Mihing lungtaisak sawm bang a mitmei veeng lel hilou in, Khrist’ nasemte bang in, lungtang apan in Pathian deihlam hih un. Mihing’ nasem hilou a Toupa’ nasem na hihman un, hoih deihna toh na toute uh’ nna sem un (Efesate 6:6-7).

Tukha a i thupi uh lunglut huai ka sa mahmah a, hoihtak a kisinsakna neihtuak mahmah leng ka sa hi. Nektak zonna leh nasepna a midangte ading a vualzawlna i hihtheihna ding in Laisiangthou in bangchi gen ahia? chih i theih poimoh masa hi. Laisiangthou, mitbulh a zang in i nekzonna leh i nasepna enleng i muh dan hong tuam ding in gintakna ka nei a huai apan hong piangkhe ding tuh nang leh midang adi’n vualzawlna hong hi ding hi.

Nektak Zonna leh Nasepna kichi tuh Pathian Thilgel ahi. Pathian in mihingte om maimai ding a hon bawl ahihlouh dan Adam leh Evi tangthu apan in i muthei hi. Gen.2:15b ah Eden Huan khou a kem ding in Pathian in Adam leh Evi koih hi. Pathian in a hon siam dan i ngaihtuah lel in leng om maimai ding i hihlouh dan a chiangmai hi. Huan i Biak Pathian leng khawl tawldam maimai lou in nasem den ahihdan Jesu’n gen hi. Joh. 5:17, … Ka Pa’n a nna a sem a, ke’n zong ka sem hi. Huai ziak in Pathian in a siam mihingte amah bang a thanuam tak a nna sem a nekzong ding a hon deih ahih dan i muthei hi. Tua in i nektak zonna leh i nasepna ah Pathian lunglut ahi chih hon musak hi. Khovel ah mi tamtakte’n nektak zonna leh nasepna pen khovel thil dan in koih ua khalam thildan a a ngaihtuahlouh ziak un nasep ah zawntatna, chihtaklouhna, ginomlouhna toh semkha zel uhi. Huai ziak tak in, midangte adia vualzawlna hiding a sap leh mohpuakna neite vualzawlna daltu, mi career susetu, mi khosakna subuaitu in i pang maimah uh. I nasep ah Pathian lunglut ahi chih chiang mahmah leng zaw sepna mun a pailou chihte a om kei ding a, a minpu a sem maimai chihte om kei ding a, suaikai ding kia a office kai chihte om kei ding a, tehna diklou zang a meh leh vanzuak chihte le a om kei ding a, seppihte ading a thuak haksa velvul inleng i om kei ding hi. Pathian in na naseppihte etton ding a hon koih ahihlai in ginglou mite’ thildiklou hih dan khawng va enton maimah i hi hia?

Thadahna tuh Vualzawlna Daltu ahi (Pau.18:9; 19:15; 22:13). I nektak zonna leh i nasep ah Pathian om chih i theihlouh chiang in thadah tak a sepna om hi’n ka thei hi. Pau. 16:27 in “thadah mi in siatna ding zongzong a …” chi hi. Sapte’n ana gen uh, “Idle mind is the devil’s workshop” a chih bang in melmapa’n semlou in bangchi in loh ka lathei dia? Midangte sepsa bangchi in ka laksak thei dia? chih ngaihtuahna sianglou hon ngaihtuah sak in hon sem khesak zel hi. Hichibang ngaihtuahna Pathian in kih ahi (Pau.15:26). Ngaihtuahna giloute bangtan kem ding na hia? (Jer. 4:14). Kuapeuh in a nna a sepnop kei aleh nek zong ne kei hen (2 Thess.3:10b). Thadahna in ei ading leh midang ading vualzawlna hon tun theilou hi.

Lungkimtheihlouhna tuh Vualzawlna Daltu ahi. Lungkimna toh kithuah Pathian limsakna tuh punna thupi tak ahi. Khovel ah bangmah i lutpih kei a, bangmah i pawtpih thei sam kei ding hi (1 Tim. 6:6-7). Kumpi Solomon in mihing ading in nasep a tan ahihman in a lungkim kaan a thilhoih zaw bangmah a om kei ana chi hi (Eccl. 3:22). Luke 3:14… na khasum utoh lungkim un. Eimi Government nasem khat in hichi’n ana gen hi, “hiai mun ah zaw i loh kia hi-a kibuai lua hi.” Hiai a thil gen in saupi hon ngaihtuah sak hi. Khasum/loh kia lou muh sawm/lamen a kitam theih luat ziak in sawk louh ding tantan hon sawk sak a, seplouh ding tantan hon semsak hi. Hau deuhdeuh in om mah lehang leng huai in kipahna hon tun tuan kei a huai naksang in i liam nengnung sek uhi. Biakinn ah thilpiak tampipi pemah leng i thilhih ah kisiamtan lou tampi ki-om ding hi. Muhna dikloupi a muh himahleh Biakinn a i thoh chiang a siang a ngaihtuah mai i hi diam?

Tehna diklou zang a sum dawng leh dikloutak a vaihawmna in vualzawlna nang ading leh midang ading dalkha hi (Lev. 19:35-36). Mahni metna ding leh hauhna ding ahih nakleh thil diklou simsim ahih leng poisalou kitam hi. Bible in leng diktat lozen ken chi hiven, chi’n kisiamtan tawmtawm i hi uhia? Office ah, dawr ngakna ah, Bazar mun ah, i nektak zonna leh i nasepna mun ah mi’n bangchi bang in hon thei ua? Sumduhpa, sumduhnu chih hiam khawng a hon theih i hikha diam? Vaihawmna zangkhial hi’n na kithei hia? Na khut ah thuneihna om chih ziak a nang hon gumloute alang lang denna in na thuneihna, midangte ading in hamsiatna suak thei hi. Mat. 7:12 Thil bangkim min na tung ua a hih ua na deih ding bang uh, mi tung ah leng hih sam un.

Midangte adia Vualzawlna: I nektak zonna leh i nasep ah Pathian om ahi chih phawk gigena leh Pathian mai a accountable gige i hih dan theihna in Pathian deihlam hon semkhe sak ding hi. Josef hinkhua ah, khemna leh khelhna apan a suahtakna tuh Pathian in mu gige ahi chih a thei a, huan ah Pathian in ompih gige ahi chih leng a thei hi. Josef ziak in Toupa’n Aigupta inkuanpihte a vualzawlta hi; inlam leh gamlam a a neih tengteng Toupa’n vual a zawl zel hi (Gen. 39:5).

Efesate 6:6 Mihing lungtaisak sawm bang a mitmei veng lel hilou in, Khrist’ nasemte bang in, lungtang apan in Pathian deihlam hih un. Eimi Daktor khat thupi leh ettontak ka sak mahmah om hi. Khatvei a nasepna mun ah ka va hoh leh a seppihte leh damloute a awlmoh dan ka muh in hon zou mahmah hi. A seppihte (ginglou mi ngen) toh ann a nekkhom dek teng ua amah thumna neisak masa gige uhi. Damlou gim om chiang bang in amah thumna nei ding in samsak zel uhi. A seppihte’n amah khami (Spiritual man) ahi chi’n thei uhi. A seppihte lak ah Bible hawmzel hi. Amah bang a i nektak zonna leh i nasepna Pathian gam nasepna a zat ding ahi. Nikhat, eimi numei khat in ka thumkhawmna mun uah a sepna mun ah a seppihte’n, nuih mai gige leh kipak gige a na om theih bangziak ahia? chi’n hon dong uhi chih thu hon gen hi. Aman, Jesu ka neih ziak ahi, chi’n dawng hi. C. Peter Wagner in, “The place of workout your faith isn’t just at church. What people do in the workplace is their ministry, just as much as singing in the choir is at Church.”

2 Timothy 2:15 Nasemtu, zumna ding neilou, thutak thu diktak a zang, Pathian pomtak hiding a nangmah kipe ding in theihtawpsuah in kizil in. I nasepna ah nasep ding hong kipia bangbang a hoih theipen, a dik leh tang a sem dia commitment neih ding tuh gingtute nasep dingdan ahi. Pathian in a hoih thei pen a sem dia hon deih ziak in hiai Bible tang ana om hi. Tulai khovel ngial ah na ki update zoh kei ngeingei leh kuamah in dottak, naihtak, ngaihkhiaktak hon salou ding uhi. A minpu lel a hih nilnelna in hamphatna leh vualzawlna na lamet bang na mu kei ding a midangte ading inleng vualzawlna na hi kei lai ding hi.

Laisiangthou in Tabitha (Dorca) bangchi bang in chiamteh hiam? Na hoih sem gige, zahngaihna thilhih hih gige mi leh numei thilhih hoih leh thilpiak a hau mahmah ahi (Nas.9:36-43). Tabitha in kei numei sia in bangmah ka hihtheih ding om kei chilou hi. Ka nektak zonna leh ka nasep leng midangte panpihna dia neu lua, tham kei lua, chi lou hi. Tabitha in a khut a om phim zang in meithaite puannak ding khuisak in Pathian na ana sem hi. Sapte’n “Your greatness is not what you have, it’s what you give” a na chi uhi. Gingtute, Pathian in ei tungtawn a midangte nasep hoih a sukha ding, impact nei ding a tua na omna mun, na sepna mun a hon koih ahihlam mangngilh kei ni. “Preach the Gospel at all times, when necessary use words” St. Francis of Assisi. Kolosate 3:17 Huan, na hih peuhmah uh, thugen ah hiam, thilhih ah hiam amah ziak a pa Pathian kiang a kipahthu gen kawm in Toupa Jesu min in hih vek un.