“Kingaihniamna leh migitna tengteng, thuaktheihna toh, itna a kithuakzou chiat in, Lemna Kha a kipumkhatna vom chinten ding in” Eph. 4:2-3.

THUPATNA: Laisiangthou in lemna Kha a kipumkhatna vom chinten ding in gingtute hon deih in hon hilh hi. Pathian in Amah gingtute kingainiam ding, migi ding, thuakthei ding, ki-it ding, kithuakzou tuah chiat ding leh lemna lungtang nei a kipumkhat a om ding in hon deih hi. Himahleh khovel khelhna ziak in tua teng kilehbulh in hinkhua zatkhak nilouh theih hi. Laisiangthou in, “Lemna bawlte a hampha uh Pathian tate chih ding ahi ngal ua” chi hi (Matt. 5:9). Lemna kichi i biak uh Pa Pathian mizia leng ahi. Gingtuten tua lemna lungtang i neih poimoh mahmah hi.

I. LEMNA KHA A KIPUMKHATNA: Pathian in gingtute i omna mun ah vuallem leh kipumkhat ding in mun tampi ah hon hilh hi. Gingtu hinkhua leh lemna kichi a kikhen theilou himahleh khelhna ziak in Pathian deihdan zuih sang in a deihlouh dan hinkhua i gingtu mimal hinkhua a zuihnop zaw a bat hun om thei hi. Laisiangthou in, “Sa dan a omte’n salam thilte a lunggulh nak uh; Kha dan a omte’n bel Khalam thilte a lunggulh nak uhi. Sa thilte deih zaw sihna ahi ngal a, Kha thil deih bel hinna leh khamuanna ahi. Sa deihdan zaw Pathian douna ahih ziak in. Huai Pathian dan in a om ngalkei a, om leng a om thei kei hi. Huchi in, sa a omte’n Pathian a kipaksak theikei hi,” chi hi (Rom. 8:5-8). I Christian hinkhua ah – sami hinkhua leh khami hinkhua om a, i thil etdan, muhdan, deihdan, saidan leh ngaih thupi zil in sami leh khami kilang chiang mahmah thei hi. Tua pawl nih ten lemna leh kipumkhatna a deih tuak ua, himahleh a etdan, a pomdan uh leh a khiakdan uh a kikelki. Gingtu hinkhua i zat lailai in Kha deihna sang in, sa deihdan a hin gige theih lai hi. Huai pen Pathian deihdan na hilou hi. Aman Khami tak a hinkhua zang a, i omna lamlam a gual toh kilem a itna nei ding in gingtute hon deih hi.

1. Kilemlouhna kipatna: Adam leh Evi hong khelh khak tak un, lemna leh kipumkhatna mansuah in a hong om hi. A khelhna ziak un kimohsak tuahna hong kipan a – a khelhna hih uh, Adam in Evi ngoh a, Evi in gul ngoh hi. Kingohtuahna hong om in, khovel ah kipumkhatna sang in kilang khenna mihingte lak ah hong om tou nilouh hi. Khelhna ziak mah in khovel kidouna phual hong suak hi. Laisiangthou ah khelhna gah i muh khenkhatte:
i) Adam leh Evi Eden huan apan delhkhiak ahihnung ua khelhna kimu nawn masapen tuh Kaina in a sanggampa hazatna, hehluatna, mahni kideihkhopna leh kiletsakna leh huatna ziak in Abel that hi (Gen. 4:8).
ii) Jakob leh Esau-te unau nu gilsung a a omlai pek un thuneihna kituh uhi (Gen. 25:22).
iii) Hazatna ziak in Jakob taten a sanggampa uh Joseph theih ngeilouh gam ah zuak ua, a pa khem uhi (Gen. 37:18-33).
iv) Israel tate gamdai a a vakvaih lai un, a makai pa uh Mosi makaihna soisel in nawngkai sak den ahihman un, Mosi khatvei sih utphial in lungkia hi (Num 11:14-15).
v) Kumpi Saul, Pathian namtel Israel-te kumpi masa pen, kiliansak mahmah hi. Amah tha khengtu ding David, hai zen in hazatna a neih man in, Pathian dan kalh in hong gamta kha hi (I Sam. 15:12; 18:6-16).
vi) Kumpi David hun nanung lam in, a tapa Absalom kumpi in hong pang hi. A Pa Pathian phawk, thah sawm in Pathian in laltutphah a piak suhsak hi. Absalom thuneih utluatna leh mahni kideihkhopna in khemna leh tualthahna tun hi. (II Sam. 15).
vii) Kumpi Solomon milim biak khelhna ziak in Israel kipumkhatna susia in, a nam sung uh lalgam nih kisuah loh uhi (I Kump. 12).
Hiai a tung ate apan in Pathian thumanlouhna leh khelhna thilhihnate in, kipumkhatna, lemna leh kithutuahna sang in siatna, kihazatna, kilangkhenna, kithutuah louhna leh pankhawm theihlouhna tun hi.

2. Lemna Khasiangthou: Laisiangthou sung ah, Toupa Jesu in kingaihniamna, sikha hihna, kingaihdamna, itna gingtute ading a a poimoh dan chiangtak in hon hilh hi. Huai bang i neih theihna ding a panpihtu ding piak hon chiam dungzui in, Pentecost ni in, gingtute sungluah ding in Kha Siangthou hon sawl hi. Hiai Kha Siangthou panpihna lou in, gingtute kingaihniamna, migitna, thuaktheihna, ki-itna, kithuak zoh tuahna leh lemna lungtang nei a kipumkhat chihte sami lungtang toh kinei thei ngeilou ding hi. A ziak bel “Sa in Kha a dou nak a, Kha inleng sa a dou hi; thilhih na tupte uh na hih theihlouhna ding un huaite a kikalh uh ahi,” (Gal. 5:17). Huaiziak in Pathian deihdan theihna ding leh hon hilh chiangtu ding leh hon pitu ding in Kha Siangthou kipoimoh hi. “Pathian Kha pi a om peuhmahte zaw, Pathian tate ahi ngal uhi” (Rom. 8:14). Kha in mi a pi chiang in, melmalte tanpha itna nei thei ua, amau hawte tanpha hoihna ding in panla thei ua amau hamsiatte vualzawl thei ua, amau simmohte thumsak theihna nei uh a (cf. Luka 6:27), bangzah tak in bawlsiat in om in, Joseph bang in hazatna ziak in character assassination na thuak in, dikloupi a hih minsiat a a om hun un leng, phuba lak lungsim nei lou in, Toupa kiang a thumsak theihna lungsim nei zaw uhi. Huai bang lungsim samitna toh neih theih hi ngeilou hi.

THUKHITNA: Gingtute Pathian mitna tellou leh Laisiangthou sinsak dan bang a i gamtat khaklouh chiang in, kisiat kibalna tung in huai in khelhna hih kha hon suak sak zelzel hi. Pathian thu i zuihlouh chiang in, ngaihdam theihna kinei lou hi. Huchi in kihuatna, kigensiat tuahna in hon suliam in, khat leh khat kimohsa tuah in i hun hoihte a liam zungzung a, i melma setan ading in ginom leh muanhuai i suak kha zel hi. Laisiangthou in, “A hihtheih liai leh, nou lama a kingakna tantan ah, mi tengteng toh kituak in khosa un, “chi hi (Rom 12:18 PEP). Gingtuten hiai khawng mah i leitung hinkhua zatna i zuih ding a Pa Pathian in a hon piak a thute i zuih chiang in ta thumangte kihi zel hi. Haksat hun, buai hun, lungzin hun leh kipah hun i tuah chiang a Laisiangthou hon sinsak thute zuih theih chih i Pathian thumanna ahih ban ah Kha mitna ahi. Huaiziak in, khovel khelhna sung-a kitaitehna sangtak lak ah ei gingtute, kingaihniamna leh migitna tengteng, thuaktheihna toh, itna a kithuakzoh chiatna te lenkip chinten in, lemna Kha a kipumkhatna vom chinten ding in muanhuai suah in, hiaite mah i gingtu mimal hinkhua a i sepkhiak theih chiang in midangte adia vualzawlna tuntu thupitak i hiding uh.