Johan 4:23,24. Himahleh ahun atung dekta, tuin leng atungkhin lel, huai hun chiang in Pathian be taktakten kha leh thutak-a Pa be ding uh ahi, Pa’n huchibang mi a bemi ding in a zong hi. Pathian zaw Kha ahi; a bemiten kha leh thutak a a biak ngeingei ding uh ahi, a chi.
Diut.6:5. Toupa na Pathian uh na lungtang tengteng un, na lungsim tengteng un, na hatna tengteng un na it ding uh ahi.
Thumasa: Amasa in Kumthak 2019 dam a hon musak a, tu akha nihna (February) tanpha honpikai i biak Pathian leh i Toupa Jesu Khrist min in simtute tengteng Kumthak Chibai kong buk hi. I Saptuam (EBC) in tukum a ‘Pathian Pomtak Biakna’ chih thupi a i neih utoh kisai a tukha a i thupi ding uh ‘Kha leh Thutak a Pathian Pomtak Biakna’ chih thu gelh ding a heutute apan deihsakna ka tankhak leh hamphatna piak a ka om man in amaute tung ah ka kipak a; gelhthei ding a chidamna hon pia Pathian min ka phat hi. Khalui (January 2019) in KTZ Editorial ah leh seppih Pastor K. Pumsuanthang ten Pathian pomtak Biakna toh kisai kibulphuhna lam ahong gelhta uh a, tutung in huailampangte settheih sawm in i tangteelte pansan in kikumdeuh leng i chi ahi. Bangteng hileh apoimohna bang in hong kilangkha thak bangleng hong om veve maithei ahi, chih ana theisiam masa ding in i kingen uhi.
Hun paisate a bangchi bang a miten Pathian ana bia uh ahia? Bang hun a Pathian biakdan kikhek ahia ? Bang ziak a biak dan kikhek poimoh ahia? Bangchi bang a biak Pathian lungkim/kipak ahia? chihte a dawnna dan in hon gelhle’ng ka chi hi.
A. BIAKNA MUN THU AH:
I Laisiangthou tangteel, Tanchin Hoih Johan’ gelh ah Samari numei in Jesu kiang ah, “Kou piputen hiai tang (Gerizim) ah Pathian a be zel ua; himahleh, nou bel, Mihing in Pathian a biakna mun ding Jerusalem khua ah a om na chi sese ua” chih ahi (t.20). Hiai thu apan i muhtheih tuh nidanglai a mihingten Pathian biakna mun chi leh nam pansan a ana kineihtuam uh ana hidan ahi. Huai tuh chi-le-kuang a kideidanna ahi. Huai lah Pathian kipahpih lam ahi ngalkei a. Thukhun lui hun leh Jesu hunlai tan ah leng Biakbuk (Temple) sung ah tutnamun/omtheihna mun ding Pathian bekhawmte lak ah kikhenna (huai tuh- Mi vantangte mun, Mun siangthou leh Mun siangthoupen) ana om lailai ahi (Jesu, Jerusalem a Kumpi ahihna bang a a lut ni a Temple a a va hohna thu apan), chih i mu hi. Hiai a Jesu gentak ahihleh Pathian biakna kichi aminpu a chiindan a neihthoh(formalism/rituals) mai hilou, leh munkhat kia a Pathian kikhumbilh hilou ahi, chih ahi. Hiai minam nihte (Juda leh Samari) bang in ei tulai khangten leng chi-le-kuang a kikhenna, aminpu lel a biakna, phatuamngaihna leh, i pu i pa ua pat a chiindan a i neihte Pathian sang-a thupi koihzawkna neikha i hi uhiam? chih hon ngaihtuahsak thei hi. Hiai i chih hang in, tu a Biakin hoihtak leh etlawm taktak ineihte neihlouh ding chihna hiam, huai munte a Pathian biakna va neih phatuamlou hiam, i va kikhop chiang a i thil hihteng Pathian pomlouh leh huat ngen ahi i chihna ahi pah kei hi.
Ahihleh, bangchik hun a? koi mun a biak a? bangchi biak Pathian pomtak/deihdan hi ding ahia? chih tuh dotna hong piangkhe pah ahong hita. Ensuk zel ni uh awle.
B. TUIN (NOW):
Ahun atung dekta, tuin leng atungkhin lel, huai hun chiang in Pathian be taktakten kha leh thutak-a Pa be ding uh ahi. I Toupa Jesu Khrist hong piankhiak toh kiton in Jerusalem seselou ah leng mihingten Pathian ana mu un ana beta uhi. Jesu Khrist in leitung a nna a seplai in mun tuamtuam ah a pai kawikawi a, a paina peuh ah Amah poimoh kisa mite leh ahihna munchianten ana delh huthut ua, temple khelkhellou ah leng a beta/pahtawita uhi. Huaiziaktak ahi ahun atung dekta, tuin leng atungkhin lel, a chih. Hiai mah tuh tuni tan aleng paitou in, kuapeuh in Pathian hihna theihna bangbang in koimun peuh ah a kipahpih leh pomtak in biakna neithei gige ahita hi. Huai omdan bel, koimun peuh ah Pathian om a, ka ngaihtuahna teng thei a, ka sep ka bawl peuhmah hon mu ahi, chih thei a Amah zahtak a hinkhua zat, i chihna ahi. Hiai i chih ziak a gingtute biakkhawmna mun leh Pathian mahmah in “na lak uah ka min omna ding mun hon bawlsak un” a chih, Biakin a Pathian va biak kul nawnlou chihna ahi kei. Biakin pawlam a khosakna a Pathian zahtak tak-a hinkhua zangten tuh a Biakin leng a ngai tuntun zaw un, a kithalawp ding uhi. Ka hinna in Toupa Biakin huangsung intualte a ngai mahmah a, ahi, a bahpih hial a; ka lungtang leh ka sa tuh Pathian hing kiang ah a kikou khia” (Phat.84:2) mi’n ana chi hial zawmah uh eive. “Kikhop hun le tamlua, aninhuai” chithei mi na hih inzaw thildang leh mundang ah leng na fuhtuan kholkei hial ding.
C. KHA LEH THUTAK A BIAK DING:
Atung a i gensa bang in, Jesu hunma khawng leh Amahmah hun tan ah leng Judate leh Samari miten biakna a neih chiang ua ngeinadan zuihna mailel, Pathian it/ngaih tuntunna ziak ana hiveklou, chihtakna leng ana kihel kimlou hikha ding hi. Huaiziak mah ahi Juda sabiak a heututen (Pharisaite, Laigelhmite leh Siampute) Jesu ana huat ua, ana kalhkalh nilouh uh. A nungzui ngoihngoih 12 te lak bang a leng Peter loungal ahihnatak ana theiloupi a ana zui minpu hihtuak uhi. Jesu’n a nungzuite kiang a, “Miten, Kei kua ahi hon chi ua?” chi a dotna a bawl khit in, “ahihleh, nou, Kei kua ahi non chi ua?” chi in dong nawn a, Peter chauh in dawng dik thei lel hi (Mt. 16;13-17:). Jesu’n, miten Pathian hihna diktak a theih ua, a pomtak a biakna Amah a piak ding uh a deih/awlmoh mahmah ziak in, “Pathian zaw Kha ahi a, a bemiten Kha leh Thutak a a biak ngeingei ding uh ahi” a chi hi. Tuchiang in eite bangleng, Gospel Centenary tungkhinta, za lak a za (100%) khristian hita i kichi ua, thukhat ah kipahhuai lua. Himahleh, Pathian’ hihnatak theichianlou, aminpu lel a Khristian i tam mahmah lai ziak ua i inkuan, i nam vaisaina uh, leh i khotang hinkhua uh hichi neknuk nilouh hidan ahi, chileng kikhial lawlou ding in gintakhuai hi. Hichi i hih ziak uh ahingei ding, i lak ua Pathian thugen ding a gamdang apan i chial hiam, i chiallouh a hongpai tapeuh in Pianthakna thu a hong bulpatpih nakveu uh. Ei lah chu, Khalam a asang a sang, Vangam vamukhin/agimnam khinta a kikoih zawmah lai! Huaiziak a, Pa’n huchibang mi a bemi ding in a zong hi” a chih, eite laka leng dik lailai hi.Hiai i chihna ah khenkhatten, ahihleh tu a i biakna dan teng bangmah phattuamna omlou, Pathian pomlouh vek hive maw? i na chi ahi maithei. Avek a pomtaklouh i chi kei a, himahleh apomtak biakna i pia un i kithei na uhia? chihthu ahi. Mihing lam ah tuh theihna taksap ziak leh ngam zohlouh ziak bang in bangtan hiam i hih nakleh ei leh ei kilungkimsak chih bang ana omthei lua hi.
D. AHIHLEH, BANGCHIH TA DING?
Kha leh Thutak a Pathian pomtak biakna i neih theihna ding a kisam leh Pathian hon ngiatte bangbang hi hiam chih i theih a, huaite tuh eimah-a a om a poimoh petmah hi. Huaite tuh- Toupa na Pathian uh na lungtang tengteng un, na lungsim tengteng un, na hatna tengteng un na it ding uh ahi. Pathian in mihing lam a hon ngiat masakpen leh a etpen tuh i LUNGTANG ahi. Ka tapa, na lungtang hon pia inla, na mitte ka lampite ah kipak uhen (Pau.23:26), chih bang; Mihing in zaw pawlam-a latdan a ensek ua, Toupan bel lungtang lam a enzaw sek hi (1 Sam. 16:7) chihte khawng apan Pathian in i lungtang hon en ahi, chih achian mahmah hi. Lungtang-a chihtakna leh kiminna omloupi a adan a neihthoh a hih guigui bang; ahih keileh, pawtham a muhtheih a kilawm lam kia buaipih leltak a, Amah biakna zaw Pathian pomtak ana chinglou ahi chih hon theisak hi.
Ginna a i Pa uh Abraham in a lungtang tengteng in Pathian a it a, a tapa neihsun Isak halmang kithoihna a lat ding in a pia ngam chih Pathian in a theichian a, ataktak in a thatsak kei, chih thu i mu uhi (Gen.22:9-12). Hiai omdan bel, a lungtang tengteng, a lungsim tengteng leh a hatna (resources) tengteng a Pathian a it ziak a hichitan a Pathian ana biak, Pathian inleng a pom a, vualzawlna achiam thu ahihkip thakthak hi (Gen22:15-18).
THUKHUPNA:
Pathian pomtak biakna i neih/i piak theihna ding in amun leh mual hiam, i thillatte leh thilpiakte atam leh tawm hiam, athupi leh thupilouh thu hiam ah kingalou in, Amah Pathian i lungtang tengteng, i lungsim tengteng leh i hatna tengteng a i- itna ah kingazaw hi. Sawltak Paul in, “itna in hon sawl teitei”, (2Kor.5:14) a chih bang a Pathian i-it leh amah biak ding i mohpuakna ahi chih theihsiamna a om dia, huai in i omna peuh ah Amah deihlam a om leh thilhih lunggulhna leh ngaih poimohna honpe ding hi. Amin omna Biakin ah leng hong kilawpsak ding a, asung a om nuamsa leh thildang in i kisubuai nuamkei ding uh hi. Biakin sung nasan a kikhentuamna beisak na ding in i Toupa Jesu Khrist a sih lai in Jerusalem Temple sung a Pindan puanzak atung apan atawtan in akeek suak hi. Biakin sung a tutna mun thu a khentuamna lungtang neihneih hinawnlou in i lungtang a om ding leh i ngaihtuahpen ding tuh Pathian omna mun a om ka hi, chih thei a Amah mai a zahtak tak-a om leh biakna piak ding ahi. Huchi bang ding in simtu tengteng Toupan hon vualzawl chiat hen.