Kum Thak Chibai! Pathian in tu kum thak 2019 ah hon pikai nawnta! A Min phat in kipahthu i gen hi. Mihing i tuam dungzuiin tu kumthak ah tup leh ngim chituam i nei chiat ngei ding hi. Leitung thil ah mite’n banglam peuh a khantouhna ding in tup leh ngim tuamtuam a nei ua, tua hih tangtunna di’n theihtawp suah in a kisakhol uhi. Tuabang mah in ei Khristiante’n leng mimal khalam hinkhua a khanna leh gahsuahna ding a hiai hun thak a tup leh ngim thak i neih ngeingei ding ahi. Tua tup leh ngim a i lohchinna ding in gam thak i lak kul hi. Kum thak a gam thak lak dia i deih “ei a setan gam omte Pathian gam ding a lak” ahi. Hiai thu mawlchik in kikum khawm lehang i chi hi.
Pathian in Joshua makaihna a Israelte Kanaan gam a a pilut khit a, khopi tamtak a lakkhit nung un, ‘gam lak ding tampi omlai’ na chi hi (Josh.13:1). Hiai thu tu hehpihna hun a Khristiante dinmun toh tehpih lehang chi i hi. Mi Jesu Khris hondampa a sang a, piangthak, Khristian a honghih khit chiang a, hoih bukim (perfect) leh bangkim a bukimna tangta ahi kei hi. Khelhna pumpi a tuam a om lai ahihman in, amah lungsim leh hinkhua ah setan gam lak ding tampi om lailai hi. Tua bang a khelhna in a thuneihkhumna chiangchiang khelhna gam, setan gam ahi lai hi. A hinna pumpi Pathian gam ding a lak siang kul lailai ahihman in, tupna chiktak toh theihtawp suah a gam thak la ding a kisakkholh poimoh hi.
Tulai Khristian tampite’n hiai thuguk theikhial in, Aigupta gam pawtsanta, gamdai paikhengta, Jordan lui kan khinta, Kanaan gam bawngnawi leh khuaizu luanna gam lutta chiin, Paul in ‘hiai muatthei pumpi muatthei lou a kheklamdang a om ding’ (1 Kor.15:52-53) chia a gen tang khinta a, van gam a tangtawn mun a om bang in kikoih kha uhi. Hiaibang gindan diklou tak ziak in thil hoihlou tawpkhawk ahih chiang un zong a khial lou, Pathian tate thilhih ahi chiin khelhna in ngai lou ua, khial thei nawnlou, a hih peuhmah uh siang vek bang in kikoih uhi. Amau a setan gam omte Pathian gam ding a lakding tampi om ahihlam himhim phawk lou ua, Pathian ta a kichih lai un, setan vanzat leh setan gam kekliantute suak zaw uhi. Tulai hun a hiaibang Kristian a tamluat tak ziak in ‘Khristiante ziak in Khristian loute lak ah Pathian min gensiat in a omta’ hi (Rom.2:24).
Ahihleh Khristiante hinna a setan gam om i chih mawk koi a om ahi dia chiin na buai ahi maithei. Tomchik a a dawnna tuh ‘Khristian mimal mit, bil, khut, khe, muk, pumpi leh ngaihtuahnate setan gam ahi thei vek’ chih ahi. Bangchiin maw? Pathian deihlouhdante mu, za, khoih, sem, hoh, pai, gen, sa, leh ngaihtuah a zat hun in setan gam a suak hi. Nang hinna ah setan gam bangte ah a om a, Pathian gam ding a la ding in na kipan ngeita hiam? Hun bangtanhiam paita a na kipanta a, Pathian gam ding a tamtak la zouta a, lak beh laiding om ahi hia? Ahih keileh, la zou lou a, lungke dimdem a, kipan ngam nawnlou na hi hia? Bangteng hileh, Pathian apan khamuanhuai mahmah hanthawnna thu tomchik in ngaikhe lehang chi i hi!
1. Pathian in Joshua kiang ah a ompihna leh zohna a chiam hi:
1.1. Mosi a ompihtak bang in Joshua a ompih ding chiin a chiam hi (Josh. 1:5,9).
1.2. A chiam bang in Jeriko khuate lungtang ah lauhna a koih a, Joshua khut ah a pia hi (2:9; 6:2).
1.3. Amor mite a zohsak a, gialpi a sawl a, melmate a thahvek theihna ding un vanlai ah Ni a khawlsak hi (10:11-13).
Pathian in Joshua a ompih bang in nang zong a hon ompih ding hi. Jawlnei Zakaria kiang a a gen bang in “mihing ban thahatna leh thilhihtheihna hilou in, ka kha in a hi zaw” (4:6) chiin Toupa Kha thahatna leh thilhihtheihna in a hon zohpih ding hi. Na gintak sang in Pathian thahatna koppih in nidang a na zoh vuallouhte baihlam tak in na zou ngei ding hi. Pathian adi’n hihvuallouh leh haksa bangmah omkei chih thei in.
# Ets. Samson, Hitler, Napoleon, etc.
2. Pathian in hattak leh hangtak a pang ding in Joshua a hanthawn hi:
2.1. Miliante, galvan hoihte, leh kulhpi thupite maituah ding himahleh hattak leh hangtak a pang ding in Pathian in Joshua hasuan hi (1:6,7,9,18).
2.2. Pathian muang a, hangsan tak a a pan nakleh a khepek a a sikna chiangchiang a gam dia peding ahi chiin a chiam hi (1:3; cf.Jos.3:15-17).
David bang a na lungke dimdem khin na hih in zong ‘Toupa ah nang leh nang kihihhat’ lechin lohchinna nang a ahi dia, nang a setan gamte Pathian gam ding in na la zou ding hi (1 Samuel 30:6).
Thukhitna: Joshua kiang a Pathian thuchiam na gintak leh nang a a hi sam ding hi. Mihing lungsim, ngaihtuahna leh thahatna a hihtheih vuallouh a na koihte, Pathian a ding in a baihlam lua hi. Tu kumthak leh hunthak ah na hinna pumpi Pathian gam dia la ding in kipan in, huchi in Khristian vualzou leh gahsuah na hi ding hi (1 Kor.6:19-20; Rom. 12:1). Khristian vualzou hih ding nang deihtelna ah a kinga hi. Tuin kipan in, Toupa’n hon huh ding hi!