Jesu a hong piang Judate Kumpipa a hong pian in mipil thumte hong vehna Matt. 2:2-11 ah i mu hi. “Koi ah ahia Kumpipa hong pian?” Mipilten kumpi hong piang pahtawi nuam in Jerusalem khua hong tung uhi. Ei ding in naupang a hong piang a tapa piak in i omta (Isai 9:6). Pathian in khovel a it mahmah ziak in a Tapa tang neihsun a pia hi. Kuapeuh amah gingta tuh amanthat louh ua tangtawn a hinna a neih zawkna ding un. Johan 3:16.

A ministry kum 3 sung in ama ah Setan nasep bangpeuh a hihmang hi. Damloute hihdam in, mittawte musak in pautheiloute pausak in phakte siangsak in dawinin m isung a teeng hawlkhia hi. Gilkial mi 4,000/5,000-te a taisak hi. Misite hingkik sak, mikhialte tatna ding in a hinna pia hi. Laisiangthou a a tungthu kigen tengteng bukim hi. Mohna, khelhna neilou, mikhialte ding in hong si hi.
Pathian a tung ah kipak mahmah in Khros tung a khaikang a omlai in Pilat in, hiai Judate Kumpipa Jesu ahi chi in a lutung ah khovel theih ding in lai tak hi. Matt. 27:37. Judaten pampaih in nawlkhin mahle uh Pilat in muchian in theichian mahmah hi. Huchi in Juda Siampulianten Pilat kiang ah Judate Kumpipa chi in gelh ken, Judate Kumpipa ka hi a chi, chi’n gelhzaw in a chi uhi. Pilat in “Ka gelhkhit ahita” chi in dawng hi. Johan 19:21,22. Jesu hong pai nawn ding lamen tak in i ngak ua, a hong pai ma in Pathian gam nna phatuamngai tak in i sem uhi. Leitung mite simmoh, pampaih, nawlkhin leh engbawl ding in a hong pai nawn ding in na gingta kei un. Kumpi thupi leh thilhihtheihna liantak toh hong pai nawn ding ahi. Gingloute ading in bel hong huhamta mahmah ding ahi.
Ka ngaihtuah in Pathian in poimoh ngaih ka sa mahmah hi. Khros tung a ahin sung in dak 6 apan dak 9 tan Kumpi hihna title ngah man hamham hi. Matt. 27:37. Hiai ah Pathian thuguk (mystery) om hi in ka thei hi. Laisiangthou in a Pu David Kumpi tutphah a tu dia Kumpi hihna title piak a om ahi. Nungak siangthou khat kiang ah a sawl a, huai nungak tuh David suan a mi khat amin Joseph kiang ah lauken; Pathian apan deihsakna na tang hi. Ngai in na gai dia, tapa na nei dia, a min Jesu na sa ding hi. Amah milian a hong hiding a, Tungnungpen tapa a chi ding uh. Toupa Pathian in a Pu David Mangtutphah a pedia Jakob suante tung ah tangtawn in vai a hawm dia, a gam in beini a nei kei ding,” a chi hi.

Mi hausa khat in a thawn (free gift) in Crore khat leh Lakh sawmnga hon pe taleh bangzah na la dia? avek in maw? A kimkhat? Na lak dandan a siangvek. Pathian in a tapa pahtawi in Kumpi title pia in a tawisang a, nang leh kei hon pia hi. Bangchin i sang dia? I Tou din i sang diam, i kumpi din i sang diam? Pathian in a tapa Jesu Kumpi Title in pahtawina sangpen pia hi. Denchiang a Leitung leh Khua vannuai vaihawmpa in a thoukik ding hi. Amah ahi misi leh mihingte vaihawm saktu ding. Laisiangthou a i muh dan in khawlni kiginni in si hi. A sih ma dak thum sung lel Kumpi hihna (Title) a mu hi. (Dak guk leh dak kua kikal). Ni thum sung Kumpi in han ah kisial hi. Huan, ni thum ni, ni sagih ni masapen ni in Kumpi in a thoukik hi. En leng Pastor a site Pastor i chi ua, Upa a site Upa i chi ua, Reverend-te a sih nung un Reverend i chi uhi. Jesu leng Khros tung a Kumpi a puankhiak a om in, Kumpi in si a, Kumpi a vui in om hi. Kuamah in a Kumpi hihna a laksak mankei uhi. Hichi ahihleh Kumpi mah in thounawn hi. Jesu hihna pen Leitung leh Khua vannuai Kumpi a na hi vele maw…Tuni in gingtu, a piangthakte bek in Tou a sanglou in, i Hondampa kia a sanglou in, Hondampa leh Kumpi (Leitung leh Khua vannuai Kumpi) in i sang ding uhi. Hiai hi Pathian thuguk (mystery) ahi. I kumpi Jesu min tawisang ni, Amah Kumpi in bia ni. Amah i Kumpi Jesu nna chih taktak in sem ni. Kumpi Jesu in i bangkim a bangkim tangtak ahi, a phu ahi. Amen!