Thumasa: Lamka mun tuamtuam ah ganhing tung a tatsiatna, October 27, 2018 ni in Chiengkonpang ah hong kigen hi. Vatawt, ak, ui, vok, thahna leh a sa kine bang nutsiatna a om hi. Mipi patau in zan in Police leh khosungmi duty kikhel mahleh tuni tan in gamsa, innsa matkhiak a omkei hi. Mundang ah ui kithat, belam leh vok a sungteng kinesa a taisan chih gen ding a tam hi. Lamka khopi kia hilou in polam ah leng hichi bang ganhing tung a hiamgamna a kigen hi. Tuin Lamka leh a kim ah thom hongdai deuh hi.
I. HIAI TATSIATNA KUA NASEP AHIA? Ganhing tung a hiai bang tatsiatna kuate, bang nasep hi ding hiam chih mi tengteng theih ut leh bildoh ahi. Tuni tan in lungtunhuai dawnna a pethei omlou in ngaihdan ngen kigen lai hi: Anuai a ngaihdan kigente ahi:
(i) Tomi/Keimi Nasep dia gintakna: Ganhing tung a tatsiatna hong kigen a pan in thuzuau leh gintak thugen a hong uang hi. Tomi/Keimi nasep hi ding a genna a hongom a, lauhna in mipi a dim hi. Muanmoh theih ding mah in Thengra Leirak a dawl khat a mi lamdang mu chih thu hong kigen hi. Hiai thu a mun ah kanchetna neih ahihnung in, khawmial zul a mi khat (mibanglou) in dawl khat ah van va lei in dawl neitu in mukhial kha a, ‘Tomi/Keimi’ hi ding chih thuthang kigensawn, thuzuau ahi.
(ii) Ui thilhih dia muanmohna: Hiai ganhing tung a tatsiatna ui nasep hi ding a gintakna hong om hi. Hlangnem khua ah ui lamdang nih kimu chih thu a om ziak in unaupa C. Lian Langel, a sa mahmah a vapai in thudotna a nei hi. Inkuan thum ah dotna dot ahihnung un, dot a omte’n ‘uiliante nih ahi’ a chi ua, himahleh huai khua ah ganvulh bangmah a lohkei uhi. Hiai a kimu, setan leh dawi hilou in uimah ahi chih a mute’n a gendan ahi.
(iii) Khumuzamba ah Ak kithat: Ak bangzah hiam kithat leh kine bang muh in a om hi. Hiai thiltung toh kisai in Vety Doctor bangzah hiam in a mun ah etchetna a nei uhi. Akbuk neuchik a akte a kineh luat ziak amau leh amau kisual, kithat, kine a chi uhi. Ganhing a omna uh a neuluat uhiam, a kial chiang in hiai bang, ‘cannibalism’ hiai mun kia hilou in mun tuamtuam ah om ahi a chi uhi.
(iv) Vok leh gandang site: Mun khenkhat a ganhing site Veterinary department in la a velchetna a neihna uah ganhing ha hiam tak in a keih hi in a mu uhi. Hiai ganhing bang hiam, ui, ngia, sehal, sahang neute leh adang theihchet omlou hi. Gamsa hidia gintakna tuh khekhap ding a nung a muhtheih a a omna ahi.
(v) Guta thum kiman: November 15, 2018 Manipur Express in Thingkangphai Defence Committee pawl in vatawt leh ak, gu mi thum a man uhi. Amaute ganhing tung a tatsete chih ding in a gukte a ngawng uah awk uh ahih chiang in gintak huailou deuh hi.
(vi) Thuthang tuamtuam: Zenhang Lamka huamsung a unau meitei khat in ganhing a lu sakol bang, apum mihing bang mu a, a mutu khophawklou a kichi hi. Mipi’n patau dak khen in delhhuan ua, man zoulou a kichi hi. Zouveng a dutyte’n mi thum, suit dum a kichei, thal nei, delh ua, Zoumunnuam lam ah tai chih thu om a, Zoumunnuam lamte’n hiai bang mi a muhlam uh a kigen kha nawn kei hi. Hiaite lou leng thuthang a tam a, phuahtawm tampi omlai ding ahi. Khurai ah vatawt si, ban ah ganhing soisa gamsa in numei khat sual chih thu kigen hi. Hiaite na gintak a na ngaihtuah leh launa’n na dim ding.
(vii) Muhdan: Hiai ganhing thahna Lamka kia a om hilou in mun tuamtuam a om ahi. ISIS leh Setan bia kichite’n amau khutnung in a gen uhi. Tuni tan Police leh duty te’n ISIS mi leh sa a muhlouh ziak un thuzuau ahi. Setan zuauthei, zuaupa ahih ziak in amah bete gente thuzuau ahi a, gintak ding ahikei (Jn 8.44b). Solkal in gamsa chikhat, ganhing tung a tatsia (predator) a chi ua, tunitan a matkhiak ahikei hi. Thilkhat chiang mahmah tuh, huntawp a om i hi uh. Setan in mite lausak ding a thilsiam, ganhingte a zangthei hi (Kil 16.13).
II. I GAM A SETAN NASEPTE: Lamka ah saptuam pawl tuamtuam 30/40 val a om a, Biakin leng a za a sim a om hi. Pastor leh Upa leng sang a sim a om hi. Gingtute leng a nuai a sim theih om hi. Hiai bang lai ah Setan bangchi’n a gamtang ngam dia? Saptuamte omlai a, Khasiangthou omlai a, banghang a setan gamtang ngam ding hiam? chih dotna a om hi. Lamka saptuam pawl tuamtuamte lak ah hiai anuai a Setan kipahlam nasepna atam ziak in ut leh utlouh a setan in nna sem a, huai tuh lamdanglou ahi.
(a) Dawite Thudotna (Divination): Maban thiltung dingte theih ut ziak a dawite, bumhatte, aisan theite naih a, vangphatna leh hauhsakna ngah ding deihna nasep ahi. Bumsiamte setan vanzat ngen ahi uhi. “Dawi aisansiamte zuan kei unla, bumsiamte leng a hon nitsak louhna ding un zongkhe kei un. Kei, TOUPA ka hi” Toupa’n a chi hi (Lev 19.31.).
(b) Misisate thudotna (Necromancy): Nu leh pa, mi kuahiam theihgigena ding a limtak a sekei hi. Himahleh kipah hun, lungkham hun a amaute thudot leh Biak Pathian zakdah khelhna ahi (1 Sam. 28:8). Saul sihna hiai ahi “Huchi in TOUPA tung a tatlekna hih a, TOUPA thu a zuihlouh a, dawizawl aisansiam thu a dot ziak in Saul a sita hi” (1 Kron 1.10).
(c) Aisanna (Prognostication): Babylonte Pathian, Teraphim Biakna ahi. Rakel in a pa Pathian a guksak inkuan Pathian a a neih uh ahi (Gen 31.30). Jerusalem sim ding a hongkuan a Babylon kumpi zat ahi: “Aisan ding in Babulon kumpipa lampi ka ah a ding a, lampi nih kigawmna tak ah; thalte a sing loklok a terephim a dong a, sa sin a en hi” a chi hi (Eze 21:21). Khristiante’n dot ding Laisiangthou ahi a, Pathian kia a biak ding ahi.
(d) Mitkhialdawite (Magic): Hiai siamna Aiguptate a ahi (Gen. 41:8). Hiai siamna in aksite leh vanlam thilte sutna pansan a thil hongtung dingte muhkholhna ahi. Tulai hun in ihmu bang a om a, thiltheihna (hypnotism) ahi. Hiai bang in lungnopna hiam damna na zon hetlouh ding ahi. Pathian Aigupta Pathian tung a thunei ahi.
(e) Kibumhaina (Sorcery): Hiai aisanna in ‘Aksite suina, damdoi lam leh kha (spirit) kigawm a mite muhna leh zaknate hihlamdan theihna leh mimal summuhna chikhat ahi (Nas 19.19). Mitkhialdawi dotna leh thuzakna khelhna ahi. “Na lak uah mi kuamah aisan ching, mangsan ching hiam, bum hiam, mitkhialdawi tawi hiam, zawl aitawi hiam, mi sisa houpih hiam, khate zawl hiam, misisate dong thei hiam na om ding uh ahi kei. Hichibang thilhih chingte peuhmah Toupa adin mi kihhuai ahi. Numei mitkhialdawitawi a hin na phal ding ahi kei” (Diut 18.10; Exo 22.18).
(f) Maibi-Maiba (Witchcraft): Damlouhna chituam deuh hiam, van mansak hiam, inn kiluh, dawi leh kaute nasep honglang om chia Saptuam Upa leh Pastorte samlou a a guk a Maibi-Maiba naihna Lamka Khristiante lak ah a tam hi. Laisiangthou in, “Himahleh tunung chiang in mi khenkhatte’n; pimangna khate leh dawite thuhilhna limsak in, ginna a hon tawpsan ding uh chih Kha in kichiantak in a gen hi” a chi hi (1 Tim 4.1).
(g) Dawi biakna (Occultism): Dawi nasep genna sappau ah a tam a, eipau a i leh chiang in a thumal kithei zoulou ahi. ‘Occult’ Latin pau a ‘kiselgu, thuguk’ chihna ahi. Dawi leh khanin thudotna tungtawn a theihkhiak a chi uhi. Khut lamente, mang aisante, horoscope, Pathian douna nasemte hihmang ahi ding uhi. Hiai bang nasemte tunna ding Tangtawn meidil ahi, “Himahleh dawilokte leh gingtaloute leh, kihhuaite leh tualthatte leh, mingaihhatte leh bumhatte leh, milimbete leh zuautheite tengteng tan tuh dil, mei leh kat a kang, sih nihna ahi” a chi hi (Kil 21.8).
I gamsung, khotang, saptuam leh inkuante’n vualzawlna leh vangphatna deihna ziak a Pathian hing apan hilou chih theih ngoihngoih dawite leh phuisam theite i naih uhi. Taksa damna ding ahih photleh siang leh sianglou khenlou in setan leh dawite nasep pomzam theih ding ahi diam? Thumdam theite sum leh pai muhna ding ahihleh mahni hihtheih louh tantan nasemtu a tamta hi. Pastorte, Pathian thudik nusia in salam metna ding zong dawi thil leng poisa loute kibawlpha ni. Sinsakna diklou pai khamitak a omte i kisik hun ahi. Pathian thutak a dingkip in kim leh pam a thiltungte i lau ding uh ahikei hi.
III. BIBLE IN BANG A GEN?: Khovel a i om sung un thil tuamtuam hongtung a, a hongtung zel ding hi. Thillamdang pipi hong tungzelte’n “Hun nanung ahita” chih a hon sinsak uhi. Paul in a gen, “Huailou in, tu bang hun ahia chih na thei ua, ihmu khanloh a hun mahmahta chih na thei uhi. Tun zaw i gintak tunglai sang in i hotdamna a nai zawta ngal a” a chih i lungtang ah ging nawn leh i chi hi (Rom 13.11).
1. Hun nanung ahita: Pathian tangtawn thilgel ah michih ading in hunseh a bawlsak hi. Mitengteng hotdam a a omtheihna ding un dohzohna toh hon ngak hi (2 Pet 3.9). Johan in, “Naute aw, hun nanungpen hita e, Khrist doupa a hongpai ding chih na zak bang un tuin Khrist doumi tampitak a hong pawtta uhi; huaiziak in hun nanungpen ahita chih i thei uhi” a chi hi (1 Jn 2.18). Khrist doudalpa setan muhtheih in hongpai leh i delhzak ding. Himahleh sa-utna, kingaihna in honzawl hi. Mit-utna, muhtheih milim kihhuaite in hon zol a, sum leh pai, inn leh lou in hon zol a, khemna ahihlam theih ma in i pukkhin uhi (1 Jn 2.16).
2. Danlou a omna thuguk: Saptuam sung a guk a nasem, ‘danlou a omna thuguk’ a chi hi. Paul in, “Danlou a omna thuguk in tuin leng a sem lellel ngal a, himahleh lakmang a a om masiah tua a khampa’n huchibang in a kham ding hi” (2 Thes 2.7). Setan in zalentak in nna sem theikei mahleh a inkuan, saptuam, khotang ah a guk in a sem hi. Khasiangthou leh saptuam, Tangthupha genna in danlou bang a omna thuguk nasep a kham lai hi. Jesu Khrist hongpai chiang in a khampa lakmang ahi dia, Danlou a omna thuguk in nna a sem ding hi.
3. Danlou a omna thuguk Khampa: Danlou a omna thuguk in tuin a semlellel a, himahleh a khampa ziak in zalentak in a sem theikei hi. Jesu Khrist huihkhua a misiangthoute la a hongpai chiang in Khasiangthou leh saptuamte laktouh i hi ding a, huai hun a kipan in danlou a omna thuguk kichi chipen, dan-a talekpa chi in a hong kilangta ding hi. “Huai dan a talekpa a hongpaina Setan sepdan bangzel in, thilhihtheihna chiteng, chiamtehna chiteng, zuau thillamdang chiteng toh, Mangthang lelte ding in khemna gilou chiteng toh ahi ding; hotdam a a om theihna ding ua thutak itna a pomlouh ziak un. Huaiziak in zuauthu a gintakna ding un, Pathian in diklouhna nasep a kiang uah a honsawl ding hi” (2 Thes 2.9-10).
4. Diabol leh A nasep: Sawltaklian, Peter in a laikhak ah, “Pilvang unla, limsak un; na melma uh Diabol, humpinelkai humham bang in a nektheih ding zong in a vialvak hi” chi in a gelh hi (1 Pet 5.8). Hiai bang genna hiam? A tung a kigen, sa-utna, mit-utna, damsung thupi lim delh a mihing khelhna a a puk chiang un Setan in a tung ua vaihawm in, khovel a thuneih khum hi (1 Jn 5.19). Jesu Khrist neiloute suak leh sal a man in a vialvak hi (Eph 2.2). Meidil a a lutpih ding zong in a theihtop in a vialvak hi. Gingtute Diabol thilhihtheihna apan tatkhiak i hi. Himahleh, humpinelkai humham bang in gingtute a patausak hi (Sam 22.13; Eze 22.25). Thuakna leh haksatna, khovel leh a utna tungtawn in hihsiat a tum hi.
5. Setan in Thilsiam zang in nna semthei ahi: A tung a kigen dana talekpa khamtu, Khasiangthou leh Saptuamte laktouh ahih chiang in Setan nasep a uangsem sem ding hi. Saptuam hun ahihlai in mi tengteng in Jesu sang leh gimthuakna mulkimhuai pumpelhna hiding ahi. Saptuam a Setan vak sawltak bang a a kibawl bang in khovel ah thilsiamte zang in nna a semthei hi. “Dragon kam a kipan leh gamsa kam a kipan leh, zawlnei taklou kam a kipan in kha nin thum, ukeng bangmai hong paikhia ka muta hi: Amaute dawite kha, thillamdang hihte; khovel pumpi leh lei kumpipate kiang a hong a, Pathian Bangkim hihtheipa ni thupi a kidouna adia amaute pikhawmte ahi uhi” Johan in a chi hi (Kil 16.13).
Thukhitna: Lamka leh a sehvel ah Pathian hing taisanna a uanglua a, setan in hon ngamthoh ahi. Mihing-ganhing tung a tatsiatna hun ah gingtute vualzohna thuguk “Belamnou sisan ziak leh a theihpih uh thu ziak in amah tung ah a vualzouta ua” a chi hi (Kil 12.11b). Jesu sisan leh tangthupha, Pathian mai a siangthou leh dembei i hihna, i vualzohna i lenkip ding uhi (Rom 1.16; Rom 5.9-11). Jakob in, Pathian thuthu in om un, Diabol dou un, huchi in a hon taimangsan ding, a chi hi (Jak 4.7). Ganhing leh mihing tung a tatsiatna hun ah i laukei ding uh. Pathian khut ah kikemsak ding uh. Bible sim, thumna, Biakin kai limsak in Pathian naih un, Diabol douna galvan ahi. Pathian thu, Tanchinhoih na hotdamna ginna ah dingkip unla, misiangthoute toh pangkhawm in zohna i tang ding uhi.
Kim leh Pam a Thiltungte Bible Apan Dawnna