Nou mit zaw a hamnpha hi, a muh ziak in, na bil uh leng a hampha hi, a zak ziak in, chihtaktak in ka hon hilh ahi, zawlnei tampite leh misiangthou tampi’n leng na thilmuhte uh muh a ut ua, himahleh a mu kei uh, na thilzakte uh leng zak a ut ua himahleh a za kei uh. (Matt. 10:23)

Thupatna: Khristmas kichi thumal nih kigawm “Khrist” leh “Mas” ahi. Khrist pen Jesu Khrist ahi a Mas i chih chiang in nopbawlna hiam ankuang luina lam genna ahi. Eite’n ankuang lui a Khristmas lawm ding chih lamsang in Jesu Khrist mikhialte tan dia mihing a hong pianna, van ankuang luina lam a genna ahizaw hi.

Jesu pian ni: Pawl khenkhatte’n Bible ah December 25 in Jesu a piang chih kigelh lou. Bible a omloupi bang dia eimah kibawltawm zang i hi ua? a chi uhi. Bible ah zaw December 25 in Jesu a piang chih kigelh kei mah e, himahleh, “Tuni’n nou ading in David khua ah Hondampa a piangta, Amah Khrist Toupa ahi” (Luka 2:11) a chi hi. David khua ah Hondampa a piangta (past tense) ahi. Thukhun lui hun a Isai leh zawlnei dang tampi genkholh, ahunbi hong tun a i Hondampa Jesu Khrist hong pianna Khristmas ahi.
Nidang in hun tuamtuam ah Khristmas a na lawm ua, himahleh Rome Emperor Constantine khat hun (AD 336) apan khovel pumpi huap in December 25 kizangta hi. Khristmas December 25 ni a i loppen, ani lawm i hikei a, eite tan dia hong pai Jesu Khrist lawm i hi zaw uhi.

Bible a Khristmas zatdan tamlou i en ding:
a. Angelte: “Tungnung pen ah Pathian thupitak in om henla, leitung a a kipahpih mahmah mihingte lak ah lemthu leng hen” (Luka 2:14) chi in van Angelte’n Pathian phat in thupina pia uhi.

b. Belampute: Belampute’n gamlak ah Jesu Khrist pian thu Angel in ahilh bang in zing khovak le ngak lou in a pai mengmeng ua, Hondampa Jesu, gan ankuang a lum va mu in Pathian phat leh pahtawi kawm in a kiknawn uhi.

c. Mipilte: “Suahlam ah Aksi ka mu ua amah bedia hong pai ka hi uh” (Matt. 2:2) chi in hiai vanlam thilsuimite’n aksi lamdang hon zui ua, himahleh amau khuak pilna hon zang in Kumpi Herod insung vatung uhi. Himahleh huai apan hong pawtkhiak uleh a aksi zuih uh a mu nawn ua a kipak mahmah uhi. Jesu pianna Bethlehem tanpha pitung a om in Naungek Jesu Khrist a vamu ua, a muh un a gou manphate uh lan in Jesu a bia ua, Angel in a mang ua a hilh bang in lamtuam ah a kiknawnta uhi.

d. Simeon: Ni giat ni in Simeon in Temple ah Jesu a nu leh pa’n honpi uh a muh in a pom a “tuin na sikha khamuangtak in paisakta in na hotdamna lah na mit in a muta ngal a” (Matt. Luka 2:30) chi in sih khamuanna a ngah hi.

e. Herod: Mipilte khem a om ahi chih Herod in a theih in a heh mahmah a, Bethlehem khawkim a naungek kum nih nuailam teng a that hi.

Eite’n bangchin i lawm ding ua?
a. Eite’n zong Khristmas i zatna hun ah van mipite mah bang in Pathian mahmah thupina pia in, Amah pahtawina hun in i zang ding uhi. Tulai in khangthakte’n Pathian phatna adiak in lenkhawm lam i nelhsiah bawl sim ua, la bangle thei nawnlou, lunglutna le neilou i bang ua, lenkhawm kichi i pu i pa apan Khristian tawndan a i neih ahihman in i uangbawl ding uh ahi. Akhang akhang a i kipiak sawn ding, thugousiah a i neih ding uh ahi. Pathian pahtawina ahi a i uangbawl ding uh ahi.

b. Khristmas hun in Belampute’n khovak leng ngaklou a pai mengmeng a Jesu Khrist a mit ngei ua a vamuh bang un eite’n leng i khalam mit a Jesu mu in kipahna i nei ding ahi. Jesu a tak in mukei mahleng i khalam mitkha ah i muthei a, i kiang a om bang in i theithei, hampha hina maizen hang e!! I tang tel bang in nidang lai a zawlnei tampi leh misiangthou tampite’n eite muh leh zakte mu ut leh za ut mahle uh zalou in a na mangthangta uhi (Matt. 7:23). Jesu Khrist tuh eite kiang a om Immanuel ahi taktak hi.

c. Kumpi Herod in kisaktheihna leh hazatna toh Khristmas a zang a khelhna neilou naupang tamtak in a sihloh uhi. Ei deihdan bang a thil a pailouh chiang a heh a nuakna hun khong a le zat theih mahmah ahi chih a hon musak hi.

Thukhitna: Khovel kinoh tak leh buaina lak ah Khristmas galdot theinawn di’n Toupa’n honpi a i kipak mahmah hi. Tuni in Khristmas galdot a i om lai in i mimal leh khotang ah lemna kumpi pianna Khristmas in kituahkhakna nei in i thei hia? Ahihkeileh, angeina bang a zangzel maidi i diam? Van Angelte bang a Pathian pahtawina hun leh belampute bang a Pathian phat in mipilte bang a i neih goumanpha pen lungtang lankhia in amah i be ding hi. Huai bang a zang thei di’n Toupa’n simtute hon vualzawl chiat hen.