THUPATNA:
Abraham hun lai a mihingte’n Noa long ziak a mihing leh ganhingte humbit a om ahih dan thei mahmah uhi. Himahleh Noa pitu Pathian lam ngalou in amau theihna zang in Pathian hing a lehngatsan uhi. Amau khutsuak in teklei a bawl ua, khopi bawl in, hinna neilou pathian nangawn bawl uhi. Amau leh amau kihih thupina ding in innsang lam in Pathian nawlkhin uhi (Gen. 11:3-4). Huai ban ah, a milim bawltawmte uh bia in Pathian hing a thei nawnta kei uhi. Huchibang hun lungzinhuai takmai nuai ah Abraham khosa a, Kaldai gam Ur khua ah teng hi. Ni khat tuh Pathian thupina muhsak a om in a kiang ah vakilak hi. Thou inla na inkuante leh na gamlam taisan inla kon etsak ding lam zuan in pai in chi hi (Gen. 12:1; Nas. 7:3).

PATHIAN THUCHIAM:
1. Abraham nam thupitak a bawl ding: Pathian in Abraham kiang ah “chi thupi mahmah in kon bawl ding” (Gen. 12:2a) chi hi. Hiai thu Abraham kiang a Pathian thuchiam amah nam thupitak a bawl a om ding ahihdan thu ahi. Huai thuchiam bukimna tuh Pathian lalgam suak ding a Thukhun lui hun a Israel tate leh Thukhun thak hun a saptuamte kigawmkhawm ding, kumsang lalgam tunding in om ding a, van thak leh lei thak in zui ding a tangtawn in omden ding hi. Huai thuchiam bukimna tung nailou deuh ngak in tulai saptuamte leng i om lel hi.
2. Abraham vualzawl ding: Pathian in Abraham kiang ah, “vual ka hon zawl dia na min ka hih thupi ding” chi hi (Gen. 12:2b). Hiai vualzawlna tuh Pathian thilsiam leh a tatkhiakna thu mihingte kiang piak a utthu ahi. Pathian amah omsa, omlel leh hong tung ding hunte a vualzawlna tuntu ding ahi. “Huchi a Abaraham tung a vualzawlnate Khrist Jesu ziak a Zentelte tung a hong tun theih a, Kha chiam ginna ziak a i muh theihna ding in” (Gal. 3:14) a chi hi.
3. Abraham leh a suante vualzawl ding: Pathian in Abraham amah mimal kia vualzawl ding a chi kei a, Amah leh a suante tengteng leng vualzawl ding ahih dan thu a gen hi (Gen 12:3; 22:18). Pathian sapna bawl dan i etleh hun paisa Adam akipan Abraham hun tan ah vualzawlna thu genkhak nei lou hi. Himahleh, Abraham kiang a thuchiam a bawlna ah Adam hun pek akipan Khrist hun tan a vualzawlna ngah dingte Abraham chi akipan hiding hi (Gal. 3:14; 16).

GINNA ZIAK A SIAMTANG:
Pathian in Abraham kiang ah thuchiam a bawl hi. Inn pua ah a pikhia a, van en inla aksite na sim theih leh sim in, na suante huchibang ahiding uh (Gen. 15:5) chi hi. Abraham in mihing dan a taneih hun hinawn lou upa lawta himahleh Pathian thu a kiang a tung in a gen bangbang a gingta hi. Huchi in Pathian in a gintakna pen a diktatna in a sehsak hi (Gen. 15:6). Hiai tuh eite leng ginna ziak a siamtansak a i om theihna ahi. Abraham ginna ziak a Pathian mai a siamtansak ahih mahbang in eite leng ginna tungtawn in Jesu Khrist a Pathian hehpihna a hotdam i hi uhi (Rom 4:21-24).

GINNA A HING:
Ginna in Abraham sap-a a omlai in a gouluah ding mun a lut ding in paikhiakna ding thu a mu a, koimun tung ding chih thei loupi in a kuankhia hi (Heb. 11:8). Ginna mah in gamchiam ah mi gam a tam bang in atam nilouh hi a gouluahpih ding Isak leh Jakob toh puanin ah a om nilouh uhi (Heb. 11:9). Ginna mah in khopi suangphum nei Pathian gel leh lam ngak in a om nilouh uhi (Heb. 11:10). Ginna a a thilhih dangte hiaite ahi.
1. Kithoihna Maitam bawl: Haran akipan in Abraham in a zi Sarah leh a sanggampa tapa Lot tonpih in Kanan gam zuan in paipih hi. Abraham Sekem mun a Toso sing omna Moreh a tuntak in Jehovah Pathian a kiang ah kilak nawn hi. Aman huai mun ah Jehovah Pathian ading in kithoihna maitam a bawl hi (Gen.12:7).
2. Puanbuk bawl: Abraham in kithoihna maitam a doh khit in puanbuk bawl nawn hi (Gen. 12:8). Babel ah mipite’n khopi bawl masa in insang a bawl zom uh. Himahleh Abraham in bel Kithoihna Maitam bawl masa in puanbuk a bawl nawn hi. Hiai in hon muhsak ahihleh Abraham in Pathian buaipih masak in a nei hi. Aman Pathian biakna leh kithuahna a ngai poimoh masa pen hi. A khawsak ding dan leng a ngai poimoh a puanbuk a bawl hi. Puanbuk lel a a tenna in leng etsak a nei hi, khovel ah inkip neilou a khualzin mi a hihdan muhtheih hi.
3. Sanggampa ziak a mi toh kisual: Lot in amah deihtelna in Abraham a kikhen khiakpih in Sodom phaizang ah teng hi. Kumpi 4 leh kumpi dang 5 kingeih louhna ziak in Lot tuh sal a pimang in om hi. Abraham in huai thu a zak in kumpi 4 sual ding in amah insung mi kisinsiamsa ngen a tonpih hi. A hong kiknawn tak in Salem kumpipa Melkisedek toh kituakkha in aman tanghou leh uain a tawi hi (Gen 14:18). Melkisedek tuh Pathian siampu lianpen Khrist etsakna ahi (Heb. 7:1-3; 16-17). Tuni’n i siampu lianpen Jesu Khrist a hia, chiklai peuh in hon gensak gige in, sang leh uain in hon vak hi.

PATHIAN TOH HINGKHAWM:
1. Mihing gam ah Pathian zintun: Genesis bung 18 ah Abraham in Pathian kinaitak a zui a hingkhawm ahihdan muh in om hi. Ni khat Abraham puanbuk kongkhak a a tutlaitak in mi thum amah kianglam zuan a pai a mu hi. Huai mi thumte lak ah khatna Jehovah Pathian ahi a, adang nih Angelte ahi uh. Abraham in Pathian khe silsak leh ann nek ding buatsaih in a kisabuai mahmah hi. Huchi in, Abraham in Pathian toh kithuahna hun nuamtak nei a; Isak pianna ding thu leh Sodom siatgawpna ding toh kisai a Pathian kilakna thu mu hi.
2. Isak latna in Khrist a ensak: Genesis bung 22 ah leng Abraham in Pathian kinaitak a zui a hingkhawm ahihdan muh in om hi. Chang 2 ah, Pathian in Abraham kiang ah, na tapa it mahmah Isak tonpih inla Moriah tang lam ah pai in, huai tang ah halmang thillat in lan in chi hi. Abraham ading in hiai thutung bangzahta a theihsiam huailou leh haksa a hi maizen diam aw? Bangteng hileh Abraham in ginna in Pathian thu a zuipah hi. A tapa a tonpih a tangtung lam zuan in ni thum tak pai uhi. Huchi in Toupa’n a chihna mun tang a tuntak un Abraham in halmang kithoihna ding maitam a doh hi. Huchi in haltum ding singkeu a bawl khit in Isak hengak in maitam tung ah a sial hi (Gen. 22:9). A tapa dawtlupna ding temta toh a khut zantou a om laitak in Toupa Angel in van akipan in sam hi, “Naupang tung ah na khut kha ken” (Gen. 22:12) chi hi. Pathian in Isak tang a lat ding in belam tal a pia hi. Abraham tung ah Pathian a lungkim a, Isak leng sihna akipan a suakta hi. Hiai teng ah Abraham tuh Pathian toh hingkhawm in ginna in a pai hi. Isak halmang kithoihna in Pathian tapa it mahmah Khrist kithoihna dia piakkhiak ding a ensak hi.

THUKHITNA:
Laisiangthou ah Pathian sapna tang mi tampi om hi, amaute mi thupi ngen ahi uh. Himahleh Abraham sapna ah, Pathian thuchiam leh Abraham hihna thupi hina lawmlawm e! Mi masa penpen Adam hun pek akipan Khrist Lalgam tunding ahih hun chiang a vanthak leh leithak toh kizom dia tangtawn a bei ngei nawn lou ding vualzawlna thuchiam Abraham kiang a piak ahi. Pathian thuchiam a bukim hun ding lamen in Khrist a siamthak a om saptuamte’n i ngaklel hi.