Tapa in sal apat a hon suahtaksak leh, na suakta taktak ding uhi (John 8:36)

India in Britishte apan suahtakna a muh uh theihgigena kumteng in August kha in India gam pumpi ah zat in a omsek hi. Suahtakna leh zalenna mihing pianken a poimoh himahleh aman piak a lei angai sek hi. India in zalenna a muhna ding in Mahatma Gandhi leh nam makai tampite’ kipiakna tuni tan in kigen mangmoh hi. India gam suahtakna i gen bel political suahtakna ahi a, tua hilou khalam ah gen leng saltanna tuamtuam leh suahtakna tuamtuam tampi om hi. Adiklel gen in politics ah suakta mahleng khalam a i suahtak keileh tangtawn a mangthang veve ding i hi. Political suahtakna apoimoh mahmah hang in damsung toh kisai lel ahi a, khalam suahtakna bel tangtawn hinna ahi. Suahtakna a om keileh zalenna piang theilou hi. Suahtakna leh zalenna mihing in pianken a apoimoh himahleh khelhna a puksa khovel khangthu et in a hatzaw in a hatlouzawte nelhsiahna leh zalenna kisuksiatsakna in adim hi. Khalam ah leng tua mah ahi – piangthak, ahihhang a khelhna sikha a omdet theih ahih bang in, salam ah leng gam khat kumpi hizezen himahleh kumpi dang thuneih khum (titular king) om thei hi. Zalenna kichi a akipatna (cause) hilou in thildang in a omsak sawn (effect/fruit) ahi - suahtakna in zalenna a gahkhia hi.

Makai Hoih: Suahtakna a om theihna ding a thil kisam bangzah hiam a om hi. Gam zalen leh gam nuamsa i chihte midang/thildang ukna apan suaktate ahi vek uhi. Suahtakna ding in vualzoh akul hi. Vualzohna ding in akisam tamtak aom a tuate a neilou namte zalen theilou uhi. Gam thupi leh khangtou i chihte a khang tangthu uh en leng leitung pumpi in a ngaihsang uh makai thupi ana nei ngeite ahi uhi. Makai hoih in a gam it, a nam it, a mite huaikhawm, mahni mimal nopsakna teng pekhia a a mi-le-sate adia a hinna nangawn pekhia makai neite gam zalen leh nuamsa ahi uhi. Makai hoih i chihte a mite muantham ching a makaite ahi. Makai hoih bukim bel leitung ah aom kei ding himahleh mi tangpite muantham ching makaite ahih uh akul. Leitung ki-ukna dan ah gam khangtou lelte ah buaina tam diak hi. Etsakna din, Pakistan bang ah agam vaihawmtu lianpente nasan corruption a ngoh a paihkhiak a om theizel gam ahia, a gamsung zalenna bang dinmun ahia chih tuh atangpi ding theihsa ahi. Makai buai chih tuh suahtakna buai ahi a, suahtakna buai tuh zalenna buaisa ahi. Khalam suahtakna ding in “Midang kuamah kiang ah hotdamna a om kei, vannuai a mihing sak lak ah, hon hondam ding min dang a omkei” (Nas 4:12).

Thumanna leh zahtakna: Suahtakna ding in makai hoih apoimoh chih pen genlouh a leng ahiding sa ahih lai in, mipite leng thumang, kithunun, dan zahtak mite ahih ding uh kisam ahi. The Great Wall of China kichi kulhdai thupi Jesu hong pianma kum 220–206 BC hunlai a Chinate Emperor Qin Shi Huang in ana bawl anung a Ming Dynasty in asutzop, asaudan avek a gawm in kilometer 21,196 pha a chi uhi. Hiai in Chinate kithuman dan leh a pankhawm dan uh hon musak a nam thupi hidia suangphum ana phum khin uh ahive hon chisak hi. Makai akua akua hitaleh mipite’n makaite zahtakna aneih masiah uh makai hoih om theilou ding hi. Insung ah Pa pen khatpeuh hitaleh a tate’n a thu aman laiteng uh tua insung ah lam-etna om hi. Civil administration ah leng thuneite leh makaite zahtak a a thu uh i man chiang in thilhoih hong piang ding hi. Makaite thumanglou, musit, amau sang a theizaw kisa ahihhang a kuamah in makai dia lah a etlouh i lak a atam chiang in kisuaktalou in kikoltang deuhdeuh zaw hi. Mipi lam en leng dan toh kituaklou thil hitheiloupi hon hisak teitei theite heutu hoih i chi uhi. Heutu khat in “Function alian aneu ah non chial ua sum hon peleng nekguk, hon pekei leng lah chau lua!” chih kiloh zel chi hi. Mipi lam ah hih diklouh tampi omthou ahi. Public makai kichite lah mi khatehnen delh, mi khutzat kitam, i pomtheihte ahih ualeh a diklouhna uh leng gen lem teitei, i pom theihlouhte ahih ualeh a hihhoihte uleng gense teitei khop a kituaklou society ah suahtakna leh zalenna om theilou ding hi. Abul ah i vote uh i zuak ua, tuazoh in vote i lei ua, i lei zohlouhte i gu thouthou ua, tua khit chiang in a sunglai tangkhate hamphatna om theiteng i kisawk huan lukluk uhi. India gam ah dan hoih pipi i nei ua, tuate lou natural law hiam natural justice kichite leng a oma, tuate zahtak a thumanna a tawm mahmah hi. Khovel ah hoih bukim chih a om kei dia himahleh gam khangtou leh mi civilized zawdeuhte i et leh dan tangpite beek hoih tak in a zui dipdip uhi. Kivel thak leng, mihing in lamlian utna munmun a kantheihna khopi ah i om a, Motor inleng utna munmun a lampi kan, utna munmun a khawlsak, i ganvulhte’n leng eite hihdan mah in utna munmun a kual, lampi kan, ektha. Passengerten lah lamlai, lamnawl chih omlou utna munmun a gari khamkhawl gaihgaih thei. Bible in tuh tuite lak ah na tanghou pai in a chih thutuam ahi a eite’n bel luiguam leh nullah guamteng ah i nin kihhuaiteng i pai ua nitamlou nung in lamlian lai teng ah i mukik neinai zel uhi. Motor neu-a tuangte’n helmet khuk ding, motor lian zaw a tuangte’n seat belt gak ding chih lel leng palsat teitei. A awlmoh kichite’n leng thil hoih ken kon pankhe ding chih sang a kuate hiam in panle uh chia dorkhat khia khiate i hi uhi. I lamliante bawl ding in leng ei Pathian thu awi kichite sang in state dang a milim pathian bete bawl mah deihhuai zaw bang maimah hi. Bangteng gen mah leng diktatna dan zahtakna, mimal kithununna leh dan enkaitu makaite thumanna i neih mateng suahtakna leh zalenna hong tung theilou ding hi.

Kipumkhatna: Khangthu ah Germante kipumkhatna, Englishte kipumkhatna, Chinate kipumkhtana, melma lauhhuaite ma a apankhawm dan uh tangthu ah i sim uhi. Salam hi in khalam hitaleh suahtakna leh zalenna om theihna ding in ahoih lam-a kipumkhatna poimoh hi. Minam lianpite nangawn a kipumkhat theih ualeh eilawi mi tawmchikte kipumkhat sem leng kilawm, tua hilou in Lamka khopi “Presidentte leh Secretary te khopi” hon chihsak zaw uhi. Kikhem tuah, kihaza tuah, kimuangmoh tuah mite lak ah kipumkhatna piang theilou ding hi. Khat leh khat kihehpih tuah a, kilainatna nei a, kingaihdamna a omna munte ah suahtakna leh zalenna om hi (Eph. 4:31,32). Zuaugen tawpsan a Thutakna hinpih ding ahi. Thutak kichi a mi bawlhoihna dia zat theih ahih bang in mi vuakna dia leng zat theih ahi. Itna a thutak gen chih a om bang in huatna toh (selphou tupna a) thutak gen chih leng om thei hi (Eph 4:15). Ei kia adik pen bang a thugen, midangte adiklou zaw dan a muhna, kisoiselna a omna peuh ah kipumkhatna sang in kibalkhapna ding kong kihong zaw hi.

Suahtakna leh Zalenna: Suahtakna leh Zalenna toh thumanna leh mohpuakna a tonkhawm gige ding ahi. Suahtakna kia tawisang a thumanna (dan zahtakna) a om keileh hiamgamna leh sisan suahna kimanoh pah pah hi. Huan, zalenna kia deih a mohpuakna langaplou mite sawt zalen manlou in saltanna dang ah lut pah sek uhi (Gal 5:1). Suahtakna leh zalenna kichi galdouna leh vualzohna toh kisai ahihman in pilvangtak a lenkiploute amin lel a suakta sunglam a saltang suak thei uhi. Israel kumpipa Jehoahaz kumpi ahihkawm kawm in Suria kumpipa Hazael leh atapa Benhadad thunuai ah a damsung teng koltang hi (2Kum 13:3). Judah kumpipa Hezekiah kumpi thupitak himahleh Assuria kumpipa Sennakerib sikha in alutkha a, aman apu Sennakerib lungkim sakna ding in Toupa inn a gold om tengteng, Biakin kongkhak a gold kithuahte leh kumpipa inkhuam-a gold kibelh teng a kheuh khevek a Assuria kumpipa a pia hi (2Kum 18:14-16). Amin a kumpi hi, atak tak-a kumpi thuneihna neilou, midang in a thuneihkhumte sikha kumpi hilel uhi.

Thukhitna: Leitung vai ah hi in khalam vai ah hitaleh suahtakna a om theihna ding in melma maituah thei Makai hoih akisam masa hi. Tuaban ah mipi lam ah tua makaipa adia kipiakna leh thumanna a poimoh nawn hi. Jesu Khrist David suan a humpi nelkai kichipa thunuai a omgige loute amin a suakta, ataktak a khelhna sal a tang ahi uh. Kumpi hingal ahihhang a kumpi hamphatna neilou (Titular king) a om theih bang in Piangthak hingal ahihhang a sum deihtakna sal a tang, pulpit a thu gengen sa utna sal a tang, namte makai, heutu zahtak huai dinmun a om, himahleh hazatna leh muhdahna sikha, mite’n Khami mahmah a atheih uh ahih hang a a sunglam a khatna (bitterness) a dim (Eph 4:31). Kampau a itna leh kingaihniamna thu gengen himahleh a sunglam a Pharo om (Ro 12:9). Biakin a meithai tagah hehpih ding gengen himahleh Bazar mun leh office lam-a nge-duhgawl bang (Mat 7:15). I gennop hiai ahi: suahtakna leh zalenna kichi polam a koi system hiam vahihsiat a thilhoih hong piang guih ding hilou in mimal malte hinna kibawlthakna apan hong kipan ding ahi zaw. Bible a Tapa taimang in a pa inn apan taikheleh suakta a zalen ding a kisakleh a va koltang zosop hi. Paul in “Bangmah sikha din ka kiphal kei hi” a chih thupoimoh mahmah ahi (1Kor 6:12). Jesu Khrist loungal thildang sikha ding in kiphal nawn kei ni. Amah kia ah suahtakna thupi, suahtakna lamdang a om hi.