THUPATNA:
YOGA in khovel mun tuamtuam hon zel in, ei kiang nasan ah Sorkal department khenkhat tungtawn in puaklut in hong om ta hi. Mi khenkhat in taksa-lungsim hahsiangna leh kisawizawina dan a ngai in sui sau sese lou in ana hih tei mai ua, khenkhat in lah heutute thumanna chi in sel seselou in zui mai uhi. YOGA bang hi a, a sung ah bang kiphumgu hiam chih sui nounel zek le i chi hi.

BC kumzabi 2na in Hindu sinsaktu Guru Patanjali in Yoga ana pankhia hi. AD 1893 in ‘mihing-pathian’ kichi Sri Ramkrishna nungzui Swami Vivekananda in pilvang tak in khovel pumpi a thehzakna ding in chi ana tuh hi. AD 1920 in Tumlam gam ah Self Realization Fellowship chih pankhia in hiai tungtawn in mun tamtak ah thehzak hi. Tuin kumteng a June 21 ni International Yoga Day chi in North East India State te tanpha ah zat in om hi.

THUBUL:
Sanskrit thumal ‘yogah – kigelgawt / kigawm / kipumkhat’ apan in YOGA hong piang a, ‘khalam kigelgawtna genna in kizang hi. India ah sahkhua vai a mimal kisawizawina leh kithuzohna genna in kizang hi. Yoga hih mite ‘yogi’ kichi hi.

BULSUTNA:
Yoga i chih Hinduten hotdamna lampi 6 a neihte uh lak a khat ahi. Hiai hotdamna lampi 6 te tuh- Nyaya – sui nounelna (analysis); Vaisesika – mizia sutna (school of character); Sankhya – thilsimna (the count); Yoga – kigelgawtna (to yoke); Mimamsa – kanchetna (enquiry), leh Vedanta – Vedas tawpna. RS Tripathi in “Upanishad in thugin poimoh tak Chandogya leh Brihadaramyaka in Hindu thugin Darshanas - Sankhya, Yoga Nyaya, Vaiseseka, Purva and Uttask-Memaisa te tunkha ahi” chi in ana gen hi.

YOGA TUP:
Yoga in atup tuh muhtheih khovel (material world) toh kikhenkhiak a Hindu pathian Brahman toh pumpi khat a om ding chih ahi. Yogi te hun sawtpipi naklou in om thei ua, a lungphu uh thuzoh thei ua, vot leh lum bangmah a simlou in, anngawl leh gilkial thuakhat ua, upat leh tek nung in leng navak leh chiim in sawtpi hat uh chih gingta uhi. Yogi ten mihing leh pathian pumpi khat a om theih gingta uhi. Huai ziak in midangte sang a khalam tungsangzaw a kikoih in amau leh amau thupi kisa in ki bia hongsuak thei uhi.

YOGA IN ATUUNKHAKTE:
Yoga in atun khak poimoh mahmah thum om hi.
1. Taksa Sawizoina (Physi-cal Exercise): Taksa leh pumpi hiangte sawizoi a, hulak leh nak dan kizil ding.
2. Lungsim Ngaihtuahna (Mental Meditation): ngaihtuahna ahoih leh hoihlou apan lungsim awngsak a, tawldamtak a om ding.
3. Thumal Gentuan (Verbal Chanting): OM chih thumal gen tuan zihzeh ding. OM– Hinduism ah kha in a houpih theihna dia lungsim kihonna dia thumal siangthou a ngaih ahi.

YOGA SINSAKNA:
Bhagavad Gita thutuun poimoh mahmah khat tuh Yoga ahi
• Bung 2 chang 48, Krishna in thukkik lou dia Arjuna a thuhilhna ah, “Na mohpuakna ah ginom inla, lohchin leh lohsap ding kisubuai sak ken, O Arjuna.” Hiai lungneelna Yoga akichi.
• Bung 2 chang 50, “Kuapeuh lungsim sawizoi tuh thilhoih hih ahi a thilsia tung a vualzou ahi. Huai ziak in Yoga hih in O Arjun, huai tuh thilhih ding dan ahi.”
• Pathian bat theih ding dan Arjun in a dotna ah Krishna in, “Yogi-te duhgawlna apan a kihepkhiak ding uh ahi. Huai ziak in duhgawlna omsak thei kongkhakte khak vek in. Mahni ki mangngilh a thumal siangthou OM chikawm a Yoga hih a toupa ngaihtuahte khovel tunglam pek a khami ahi.”
• Bung 3 ah Karma Yoga; Bung 5 ah Karma Yoga-action in Krishna consciousness leh
• Bung 6 ah Sankhya –Yoga te kigelh hi.

Kum 2000 vel paita in Yoga Sutra ah Yogic sinsakna point 5 in ana khen uhi.
1. Pathian (God): Yoga pathian ‘Ishvara’ ahi a, OM chi in kisam hi.
Ishvara pathian, theihna tengteng kipatna ahi (Yoga Sutras 1.25)
Ishvara pathian, OM chi a sap leh theih in a om hi (YS 1.27)

2. Thumna (Prayer): thusam nei a kizopna thukpi neih ding (chanting repeated mantras)
OM chih thumal sam in athuk zosem a pathian toh kizop ding (YS1.28-29)

3. Biakna (Worship): kha (spirit) zahtakna pekawm in aging a dawi (demon spirit) sap a thahatna neih ding. Etsakna, nisa mai a kun ten nisa pathian abiak bang un. Yogic ten leng a omdan (posture) te ua tha petu ganhing leh solte’ (solar bodies) pathianlim ching ahi uhi. A thusam kisinsakte uleng pathian leh tha petu sapna leh biakna ahi hi.
Hu’ lakdan leh thukpi ngaihtuah dan kisin kawm a Yoga hih in hon thuklutsak sem hi (YS 2.46-55)

4. Kha toh kihouna (Communicating with Spirit): Yoga Sutras ah dawi thudot dan (divination) leh bumhai dan (sorcery) kigelh hi. Hiai tungtawn in khalam gam leh dawite toh kithuzak thei in thil theihtheihna, thil hihtheihna leh thiltuah lamdang pipi omsak thei hi.
• Yogi ten lungsim thuzohna zang in hun paisa leh hun hongtung ding gen khawl thei uhi (YS 3.16, 3.22)
• Lungsim thuzohna tung-tawn in khate muthei ua kihou thei uhi (YS 3.25, 3.32)
• Lungsim thuzohna tung-tawn in mitkhial dawi (sorcery) thilhihtheihna tuamtuamte nei thei uhi (YS 3.17 – 3.38)
• Lungsim thuzohna tung-tawn in theih theihna sangpi neihtheih hi (YS 3.5)
• Damdawi, dawi biak leh yoga tungtawn in thilhihtheihna lamdang neihtheih hi (YS 4.1)

5. Hih ziak (Purpose): Yogi te tup: Yoga Sutras a kigelh bangbang zui a theihna, pilna leh zalenna nei dia pathian suah (one with god), (YS 1.1 – 4.34)

INDIA DAN BUPI (CONSTITUTION):
India Danbupi Thumapi (preamble) ah India tuh Sovereign Socialist Secular Democratic Republic hihsak a gamsung miten Dikna, Zalenna, Kikimna leh Kitanauna a neih chiat ding chih gelh ahi. Secular thumal in a gen tuh ‘Gamsung ah sahkhua tengteng a kibang a humbit in gam pumpi sahkhua chihbik a om louh ding’ chih ahi. Thumapi in hinna leh biakna leh sahkhua zalenna hon chiam pen Fundamental Right sung ah Article 25-29 in Sahkhua Zalenna mimal chih in amau ginna zalentak a gen a, zui in, a puangzak thei ding ua, State leh a kisinsakna munten bang sahkhua mah a deidan thei kei ding chih ahi.

Huaiziak in sahkhua toh kisai a India dinmun tuh:
1. India in sahkhua bik (state religion) anei kei.
2. State in sahkhua a deidan theih ahikei
3. State in sahkhua hiam sahkhua sinsakna phung-vuhna dia tax lak phal ahikei.
4. Sorkal siamsinna innte ah sahkhua thu sinsak phal ahi kei.
5. Sorkal theihpih (recog-nized) hiam sorkal apan panpihna mu siamsinna inn te ah naupangte utna tellou a phutluih in sahkhua vai sinsak theih ahi kei. Sahkhua khatpeuh te dinsuah siamsinna inn te ah leng naupangte lemsakna kia in sahkhua vai sinsak theih ahi. Naupang melmawl (minors) te amau enkoltu (guardian) te lemsakna kia a sinsak phal ahi.

LAISIANGTHOU SINSAKNA:
Laisiangthou sinsakna poimoh Thupiak Sawm a kigen ‘Kei lou pathian dang nei ken, Milim be ken, Toupa na Pathian min amawkna in lou ken, Khawlni tang in’ chih ahi. (Ex. 20: 1-11; Deut. 4 : 39; 5: 7; 30: 17; Jdg. 2: 12-13; 1Cor. 8: 4-6; Gal. 5: 19-20).

Laisiangthou in gingloumite hihdan bang a thumna gen tuantuan lou ding in hon sinsak hi. (Ex. 23: 13; Deut. 12: 3-4,30; 13: 1-4; Matt. 6: 7). Ban ah aisan hiam, khanin kiang a vatai leh dawi kiang a kithoih te hon kham bikbek hi. (Lev. 17: 7; 20: 6, 26-31; Deut. 18: 9-12; 32: 17; Mal. 3: 5; 1Cor. 10: 20-21; Rev. 9: 20-21; 22: 15).

Laisiangthou in Pathian batna nei ding in hon hanthawn a Pathian suak ding in hon sawl ngeilou hi (Phi. 3: 7 – 14; 1Jh. 3: 2). Jesu Khrist kia lampi, thutak leh hinna omsun ahi a, Amah ginna tungtawn kia a hotdamna ngah ding, nasep ziak hiam mihing panlak ziak hilou ahihdan hon sinsak hi (Jh. 3: 16-18; 14: 6; Eph. 2: 8-9; Rom 10: 9)

Laisiangthou in Pathian akipan i muh uh pumpi pen Pathian hing temple leh man a leisa ahihman in Pathian pahtawina ding kia a zat ding a chi hi. Ut dandan a zat ding leh taksa gelgawt zialzial ding phallou hi (1Kor. 6: 19-20; 2Kor. 6: 14-18).

THUKHUPNA:
Hun nunung a om i hihtak man in melma Satan in hihdan tuamtuam leh vanzat chi tuamtuam zang a hon khem ding chih Laisiangthou a i muh sa ahi. Khelhna lak a kiven ding kia hilou in akilatdan a gilou bang a kilangte lak ah leng kihem ding a sinsak i hi. Diabol zekhemnate douzou ding in Pathian galvan kim la ni, i melmapa humpinelkai bang a suksiat ding zong a vialvak ahi.

“Ginglou mite toh kituaklou pi a hakkol pokhawm in om kei un; diktatlouhna leh diktatna in bang ahia kikopna a neih uh? Ahih keileh mial leh vak in bang ahia kithuahna a neih uh? Belial leh Khrist in leng bang ahia kituahna a neih uh? Ahih keileh ginglou leh gingmi’n bang ahia tankhawm a neih uh? Milim leh Pathian temple in leng bang ahia kituahna a neih uh? Eite zaw Pathian hing temple i hi ngal ua” 2Kor. 6: 14-18

Endnotes
1. Christian Research Institute, How Should Christian Respond to Yoga?
2. What is the Christian View of Yoga?
3. A L Basham, The Wonder that was India, Ruper & Co.,p328
4. ibid p328
5. RS Tripathi, History of Ancient India, Delhi: Motilal Banarusidasa, 1977, p53
6. What is the Christian View of Yoga?
7. Basham p.329
8. viii What is the Christian View of Yoga?
9. Certain syllables were believed to be particularly holy, notably ‘OM’(the Pravana) which contains the essence of the Vedas and is pregnant with the utmost power and mystery – Basham p.242
10. Sandeep Poonen, Yoga and the Christian, This email address is being protected from spambots. You need JavaScript enabled to view it.
11. “Bhagawad Gita is the most exalted and beautiful of India’s religious poems, which teaches a fully-fledged theism and is part of the more recent Hinduism rather than the Old Brahmanism, which slowly changed from a religion of sacrifice to one duration” Basham p.255
12. SD Goswami, Reading in Vedic Literature, The BV Book Trust, 2000,
13. What Does the Bible Say? The Teachings of Yoga and the Bible are Antithetical, https://www. truthbehindyoga.com/what-the-bible-says1.html
14. Drugs- invoking spirits with altering substances; mantras- invoking spirits by sound; yoga- invoking spirits by movement- ibid p.5
15. Durga Das Basu, Introduction to the Constitution of India, New Delhi : Prentice-Hall of India Pvt Ltd,p20-21
16. Ibid p. 27
17. Vijay Jaiswal, Right to Freedom of Religion in Indian Constitution: Secularism, https://www.importantindia.com