(Isai 9:6-7; Lk 2:8-14)

THUMAPI: Simtu deihtakte Bethlehem bawng-in sung-a hong piang naungek Jesu min in Kristmas chibai! Jawlnei Isai in Jesu Khrist pianma kum 700 BC vel in “Ngai un, nungak siangthou khat a gai ding a, tapa a nei dia, a min ‘Immanuel’ a sa ding uh” chi in a na gen hi (Isai 7:9). Tua kia hilou in “Ei ding in naungek a hong piang a, tapa piak in i omta; vaihawmna a liangzang ah a tuang ding a; amin ‘Lamdang’, ‘Lemthei’, ‘Pathian Hat’, ‘Tangtawn Pa’, ‘Lemna Lal’ chi ding uh” chi in gen nawn bok hi (Isai 9:6). Jawlnei Jeremia leh Ezekiel-ten zong David suan apan kumpi hong piang ding ahih dan bang (Jer 23:1-8; Eze 34:23-24), Sabengtung tung a a tuan ding tanpha a genkholh na uh Laisiangthou ah i mu theivek hi (Zak 9:9). Thukhun thak ah Pathian’ Angel Gabriel in, Nazareth kho nungak Mari kiang a tapa piak ding thu a genkholhna a kimu nawn hi (Lk 2:30-33). Hiai Tapa bang ding a piak a om hi hiam chih saulou in enkhawm leng uthuai i sa hi:

TAPA PIAK A OM NA: Judaten a pi leh pute hun ua pan tapa neihlouh kichi hamsethuak bang khop a a ngaih uh ahi a, leitung mi nam khenkhat ngaihdan leng ahi khamoh kei ding hi. Kristian sahkhua honglut ma hun in eilak tanpha ahleng, numei tapa neilou tuh mi phung mitang tangzou lou peuh chi in simmoh in, maak leh kaihkik tandong tuak thei uhi. Huaiziak in tapa piak a omna tuh vualzawlna leh hamphatna lian tawpkhawk ahi. Jawlnei ten a genkholh nung uh kum 700BC vel in, Bethlehem khua ah a tak a muh theih in tapa (Jesu) piak ahita hi. Jesu hong pian lai in dinmun niamtak belam chingte kiang ah Angel hong kilak in ‘Laukei unla, Ngai un, michih ading in tanchin hoih kipahhuai mahmah kon tut ahi. Tuni’n nou ading in David khua ah hondampa a piangta...’ (Lk 2: 11-12) chi’n thu kipah huaitak hong theisak hi. Huan suahlam mipil Aksi lam suipawlte kiang ah leng theihsak a om in ‘Koi ah ahia Judate kumpipa hong pian? Suahlam ah a Aksi ka mu ua…’ a chi uhi (Matt 2:2). Hiai tuh Jawlneite genkholh bang a Tapa piakna ahi.

MICHIH ADIA PIAK AHI: Khovel ah ‘michih ading’ kichi himhim bangmah a om theikei. Eden huan i pawtsan ni ua kipan mihingte tuh mahni angmasialna in hon luahdim vek in, thilhoih leh manpha himhimte midang ading i chi theikei ua, mahni ading kia a en in. Mahni hamphatna ding kia zong in i phe veng-vung mai uhi. Mi hausaten leng neihbeh lunggulh in, mi genthei leh nuainung zawte leng mahni ading zonna in hon kaibuai mahmah sek hi. Khovel fangsuak hial mahleng le ‘hiai tuh kei’ a ahi’ chih ding a vang mahmah, Inn hoih i muhte a neitu omsa, gam lianpi i muhte a neitu omsa, motor hoih leh changkang taktakte a neitu omsa ngen ahi. Khovel ah michih ading kichi himhim bangmah a om theikei. Himahleh, Jesu Khrist tuh “Michih ading” chih ahih tlat ziak in (Lk 2:11-12). Khovel ah michih neihkhawm leh kikawp theih omsun tuh Jesu Khrist kia ahi. India Prime Minister Shri Narendra Modi in Ayushman Bharat Health Scheme (Modicare) a hong khethak a, India a mizawng 500 million in a hamphat pihding khop khovel a health care lianpen dia kigen ahi. Ahia, Lamka zang a BPL Card kidaih lou chi theiten health card i khut in i tawichiat na diam? Hiai lam saugen dah ni. I gen nawp pen zaw khovel ah michih ading kichi om thei taktak lou hi. Himahleh tua Jesu michih ading chih ahih man in hampha hina maizen hang e maw.

KHOVEL POIMOH AHI! Van Angelten ‘michih ading in tanchinhoih kipah huai mahmah kon tut ahi’ (Lk 2;11-12) chi in khovel a theisak uhi. Sihpih tham natna tuak doctor in dam ngeingei na ding damdawi a piak bang in, khovel natna nei leh si ngeingei ding lai, a dam ngeingei nading in Tapa piak in i om ta, huai tuh Tanchin hoih kipahhuai ahi (Jn 3;16). Tua tanchinhoih Jesu Khrist ah khovel mel suk lamdang a om dan ngaihtuah mah in. Bangchik laimah a ki thurual ngeilou mimawl belamchingte leh khovel mipil scientist Aksi lam siamten kihou hetlou napi in, Naungek Jesu omna manoh in a pai tuak uhi. Bangziak hi ding ahia? Tunglam a pan theihsakna a dawng tuaktuak uh ahi ding. Bangteng hileh Naungek Jesu Khrist tuh mimawl pen leh mipil penten leng ‘hiai kei a ahi’ a chi ua, kihazatna om hetlou a, neitu hihna a tan tuaktuakna uh khovel mel lamdan na ahi. Khovel michih ading tanchin hoih a tunna peuh ah milian leh milal, mi nuainung tanpha hihna kibang in a om theita uhi. (Lk 1:52) Koimun peuh Jesu Khrist in lalpen ahihna ah unau khat bang in melmate nangawn toh kituahna awm thei hi.

TAPA NEI IN PESAWN ZEL DING: Tapa muchiantu diktak in mite piaksawn ding a veizui ngal hi. Sawltak Paul in ‘genkei leng ka tung a gikding’ a chih bang in, a muchiantu diktak tehna tuh a puandalhna nasep ah kilang ding hi. Mission lam awn in genta leng khovel gamlim (globe) en mah in; a lai a line kigit equatorial region tuh gammial sahna mun pen bang a ngaihsut ahi. World Christian Encylopedia - 2001 in a taklatna ah khovel ah mihing 6,055,049,000 a om a, Kristian 33% kia ahi hi. India gam census 2001 apan enleng Hindu 74.33%, Muslim 14.20%, Kristian 5.84%, Sikh 1.86%, Budhist 0.82%, others 2.95% dan a chiamteh ahi. India gam a Hindu kulmut RSS kichiten a sahkhua uh a humbitna ding ua govt. thahatna zang a pan alakdan uh i mu ua, Mosolman sahkhaw zuite a sahkhua ua dia a kipiak na uh huaisiat dan te i thei hi. ISIS leh Taliban kichiten politics sangmah in sahkhua humbit nuam a lubuk phal ahihzawk dan uh a muh theih hi.

Bangteng hileh, michih ading Tanchinhoih in doutu ahauhzoh peuhleh a dalhzak zel ding chih ahi. Abultung apan Rome kumpi-13 hial in kum-300 sung vingveng dou mahle uh, a douzou kei uh. “Kaisar lou kumpi dang ka neikei uh” (Johan 19:15) chi a kikou ten, Rome gam mah ah “Jesu tuh Kumpi ahi” a chi zaw uhi. Michihten amau’ a diktak dia piak a om hiai Tanchinhoih a ngah hun chiang un, khovel sahkho dangdang betu tengteng Khrist belamnou maah suktuah vek in i omta ding uhi (Eph 1:10). Huai hun chiang in michih Missionary te tanpha inleng leave nget ngai nawnlou in, tangtawn in Pa kiang ah khawl tawldam hun ahita ding hi.

THUKHITNA: Phalbi khovot hongtung a tangsam pakte hong om chiang in, Bethlehem ngaihna tulsa lungsung ah hong thak zel hi. Ahia, tulai in mi tampiten Krismas ni a biakin kai leh lenkhawm sang in gari zang a khodung leh vai a vialdian utzaw, carol nuamsa zaw, kholai dung a thawmging toh chiauzen a nuamsip bawl utzaw bang ki-om kha thei hi. Khrismas nang ading in bang ahia? Bang na chi zat a chih kivel thak mah in. Tapa Jesu Khrist piak a i om nasan theichian loute ading in festival khat bang lel ahi ding a, a khente ading in picnic day hiam, Ningolchak Koubah khawng bang a zatkhak ding kivel huai mahmah hi. Tapa tuh khovel kilem lou lemna kumpi ding a piak ahi (Isai 9:6). Huai in mihing leh mihing kal lemna, Pathian leh mihing kal lemna a hon tun hi. Michih hondampa ding a piak ahi (1 Tim 1:15). Khelhna sal apan suahtakna dia piak ahi (Johan 8:36) Simtu it aw, tuni in Tapa Jesu Khrist na sangta hiam? Tua na san kei leh Khristmas nang ading in a mawkna lel hi ding hi. Toupan hon vualzawl chiat hen.