Tuni in hiaite ngaihtuah khawm lehang uthuai ka sa hi: Gingtu hizenpi a banghang a Toupa vualzawlna Tuailaite’n kidong lou ahia? Banghang a i gam ah Toupa gam hong tunglou ahia? Banghang a midangte adia vualzawlna kihitheilou ahia? Tuailaite tengteng i huchi vek uh chihna ahi hetkei a, khotaang leh saptuam sung i etchiang in hiai dotna hong pianglou theilou ahizaw hi. Tua ban ah, Pathian’ vualzawlna kichi ei tuailaite’n ngah chiatta hilehang, gingloute’n le ut-leh-utlou in hon theihpih ding uh ahi. A ngahtate leh a ngah nailoute i vek un kivelthak le i chi ahi. I hinkhua kimkhat in Pathian Thu awi a, a kimkhat in ei thu awi zel abang hi. Khat lam ah lah omkhin vetlou, khat lam ah lah lutsiang ut tuanlou, tualtevanglai a baak (bat) a gen uh toh kibang i hihkhak ding uh lauhuai hi. Tampi etsakna omtheite lak ah Juda Iskariot i en ding: Juda Iskariot kichipa, Toupa Jesu in a nungzui 12 te lak a khat dia a teel ahi. Tuabang a teelkhak a omthei ahihleh, ahihna leh dinmun ah Toupa’n lametna nei hingei ding in a gintakhuai hi. Ahi, hun hong pai zel di ah Juda in a Toupa a zuak ding chih Jesu in a theihsa ahingei ding. Huchi ahihlai in, Toupa’n Juda hinkhua ah kikhekna omthei ahi chih leng mu ahingei ding. Huchimah bang in, Juda Iskariot in leng Toupa’ Gamthu theihna a nei hi. Himahleh a lohchin utna in, a theihsa thu a mangngilh sak a, hun remchang a muh masakpen in a Toupa a zuak maimah hi. Tuailaite, Juda Iskariot kichipa khovel a mihaipen leh huathuaipen bang in na koih hia? Eite le Toupa Gamthu theite i hi ua, a hotdamna Tanchin Hoih mute i hi ua, a Thukhun Thak sung a tentheihna hamphatna neite i hi uh. Ahi a, khovel gam tunding lunggulh zaw, salam punna ngaipoimoh zaw, leh ei mimal’ thukhun zuizawte i hi kha uhia? Juda Iskariot’ tawpna i theichiat uhi, eite leng amah bang a beithei i hihdan uh tuni in phawkthak le i chi hi. Vualzawlna ahi Pa’ nungzui den hinapi, a tawpna hamsiatna ahi maimah hi. Vualzawlna/hamphatna lunggulh luatna lam a Pathian Thu taisan a khovel thu zui i hih nilouh khak ding uh lauhuai hi.

Laisiangthou sung a mi khat mah i etsakna zat ah guanglut nawn le: Daniel, tuailaite’ etton dia kigen munpente lak a khat ahi. Judas Iskariot toh enkhawm bang hilehang, kilamdanna tampi a nei uhi. Judas Iskariot bel Toupa Jesu in a nungzui dia a sap ahi a; Daniel bel Nebuchadnezzar in a salmat ahi hi. Judas Iskariot in Toupa Jesu kam mahmah akipan in Pathian’ Gamthu a za a, nahoih septheihna di hun rem piak ahi gige a, nahoihlou leh khemna a pukna di hun man omlou khop in Toupa Jesu’n a chil hi. Daniel bel, salmat a om ahih mahbang in gingloute’ omdan teng in om bang hitaleh leng “ngaihsiam” huai di khop a hun leh mun haksa a ding ahi gige hi. Ahihleh Daniel bangchi’n a om a? Tulai khovel in “Mihai lua” a sakte bang in a om hi- hamphatna a mai a kiluite khat le lalou in salmat a a om ma a thupukna a lak ah a dingkip hi, Himahleh Daniel in kumpipa an hiam a dawn uain hiam a kihihnitlouh a lungtang in a tum chiltel hi. A tum chiltel chih pen a thupuk khinta chih in a genchiang zawlai hi. Hai kha hinatel e! hiai Daniel. Kumpipa neek bang nethei di hi a, kumpipa maipha muhtheihna ding hun remchang tampi nei hi a, salmat ahihlam le kitheilou tel ahi de aw? Judas Iskariot bang Daniel dinmun a ding hileh bangchi’n a om de aw? Huchimah bang in Daniel bang Judas Iskariot dinmun a ding hileh bangchi’n a om mah de aw? Tuailaite tuni in hiai dotnate mimal chih kidong thak ding in Toupa’ min in kon chial hi. Vualzawlna leh hamphatna kichite bangziak a khen in ngah a khen in ngahlou i hi ua? Bangziak a dinmun kibang ah, a khen kingaisia a khen in Toupa’ min phat thei i hi ua? Simtute, i gennop leng i theihsa mah hi in ka koih hi. Daniel in haksatna tawpkhawk, sihna limguam a a dinlai inleng a Toupa’ deihlam a taisankei a, haihuai leh mawlhuai a bat inleng a Pathian’ thu a mang teitei hi. Eite i hih uleh Khrist Jesu ziak a ginna a Abraham suante i hi uh, tua mah vualzawlna i hihtheihna uleh vualzawlna i ngahna uh ahi. Gingtu tuailai kichi a, Khrist Jesu’ deihdan tellou a hinkhua zangte ading in vualzawlna a omkei, huchimah bang in Khrist Jesu deihdan kia mitsuan a hinkhua zangte ading in bangkim ah Toupa’ vualzawlna a om hi. Nang vualzawlna na hihtheih ma in nang, Khrist Jesu tungtawn a vualzawlna na ngahta hia chih tutung Tuailaite Ni a i suut ding thu hileh i chi ahi.