“Tua bang ahihman in, sanggamte aw, Pathian’ zahngaihna ngaihsun in, na pumpite uh kithoihna hing a a siangthou leh Pathian lungtaina hi ding a laan ding in kon kun hi. Tua mah, noute ading in, khalam a biakna thilhih ahi.” Romte 12:1

I. THUMAPI
Simtute tengteng i Toupa Jesu Khrist min in Kum Thak Chibai! Pathian in Kum Thak 2019 hon musak a, i kipak mahmah hi. Kum Thak i lut toh kiton in michih in lungsim ah kithakpatna khat i nei chiat uhi. Kum lui a hihkhelh tu kum thak a bawl dik utna, hihkhaklouh thilhoih tu kum thak a pattuak tampi toh i om ding uhi. Kumsim Khawmpi 70na hun ah “Pathian Pomtak Biakna” chih thupi zang in Rev. L. Kham kho Lun in Thugenna Manpha hon nei a, Rev. V. Khamvum in Jakob Laikhak study hon neihpih a, ali thuklam hon lutpih a, Khawmpi hoh kha teng in khalam ah hamphatna i neih chiat ka lamen. Hiai bang teng toh kum thak i lut lai in apoimoh mahmah “Pathian Pomtak Biakna” chih lungsim a ngaihtuah kawm in lutkhawm lehang i chi hi.

II. BIAKNA BANG AHIA?
Chinzam Tawmbing English-Paite Dictionary in “Pathian zahtak-a bia, ngai thupi” a chi hi. Atom a gen in Maipha zonna ahi. Thukhun Lui leh Thukhun Thak ah Biakna chih thumal a kizatna kingainiam tak a kipiaklutna ahi. A neu zaw in a lianzaw kiang a khukdin/khupboh a zahna piakna ahi. Mihing in amah Siamtu Pathian biak ahi. Biakna lompi nih Mihonpi Biakna leh Mimal biakna in khentheih hi.

Mihonpi Biakna leh Mimal biakna.
Mipi Biakin a bia ding a apaikhawm chiang in Mihonpi Biakna (Corporate worship) ahi a, Mimal in mahni om nana leh mahni hinkhua a Pathian Lungtuak a hinkhua a zat chiang in Mimal Biakna (individual Worship) a kichi hi.
Biakin a Pathian bedia i paikhawm chiang in Lasakna, Thumna, thugen chihte tengteng biakna a telkhawmvek ahi. Hiai pen a poimoh mahmah ahi. Hiai bang a biakkhawmna ah miteng a telkha a, huai in michih tokthou a hihhattuah in, mimal biakna ahatsak semsem hi. Pathian Kha ahi a, mite muhna a hoih sang in Pathian Lungtuak in i bia kha hiam chih mahni kidot tuak mahmah hi. Biakin kikhop sung a paupau, mobile khoihkhoih, pawtpawt chihte mitsiphuai mahmah hi. Biakin a omsung pawlam toh kizopna a bei ding ahi.

III. PATHIAN POMTAKLOU BIAKNA
“Ahih hang in Kaina leh a thillat bel a kipahpih kei. Huchiin, Kaina a heh mahmah a, a mel a liapta hi” (Gen. 4:5). “Toupa’n: Na kithoihna zouzaite’ un kei ading a bang manphatna nei ahia? chi hi. Noute’ haltum thillat belamtal leh gan vakthaute’ thaute’n hon nimta hi. Bawngtalte, belamnoute leh kelte’ sisan ah kipahna neilou hi’ng” (Isai 1:11).

I Pathian tuh kha ahi a a be mite’n kha leh thutak a biak ding ahi (Jn 4:24) chih i thei a, himahleh Pathian in bang ziak a a thillat pomlou ahia? Aman a hoihpen a piaklouh ziak ahi. I Pathian in ahoihpen a deih a, ahoihpen zom a deihkei hi. Tuni in Pathian Bia in Biakin ah i kuan damdam zel ua, bang lungsim toh i kuan ua? Tawp pah ut a Bedia kuan ngen houh i hi kha hia? Vai tamlua in a awngkal lel a Pathian bedia Biakin kai i hih khak ding alauhhuai hi. Pathian pen ngeina dan a neih biakna ah lunglut lou a, lungtang kitamkham a Amah mel zongte ah lunglut ahi. Biakin lah hoih deuhdeuh maiven, vanzat lah sang deuhdeuh, atung-anuai zuun theihtawp in i zuun ua, tutna lah nip deuhdeuh, sah deuhdeuh, Pathian lamlam theilou a A Biakin bawl i hih khak ding kivelhuai mahmah hi. Alangkhat ah Pathian i ngaih thupi dan alang a kipahhuai hi.
Paul in Galatiate kiang a “Tua na lungnopna uh bang suakta ahia le? Hithei hi leh, na mittangte nangawn uh khelkhiain kei non pe nuam ding uh chih ka thei hi” (Gal.5:15) a chih bang lungsim a hong lang hi. Biakin bawlna ding ahih nakleh ka khaloh ka thoh ding bang chi, atak in le i thoh uhi. I lamzou ngei ua, i Biak Pathian uh lunglutna lah a Inn pen sang in a Sung a Bia a vapaikhawm zelte ahi ngal a.

Biakin kai pasal tawmlua, “meithai Saptuam” mah bang a numeite’n tutna tam luahzaw gige. Papi chingkam khat in “Biakin dak a gin chiang in Numeite kiang ah va kai un ken inn ka na ngak di a chi ua; Patau dak hong gin chiang in Pasal teng a kimpah diam a, i Biakin dakte uhle Pataudak khet in kikhen leh Pasal i kai hoihzaw di e”, a chi hial hi. Upate’n Biakin kha khat khawng kalh di chi in thupukna honla le uh kuate’n a soisel masapen dia aw… Genta vanglak, Papi chingkam khat in lah, setan biakna hong kigen tung in “Setan a tuam a vahuchi biakle angai a hia? I khohei dan in amah Lungtuak lua ahih chia” hon chih gennei ka sa mahmah hi.

IV. PATHIAN POMTAK BIAKNA
“Abel in bel a belamhon lak a piang masate apan, a thau beute a laan hi. Toupa’n Abel leh a thillat a sang” (Gen. 4:4)

“…Na tapa, na tapa tang neihsun nangawn na siit louh man in, Pathian na lau chih tu’n ka theita, a chi hi.” (Gen. 22:12).

I changtel ah Abel in a gan vakthaute in kithoihna a bawl a, huai pen Pathian in a sang hi. Pathian in Kaina biakna a pomlouh ziak a gen a “adik hih lechin saan in na om ding” a chi hi. I Pathian chilgil Pathian ahi. Hih maimai a kipak ahihlouh dan a chiang hi. Pathian pomtak Biakna zaw chihtaktak a biakna ahi. Anania leh Saphira-te nupa bang a midangte theih ding lel a Biakna limsak i hih inzaw mi hehpihhuai mahmah i hi ding.
Abraham in a Tapa Isak a lat ding in lungsim thuahnih a nei kei. A tapa mahmah a Pathian biak a sawm a, biak leng a bia hi. Huchi in Pathian kipahna a sukha a, a tapa toh Belamtal a gou ua kithoihna a lan khawm uhi. Eite’n leng Pathian pomtak biakna i piak theihna ding in Abel bang lungsim i neih a, Abraham bang a ataktak biakna i lat ding uh ahi. I hun thoveng lel a Pathian biakding hilou in Aman pia a Pathian i biak ding uh ahi. Abraham in a goumanpha, a tapa tang neihsun, teknung-vuainung a aneih a pekhe ngam hi. Unau nang Pathian ading in goumanpha bang na pia a?

V. BIAKNA A PATHIAN IN A NGIAT
Thukhun lui hun in Israel te’n ngeina dante, Kithoihna leh Kut in Pathian a na bia uhi. (1 Sam.1:3; Sam 132:7). Hiai a kithoihna leh Kut ah Pathian a lunglut tham a, himahleh amau ngeina dan a nei a, hihbuchinna lel a hon neih chiang un i Pathian in sungnimhuai A sa hi. Biakna diktak, Pathian pomtak in a ngiat zaw – Gamtat-khoheidan dik; Khalam kingaihniamna leh Khelhna kipuanna ahi.

a) Gamtat-khoheidan dik
Gamtat-khoheidan dik a hin pen Pathian lungtaina ahi. Hotdamtate ading in hindan ding Toupa’n hon lam-et om ahi. “Ahihleh, na pumpi uh, na sung ua om Pathian kiang a kipan-a na muh uh, Kha Siangthou temple ahi chih na theikei ua hia? Noumau a leng na hi kei ua, man-a leisa na hita uh. Huai ziak in, na pumpi un Pathian pahtawi un.” (1 Kor.6:19,20) Pathian Kha Siangthou tenna temple hihlam kiphawk a, hindan siangthou a hin pen Pathian Biakna dik leh a kipahna ahi. Tuni in na hinkhua kivel thak dihle unau, Temple paithei na hihlam kiphawk in na hindan huaibang in a omkha hia? Sapte’n “Work is Worship” – Ginom tak a nasepna Biakna ahi a chi uhi. I sepna chiat a ginom tak leh chitak a i sep pen leng Pathian lungtaina ahihlam mangngilh kei ni (Jakob 1:27).

b) Khalam kingaihniamna
“… Laisiangthou in, Pathian in mi kisatheite a dou a, kingaineute bel hehpihna a pe nak, a chi ahi” (Jk.4:6). Pathian pomtak biakna pe ding in Khalam a kingaihniam a poimoh hi. Kisathei tak a midangte hatlou leh buchinglou a koihna Pathian deihlam ahi kei. Michih kitungding tuah a khalam a kihihhat tuah ding a lam-ette i hi. Kingainiam hinkhua Khristiante ading a i galvan uh ahih ding ahi.

c) Khelhna kipuanna
“Ka khelhna na kiang ah ka kithan a, ka thulimlouhna ka imta kei hi, Ka tatlekna Toupa kiang ah ka pulak ding a, ka chi a; huchiin ka khelh thulimlouhna tuh na ngaidamta hi” (Sam 32:5). Pathian pomtak biakna peding in Khelh kipuanna apoimoh mahmah hi. Hiai Sam gelhtu, David in a khelhna ahi bangbang a a puankhiak chiang in Pathian ngaihdamna a tang a, huchi in Pathian lungtaina hong hithei hi. “Huai ziak in, maitam bul a na thilpiak na lat lel lai a na unau in na tung a lunghihlouhna a nei chih na theihkhiak leh, huai maitam ma ah na thilpiak tuh nusia inla, pai inla na unau kilempih phot inla huan na thilpiak lan in” (Mt. 5:23, 24). Mitoh kilemlouhna nei i om hia? “Gilou paisan inla, thilhoih hih in; lemna zong inla, a delh in delh in” (Sam 34:14).

THUKHITNA
Pathian in Amah Biak ding a ngai poimoh mahmah a, Thupiak 10 lak a amasapen in koih hi. Eite leng Ama pomtak Biakna neih i ut chiat uhi. Hiai bang a a hing biakna neithei ding in Michih in eilam a panlakna ding aom hi. Kum Thak, hun thak, i tot ngeinailouh lampi zui dia i kisak lai in, Niteng-hunteng a Pathian lungtaina hihkha ding in Gamtat-khoheidan dik; Khalam-a kingaihniamna leh Khelhna kipuanna ahi apoimoh. Bloom where you are planted – koihkhak a na omna mun ah pakpalh in. Kithoihna hing leh siangthou Pathian pomtak (Rom.12:1) hi ding in kingainiam a A thu sim a, thum a a mel zong gige thei ding in Pathian in hon makaih chiat hen. Amen.