Laisiangthou tangtel:
i. Himahleh kenzaw Pathian ginna ziak in tuabang in ka hih kei hi (Neh. 5:15).
ii. Mihing ading a lampi dik hileh kilawm a om a, a tawpna tuh sihna lampi ahi (Pau. 14:12).

Thumapi: Apple i et chiang in a siatna, amuatna bangmah a kimu kei a, himahleh i nek chiang in a lungvei bang a na om thei hi. Tuabang mah in Yoga in mihing a damtheihna pethei mahleh ei gingtute ading in hoihna sang in siatna hon tun zaw a hihlam thei le chih ka ut ziak in, laibu tuamtuam leh internet tungtawn in ka hon kaikhawm hi. Yoga i chih bang a hia? Yoga in Hinduism toh kizopna a nei hia? Hinduism in tunung hun ding a sinsak dan leh Khristiante adin Yoga a hoih diam? chihte i sutkhawm ding uhi.
Laisiangthou in ka hun leh nite a hong nai chiang in, thillamdang tampi a hong tung ding a chih bang in, tulai in setan in tangtawn gawtmun meidil a a tenpih ding mihingte zong in, Pathian zakdah ding thil tampi a bawlte lak a Yoga kichi tuh tuni a Khristian tampi`n siatna a ngaihtuah lou a taksa damtheihna ding chih lungsim a nei a hih mitampi omta hi. Huai ziak in, Yoga kichi ei gingtute adia hoih taktak hia chih i en ding.

1. Yoga i chih bang ahia?
Tulai khangthakte lak ah gingtu hi’n gingloute hitaleh taksa damtheihna dia kizang Yoga tuh Sanskrit pau in “Yuj” hi a, sappau in “unity” chi’n kilet thei hi. Ei pau in “kipumkhatna ahih keileh ei leh ei kithuzoh/ kithunun” chi in lehtheih hi. “Yuj” kichi thumal a kipat in “yajna” chih hong omkhia a, huai leng “kilatna, kipumpiakna” chih ahi. Yoga tuh Hindu sahkhua leh gindan a kipat a kha zalenna bukim mu a pathian toh kipumkhat ding a taksa leh lungsim thunun a sawizoina ahi, chileng khial lou pen ding hi. Bhagavat Gita in a sutdan in, “Yoga i chih pen Indian khangsim dan in Veda hunlai in Khristna in leng a mite lunglutna din a na zangta hi. Huai hun tuh BC 6-3 laivel ding ahi” chi’n gen hi. Hiai Yoga kichi tuh Buddhist, Jainism sahkhua zuiten leng a pathian utoh sunggil tak a kizoptuahna din a na zang uhi. Dr. Ishwar Basavaraddi in, “Yoga kichi India mallma ah kum 500 BC laivel in hong kithei khia a, Yoga kigenkhakna laibu masapen ‘Reg-Veda ahi chi hi. Reg Veda bangchi bang laibu ahi a chih nawnleh, Hindu kulmut Brahman siampu laibu ahi. Huchi’n hun leh nite hong beitou zel in Hinduten Yoga kichi pen amau sahkhua ah kailut in, tunitan in zangden uhi” chi`n gen hi.
Yogasana & Nature Culture for tool fitness laibu in, “Yoga i hih chiang in guh leh tang natna tengteng a beisak hi” chi’n gen a, huan a gen dan dangkhat ah, “Yoga tuh nisa pathian biakna ahi, a ziak a hihleh Yoga zingkal leh nitaklam chiang in nisa lam nga a kihih a hihman in” chi`n leng a gen hi. Khristna gen dan in, “Yoga a pat lungmuanna kim, Hindute gindan toh kituak muhtheih/tantheih ahi” chi`n gen hi. UK gam ah Father John Chandter in, “Yoga tuh hall sung leh biakin sung a hih ding a na phal nawnkei a kham kichi hi. Aziak ahihleh ei gingtute i taksa pumpi Tanchinhoih puanzakna/thehzakna a zat ding ahi. Charles Elliots in, Hindu tuh bawl ahi kei a, inn bawl bang a hi kei a, gam nuai bang ahi zaw hi, a na chih bang in, Yoga bang hun a hong om a kipankhia ahia chih ki theichet lou hi. Khangtou zel ahih ziak in gen tawpni leng omlou ding hi. Nidang in Shamanism a chih uh khalam damna muh leh neihna ding in taksa sawizoina apan a hong kipankhia hi a ngaipawl leng om uhi. Himahleh, Shamanism tuh sahkhua a kithalopna, limna nasep hi zaw hi. Yoga pen tuabang hilou in sahkhua leh niteng hindan kepbitna chih ahi zaw hi.
Yoga kichi ninhuaipi mihing muhkhiak ahih ziak in Indus (Indo-Aryan) luipang a teng Hindu (Persian pau Hinduism hong pianna) te in masawnna leh khantouhna a manoh lai hun (2500-1500 BC) vel a kipan hita ding a gintak ahi. Reg-Veda 10:136 leh 15 te a kimu bang in huai hunlai in taksa thunun leh nasep a kithununna chihna chiin na nei khinta uhi. Yoga kichi a min diktak tuh kum 800-200 BCE hun lai vel a Upanishads a Prota Yoga kichi in ana muhkhiak ahi. Hindi mipil Patanjali kichi Yoga tungtang gelh ding a seh masakpen ahi a, kum zabi nihna vel in Yoga Sutra hon gelh hi. Huai in ma sawnzel in Patanjali Yoga, Yoga Vertika (Medieval Yoga) chihte leh Modern Yoga chihte tanpha hong omta hi. Leitung pumpi huap in June 21 ni International Yoga Day chi`n kizang a, Hinduism, Jainism leh Buddhism sahkhuate ah hon zang san mahmah uhi.

2. Yoga in Hinduism toh kizopna anei hia?
Nei tham e, a kizom kia leng hilou in, Indus luipang a tengte sahkhua kum zabi 19 na a hong om khiak bang in Hinduism chih hong om hi. Huaituh a pathian uh kiang a tuntheihna ding ua a thilhih uh Yoga ana hi hi. Hinduism leh Yoga tuh nu khat suan ahi ua, Hindute school of thought (Darshan) guk lak a khat ahi a, huai teng lak a pathian om kei, leitung bangmahlou a kipan a Pathian bawl ahi chih pomlou, Science zilsiamna dungzui a hong om toutou Samkhya tuh a kingakna uh a hong hita hi. Karma, Yoga chihte nei in; Hindu sahkhua ah hotdam hihtheihna ding a lampi khat in pom uhi. Bhagavat Gita 6:14 ah Yoga diktak tuh kha hotdamna ding a hen a omna apan a suahtakna ding a zat, mihing hinkhua sawizoi tuh a hi. Huai pen paihkhiaksak theih mai a hi kei hi.

3. Hindusm in tunung hun ding a zilsak dan:
Hinduism in mihingte hiai khovel a omsung a a thilhih (karma) dungzui a a sihnung chiang a kipahman muding ahi chi’n, huaipen, piannawnna (Samsara) leh zalenna (Moksha) te zang in suikhiak sawm hi. Mi a damsung a a thilhoihhihte ziak a piannawn chiang a a zalenna in pathian (Brahmin) toh kipumkhat sakthei ding hi. Himahleh, thilhoih ahih tawm leh a sihnung chiang in a kha tuh thil neuzaw (Eg: mihing hi lou in ganhing, bawng, ui chihte) ah a piang nawn ding chih ngaihdan nei uhi. Piannawnna a pan a zalenna kha hotdamna tang a, pathian toh kipumkhat a pathian batna neih theihna ding a, kalsuanna tuh Yoga ahi chih Hindu sahkhua kisinsakna ahi.
Hindu sahkhua sinsaktu minthang India gam tuam tuam a hong zinte leh sinlaite kiang a Hinduism sinsaktu Sakunthala Jaganathan in a laibu gelh ‘An Introduction of Hinduism’ (1984) ah Hinduten a bawlzel uh thil giat taklang a, Khristiante ading a zuihtheih louh ding khenkhat om hi. Huaite tuh saulou in i gen ding.

Amasa nihte: (i) Yama leh (ii) Niyama en masa ni:
Yama leh Niyamate lungsim sianthousakna leh mihing hinna diktak a kipan a mohpuakna zohna chi uhi.

Yama: Hiai pen tualthahnate, gitlouhnate, huhamnate leh duhamnate lak a kipan a kihihsiangthouna leh numei-pasal kal a kikep sianthou kia hilou in zi leh pasal neih louhna tanpha huam hi.

Niyama: Hiai pen sunglam leh pawlam kiven zohna kawk hi, kingainiam tak a hinkhua zatna sinsak hi. Hiai in lungkimtak a pathian (Brahmin) a kituk-lutna sinsak a, huai ziak in vaite pathian thute sin ngai hi.
Adang gukte: (iii) Asama, (iv) Pranayana (v) Pratyahara (vi) Dharana (vii) Dhyana leh (viii) Samadhite ahi:

Asama: Hiai pen lungsim ngaihtuahna, taksa thunun a kisawizoina, chihtakna toh taimatak a hihna tuh ahi hi. Pranayana: Hiai pen khuak lam sawina ahi. Pratyahara: Hiai tuh khovel thilte lak apan a kikhumchipna ahi. Hiai in mihing hinna sawizoi in detsak chi uhi. Hiaite ahi Yoga taksa kisawizoina chi a i theihpen uh. Yoga chih tuh taksa maimai sawizoina, chih maimai ahi thei kei hi.

Dharana: Yoga diktak tuh Raja Yoga a chi ua huaite a khaikhawmna ahi.

Dhyana: Hiai in Dhyana a pilutnawn in ngaihtuahna tawptheilou nei ding in theihnadik peding in panpih zel chi uhi.

Atawpna ah Samadhi: Hiai pen in Yoga leh a nagihtuahna pumkhat suaksak in theihna dik pezel chi uhi.

Hotdamna tanna ding in theihna, thilhoih hih leh pathian ompihnate a poimoh gige a, Samadhi tuh sawngnih in kikhen nawn uhi. Mihing theihna bukim leh dikna nei a thilhihtheihna sangzaw Yoga hihna a kipan a neih tuh Siddhis kichi hi. Tua ban ah, pathian toh kipumkhatna ngaihtuahna khatkia neih tuh Nirvikalpa Samadhi a kichi nawn hi. Athilhih ziak a gawtna (piannawnna-Samsara) lak a kipan a hotdam hih in zalenna leh hotdamna bukim (Moksha) tangsak chi`n gingta uhi.

4. Khristiante adi’n Yoga hoih mah hia?
Hinduten taksa kisawizoina tuh kembit in a sahkhua uh thehzakna bulpatna ding in hon zang ta uhi. Tulai in Khristian tampite ngaihtuahna ah Yoga kichi thang mahmah ta a, kum bangzah hiam paita a Hindu te sinsakna in a hon zohkhitsa i hong bang maithei uhi. Huai ziak in, Yoga kichi a thumal kia leng i gintaklouh ding ua, i saptuam sung, khotang leh i innkuan chiat a hiai Yoga hoihlouh dan i kisinsak uh poimohta hi.

Ei zosuante tuh tuipi gallam a kisinsaknate zui a Khristian i na hi ua, mi masate (pi-le-pu) sahkhua dawi-le-kau biakna zuih ut thakna lungsim bang leng i nei nawn maithei uhi. Himahleh, thilhoih muta a, a muloute bang a om theih hinawn lou hi.

Pathian sinsakna Laisiangthou i etchiang in, a tung a Yoga sinsakna tomkim a i gelhte un Khristianna nasatak in dou hi. Theologian minthang Abraham Dommer kichipa’n, “Khristian Yoga” ana gen a, huai thu Yoga minthang Baba Prem in “Khristian Yoga” chih kitak a muh leh a lungphawng guih a, Hindu a piang Hindu laibu upapen Vedas mun poimoh pen luahtu, Sanskrit pau a na kigelh a muh in zadah mahmah hi.

Yoga tuh taksa kisawizoina kia ahi kei a, huchi bang a gente’n Hindu sahkhua kisinsakna gensia ahi i chih leh, Khristian khat hingal a Yoga na hih gige mite in Khristian Thugin a ngainep uh chihna ahi. Yoga neitu tuh Hindute ahi ua, Khristiante ading in hiai in poimohna bangmah a neikei hi.

Thukhupna: Southern Manipur a tengte 99.99% Khristian i hi ua, Local Newspaperte a Yoga hih chih alemlak leh amun-le-mual hong kisuah ka simkhak ni’n, aw setan in mipite lungsim thuzoh hina mahmah e maw, chi’n ka pona mahmah hi. Eite lak a Yoga hoih ahi chi a hih, Yoga in siatna neikei chia gingta leng om zawmah ding in gintak huai hi. Sawltak Paul in, “Hamsia dong in om uhen” a chihte lak a tel ding in i kiphal kei hi. Paul in, “Bangkim enchian zaw unlan, a hoih tuh len tinten un” (I Thess. 5:20-21) a chih bang in, gingtute’n i khalam hinkhua leh i salam hinkhua hon hihbuaithei thilte hoihtak a velchian in huaite a kihep siangthou i poimoh penpen uh ahi. Miten Yoga a hoih hi, taksa damtheihna ding a hihding ahi, chi a deihsak tak a hong gen uleh leng, kei Khristian ka hi, huaite hih ding ka Toupa Pathian in hon phallou ahi i chih ngam a ngaita hi. Apple a siatna omlou, himahleh, i nek chiang a lungvei omte toh i kibatlouh ding uh ahi. Khristian thugin (Laisiangthou) leh Khristian hong phutkhepa Toupa Jesu Khrist deihdan toh kituaklou Yoga hihna a tel a na ki-Khristian sak leh, nang-le-nang kikhem lungmuang hi ding na hi. Huai ziak in, Toupa Jesu`n, “Khemna na tuah louhna ding un thum gige un” a chih tuh mangngilh kei ni. Khristiante tuh leitung hindan toh kituak a hing ding i hi kei ua, Pathian deihdan leh Laisiangthou toh kituak a hing dingte i hizaw uhi. Toupa Jesu`n, “Kei Lampi, Thutak leh Hinna tuh ka hi, kei kiang a pailou tuh kuamah Pa kiang a tung kei ding hi” (Jn. 14:6) chi hi. Huan a dang ah “Kei Toupa a hon hihdampa tuh ka hi” a chi hi. Damna bukim tuh Yoga a om lou in Jesu Khrist a om hizaw hi. Sodom mite siatna ziak a khopi susia ding in kuan in, Vansawltak in, Lot kiang a, “Na suahtakna ding un taikhia un” a chih bang in, ei gingtute setan thang Yoga a kipat i suahtak theihna ding in gintaklouh a hih leng i hihlouh ding uh ahi. Agingta leh ahihte lak akipan a i suahtakna ding in i taikhiak ding uh ahi.

Khristian innsung a Yoga ngaina leh lunglut i omleh nu-le-pate, huai apat a suahtaktheihna ding in inkuan chialpi leh Counseling chihte ngaihnat a neih i tup chiat ding uh ahi. Tate tuh Pathian a kipat a i goutan uh ahi a, Van-gam i tunchiang a Toupan ka hon piak na Goutante hiai sung ah a om uhia? hon chi leh na innsung mite kimlou ding na hihman in Van-gam a leng kipaktuanlou ding na hi. Tunin innsung a bitna ding in Pathian a khatna a koih chiat in, leitung thilte sang in Pathian Thu lunggulh in Pathian Thu ah dangtak zaw chiat le, huai siatna lak ah Toupa ziak in suahtakna leh kipahna na mu ding hi. Yoga akipat innsung vengbit zouchiat ding leh eimah hinkhua kikem siangthou chiat ding in Toupa`n simtute tengteng thupha hong pechiat ta hen, chih ka thumna ahi