Abraham suan a piang Jesu Khrist ah Pathian in Abraham a vualzawlna leh vualzawlna hi dia a bawlna (sapna) a tangtung hi. Jesu Khrist tuh lei a namchih adia vualzawlna ahita a, amah sanglou leh thei nailoute ading na-ngawn a vualzawlna luikhiak ahi hi. Laisiangthou in, Mihing tapa nasep sak a om ding hilou in nasem ding leh mi tampi adia tatna hi ding in a hongpai hi, chi hi. Laphuaktuin, Vanmang naubang a kahna Kalvary ah khentuam neilou, chichih, pauchih leh namchihte a na chi hi. Hiai vualzawlna Pathian in a tapa a hon luikhiak tuh tangtawn ading, kha leh sa mihing hinna pumpi adia vualzawlna ahih man in hiai sang a vualzawlna hoihzaw, thupizaw leh deihhuaizaw omlou hi.

Theihchetna nei a ginna leh deihtelna a, Jesu mu a kipahpih a pom, amah adia kipia a amah tawh Kros a sikhawm, amah tawh hih hing khawm a omte tuh huai vualzawlna tangte i hi uh. Huai vualzawlna midang atang lai dingte adia pesawntu hi ding in “Nang Vualzawlna hi in” chih thupiak hilh in i om hi. Huan, vualzawlna hithei i hi chih kiphawkthak sak leng i hi uh. Jesu’n Pa’n kei honsawl bangmah in nou kon sawl ahi, a chih leh kuan unla, namchih apan nungzuite bawl un a chih in vualzawlna i hihna dia i hih ding hilhna ahi. Tangthupha paizel a saltangte a suahtak sakna ding in i tangthupha muh leh theih, i tan pen gensawn a piaksawn ding ahi. Jesu hotdamna thu paisawn sakna dia i sep theih tuamtuam omding hi. Hindan a latsak bang, kam a hilh sawn bang, laigelh a piaksawn bang leh hotdamna thu paisawn na dia hih theih thumna, thilpiak, hun leh tha piaknate i deihtelna a hih theih ngen ahi. Deihtelna a hiai nasepnate vualzawlna lampi a hon pitu ahi. Na deihtelna in vualzawlna lampi na tawnta hiam?

Pathian itte leh Pathian it mite’n hiai nasep itna ziak in a tel zel uhi. Paul in Khrist itna in honsawl teitei a chi a, semlou theilou in a kikoih hi. Eiten Pathian apan itna i sin khiak a, amah itpen a nei a, niteng Kross pawkawm a zuih ding leh khovel it kei unla, khovel a thil omte leng it sam kei un chih leh lei lam thil deihna omte hihlum un chiin Laisiangthou in honhilh hi. Khovel sang a Pathian itzaw a, huai itna in hotdamna na hon sem sak ding ahi. Min Jesu’ a muh leh vualzawlna mu ahi. Huai vualzawlna mite’n a muhna ding ua, vualzawlna tang i hi kha hiam, huai vualzawlna tuh khovel omlai teng khawllou a paizom zel ding ahi.

Abraham, ginna a i pa un lungtang tengteng in Pathian a muang a, ze-etnate om mah leh ginna tawpsan lou in Pathian sapna mu in Kanan gam luta khawlmai hilou in. Pathian khopi suangphum nei, Pathian gel leh lam luah ding ngak in aginna kip mahmah hi. Pathian adin a muanhuai a, Pathian inleng amah vualzawlna in a bawl hi. A sikhate Isak zi ding zong a kuante’n leng muanhuai tak in ahih uhi. Sikha a pute uh adia muanhuai tampi om uhi. Sikha muanhuaite vualzawlna hithei zel uhi. Eite lak ah saptuam a nasemtu Toupa sikha muanhuai lou i om leh vualzawlna hilou ding i hi. Solkar, Company leh Private ah semtu muanhuai lou i om leh vualzawlna i hi kei hial ding. I sep nnate Toupa nna bang in i sem uhiam?

Laisiangthou a mi thupi i muh tampite a kisaikhakpih uh mite leh Toupa Pathian adin muanhuai tak in a na sem ua, vualzawlnate a na hi uh hi. Hondampa leh Toupa Jesu adia kipia a, nanga kahi, na sikha in hon zui ding kahi chi a, a ut bangbanga honzat dia i om gige leh vualzawlna a hon bawl ut lua ahi. Amah adin ginom leh muanhuai in om gige ni maw. Amah midangte adia sepsak dia hongpai bang in eite Khrist leh Saptuam adia kiman a i om na in vualzawlna hon hisak ahi. Mosi in Kanan gam enkhe dia asawlte namchih apan teltuam intekpente ngen ahi uh. Agam etkhiak uh toh kisai report hon pia ua Pathian muanna neilou in mipite a lunglelh sak ziak un hamsiatnate a suak uhi. Eite vualzawlna hi in chi a hilh a i om lai in, melma mulian a Pathian muanna neilou a vualzawlna hilou hamsiat na i hih khak ding thil lauhuai ahi.

Thumna leh thilpiak a i pan nate ziak in minam i theihlouh leh muhlouhte lak ah Jesu thu kigen a Vualzawlna tang omtham ding hi. Huai Pathian deihlam ahi chih i pom lai in, vualzawlna i hih zomzel na ding in eilak leh innkuan sung-a leng vualzawlna i hih ding uh ahi. Laisiangthou in innkuan leh asuante uh adia vualzawlna a na hi tampi hon hilh hi. Ta goutan neite’n naulat hun a i kipuan khiakna, Pathian thu bang a it a, sinsak ding, amah lam a pi ding a thuchiam i bawlte taksuah dia pankhawm poimoh lua hi. Innkuan, saptuam, khotang leh midangte adia vualzawlna hiding in Toupan hon panpih chiat hen.