Thupatna: Hiai article ah Depression bang ahia, bang a hong kipan, a veite bangchi om/bangchi kilat hiam, bangchi kep ding hiam? chih thu tamlou i gen ding hi.

I Saptuam (EBC) Pathian vualzawlna in i kibehlapzel ua tamlam in 60000/70000 (milip) bang ah Depression/kingaihsiatna i chihte a uang mahmah mai a hiai in minam, inkuan naktak a hon sukha ahihman in puaknat-huai lua a tuate daal dingdan hiai apan ngaihtuah in mi malmal, saptuam in panla thei leng ka ut petmah hi.

DEPRESSION BANG AHIA? Hiai hih ‘sappau’ ahi a, lungkhamna (sadness) Low of spirit, chiin kilet a, ahih ziak in i theihsiam din ‘KINGAIHSIATNA’ chiin letleng atangpen ding in i gingta.

HONG KIPATNA: Hiai hih pianpih Haina ahi zenzen kei, sia leh pha theihnung a mihing lungtang a hong kipan ahi.

HIAI NATNA VEITE KILATDAN TAKSA AH –
•Ihmut haksa sa or khanloh chia ihmu thei nawnlou.
•Thadah, thatawl pahpah, seppeih neilou, zoi demdum.
•An duhlua or ankam limni neilou.
•Tha le zung kham nat, tawl demdum, lung-am zelzel, dipko huthut, awmbing, luna, kho-ul neel pawtpawt, kinoh tengtung, thil mangngilh hat, ning kitel, nak haksasa, chi hik mulmul leh ekkhal i chihte depression i neihchian omnuam mahmah hi.

LUNGSIM LAM A KILATDAN
•Thilteng lungkhamna ngen a ngai a lungkham vungvung, ahih keileh lungkhamna dan le theilou.
•Kuamah toh le omkhawm nuamlou, tuam om ut, kuamah ngaihsak utna le neilou.
•Chiamnuih dong theilou, hehna kitheilou a heh mawkmawk.
•A ziak omloupi a kahtha suak chi a kap nemnom thethup.
•Thangpaih tha suak mawkmawk, kisiamtan louhna lianpi nei bang a ki ngaihtuah mawk. Ahih keileh mahni a chingpen/pilpen/hoihpen hi a kikoih lian mawk.
•Bangmah lunglutna leh kilawpna himhim neilou, lametna neilou himhim lehlam ah thil banghiam midang apan mu dia kilamen mawk.
•Kingaisang mahmah mawk lehlam ah lunglel demdum bang a om.
•Hiai bang natna vei alah mi theih ding lau a ki selsel in lah kisel zou tuanlou, lungtang natluatna nei ahi chih min thei veve.

AKEP DINGDAN
•Hiai pen lungtang natna ahih ziak in khovel lam ah et in psychiatrist te kiang naih theih, huaite sangmah a spiritual counsellor te Pathian mizatte mah a damna om ding hi. Doctor-ten damdoi honpe dia vangneih or Pathian kep ahihtuan keileh damdoi in dam mawkmawk lou dia, damthei hi.
•Ei Pathian tate damna taktak din zaw ‘Khrist tanchin leh na omdan uh kituaksak photphot un’ chih i Laisiangthou in hon hilh dan in khosak ding tup in neileng, i lak ah tuate omlou ding hipen hi.
•Pathian i phawk zohlouh luatna uh tuh hiai natna hon piangsaktu hipen in kilang hi.
•Nang ngaihtuah hat ziak in hiam, gelsiamna in leitung thu et in zaw na kem dam kei ding chih thei inla, Toupa zong in, a nailai in sam zaw in, amah ah natna chikim damna om hi. Sum sen ngailou, amanbei, pathiante’ Pathian, daktorte’ Daktor naihpen in nei ni, unau.

Hiai DEPRESSION CHI 3 IN PSYCHOLOGIST-TEN A KHEN UA EN NAWN NI:
1. Mild Depression: Hiai veite tuh niteng khosakna hon su nawngkai zou nailou, a kallak a om thei zelzel hih thohlai. Kikep baih poimoh a hun laitak ahi.
2. Moderate Depression: Hiai hun ah ahihleh a natna uangsim mahmahta, niteng hunzat nawngkai sak mahmahta. Hiai hun tan a ngei ngahlou a na omleh damna muh haksa mahmah ding, Daktor naih hiam counsellor-te naih ding hita lechin leng, a suukpi dinmun tung nailou deuh hilel na hia, zumna in ngai kenla, damna na lunggulhna pen adin kisata in, kin in. Hiai stage ah sia leh pha theihna hoihtak neilai i hihman un damkhiak a baihlam lai zek hi.
3. Severe Depression: Hiai hun/dinmun stage kha a tawpkhawk tunna ahi a, hiai natna veiphot phot tuh Daktor naih kikhelte Counsellor-te loungal or Pathian loungal damna pethie om nawn kei a, lametna beita bang ahi. Aziak bel taksa natna hilou a, lungsim natna ahih ziak in Cancer a huntak a kep ahihleh (Daktor tungtawn in) damthei a, ahih ziak in Cancer natna keptheih vual nawnlou dinmun bang ahi geihta.

BANGZIAK A HIAI NATNA VEI THEI MAWK I HIA?
1. I khuak a chemical-te a kichuplouh ziak.
2. Vitamin khenkhat taksap ziak.
3. Khuak meimat ziak
4. Gawl natna hypo/hyper thyroid ziak ahi thei.

Hiai dinmun tungkha, thuak kha nupa omte hehpihhuai petmah ua, tua bang a omkhate nupa hihna hoihtak a hong om theilou a, a zi ziak hiam/a pasal ziak hiam a kikem theilou a om hun unleng, nu leh pa’n ka tanu/ ka tapa hi chi ahih chian khasiatna in i la kei dia vangsia leh vangsia kiphukha i hi a, chi a i kikhen sak a kisimmohna hiam thil a la hetlou a lungkimtak a nu leh pate/insung tate kihou siam poimoh lua, mi kideih a kiteng hinapi khamtheih guihtheih ziak a kikhente leh tua bang lungsim natna nei a nupa kikhente ‘case’ kibang hetlou ahihman in numei/pasal nulepa tuaktuak inleng thil kisimmohna a lalou hial a Khristianhuai tak a thil i lak poimoh lua hi.

Na tanu mi mou kuan hinapi hiai natna nei in mi insung ah va omleh bang na chi ngaihsut dia? Zumhuaina in leh kisuanlahna in na la thei diam? Lemna zong unla, a delh in delh un, itna loungal kuamah bangmah ba kei un, ki-ittuah chiat un, chih Pathian thupiak thei in khosa chiat leng chih lunggulh huai sa petmah in tua bang natna veite ka thuakpihnate kei kia hihtheihna a bangmah hilou ahih ziak in...

I saptuam sung ah a biik in nupa zi le ta a kinei hinapi a pasal hiam a zi hiam tuabang lungtang natna vei a i deihtel leh utpen/tuppen hiloupi a pasal/a zi hiai natna neih ziak nupa kikhen tampi omta, poilua! Chiamnuih sak kei ni, poisak pih in, thumpih ni, a nihtuak un.

A biik in numei tuabang lungtangna neiten a pasalte uh hiai bang in mu uh/thei in ngaihtuah mawkmawk uhi.
1. Pasal omlou a insung a om theilou.
2. Pasalte mi toh kithuah ding phallou/miteng toh muangmoh.
3. Insak inkhang toh kikawm le ut vetlou.
4. Pasal-te toh kia om ut, Pathian a thumsaktute thu ngaihkhiak utlou.
5. Pasal nulepa, sanggamte mu peih se lou.
6. Thil kilawm hia hilou chih lungsim a neilou bang a hehna ding zong a hang toihtoih mawk.
7. Septuak tampi omte sepna tang theilou, etna ngal khauhtak a en gegu.

Tua bang natna nei Nupa, a pasal hiam a zi hiam ahihleh insung haksatna lianpi suak a, tuabang miten a tunga point i gente lou leng zite/pasalte a veilou penpen thuakdin/thuakna, lungngaihna tamtak omlai ahih man in ka pasal, ka zi koihkhiak a kikhen mailouh lungsim damna ding omlou chi a kikhen a tam mahmah ta mai a, panla thak ni. Severe depression i tun chiang in misiam mipil hih dam theih vual ahih nawnlouh ban ah Pathian adin leng buaihuai ban din i ngaihtuah hial hi. A ziak tuh – Pathian/Bible chih genkhak chia zadah.

Pathian a thumsak tute thu leng za peih nawnlou uh ahihman un, si guih tale uh a kha Pathian kiang a tung ngei ding, a lungmuanhuai e chih gen ngam ahi kei ding in ka gingta.

Hiai last stage pen a tawpkhawk dinmun ahihman in mi lak a kiseel vual hi nawnlou, a natna in semkheta, ‘mi hai’ ahihke’h ‘lungsim mawk’ chih dinmun tung hita. Hiaite Pathian loungal a damna ding omlou hi. Hiai bang natna i saptuam ah i minam ah beithei leh i chi petmah hi.

I saptuam, inkuan leh mi malmal in phattuampihna i neihtheih lamen petmah in hiai thu ka hon gelh hi. Hiai thu simtu tengteng Toupan hon vualzawl henla, mite hehpih theihna toh khosa thei din Toupa’n mi malmal leh i saptuam hon vualzawl hen.