Thupatna
Baptist Youth Fellowship kum 53 tan dong puksia a muih leh mong mai ding a hon phallou, hon kem, hon veng a hon tonpih a hiaitan hon pitung tak man in Toupa min phat in om hen. Toupa hon pi nasa lampite khangthakte’n enkik in theithak zel ding deihsakna ziak in a beubeu in i taklang ding.

A. Matai pawlte
EBC kipattung in Tuailai Pawl min a kivaihawmna a ompahkei hi. Huchih hun in heutu masate Pu Kaineng leh Pu Siamkung makaihna in YCAR (Young Christian Advance Rally) chih min phuak in, Naupangte leh Tuailaite lak ah Pathian thu sinsakna kipan hi. Hiai pawl min in Naupang leh Tuailaite’n khawmpi bang a nei ua, kipolhlimna, thu leh la a kitaitehna khawng nei in nuamsatak in hun nazang uhi. Naupang leh Tuailaite kia hilou in nupi leh papite’n leng kithuahpih in saptuam kiphuhkipna ding a vanzat hoihtak a hong suak hi. Paunak in phulun pawtna ding leikha in a keivang chih bang deuh in BYF pawtna ding lamsialtu matai pawl YCAR i hisak hi.

B. Baptist Youth Fellowship piang:
Naungek a hong piankhiak theihna ding a nu sung a kha 9 sung a kiselgu mahbang in YCAR sung ah kum bangzah hiam kikhoi lian (ham) in October 18, 1965 in hong piangkhia a a min ding in KHRISTIAN TUAILAI PAWL (KTP) chih in om hi. A piangsaktute Pu N Vungthang makaihna in tuailai member 15 kipawlkhawm in Hiangtam Lamka ah KTP phuhkhiak ahi. Huai hun apan in YCAR sung ah Naupang lamte kipawlkhawm ua, KTP sung ah Tuailai lamte kipawlkhawmta uhi. Saptuam tangthu ah hiai hun pen Khanletna chikhat ahi chileng khial khollou ding in a gintakhuai hi. Tu in BYF kum 53 chinna ahita a, a phutkhetute Makai lian (Chairman) Upa N Vungthang leh member bangzah hiam in hon dampih lai uhi. Amaute ziak in Pathian min i phat hi.

C. Tup leh Ngim:
BYF phutkhia heutu masate’n tup leh ngim kichiantak point 4 a nei uh a, huai teng khaikhawmna ding thupi “KHRIST LEH SAPTUAM DIN” chih ana koih uhi. Huai thupi mah tuni tan in BYF Emblem ah kikoihden lai hi. Tup leh Ngim 4 a neihte uh amau gelh banggeih teisawn hiaite ahi: 1) Pathian gam leh a Saptuamte khantouhna ding lametna. 2) Tuailai Pawlte lak a Biakin a thugenna lam kitathiamna leh a thu a khanlet theihna ding ngaihtuahna. 3) Phatna la himhim solfa neita phot tuh solfa dan diktak a sak dingdan kisinna. 4) Gammial ading a septheih dandan thohlawm leh thilpiak (missionary vision) ahi deuh hi.

D. KTP Central Board: Tuailaite lak a nasepna enkoltu leh vaihawmtu kichiantak neih ding hoihsakna a om man in 1967 apan in KTP Central Board phutkhia uhi. Term khat sung kum khat ahi a kum teng in Board member-te makaihna in tuailai khawmpi nei ua heutu ding kitelna toh thuah zel uhi. Saptuam khangtou zel ah khawmpi leh kizatna tuamtuam ahong tamtak ziak in 1984 in Central Board beisakna leh District Level a kivaipuakna hong kipan hi. Huchi in District KTP khawmpi chih lam in hong paita hi.

E. Tuailai Khawmpi lian kinei:
Tuailai leh Mission nasep hatsakna ding ngimna in Sia T Pum Za Thang kiang ah Youth & Missions Promoter nna got in om hi. Tuailaite phawkthakna hong piang in 1987 kum in, TUAILAI 87 kizang a khanloh thakna thupitak hong om hi. Huai nungsiah TUAILAI 90, TUAILAI 2000, TUAILAI 2005, TUAILAI 2010 chihte kizang tou hi. Kum 2015 kum a TUAILAI 2015 leh GOLDEN JUBILEE lopna kithuah nei ding kichipen gam buaina ziak in neihtheihlouh in om hi.

F. Min kikhekna:
Kum 1965 a min kiphuak KTP paidan leh tup leh ngim kilamdanna omlou angeimah lenkip den himahleh a hong pichin nung in sapmin khat hon nei hi. Huai tuh BYF i chihchih uh kum 2003 apan ahi a, KTP leh BYF in paidan leh nasep ah chituamna a neikei hi. Tu in KTP chinawn lou in BYF a kichi zawta hi.

G. KTP phutkhetute vision tangtunnate:
01. KTP Central Board ngaih poimohna leh panlakna in Paite Pau Laisiangthou lehna kisem hi.
02. KTP leh Mission Board pangkhawm in Missionary Box zawng in gam pumpi fangsuak uhi.
03. KTP agenda GBC patkhiak ding thu EBC Khawmpi 30na 1981 paisuak in patkhiak ahi.
04. KTP memberte, Khamangthang veina ziak in Bible Camp neih pat ahi kisunzom lai.
05. KTP Central Board awlmohna ziak in Ulian Bible Camp 1975 in kipan hi.
06. KTP Central Board makaihna in khawmpi 12vei kum teng in 1984 tan kinei hi.
07. KTP lunggulhna leh EBC khawmpi 37na lemsakna in BYF Day 1986 apan zat ahita.
08. BYF panlakna in Arm Forces Gospel Camp leh ZNV Camp chihte neih ahi.
09. BYF makaihna in headquarters level a khawmpi kum 5 hal in kinei zel.
10. BYF panlakna in Central Choir kinei India leh gamdang tanpha ah lasa in kuanta uh.
11. BYF panlakna in Counselling Center patkhiak leh zatlel ahi.
12. BYF panlakna in gamsung a diktatlouhnate douna movement neih ahi.
13. BYFte’ gammial luh ding in EBC mission field ah lut in semlel uhi.
14. BYFte’ seppih mission agency dangte FMPB, IEM, NECTAR, HIM, MVM, YWAM, SIM, OMF, MEC.

Thukhitna
BYF tangthu laktom bukimkei mahleh khangthakte kiang a piaksawnna bang a kingai a gelh ahi. I Pathian in ahon pidan masate thei gige kawm in kalsuan lehang abul hon patpihtu Toupa’n atawp dong a honpi ding ahi chih i gingta hi. Tuailaite hiai tan a hon domsangtu Toupa’n agency dang tampi toh semkhawm a malianpi nei ding in hon koihta hi. Lungsim lianpi nei in khovel pumpi ngaihtuah kawm in sem ni. Tuailai Takkheh!