Thumasa:
September 6, 2018, sun dak 11:51 am in India thukhenna sangpen, ‘Supreme Court of India’ in IPC Section 377 a kigen, zek kibang kitenna, numei leh numei, pasal leh pasal kitenna, zek boltawmte toh kitenna, ganhing toh kithuahna leh naupangte sa-utna thoihna dia zat khamna dante hihbei in India ah phalna a phuangkhia uhi. Hiai thukhenna ah Chief Justice of India, Dipak Misra, Rohinton Nariman, A M Khanwilkar, D Y Chandrachud leh Indu Malhotra-te’n thukhentu ahi uhi. Hiai a phuankhiak uh toh kiton in India gamsung ah, mihing kumching ahihnak ualeh pasal leh pasal, numei leh numei kitenna, amau deihtelna in phalsak hi.

Indian Penal Code, Section 377 in zek kibang kitenna khamna, ganhing toh kithuahna leh naupang zat thanghuainate khelhna leh suangkul tanna leh liau theihna ban a thu zil in damsung suangkul tan theihna chi a kum 2015 a Supreme Court in a phuankhiak a phiat hi. Section 377 IPC phiatna in India gam ah zek kibang kitenna, thangtatna leh zautatna tun ahih man in a lungzinhuai thukhat ahi. Ganhing leh naupang kithuahpihna khelhna (crime) leh gawt ding chih ahi.
I. SAPTUAM TUAMTUAM DINMUN: Supreme Court in Homosexualte zalenna a piak toh kiton in saptuam pawl tuamtuam in amau dinmun a gen uhi. Saptuam chih dinmun thei zoulou kia lou in gelhseng louh ahih man in a lompi pawl thum dinmun i taklang ding uh:

(i) Catholic Saptuam Dinmun: Fr. Stephen Fernandes, Secretary, Justice, peace and Development, Indian Bishops Conference in hiai bang in a gen hi: “Amasapen in zek kibang kitenna leh kithuahna, mi piching hi in pichinglou hitaleh khelhna leh dankalh ahi chih ka hon genthak nawn hi. Catholic saptuam in mi piching kithutuak himahle uh Pathian in nupa kal a kithuahna a bawl, itna a kigomna tungtawn a ta leh nau neih ding a chih numei leh pasal kitenna a hihbukimna toh kikalh ahih ziak in zek kibang kitenna Catholic saptuam in a pawm theikei” a chi hi

Catholic saptuam in zek kibang kitenna a pom theihlouh mai uh hilou huai bang mite kitenna uaplou ding in thusuah uhi. Bishop Michael Jarrell in Catholicte kiang a thupiak khauhtak a bawl hiai ahi: “Catholic mi leh sa himhim zek kibangte kitenna a kihel lou ding in hasuan ahi”. Supreme court thukhenna in Catholic saptuam in kitenna numei khat leh pasal khat kigomna ahi chih a dou hi

(ii) SOUTHERN BAPTIST CONVENTION: USA Supreme Court in zek kibang kiten phalna a bawl lai in, Russell Moore, President of the Ethics & Liberty Commission, Southern Baptist Convention in hiai a gen hi. “Amasapen in saptuamte patau kei un. Supreme Court in septheih tampi nei mahleh Jesu han apan samkhe theilou ahi. Amah a hing a, leitung pumpi a gam ahi” chi in. Hiai thupukna in inkuan leh mi tampi lungtang a suna chih ka thei. Kitenna Bible hon hilh leh Jesu leh sawltakte sinsak louh saptuam in sinsak ding dang a neikei hi. Jesu si a thounawn i gingta ua, suahlam van ah sakol toh a hong kilang ding. Tanchinhoih in mikhial ngaidam in Pathian tate in a hon bawl hi. Bible sinsak kitenna leh nu-pa kithuahna tawpsante’n khovel kiang a gen ding a neikei hi.

“Eimah a om ginna kip leh migitna, dikna hehpihna ah i dingkip ding uh. Jesu hon sinsakte i gen ding ua, amah sepban i sem ding uh. Hondoute tung a itna leh lainatna nei in, Kha leh Tanchinhoih nei in kipaktak in Zion i manoh uhi. Pathian kumpi gam zong ni. Tanchinhoih ah dingkip ni. Pathian kia i lau ding ua, khovel i laukei ding uh” a chi hi.

(iii) EVANGELICALTE DINMUN: Evangelical Khristiante’n, “Supreme Court in kiten dan a gen a nial uhi. Inkuan solkal dinsuah ahikei a, amah ngaihdan a inkuan bawlthak atup ding hilou ahi. Kitenna bawlthakna Bible thuneihna in a phallouh ziak in mihing in ngaihdan gen theih a neikei hi. Bible ah Pathian in kitenna ‘pasal khat leh numei khat kitenna” a chi hi (Gen 2.24). Genesis a pan Kilakna pha in Bible toh kituak kitenna ‘pasal leh numei kitenna’ ahi. Hiai thudik genbeh ngailou ahi. Jesu’n kitenna atung akipan ahi a chi hi (Matt 19.4-6). Mihing bawl vaihawmna leh thukhenna in kitenna leh a etsak banghiam chih genchian ding in thuneihna a neikei uhi (Eph 5.32).

Evangelical Saptuam in ‘tawndan kikheng zel mahleh Bible theihpih kitenna ginomtak a zui ding’ a chi hi. Evangelical saptuamte hun thak ah Bible sinsak hilou kitenna leh numei-pasal kithuahna sinsakna maituah ding in sapna a hi. Hiai saptuam tangthu ah a thak ahikei. Saptuam Tanchinhoih in a genchetsa ahi. Tawndante’n hoihsa in sakei mahleh Tanchinhoih michih ading Tanchinhoih kipahhuai ahi (Luk 2.14). Tanchinhoih in theihpihna hon makaih ding ahi. Evangelicalte, Tanchinhoih in hon hinsakte, Pathian in Jesu Khrist hinna, sihna leh thohnawnna tawn a kilemnawnna hon piak pansan in hiaite kituaktak in ka zui ding uhi:

I tung a vaihawmte thumpih in, Bible sinsak kitenna gen ni. Mi tengteng LGBT tel in Pathian batna nei ahi ua, i zah ding uh. Ngaihdan kibatpih loute it in, zahtak in omdan siam in om ni.

II. BIBLE IN HOMOSEXUAL A GENDAN: Huntawp kuan saptuamte lak ah khelhna a pun ding dan leh hiamgamna a nasat ding dan Jesu mahmah in a gen hi (Matt 24.12). Khasiangthou lakkhiak a om hun chiang a khovel a melmapa nasep ding dan leh mi tampi in hoih salou napi a khelhna a kibual ding uh ahihdan Paul in a gen hi (2 Thess 2.7-8). India in 2015 a a deihlouh zek kibang kitenna tuin deih chih hun kikhek in gennei ahi chih hon musak hi. Homosexual khelhna Laisiangthou pansan in i sutkhom ding uhi:

(i) THUKHUNLUI LAIBU APAN IN: Zek kibang kingaihna leh thanghuaina Bible a kimu masapen Sodom khopite gamtatna ahi (Gen 19.22). Sodom khomite’n angelte kithuahpih sawm in Lot inn a luh uhi (Gen 19.5ff). Lot inkuante Angelte hotdam zohlouh inkuan a hi ua, a zi chisuang a suak hi. Sodom khomite’n Lot tanute sang in angelte luppih a utzaw ua, Pathian hong kigolh a, angelte humbit in a om uhi. Kolhawm ah Lot zukham ziak in a tanu nihte’n a kisual huan uh chih i mu hi. Tulai in ‘Sodomy’ a kichih chiang in tawkohuk genna in a kizang hi.

(a) Lot in angel mikhual a zintun hi. “A lup ma un khomite, Sodom khomite, veng teng a mi tengteng, a tek a khang in a inn a umkim velta uh. Lot kiang ah, “Tuzan a na in a honglut mite koi a om uh ahia? Amau ka luppih theihna ding un ka kiang uah hon pikhia in” a hong chi uhi”. (Gen 19.4-5). Hiai mite khelhna ziak in Pathian vaihawmna Sodom tung a sunbuak ahita hi. Sodom a tawkohuk khopi a van apan hong pai angelte luppih tumte hihmanthat ahih uh bang in khovel a gitlouhna palaite Khrist in hihse ding ahihdan hon theisak tuan hi.

(b) Sodomte Khelhna: Na tanau Sodom thulimlouhna hiaite ahi: kisaktheihna, nekvah luatnate, amah leh a tanute nuamtat mawkmawkte ahi, mi gentheite leh tasamte a panpih tuan sam kei uh. Huan mi uang ahi ua, ka ma a thil kihhuai hihsa ahi uh; huchi in hoih ka sak bang in ka hihmangta ahi” Toupa’n a chi (Eze 16.49). Sodom mite khelhna Juda in hiai bang in a gen hi:

(c) Sodomte khelhna: “Sodom leh Gomorrah leh a kiang kim ua khuate kingaihna a kipumpiak a, gitlouhna lek lua, amau mihinpih loute nangawn enlah a a delhtak ziak un, tangtawn mei a gawt a om dingte etsakna ding a suankhiak in a om uhi” (Juda 7). Hiai a mihinpih louh nangawn enlah a chihna ah ganhing nasan kithuahpihna genna hi ding hi. Hiai a zek kibang kingaihna toh kisai in Pathian in a deihdan leh a thupiak chiangtak in anuai a laibute ah a gelhta hi.

(d) Tawkohuk khamna: Kitenna thiltup nei a piak ahihna leh siangthou leh zahtaktak a zat ding ahihdan genna in Pathian in hiai dan a pia hi. “Numei bang in pasal na luppih ding ahi kei. Thil kihhuai ahi. Kihihnin ding in ganta himhim na luppih ding ahi kei. Luppih ding in ganta ma ah numei a din ding ahi kei. Gitlouhna tungtuan ahi” a chi hi (Lev 18:22-23).

(e) Ganhing toh kithuah khamna: Pathian in numei-pasal kitenna hilou numei a luppih bang a, pasal luppihte hihlup ding a chi hi. “Mi’n numei a luppih bang a pasal a luppih leh thil kihhuai mahmah hihtuak ahi ua, hihlup ngeingei ding ahi. A sisan moh a tung uah a om ding hi” a chi hi. Zek kibang kithuahna khelhna, dan in “hihlup ngeingei ding” a chi hi.

(ii)THUKHUN THAK IN HOMOSEXUAL A GENNA: Sawltak Paul in zek kibang kingaihna, kitenna Bible kalh, khelhna a chi hi. Tulai in mi khenkhat ‘pro-gay theology’ chi a kigente’n thukhun thak laibu a Greek kammalte akipan in zek kibang kingaihna hilhchetna a nei uhi.

(a) JESU SINSAKNA: Mi khenkhat sutdan in Jesu’n zek kibang kingaihna gen ngeilou a chi uhi. Jesu’n thuneitak in khelhna chi khat mai hilou, a lompi in a sinsak hi. A sinsakna apan in, ‘mihingte lungtang leh Pathian siangthouna’ a ngaikhete theihsiam ding in a sinsak hi.

(i) Lungtang khelhna: “Nidanglai mite’n ‘Ang na kawm ding ahi kei’ a chih uh na zata uhi. Himahleh ken zaw kuapeuh etlahna lungsim toh numei en in, a lungsim in angkawm ahi chih k’on hilh ahi”, Jesu’n a chi hi (Matt 5.27-28). Hiai ah Jesu’n, “Pathian siangthouna in dik leh diklou a tehna polam a muhtheih a sepkhiakte sang in lungtang-ngaihtuahna ahi” chih a sinsak hi. A hiloupi lungtang a ngaihtuahna lel leng Pathian mai a khelhna ahi.

(ii) Jesu leh kitenna: Pharisaite a kiang ah a hong ua, amah ze-etna ding in, “Bangziak peuh in min a zi mak a siang hia?” a chi uhi. Jesu’n a kiang uah, “Atung akipan amau bawlpa’n numei leh pasal a bawl leh, hiaiziak in pasal in a nu leh a pa a paisan ding a, a zi a len ding. Huchi in, a nih un sa pumkhat a hong hita ding uh, a chi chih na simkei ua hia? Huchi in nih ahita kei ua, sa pumkhat ahi zawta uhi. Huaiziak in Pathian in a gawmsa mihing in khenkei hen” chi in, a dawng hi (Matt 19.3-9). Kitenna bang hi a, kitenna a Pathian thiltup bang hiam chih Jesu’n a gen hi.

(iii) Pharisaite dotna, ‘kimakna’ thu himahleh ‘kitenna, angkawmna, kimakna’ thupi thum himahleh khelhna a chikhat in a dawng hi. Jesu’n, ‘Kitenna Pathian a ahi’ chih a gen hi. Kitenna ‘pasal leh numei’ pumkhat suahna ahi. Kitenna tungtawn a ‘ta leh tute suang ding’ chih a thiltup a gen hi.

“Pathian in amau a vualzawl hi. Pathian mah in a kiang uah, “Chi tampi suang ding in hong pung unla, lei luahdim un,” a chi hi (Gen 1.28). Pathian bawl kitenna ah ‘Kimak’ omlou ahihdan a gen chian hi. Nu-pa kitenna Khrist leh saptuam etsakna ahi.

(iii) PAUL IN HOMOSEXUAL A GENNA: Paul hun in Asia minor leh Europe mun tamtak ah numei leh pasal kal khelhna a uang mahmah hi. Korinth khua, Rome khua, Kolosa khua leh khopi tuamtuam Homosexuality (tawkohuk) dinmun hiai bang in a muhtheih hi.

(a) Korinth Saptuam leh Tawkohuk: Paul in, Korinth saptuamte kiang ah homosexual kitenna leh kithuahna phalna bangmah a pekei hi. “Ahihleh midiktatloute’n Pathian gam a luah kei ding uh chih na theikei ua hia? Zekhem in omkei un, kingaihhatte, milim bete, angkawmte leh mihukte leh tawkohukte, gutate, mihuaihamte, zukhamhatte, salhhatte leh lepgute’n Pathian gam a luah kei ding uh” a chi hi (1 Kor 6:9-10). Tawkohuk kingaih-kitenna chiangsem a i muhtheihna ding in Paul in a Greek kammal zat, khenkhatte i velkhawm ding uhi.

(b) Kingaihhatte (pornos) chih a zang a huai kammal ‘Pornography’ lakkhiakna ahi. Huai bel numei-pasal vuaktang lim, numei-pasal kithuahna lim etna leh zongsatna genna ahi. Milim bia hiam angkawmte genna in (moichos) chih kammal a zang a, huai tuh ‘sum leh pai deihna leh numei lunggulhna’ genna ahi. Mihukte (malakos) chih a zang a huai tuh ‘nem, sukkhak a nem’ chihna ahi. numei, pasal toh kithuahna a numei dinmun genna ahi. Tawkohukte (arsenokoites) chih a zang hi. ‘arsen’ ‘pasal’ chihna, ‘koite’ ‘lupna’ chihna ahi. A gen, pasal in pasal luppih chihna ahi. Zek kibang kithuahna a pasal dinmun (male role) genna ahi. Numei leh numei kithuahna a pasal dan a pang genna leng ahi. Ganhing kithuahpih khelhna lauhuai, sihsak ding chih ahi (Exo 20.19).

(iv) ROMETE LEH TAWKOHUKNA: Romete kiang ah Paul in, “Huaiziak in a sa uh zumhuaipi a kibawltuah ding in a lungtang uh duhgawlna bang a thilnin hihphal in Pathian in a lehngatsan hi... Huaiziak in Pathian in zumhuaipi a huk phal in lehlam a ngatsanta hi; a numeite nangawn un leng a omdan pianpih uh danlou bang a om ding in a kibawl lamdang uhi; Pasalte’n leng numei zatdan ngeina tawpsan in, huk in a kienlah ua, pasal leh pasal zummoh thilhih in a om ua, a gitlouh man muh ding uh tuh a satung uah a mu uhi” (Rom 1:24-27).

(i) Hiai sung a Paul kammal zatte apan in Rome saptuam thiltuah, “A sa uh zumhuaipi a kibawltuah ding in lungtang a nei uh” a chi hi. Hiai a Greek kammal ‘Epithumia’ a kizat ziak in huai gen tuh ‘ngeinalou sa-utna, nopsakna lunggulh’ chihna ahi. Huai ngeinalou a sautna thoihna ‘homosexual’ (tawkohuk) khelhna genna leh ‘lebianism’ khelhna hi a sut ahi.

(ii) Hiai khelhna Pathian huat, zakdah ahih ziak in Pathian in a ‘lehngatsan, a nutsiatte’ chihna ahi. Pathian in zumhuaipi a huk phal in a lehngatsan hi. “Numei zatna ngeina tawpsan” a chih tuh numei-pasal kitenna tungtawn a pumkhat suahna hilou, Pathian bawl numei-pasal kithuahna ngeina deihkhoplou a numei leh numei, pasal leh pasal, pasal leh numei tawkohuk genna ahi.

(iii) Paul in hemgen nawnlou in, “Pasalte’n leng numei zatdan ngeina tawpsan in, huk in a kienlah ua, ‘pasal leh pasal’ zummoh thilhih in a om ua, a gitlouh man muh ding uh tuh a satung uah a mu uhi” a chi hi. Pasalte’n numei-pasal kithuahna ngeina a lungkim zoulou in, pasal pihte enlah in zummoh thilhih in a satung uah a gitlouhman a mu uhi. ‘Homosexual’ khelhna Pathian in mimal leh gam a gawtna khelhna a chi hi.

III. EBC SAPTUAM DINMUN: Supreme Court of India thuphuan toh kisai in Saptuam tuamtuam dinmun, Laisiangthou gendan, i taklat nung in, Saptuam Jesu Khrist Tanchinhoih leh Laisiangthou sinsak ah a dingkipte ading in anuai a pointte a dinmun uh ahi.

(i) Saptuam, Jesu Khrist leh a Tanchinhoih a dingkip a, Laisiangthou, Pathian hatkhum a piak, Genesis apan Kilakna, Pathian thuhing, behlap leh paihkhen ngailou pomkipte ading in pasal leh numei kitenna Pathian bawl leh Bible sinsak kitenna ahi. Pathian bawl kitenna lou himhim khelhna leh Pathian dan bohsiatna chi in a mohpaih hi (Gen.1:27; 2.18; Gen 2.24)

(ii) Pathian bawl kitenna in ‘ta leh nau vualzawlna’ a chiam hi. “Chi tampi suang ding in hongpung unla lei luahdim un” a chihman in kitenna in a thiltup kiteltak nei ahi chi hi. Hiai Pathian kammal leh Bible sinsak zuih ding omsun ahi. (Gen 1.28). Inkuan, Pathian bawl ki-ukna neupen, kitenna tungtawn a dinkhiak ahih ziak in hiai kitenna genchian ding in kumpite, thukhenna innte kiang a Pathian in thuneihna pelou in Bible kia thunei ahi (2 Tim 4.16).

(iii) Saptuam in thukhenna sangpen, Supreme Court leh vaihawmte a zahtak a, a thukhenna uh Pathian leh Laisiangthou toh kituaklou chih theikawm in amaute thumsak leh Laisiangthou sinsak thudik mah sinsak zel ding a kipiakna (commitment) ahi. Zek kibang kitenna, ganta toh kitenna leh kithuahna a mohpaih a, himahleh huai a kihelmite Pathian batna nei a siam ahih ziak un lampi dik a pikik nawn ding a sinsak leh panpih a tup ahi (Jude 24).

(iv) Saptuam in memberte zek kibang kitenglou ding leh zek kibang kitenna a saptuam min a kihel a deihkei a, Pastor leh thaunilhna tangte hiai kitenna sai ding in thuneihna a pekei hi. Khovel vaihomna, tawndan (culture) kikhek zel in, phuahtawm kitenna dang bawlzel mahle uh Bible, Pathian thutak sinsak kitenna, a thiltup leh a etsakte itna leh lainatna toh khovel kiang a tangkoupih ding, paikhialte Khrist kiang a pikik a hanchiam hi (2 Kor 6.17).

Thukhitna: Homosexual kitenna kia hilou in, angkawm dankalh hilou leh damlou gimte thah theihna (euthanasia) phalna leh issue dangdang a om hi. Tuni in Homosexual kiten phalna leh Bible sinsak leh saptuam dinmun i gen uhi. Hiai thute pilvangtak a sui detdet a, Bible gendan, sinsak dan leh khovel paidan buktuah a, huntawp-a ding i hi chih thei in Laisiangthou in bang gen hiam chih i thupukna hi gige ding in Toupa’n hon Vualzawl hen.

Source laknate:

1. Paulk, Anne. Restoring Sexual Identity. Eugene OR: Harvest House, 2003.

2. Dallas, Joe. Desires in Conflict. Eugene, OR: Harvest House, 1991.

3. Konrad, Jeff. You Don’t Have to Be Gay. Pacific Publishing, 1987.

4. Satinover, Jeffrey. Homosexuality and the Politics of Truth. Baker, 1996.

5. Collins, Gary R., Christian Counselling: A Comprehensive Guide, Word (UK) Ltd., 1989.

6. www.tms.edu/.../a-biblical-response-to-homosexuality

7. familylifetoday.com/.../a-biblical-response-to-homosexuality

8. www.livehope.org