THUMASA: Khalui (February) in ‘Kha leh Thutak-a Pathian Pomtak Biak Piakna’ chih thu KTZ Editorial Boardt-e leh Pathian deihsakna tang in ka hon gelhta a, tukha inleng amaute deihsakna toh ‘Thumna Hinkhua a Pathian Pomtak Biak Piakna’ chih thupi gelh ding a hamphatna piak a ka om nawn ziak in ka kipak mahmah hi. I thupi uh, muhkhak leh simkhak lel inleng khenkhatte adi’n huphurhhuai leh ngaphuai hetlou hiding in a gintakhuai hi. Bangteng hileh, ei gingtute (heutute leh mipite hitaleh) ading a hinkhua a kihelkha ngeingei ding a deih leh lamet-a, sinsak a omte i hi uhi. Jesu’n, “Kuapeuh in a hon zuih nopleh a khros kipuak in honzui hen. Huchilou in zaw ka nungzui ahi theikei ding”, ana chita him hi (Matt.16;24). Ei ngaptan leh lemtan dandan lel a a nungzuitu hilou a, amah’ khros puakpih ding, a min ziak a haksatna leng i thuak ding phal ahi. I thupi toh kisai a Bible text hong kipiate leh adangdang pansan in kikum leng i chi ahi.

I. THUMNA (PRAYER) TOH KISAI THEIHTUAK MASATE:
I na gensek bang un, “Thumna tuh eilam apan Pathian i houpihna ahi a, Laisiangthou i sim chiang in Pathian in hon houpihna ahi” chih ahi. Gingtute ading in Thumna tuh Khalama inaakna (breathing) bang a gen ahi. Sa a i hinna ah leng huihsiang i kiphatmohzah mulou/ngahlou in omleng i naakna buai ding a, kisi maimah dingdan ahi. Gingtu khat hingal a thumna ngaihsaklou leh neilou tuh bangchituk in kigenhat thu in kisiamtan mahleh Khalam a hinglou leh lohsam mi khat ahi. Huai ziak in, ei gingtute ading in thumna hinkhua i neih ngeingei ding a poimoh ahi.

II. THUMNA LEH BIAK PIAKNA KIZOPNA DAN:
Tuchiang in tualsung Saptuam khenkhat ah ‘Praise and Worship Team’ ten biakkhawmna bulpatna dan in Phatna la sakkhawmna hon pi ua, huchia a hon pi sungteng uh Biakna leh Phatna i chi uhi. Akhen chiang in mipi thumkhawmna hon neihpih ua, akhen chia’h khut liiktou ni, chih khawng a a hon gen chiang bang un khenkhatten haksa i sa mahmah ua, a phun supsup bang i om thei uhi. Ahitak a gen in Biak piakna i chih hiaitan chauh hilou a, a min thupina ding a i hih khempeuh ahi. Tuate lak ah THUMNA a kihellou theilou khat ahi. Thumna bang leng i theihdan tangpi in a ngetna lam kia in i thei uh a bang hi. Thumna in a tunkhak tuh-
1. Pahtawina piakna (Prayer of Adoration): Pathian thupina leh a thilhihtheihna thei a pahtawina/phatna/thupina ipiakna ahi.
2. Thuphatawina/Khelhna puankhiakna (Prayer of Confession): Huchi bang a Pathian thupina leh a thilhihtheihna i muh leh theihna toh kizui in a mai a kiseelthei vual i hihlouhdan i kimuchian a i hihkhelhte thuphatawina leh ngaihdam ngetna in a zui teitei hi (Isai 6:1-5)
3. Kipiakkhiakna leh nget-na (Prayer of Supplication): Huchi a Khelhna thuphatawina tan ah a khawl kei a, Amah (Pathian) deihna bang a hing ding a kipiakkhiakna in a zui hi (Isai 6:6-9).
4. Kipahthugenna (Pray-er of Thanksgiving): I Laisiangthou a Phatnalate (Psalms) pumpi khawng Pathian tung a/kiang a kipahthugenna ahipen mai hi.
5. Midangte adia ngetsakna (Prayer of Intercession): Huai ban ah, eikia a Pathian hoihna leh hehpihna tanglou a midangte adia leng deihsakna toh midangte adia leng ngetsakna ahong gahsuah ding ahi. Huai mah tuh i Toupa Jesu thumna ahi (Johan bung 17na pumpi en in). Hiai tuh Biakin ah leh mimalmal omna tek ah ahih/aneih theih hi. A poimoh masapen tuh ei mimal lungtang ahi. Mihing mitmuh a kilawm/hoih chih thu lel hilou, lungtang a veina leh chihtakna ahi apoimoh. Huchibang a ahonpi adia biakin hiam leh koimun hiam a programme hong kibawlte seselou ah leng mimal in eimah adia hun kibawl inleng thumna hun i nei thei hi. Huai ahi i poimoh uh.

III. THUMNA HINKHUA:
‘Atangpi in ‘thumna hinkhua’ i chih chiang in hunseh tumta chiantak zuia ginomtak leh chihtakna toh thumna, huai tuh a mihonpi leh mimal neihte ahi tuaktuak hi. Thukhun lui hun sunga mimal a thumna hunseh chiantak nei a thumna nei i muhte lak a khat tuh Daniel ahi a, nikhat a thum (3) vei khukdin a thum zel ahi. Daniel in tua thuseh a kisuah chih a theih tak in, inn a pai in, a inndan tungnung ah a kaltou a, Jerusalem lam nga tohlette a hong hi. Nidang a ahih ngeina bang in, ni khat in thumvei khukdin in a thum a, Pathian kiang ah kipahthu a gen hi (Dan.6:10). I Toupa Jesu hilhial leng 100% a Pathian, 100% mah a Mihing hongsuak ahihman in A Pa kiang ah thumthum mai a, “Pa aw, Pa aw,” mah chi ngutngut hi. Zing baihtak (dawn), sun laitak, leh zankhang (mid-night) chih hunte ah thum deuh a, mipi lak a a om inleng athum hun ding atun nakleh kihemkhe hiau in va thum hi, chih Tanchin Hoih laibu lite (4) ah a muh theih hi. Huai ziak in, ‘thumna hinkhua’ i chih tuh hiai hunseh kichian i neih/i bawlte thei gige a, muanhuaitak a zuih ahi. Tuamah Sawltak Paul in Thessalonika Saptuamte kiang a, “Tawplou in thum gige unla, thil bangkim ah, Pathian tung ah kipahthu gen un. Hiai noute ading a, Khrist-a Pathian’ deihlam ahi”, ana chih ahi (1Thess. 5:17-18). Hichibang a thumna hinkhua neih pen Pathian in i hih/omdan ding a adeihlam ahi, chih ahi. Pathian deihlam ahi, chih i theih nung a i zuih/ i pichinsak utkei a, eimah utdan chianglel mah i chihchih lebel, Pathian zahtaklou, a deihlam deihpihlou, a thu mantak salou, chihna ahi a, i biak piakna leng Amah adi’n pomtak ahikei ding hi.

IV. I THUMNA DAWN A AOMNA DING IN:
Huchi a Thumna hinkhua i neih/i zuih a i thum hiam, eimah lemtan dandan a i thum ahih inleng i thumna Pathian dawntaak/zaktheih thumna bangchi bang hi a? dawntaak louh/zaktheih louh thumna bangchi bang hi hiam? chih, i Laisiangthou in chiantak in a hon hilh hi.
1. Tupna dik poimoh: Thum thum napi a, i tupna/tupdan adik keileh Pathian in hon dawnglou/pelou ding ana hidan ahi. “Na ngen ua, na nget diklouh ziak un na mu kei uh; noumau nopsakna dia zat tupna lungsim diklou toh na nget ziak un” (Jak.4:3). Kumpipa Solomon in Ama’ mimal hoihna ding leh nopsakna ding ngenlou a, a mipite hoihtak leh kizen tak a a vaihawmsak theihna ding in Pathian kiang ah pilna (wisdom) a ngen hi. Huai in Pathian a kipaksak a, a nget a piak ban ah a ngetlouh hauhsakna leng a pia, chih ahi (1 Kump. 3:7-14). Hiai Kumpi Solomon bang in, tulaia i nam leh Civil Society tuamtuam a i heututen leng Pathian kiang ah thumna neisam himaizen le uh zaw, Pathian in pesam ding a gintakhuai lua hi a! Huchileh, tulai khawng a hichi buai neknuklou ding zaw kihi maithei hi a!
2. Kiliansaktak/Kidiksak tak a thumna za nuamlou: Tuaban ah, Pharisai leh Siahkhontu thumna tungtang a Jesu’ gentehna (Luke 18:9-14) thu apan in lungsim a kisaktheihna leh kampau mahmah a leng kisiamtanna thu gengen kawm a thumna Pathian in ngaikhelou/zadah leh, lungsim siangthoutak-a kingaihniamna toh thumna Pathian in ngaikhia/zanuam ahihdan i muthei uhi. Unaute, na thum chiang un bangchi in na thum sek ua le? Eimah hamphatna dinglel leh hoihsak bangbang hon hihsak/pia ding in hia na thum zel? Midang teng bang musit mahmah leh nang kia dik kisa giugeu in hia na thum sek? Ahihkeileh, nang kia siamlouh kitan in kisikna taktak leh, nang kia ading hilou in midangte hoihna ding inleng na thumzel sam hia? Kivel chian ni.
3. Ngaihdam theih louhna lungtang toh thumna za theilou: Huchiin, hihdam a na om theihna ding un, na khelhnate uh thupha kitawi tuah unla, kithumsak tuahzel un (Jak.5:16). Unau kal ah, lawm-le-vual kal ah, sepkhawmpihte toh kal ah, insak-inkhang kal ah leh, inkuan sungmi kal ah hitaleh i kihihkhelh khakna hiam i kilungnop louhnate i kingaihdam tuah ding uh ahi. Ngaihdam theih louhna lungtang toh thum zaw Pathian zaktheih hilou ahi.
4. Khelhna iim leh hih kawm a thumna za theilou: Ngai dih, hon hondam theilou ding a, Tangtawn Toupa’ khut tomlua hilou hi. Za theilou ding a nangong lua hilou hi. Ahihhang a, na tatsiatnate un na Pathian uapan hon khenkhia a, na khelhnate un amai liah a, hon za theilou hi. Ahang bel, na khutte uh sisan a niin a, na khutzungte uh mohna in niin hi. Na mukte un zuau gen a, na leite un gitlouh thu gen hi. Kuama’n dik-a thukhenna ngenlou a, kuama’n diktatna ngenlou hi. Thunamanlou muang uh a, zuauthu gen uhi. Thil gilou suangtuah uh a, khelhna gahkhia uhi (Isai 59:1-4). Khelhna iim/seel kawm a thumna Pathian in ngaikhe lou hi. Ka min a kilou ka mite kingainiam a a thum ua, ka maitang a zon ua, a gamtat giloute uh a kiheisan uleh, vaantung apan in ka na za ding a, a khelhna uh ka ngaidam ding a, a gam uh ka damsak ding (2 Kron. 7:14) Khelhna kiheisan/tawpsan tuanlou a, kidiksak gige leh midang mohpaih gige kawm a thumna, Pathian in zatheilou ahi, chih thei ni uh aw.

THUKHITNA: Thumna hinkhua neih tuh gingtu/khristiante ading a thil poimoh mahmah ahi. Huailou in gingtu haat leh gahsuah i hitheikei uhi. Thumna hinkhua neih i chih niteng a thumna hun atamthei pen neih ban ah, hun seh kichiantak nei a thumna neih, chihna ahi. Nang mimal a huchibang thumna hinkhua ana neilou na hihleh leng, saptuam in thumna hun abawlte beek ah chihtakna leh veina toh nana kihelzel hia, unau? Huchi bang a mimala neilou, saptuam bawl thumna hunte bangleng ngaihsak kha mahmah lou, “a na thum pawl om na ve uh”, chi maimah a, a programme bawltute meuhmeuh bang suanlam gamzon a, ut dandan a om maimah na hih lezaw, na Khristian hinkhua ah khanna leh gah kipahhuai leng na mukei ding. Nang Makai/ gingtu khat, kingaihsun pha mahmah in aw.

*Thumna in Pathian a sulamdang kei a, athumtu a sulamdang zawsek hi. – Thomas Fuller
*Thumna hoihpen tuh, thusamkhiakte sang a lungtang a mauna ahizaw hi. – John Bunyan
*Thum angai nawnkei chitu zaw, a kingaihniam theihna ding in thum hen. – Anonymous
‘Thumna Hinkhua a Pathian Pomtak Biak Piakna’ neithei ding in simtu tengteng Toupa’n hon vualzawl hen.