Sam 1:3 – Amah zaw tuiluang kiang a sing suan, ahun a gah zel, anah leng kau ngeilou bang ahi a; a thilhih peuhmah alamzang zel ding hi.

“Aw i lak uah kua ahiam, THUTAK a muanhuai, THUTAK gum a ding’ ding, Toupa lam a pang?” Biakna Late no. 6na
Abraham Lincoln (US President 16na) in “Pathian apan vualzawlna ka ngah khempeuh Laisiangthou (Bible) apan ahi. Huai ziak in, Pathian in mihingte kiang a a thilpiak manphapen tuh Laisiangthou (Bible) ahi” chi hi. Midangte adia Vualzawlna i hih theihna ding in, Pathian apan vualzawlna i poimoh ua, huai vualzawlna i muh theihna ding lampi omsun tuh Laisiangthou i sim gige a, i hinpih ngai ahi. Laisiangthou Pathian’ aw hinpihna tungtawn a midangte’ adia vualzawlna i hihtheihna ding in;

Khatna ah: Laisiangthou Pathian aw Ahihna Pomkip Masa in:
Sam 1:1 “Pathian limsakloute’ hoihsak bang a om ngeilou a, mikhialte’ lampi aleng ding lou a, musitte’ tutpha aleng tu ngeilou mi a hampha hi.” Hiai ah “ngeilou” chih kammal ahong kizang hi. Atom in genle, Pathian limsakloute, mikhialte leh muhsit hatte toh thukhatsat a luangkhawm ngeilou chihna ahi.

Pathian limsak Daniel in “Kumpipa an hiam, a dawn uain hiam a kihihnit louh a lungtang in a tum chiltel hi” (Dan 1:8) hiai bang in alungtang sugah thupukna kichiantak bawl a, huaimah hangsantakin dinpih ngam hi. Amah bangbang a Pathian limsak mite’n soiselna leh demna a tuah ngeingei ding uh khenkhatte;
1. Min a dawn lai a dawnlou tuamse, kimihoih sak, kideihkhop pa chih bang a lohtak ahi mai di e maw!
2. Na lawmte’n ne/dawn vek uh eive, “nang chauh na hi aw!”.
3. Apoi di hia khatvei bang, anawn chiah na hih nawn dah kei dia!
4. Deihsakna na tang kei daih de aw, thumanglou, genhakpa!
5. Tulai pau in, vangam kailouh nadi zenlah hilou a, nesuk/dawnsuk maive!
6. Ngaihzawng nangawn le muh louh loh hial le kilawm kasa! Nungakte’n PA’ salou di ua, tuailua’ chi zomah un teh maw. (Bible a kigelh bel ahi kei)

Daniel in a Doctrine a chiang mahmah ahih man in Laisiangthou Pathian aw mah ngaihsangpen in a nei a, bang kim paisan in Pathian thupiak leh dante mah alenkip tinten hi. Ei gingtute ading in thupi in ettontak mahmah hi.

Khangthak tamtakte’n “Laisiangthou tu hun toh kituak nawnlou (outdated) ahi, Pathian le om taktak kenteh!” chi uhi. Huai ziak in, Laisiangthou toh kisai i kisinsaknate a thak a i vel ua, kiptak a i dinpih uh angaita hi. Laisiangthou toh kisai i Saptuam pom dan hiai bang ahi.

“Thukhunlui laibu 39 leh Thukhun Thak laibu 27 kigawm bu 66 Laisiangthou, thumal leh a vekpi a Pathian hatkhiak thu a kigelhna masa a a diklou omlou, up ding leh zuih ding a thuneihna sangpen leh a tawp ahi” (Kiphuhkhiakna Dan leh Kivaipuakna Dan 2015, (Article 2 THUGIN SINSAK GENKHIAKNA)

2 Pet 1:21 “Laisiangthou himhim mihing thu a pawt ahi ngeikei a, mite’n Khasiangthou sawl in Pathian a kipan a gen zaw uhi” chi hi. Pathian aw i zaktheihna tuh Laisiangthou ahi a, na sim chiang in zui leh zang thei ngal di’n mansa in om in.

Donald Trump (America President hihna lenlel) in hiai bang in a gen hi, “Holy Bible clearly says GAY Marriage is an evil act, therefore, has no place in America” (Bible in zek kibangte kitenna khelhna nasep ahi’ chi ahih man in Amerika ah hiai bangte’n mun anei thei kei ding) chi’n gen hi. Ke’n zaw Laisiangthou toh kituaklou ahih man in ka ne in, ka dawn in, ka la thei kei ding i chi ngam diam?

Laisiangthou in mikhialte toh thukhat a luangkhawm ngeilou a Laisiangthou mah zui tintente mihampha ana chi hi. “Laisiangthou in huai a china a, kei ngaihdan in…” chihte i tawpsan a, “Laisiangthou in a chi” chih gum ngam a i pomkip ngam a hunta hi.

Nihna ah, Na hinkhua ah Laisiangthou Pathian Aw, POIMOH MASA in Nei in:
Sam 1:2 “A kipahna uh TOUPA Dan ah ahi zaw a; a danthu sun leh zan in a ngaihtuah ngitnget hi” Hiai ah “TOUPA’ Dan” hong kigen a huai tuh Laisiangthou ahi. Ahihleh huai Laisiangthou bangchibang laibu ahia? Sawltak Paul in Timothy a laikhakna ah hiai bang in gen hi “Laisiangthou peuhmah Pathian hatkhum-a piak ahi a; huai ziak in, thuhilhna ding, taihilhna ding, bawlhoihna ding, diktatna lam a kichilna ding in a phatuam hi” (2Tim 3:16; 2Pet 1:21) chi hi.

Kuapeuh niteng i khosakna ah Dan bei in kikhosa ngeilou hi. Mihingte khosak niam leh san dan dungzui in, siamna leh pilna i neih dungzui in, paidan, chiindan leh khosakna dan tuamtuam i nei chiat. Huchibang ahihlai in na mimal hinkhua, na inkuan khosakna leh na Khristian hinkhua koi ah bang dan zui a kibulphuh na hi a unau?

Aban i sim zelna ah “a’ dan thu tuh sun leh zan in a ngaihtuah ngitnget” chi hi. Huchibang a ngaihtuah leh buaipih a sim gigete’n khuaizu sang in khum sa zaw ua, dangka leh dangka-eng sang in manpha zaw sa uhi (Sam 19:7-10).

Tulai in Laisiangthou neilou i om nawn kei ua, nidang in bel innkuan khat in khat khawng i nei hamham ua, sim leng kisim tam a, khalam thu ah gen ding leh kikup ding i nei tam mahmah hin ka mu hi. Tulai in bel innkuan khat in tampipi i nei ua, i sim man kei ua, whatsapp leh Facebook etc i sim tamzaw ua, i Laisiangthoute uh koisan hiam ah ap phelphul thei ding khop in i ngaihsak kei uh abang hi. Tuhun a i dinmun uh khenkhat ka muh dan tamlou kon taklang ding.

1. Phone i mansak leh poi i sa lua ua, Bible i innsung ah i koihna i theihlouh inleng poi i sa lawmlawm kei uh.
2. Tuhun in Phone koi hiam a i nut siat leh gamlapi tung khin mahlehang i kik vengveng a i va la ua, Bible i nutsiat leh kha khat bang i nutsiatna a a omom poi i sa kei uh.
3. Zingsang i thoh in News leh Phone enkawm in ekbuk namsepi sung ah sawtpipi tut poi i sa kei ua, Laisiangthou sim a room siang hiuhiau sung ah dak kimkhat leng sawt i sa uh.
4. Laisiangthou i sim chiang in ihmut hun ding kitheipahpah a, phone a i et chiang in ihmut ding i mangngilh uhi.
5. Whatsapp leh FB khong a kuahiamte thugente comment/like i pesek ua himahleh Laisiangthou i sim chiang in comment hiam Like hiam leng i ngap kei uh.
Mitengteng hiai dan ahi chihna hilou in atam zawte hiai bang dinmun a om hin ka kimu hi (adik kei leh ngaihsiam).

Thomas Jefferson (America founding Father) in “Laisiangthou simna leh telsuina in mimanpha hong suaksak ding a, Pa hoih zaw leh pasal hoih zaw hong hisak ding ahi” chi hi.

Daniel Webster in “Laisiangthou (Bible) tellou Laisiamna (Education) kia in kimanna ding omlou hi” ana chi hi. Huai ziak in na hinkhua ah Laisiangthou a poimohpen in koih inla, sim gige in, huchi in Saptuam leh khotang ah mi poimoh na hong hithei ding hi.

Thumna ah, Hinkhua a Laisiangthou hon sinsak thute PESAWNTU hiin:
Sam 1:3 “Amah zaw tuiluang kiang a sing suan, ahun a gah zel, a nah leng kau ngeilou bang ahi a; a thilhih peuhmah a lamzang zel ding hi” ana chi hi. Mite’n Pathian ahon limsak ua, a’thu a ahong kibulphuh khit chiang un agah muh ding ahong om hi. Ahihleh bangchibang ahi dia? Galatia laibu ah gah (kha gah) hiai bang in a gen hi; Itna, Kipahna, lemna, thuaktheihna, migitna, hoihna, muanhuaina, nunnemna, kidektheihna chihte (Gal 5:22). I mimal hinkhua ah hiai bang gahsuahna muh theih ding aom hia?

Aban i sim touh zel aleh “a thilhih peuhmah a lamzang zel ding hi” a chi lai hi. Kua lohchinna deihlou aom dia? Hiai mah hilou hia maw sum-le-pai leh tha-le-zung tampi seng a i zonzon uh? Lamzan a i hong lohchin theihna ding thuguk hiai Laisiangthou ah a om chih athak in phawk thak chianti (Josh 1:8; Sam 37:4-5; Pau 3:5-10).

Billy Graham in “Laibu dangte’n a hon piak theihlouh nopna Laisiangthou in ahon pia hi. Haksatna ahon zohsak a, lauhna mun ah muanna ahon pia a, sihna limguam palsuah dingdan ahon hilh a, ka damsung teng in atam theipen ngah ka sawm hi” chi hi. Na hong lohchin a, tampi a na hong gah khiak chiang in midangte’n ana hamphatpih ua, huchi in i theihlouh kal a midangte pesawntu ana kihi gige hi.

Thukhitna: “Aw i lak uah kua ahiam, THUTAK a muanhuai, THUTAK gum a ding diing, Toupa lam a pang?” Khatveivei midangte adia vualzawlna i hih theihna ding in i theihtawp in tha-le-zung, sum-le-paite seng in pan i lasek ua, huchibang a pan i hon lak tam semsem leh i vuina ding leh midangte’n i tung a a lungkimlouhna ding uh mu tam semsem uh abang hi. Himahleh Laisiangthou sim gige mite hinkhua apan in gah khum leh kilawm hong suak in amah mimal hinkhua leh midangte’ hinkhua a lungkimna leh kipahna tun naknak hi.

Huai ziak in, Laisiangthou (Thutak) Pathian aw ahihna hangsantak in pom inla, gum in, na hinkhua a mun poimohpen luahsak in sim gige in, huchi in midangte’ adi’n vualzawlna petu na hong hi ding hi. Laisiangthou Pathian aw, hinpih ni. Amen.