Thumapi:
Amasa in Khristian Thukizakna sim tengteng midangte adia vualzawlna hihtheihna ding a a hinna hon pia i Toupa leh Hondampa Jesu Khrist min in chibai kon buk hi. Tukum thupi “Nang Vualzawlna Hi in” chih sung ah, tu kha Tuailaite Ni omna ahih toh kiton in thupi khennenna “Tuailai Hihna a Midangte adia Vualzawlna” chih i zang uhi. Hiai thupi toh kisai kuptheihna ding hunlem heutute’n a hon bawlsak man un kipahhuai ka sa hi. Hiai a i taklat ut ahihleh Pathian kihtakna leh diktatna toh tuailaite’n pan la a, tuailaina a diktatna hinkhua siangthou nei a midangte ading a vualzawlna i hih ding Pathian in hon deihdan ahi chih theithak lehang deihhuai i sa ahi.

Tuailai hun pen mihingte hinkhua ading a hun manphapen ahih ziak in upate’n gen mangmoh in a neisek uhi. ‘Kei leng ka tuailai hun a hat sam ing a, ka ut bangbang a paizou a, taizou ka hi. Himahleh tuin ahihleh ka hat nawn kei a, thahatna leng ka nei zou nawn kei,’ a chisek uhi. Huaidan mah ahi i Laisiangthou in leng tuailai hun ana gen: “Tangvalte’ thupina a thahatna uh hi …” (Pau. 20:29) a chih ban ah “… tuailaina muvanlai’ a bang a thaksak zel” (Sam 103:5) ana chi hi. Isai 40:30 ah “Tuailaite nangawn leng a bah un a gim ding ua, tangvalte leng a puk zou ding uh” a chi hi. Tuailai hun pen hatlai hun ahi a, hiai hun a om gige theilou ding i hihdan leng ahon theisak hi. A ziak tuh hatlouh hun leng hong tung ding ahihman in ahi.

Tuailai hun i chih chiang in mihing khat a khangdawn lai i genna ahi. I saptuam EBC in tuailai hun pen kum 18 apan kum 45 kikal i huamkha sak uhi. Mi khenkhat in tuailai hun i chih naupan hun leh pichin hun kikal ahi a, hun poimohtak ahi a chi uhi. Tua bel mihing ading a hun poimoh, kisintheih lai hun, a hoih leh hoihlou lam a khantheih lai hun, hihkhelhkhak leh paikhelh theihna hun ahi. Tuailai hun zang dikte mi manpha a suak uh a, a zangkhialte lah a damsung tengteng un mi buaihuai leh mi zattaklouh a suak thei uhi. Huchi ahihziak in i Laisiangthou in “na tuailai hun in nang hon siampa thei gige in” chi in ahon hanthawn hi (Ekle 12:1).

“Khristian tuailaite tuh tulai khovel segawpsa lak a teng a, khosa i hi uhi. Hiai khovel mialnuai a Khrist itna vak taangsak a, khotang, inkuan, saptuam sung leh midang Pathian theilou a kha uh mangthang dingte adia vualzawlna i hihtheihna ding un sep ding Pathian in a hon piak i sep uh a poimoh petmah hi. Huaite abanban in chi thum in i en ding uhi:

Khatna ah, Pathian theih gige tuh tuailaite’n midangte adia vualzawlna a hihtheihna ding ua a poimohpen ahi (Ekl 12:1).

Hiai santak ah Toupa Pathian tuh ‘hon siampa’ chih ahi. Huai in a gen tuh leitung mihing a hon bawltu, hon neitu Pathian ahi chihna ahi masa a; a nihna ah, ‘Khrist ginna tungtawn a amah adia hon siamthak’ (2 Kor 5:17) chihna leng ahi nawn hi. Huai ban ah, Toupa theih i chihna in ‘Toupa launa’ chih leng a tel hi. Obadiah in…Elijah kiang ah… ‘na sikha in ka valnou tung apan Toupa ka lau hi’ (1 Kum 18:12) ana chih mah bang in. Huan, Pathian lametna leh muanna leng a tel hi. Sam gelhtu in ‘Toupa Pathian aw, nang ka lamet na hi: ka naupan chik akipan k’on muan na hi’ (Sam 71:5) ana chi hi. Ban ah, hon siampa theih in, ‘Toupa ngakna leh zonna’ le a tel hi. Jeremia in, ‘Amah ngakte kiang ah Toupa a hoih, amah zong mi tung ah. Min Toupa hotdamna a lamet a a ngak vengveng a hoih hi’ (Kah 3:25-27) a chi hi. Huaite ban ah, Omdan sianthouna hon neisak hi. Sam gelhtu in, ‘Valnou in, bangchi’n ahia a omdan a hih siangthou ding? Na thu bang zel a omdan venghoih in’ (Sam 119:9) chi hi. Toupa Pathian theihna in Khrist tungtawn a amah toh kizopna thuktak nei i hihdan bang, A hon neitu zahna leh launa nei hinkhua zang a, lametna toh amah a muang a, ahong pai nawn masiah ginomtak a ngak a omdan gamtatdan siangthou hinkhiakna pansan in midangte’n Khrist mel kilawmna mu in amaute ading a vualzawlna i hi ding uhi.

Nihna ah, Upate, ei sang a u-zawte zahtakna/zahna piakna tungtawn in midangte adia vualzawlna i hi thei ding hi.

Lev 19:32 ah ‘A teekte’ mai a na om chiang un, ding unla, pate zahna pia un. Tua bang in na Pathian uh zah un. Kei Tangtawn Toupa ka hi’ (BI) ana chi hi. ‘Amaute (Job lawm thumte), amah sang a upazaw ahihman un, Elihu in Job a houpih ma in ana ngak hi...Tuachi-in, Buz mi, Barakel’ tapa Elihu in: “Kum lam ah ka naupang a, noute na upa uhi. Hiai hang in ka lauthawng a, ka theih nangawn kon na hilh ngamkei hi” (Job 2:4,6) a chi hi. Hiai santak ah Barakel’ tapa Elihu in amah sang a kum lam a u-zawte a zahdan a thupi ngei! Aman lauthawng kawm a ama sang a upa-zawte lak a a omdan in eite leng sinlai hon pia hi in ka thei hi. Eite leng nidanglai in i pu i pate’n amau sang a upa zawte ana zahtak ua, insung a a lianpen ‘Tou’ chi in a thu sel ding ana ngaihtuah kei himhim uhi. Tu khang ah eite’n ei sang a upa zaw, tekpi tekpute it in zahtak kawm in, a thu uh a hoih lam a manna lam ah kiheithak lehang a lunggulhhuai petmah hi. Huchi bang in nungta lehang i innsung, vengsung, gamsung leh namsung ah midangte ading in vualzawlna i hi taktak ding uhi.

Thumna ah, Midangte adia vualzawlna hihna ding in Nu-le-pa zahtak a, pahtawina i piak ngeingei ding uh ahi.

Laisiangthou a Thupiak sawmte lak a a ngana ah ‘Na nu leh na pa zahtak in. Toupa na Pathian in ahon piak gam a na nite a sau theihna ding in’ (Exo. 20:12; Dt. 5:16; Eph. 6:1-2) a chi hi. Huai mah Lev 19:3 ah a gen ‘Noute kuapeuh in a nu leh a pa a zah ding ahi. …Kei Tangtawn Toupa na Pathian uh ka hi’ a chi hi. Thukhun Thak ah Paul in Timothi kiang ah meithaite toh kisai in ‘…amau insung ah Pathian limsakna mohpuakna thei masa uhenla, amau nu leh pate uh kem uhen; huai Pathian kipahlamtak ahi’ (1 Tim. 5:4) ana chi hi. Nang bang na chi a, na nu-le-pate zahtak in leh pahtawi in na om hia? Ahihke’h amaute don utlou, zah leng zah himhim lou in na om hia? Gingtute melma setan in nu-le-pate zahtak louhna lungsim a hon posak thei mahmah ahi chih theih ding ahi. Nu-le-pa zahtak louhna tuh Laisiangthou in ‘muhsitna’ a chi hi (Pau 15:20). Huai tuh nu-le-pate simmoh a musit chihna leng a hithei hi. A hon suangtute zahtak a pahtawi hinkhua zangkha hi in na kithei hia? Amau hon suangtute ading in kipahna hih sawm chiat ni aw.

Thukhitna: Tuailaite i hatlai, i hoihlai, nna hoih tampi i sep theihlai in ei ut dandan a om a, sa-utna mit-utnate pichin a Pathian theilou a om ding in Pathian in ahon deihkei a; Joseph bang a zolna tuah hun a “Bangchi’n hiai khelhna liantak hih in Pathian tung ah thil ka hihkhial thei dia? (Gen. 39:9) a chih bang a khiallou a, hangsantak a Pathian adia kikoih siangthou ngam mi Pathian in a deih ahi. Huai ban ah, amah Pathian theihna kichiantak nei a amah ading, inkuanpihte, khua-le-tuite, chi-le-sate, leh gam-le-nam ading a vualzawlna hi ding in Pathian in nang hon deih ahi. Tua ding in Pathian theichian ding, inkuan sung leh khotang a mahni sang a upa-zawte tung a zahna hinkhua nei a, mahni nu-le-pate thumang a, zahtaktak a pahtawina piakna pia a, midangte adia vualzawlna hithei ding in simtute Toupa’n hon vualzawl chiat hen!