Khovel hondampa i Toupa Jesu Khrist hong pian hun hong tungnawn ding ahita. Thulamdang gen chet vuallouh a thukdan, a sandan leh a letdan suisuah vuallouh, lei leh van mangpen mihing a hong piang a, sihpih tham hehpihna hinkhua hon zang a, a melmate ading a ahinna hon petu kipiakna kua ahia a genchian thei?

A nungzuite kiang ah “Na melmate it inla, ahon sawite thum sak in, Na biang langkhat hon bengte kiang ah alanglam le dawh in” chi in thu hon pelai. A haksangei! hiai bang hinkhua lampi zuih dik. Hon ittute leh hon deihsaktute ading in hoihna suahkhiak tuh michih in i hihthei chiat ua, himahleh ei hon hua leh hon soisate, i siatna ding deih a hon hih minsiat tumte tung a hoihna, itna leh hehpihna latsak chih tuh haksa in thubaih liai ahi kei hi.

Hitamahleh hiai bang huntak a i dinlai in ei gingtute ading in gingtu hinkhua a hing i hihnatak i latsak hun ding a na hi daihzel mai. A nung i zuih Toupa Jesu’n zaw, a siamna thu khatvei mah leng genlou in zuau a gilou chiteng a, a heklai un, a thuak mualsuah a a melmate, amah simmoh leh zuaktute adia a hinna hon piak khiattel maizaw! Hiai bang lampi i hinna in a hon zuihkhak pat chiang in i Hondampa itna leh hehpihna thukdan leh a saandan i hon chiampan theichauh ahi ding. Tuabang lampi tawnlou in midangte adi’n Vualzawlna i hi thei dia hia?

Pathian in Abraham kiang ah “Na khua a kipan leh na tanaute leh na pa inn a kipan pawt inla, kon et-sak ding gam ah pai in, Chii thupi mahmah in kon bawldia, vual ka hon zawldia, na min ka hihthupi ding, nang vualzawlna na hi ding,” (Gen. 12:1-2) chi hi.
Vualzawlna i chih bang ahia? Vualzawlna i chih pen thuhoih thupha i genna ahi, ahoih thilte khempeuh vualzawlna ahi. Abraham in vualzawlna a nei masa hilou in, Pathian in amah vualzawlna pia hi. Abraham vualzawlna i chih chiang in salam leh khalam vualzawlna chikim i gen nop na ahi. Na suan na khakte van a aksite zah leh tuipi piau a piaunel zah in ahi ding (Gen. 22:17) a chi.

Vualzawlna i hihtheihna ding in:
I. NUTSIAT/TAIHSAN NEI NGAM NI
Pathian in Abraham kiang ah kon vualzawl ding a chihma in thil thum nutsiat ding ngiat masa hi. A pa leh a innkuan pihte nutsiat ding poimoh masa hi. A pa Terah milim bia ahihman in Vualzawlna tanna ding in nutsiat poimoh taktak hi. Tua ban ah, tanau lainate leh a khua a tuite zong nutsiat poimoh sak lailai hi.
Abraham in – A pa a nutsiat ngam ziak in – Mi tengteng Pa chih a loh hi.
A gam, a khua-leh-tui a nutsiat ngam ziak in - Gam hoih mahmah Kanaan gam a tensak in om hi.
A chii-leh-sate a nutsiat ngam ziak in – Chi thupitak a bawl in om hi. Tuhun chiang in ei Khristian kum za chinna a lawmkhintate, kipiching sak hiaihiai ta, khami semsem ding i hihlai in i nutsiatsa i pi leh pute biakna dawi leh kaute biakna a kiknawn i bangta mai ua. Gua hong khangkhang a akuitun chiang a, apouna lei a baat kiknawn banglel houh i hi diam? Ngaihtuahthak ni, i Toupa Jesu leitung a mi tengteng adia vualzawlna hiding a a hongpai lai in a nutsiatte na ngaihtuah ngei hia?
Amah zaw, Pathian bang a om hina pi in, Pathian toh kikim a om tuh thil khiaklah ding in a sepkei hi (Phil. 2:6). A kumpi lukhu leh a kumpi puante suahkhia in a laltutphahte taisan in, thangvan mite’n phallou zong khouzoulou uhi.
“Ka pa innpi vakpha, ka mangtutphah thupi tuang nung hong siah vek in, lei ah gimtheih kong thuak. Ka nusia vek nang ziak, nang ziak, kei ziak bang na nusia? Nang di’a ka thuak natdan, ka kam genzoulou ding, lungzin thuukpen kong thuak gotmun pan hong hon din. Ka thuakna lian nang din, nang din, kei din bang hiam na ngap? chi’n la i sa ua (Bnl-170). Aw unau, nang mi dangte adia vualzawlna na hihna di’n nang leng bang na nusia ngamta ale?
Tulaitak in nang leh kei kiang ah tanau laina leh khua leh tuite nuse ding hon chikholkei maithei. Himahleh i niteng hinkhua a nutsiat ding a chihte ngaihtuah le. I laisiangthou ah, “Misiangthou hita na hih man un, kingaih leh sianglou teng teng huaihamna toh na lak uah loh khak in om kei hen, zahmohte thuginalou gente, chiamnuih thu nangawn huaite kilawmlou ahi, huaite gen sang in kipahthu genzaw un. Kingaihhat leh mi huaiham in, mi huaiham zaw milim biakna ahi, Khrist leh Pathian gam ah tan ding a neikei uh chih na thei mahmah ngal ua” (Eph. 5:3-5).
“Na piankenlui uh na nidanglai hindan uh segawpsa suahkhia unla, na lungsimkha uah athak in hong om unla, Pianken thak diktatna leh sianthouna, Pathian batpih a siam pen silh un” (Eph. 4:22-24). “Valnou duhgawlnate khawng taisan unla, lungtang siangthou a Toupa lou peuhmahte lak ah diktatna, ginna itna leh lametna delh un” (1 Tim. 2:22) “Pathian in kisatheite a dou a, kingaineute bel hehpihna a penak nak” (1 Pet. 5:5)

II. GINNA TOH KALSUAN NGAM NI
Abraham in Pathian a ginna thupi i sa mahmah ahi. A ziak tuh a muh ngei nailouhna gam ah Pathian sawlna mang in zuanngam hi. Muhngeilouhna gam zuan a paingam chih pen Pathian thu mang ngam, muang ngam leh Pathian thu a kinga-ngam chihna ahi. Ginna ziak a kalsuan ngam pa’n - Ginna ziak in diktansakna a ngah hi. Ginna ziak a a tapa neihsun pengam pa’n - Ginna ziak in ginna a i pa chih a lohzou hi. Pathian a gintak ziak in - Pathian lawm chih a tang hi, Pathian lawm ahih ziak in Pathian thuguk a thei hi.
Abraham in Pathian a ginna ziak in diktansak in a om. Ginna a i pa leh Pathian lawm chih atang pa ahi. Lawm i chih chiang in i nu leh pa sang a i kinaihpih zawk, thusia lasia, thu hoih thupha i kikuppih ngamte thu iim khat le ineih louh na i gen khiat ngamna mite i lawm ahi. Abraham Pathian lawm ahihman in Pathian in kuamah kiang a a genkhiat nailouh Sodom leh Gomora halmang ding a chih Abraham a na hilh khinkhian hi (Gen. 18:17). Eite muhtheih a pailou in, ginna in i pai zawzel uhi (2 Kor. 5:7).

III. CHII THUPITAK IN KON BAWL DING
Abraham leh Sara tek mahmah tanapi in a suan leh khakte atu le tate, tuipi piau a piaunel zah leh tung a aksite zah-a tam ding, simzohlouh ding zah a tam nei ding in thuchiam a tanglai uhi (Gen.22:17). Amau nupa in zong gingta zou nonlou bang in nui uhi (Gen. 17:17; 18:13-15). Himahleh Pathian thuchiam hong tangtung in Isak hong piang a, Isak a kipan Esau leh Jacob hong piang in, Jacob akipan Israel nam 12 hong piang a sim zohlouh zah dong in tu leh ta, suan leh khak hon nei uhi. Tuaban ah, Israelte pianna pi leh pute Pathian nam tel hong suak in salam leh khalam ta hon nei khawm petmah uhi. Ginna ziak a dik tansakna a neita eite zong Abraham ta, Abraham suan leh khakte lak a sim i hi sawnsawn uhi, amah leng Abraham tapa ahi ngal a (Luk. 19:9).

IV. VUAL KA HON ZAWL DIA NA MIN KA HIH THUPI DING
Pathian in Abraham vualzawl petmah in a suan leh khak tu le tate tampi pia in hauhsakna ah, dangka leh dangkaeng leh huang vulh ganta tampi petmah pia in vualzawlna chikim a dimlet in nei hi. Amahmah zong vualzawlna hipah hi. Tuakia hilouin, amin mahmah zong thupi sak in bei ngeilou ding hi. Leitung bei dong a, a kigen gen lai ding ahihban ah, Pathian mahmah in zong “Kei Abraham Pathian, Isak Pathian, Jacob Pathian ka hi chilai hi” (Mark.12:16). Pathian in amah min toh kizom sak in kitamsak laidep hi. Pathian in Abraham vualzawl in amin thupisak in Laisiangthou sung ah zong Abraham min 280 vel kimu in min thupina sang penpen pia hi.
Hiai bang mah in enleng Abraham vualzawlna bang i tan sam theihna ding in Pathian mah muang tinten in amah chih bang in nutsiat neingam ni in, ginna toh kal suan ngam ni. Na zi na tate ading in vualzawlna hi in. Na pasal ading in vualzawlna hi in. Na nu leh na pa ading in vualzawlna hi in, na inkuante ading in vualzawlna hi in, na insak inkhang, na veng napamte ading in vualzawlna hi in, na saptuamte ading in vualzawlna hi in, na chi leh sate ading in vualzawlna hi in, na gam na lei ading in vualzawlna hi in. A al-kia hilou in a chi (salt) hi inla, akhum kia hilou in a chikhum (sweet) hi in. Vualzawlna tangtu hilou in Vualzawlna hizaw in.