna adia thumna kichi innmun a septheih, sumsen ngailou ahihman in baihlampi ding a bang hi. Himahleh veina leh awlmohna taktak omlou a thum kichi thil baihlam hilou hi. Huai ziak in, thumna tung tawn a missions nasepna tuh a mangkhate itna leh veina neimite ading a septheih nna poimoh mahmah ahi. Saptuam pumpi’n thumna hun i neihzel ban ah, nangmah mimal a hunlem kibawl in leng na thum thei a, mi bangzah hiam kipawl in leng a thum theih hi.

Thukhitna: Saptuam napi Mission ahi i chihlai a, atung a kigente a pankhakna nei nailou i hihleh kingaihtuah mahmah ngai ding hi. Toupan thil khat bek hihding a hon deih a hon lam-en ahi. En semkei le hang le Toupa nasepna khawllou ding hi. Himahleh hiai nasepna a eiten Khrist vang a hamphatna tangkha lel hizaw hihang. Kuankhiakna, piakkhiakna leh thumna, khat bek a pan lathak ding in Toupa’n hon vualzawl hen.