Hiai, tukum thupi dia heutute’n hon tel uh, thupi in poimoh ka sa thakthak a, ken leng hiai thupi Abraham in Pathian kiang a kawk sak/tup pen hi a ka muhdan tamlou kon kum nuam hi. Pathian in a vualzawlsa Kanan gam a pai/pem ding in Abraham a sawl a va enkhe din a chial hi. Pathian thei mi ahih toh a deihsak luat ziak hi ngei ding. Hichi in a chi hi, “Na kholam a kipan, na tanaute akipan leh na pa in a kipan pawt inla, gam ka hon etsak ding lam ah pai in” chi thupi’n ka hon bawl dia, vual ka hon zawl dia, Nang Vualzawlna na hi ding hi, nang hon vualzawlte ka vualzawl dia hon hamsiatte ka hamsiat dia, nang ah leia namchih a nuamsa ding; chiin, thuchiam apia hi. Kipahhuai mahmah. Abraham in midangte adia vualzawlna ahih theihna ding in Pathian thupiakte a zuih phot ngai hi chih a thei a a pemkhe mah a, a thupiakte leng a zuizel hi. Huchi in Pathian gamchiam a vualzawlsa gam Kanan gam sattu (founder) in pang hi. Huaiziak in vanlam leh leilam vualzawlna Pathian in a pia mah hi. Huchi hileh, hiaithu za eiten tuni in bang i lohta dia le?
1. Midangte adia vualzawlna, a chih midangte thilpiak pia/va panpih dingchihna hipah khollou din ka ngaihtuah a, thilpiak bel a pe zoute adin hoih mahmah himah hi; mi panpihna ahih ziak in, huan Pathian kipahna khat leng ahi him hi. Ahi a, mi panpih thei dia vualzawla i om na din Pathianthu i man masak phot ngai hi.
2. Abraham bang a Pathian thu i manphot a, mikhialte leh Pathian hing theiloute, theihsak a thupiakte zuih sak ding chih mah Pathian in tuni a eite ahon sawlna santak hizaw hi. Ahi a, Abraham in a innsung ah Pathian leh a thupiakte chi a na tuh a, abiktak in khang thum tan, Joseph tan ahilhzou deuh hi a theih in a om hi. Huaiziak in vualzawlna leng atang mah uhi. Tuin eite nasepna ding mun thum ka kawksak hi. Huaite Insung ah, Tualsung ah, Polam ah (Gammial ah):
Insung ah: Nu leh pa i hih a kipan in Pathian in mohpuakna lianpi hon piak om hi. Huai tuh ta kepna leh Pathian thu sinsakna ah ahi. Tate Pathian gou hon kepsak ahihman in van gou hithei ngei chiat ding a i kep a Pathian thu i hilhhilh ngai na hi petmah hi. (Sam 127:3). Abraham mah bang in. Tuin tuabang mohpuakna i zohlouh ziak a siatna pung hiaihiai hi a theih in a om hi. Tate insung a i hilh ban ah, biakinn i kaipih gige poimoh lai hi a theih in a om hi. Hiaibang hihtheihna ding in nu-le-pa Khrist a kisiamthak chih louh ngal ading dang omlou hin ka thei hi. Kikepna lam ah, tate ompih gige di, kholak a kikhahzan louh ding, abiiktak in naupangte leh nupen inn a aom gige ding uh i bittheihna ding in, vaite paidan bang in. Nute hi kholak vai himhim ah kigolhsak louh ahoih pen hi. Bible, Pathian thu enkawm in kipan thak chiat ni aw, unaute.
Tualsung ah: I Tualsung i khodak leh Pathian thei a lah a thupiak zuilou i tam ziak ahi dia, khelhna pung hiaihiai hi a muh in a om hi. Pathian thupiak zuiloute mikhial ahi a, mikhial athu mangloute hamsia a delh zui zui ding chi hi (Pau. 3:33; Ekso. 30:19-20). Khangthum khangli tan a phu lading chi lai hi (Ekso 20:5). Hiai thumanglou, khial te Pathian hamsiatna/gawtna apan i hotkhiak ding chih eite adia mohpuakna ahong hita hi. Khelhna hamsia donna tuh alauhhuai dan theihsiamsak a, Pathian thu leh a lampi a pikiknawn ding a poimoh mahmah hi. Huchi in en vualzawl theikei mah leng, Pathian in vualzawl zawta ding hi (Deu 28:1-2). Huchi in ei amah ading in vualzawlna, vualzawlna nak hong kisuak ding hi. Hiai hilou hia Pathian in Abraham kiang a a gen pentak ka chi hi. Hiai evangelism diktak mah leng hilou hia maw? Huchih naksang in achang in Saptuam nangawn in, mikhhialte siam i tangsak khanak uh abang zaw hi (Nupa kal leh thil dangdang ah). Pathian chih bang a mikhialte- siamlouh tangsak a, bawlhoih sawmzaw lou in. Mi, vualzawlna dongsaktu hihnak sang in hamsia lampi a nungthuaptu kilehsuah theih leh kilawm zaw hi. Huaiziak in vualzawlna hih naksang a ahamsiat kisuak thei a, huan ei leh ei leng kihamsiat i lehsuah khak ding lauhuai zaw bang hi (Pau 24:11-12). Huaiziak mah in kuapeuhmah in khelhna lauhuai dan gen uang chiat ni. Pathian thu mangte hi a, innsung, i nam leh saptuam in Pathian vualzawlna i dontheihna ding un, phetlou in mahni masial lou a Pathian thu enkawm a nam leh gam damna ding semkhethei te hih tumchiat thei leng hoih mahmah ding hi. Nam dam leh gam dam lah i deih chiat ngal a maw.
Polam ah: (a) Siamthak a hotdamna pethei i Toupa Jesu thei nailou, gammial ah khamangthang tampi om lai hi. Hiai gamte/mite ei gingtute ading in Pathian thu zaksak ding i mohpuakna ahi. “Khovel teng a thilsiamteng kiang ah ka tanchin hilh in genzak un” chi a thupiak hon pia i Toupa Jesun van a a kaltouh dek in hon vaikhak hi. Aman hong gen thei nawnlou ding ahih ziakna toh in (Mark 16:15-16). Huchi hileh, Toupa Jesu nei a, pom taktakte om maimai theih vual hilou hi. I Toupa hon phut bang a a za nailoute lak a i kuankhiak uh aloutheilou hita hi. Hiai mohpuakna i ngaihsak kei leh i Toupa’n hon got thei hi. (Pau 24:11&12). Hileh kuate i kuan dia le? I kuan thei vek diam? (b) Tuabang kal ah, kuan theiloute leh kuan peih mahmah loute ading in Pathian in chance khat hon pe hamham lai hi. Huai tuh a sawltu a pan theihna ahi (Rome 10:14-15), kihampha mahmah lai maw. Hileh kua ken ka sawl dia le? Nawngkaina khat om leh kilawm zel maw. Hilou, i Saptuam in lampi hon bawlsak om kha zenzen hi. Kipahhuai lua!! Huaituh Missionary vakna i chih ahi. Aw le, Unau ei a kuan theiloute, hiai missionary vakna bek ah pang chiat ni. Hiai a i panleh Toupa’n chance hon piak ahih dungzui in hon mohsa nawn lou ding in a gintak huai hi. Unau, kisa ni, Ni in ahon tumsan ma in.