I. Thupatna: Laisiangthou ah “khelhna a khanna peuh ah hehpihna a khang sem” chih Genesis 1-11 sung ah leng a dikna tampi a om hi. Gen. 1-2 sung ah Pathian’ thilsiam thu leh Aman a thilsiamte hoih a sakdan kigelh hi. Huai thilsiam hoih mahmahte khelhna in a suksiatdan leh a poina Gen. 3-5 sung ah kiteltak in i mu nawn hi. Hiai sung mah ah Pathian in Amah batpih a a siam Adam leh Evi, khelhna ziak a, Eden huan apan a hawlkhiakna thu leng kigelh hi. Pathian itna leh hehpihna in phaktawp neilou ahihna a kilatna ding in Adam leh Evi a vuaktanna uh khuhna ding in savun puannaktualte a silhsak hi (Gen. 3:21). Gen. 6-10 sung ah khelhna’ nasep hong pung deuhdeuh ahih man in Pathian in leitung a mihing a bawl ziak in a kisik mahmah hi (Gen. 6:6). Huchiin tuichim in mikhialte tengteng, Noah leh a innkuante chihlouh, a nuai chimit vek hi. Hinapiin, khang hong om dingte kiang ah a itna latsakna ding in Sakhituihup, chiamtehna ding in, Noah leh a suante kiang ah pia hi. Gen. 11 ah leitung ah mi a hong pun uh toh kiton in a minthanna ding un van sun pha ding Innsang lam ding hon gel uhi. Pathian in zadah ahih man in a pau uh kithei tuah lou ding in hih buai a, huai tuh a innsang lamna uh tawpna a hong hi hi. Hiai a tung a thiltung nihte a Pathian itna nasep muh ahih bangbang in, Gen. 12 ah Pathian itna mi tengteng in a tan theihna ding un mikhat zang a vualzawl ding tup a nei in Abram a sam hi.

II. GENESIS 12:1-3: A THU kilepdan etna (Chiastic structure).

1. Huan, Toupan, Abram kiang ah, na kho lam a kipan leh na tanaute lak a kipan leh na pa in a kipan pawt inla, gam ka hon etsak ding lam ah pai in:

2. A1 - Huchiin, chi thupi mahmah in ka honbawl ding a,

X1 - vual ka hon zawl ding a [vualzawl],

A2 - na min ka hih thupi ding {min thupi};

3. Huan, nang vualzawlna hi in:

B1 - Huan, nang hon vualzawl peuhmah ka vualzawl ding a,

X2 - hon hamsiat peuhmah ka hamsiat ding:

B2 - nang ah lei a nam chih vualzawl in a om ding uh, a chi a.

Hiai a tung a guhgel apat in Pathian in Abram a sapna a thumal kizangte apan in Abram hih ding leh Pathian hih ding genlat in om hi (12:2). Midangten Abram tungtawn a vualzawlna leh hamsiatna tang thei uh ahihna Pathian thuchiam i mu hi (12:3). Hiai a Abram sapna tuh mi tampi ading a vualzawlna hi ding in mi khat ah hong kipan masa hi. Tua mah bang in hotkhiatna thu mi khat (Abram) a kipat mi tengteng ading a hong hi hi.

Pathian in Abram a sap in a paina ding theikei mahleh (Heb. 11:8), Abram in a paisan dingte chiangtak in taklang hi (Gen. 12:1). Hiai a sapna ah thupiak nih (12:1; 3a) Pathian in pia a, huai thupiak Abram in a zuih leh thuchiam guk (12:2; 3b) in zui hi. Tang 2 ah Pathian in Abram a vualzawl ding (X1) dan i muhtheih tuh: Abram chi thupitak (A1) leh min thupitak a bawl ding (A2) chih ahi. Ban ah, Vualzawltu Pathian leh vualzawl a om ding Abram chih i mu hi. Tang 3a ah Abram ngaineu (“קָלַל” “qalal,” belittle, disgrace, shame; cf. “אָאֹר,” aor, curse) peuhmah hamsiat a om ding ahihdan i mu hi (X٢). Hamsiat chih thumal pen vualzawl thumal in khiang hi (B١ & B٢). Abram tuh hamsiatna hilou a, vualzawlna hiding a sap ahih ziak ahi.

Sinding (Application): Pathian’ gam nasepna ading a sapna in ngiat nei hi. Ei ut dan, hoihsak dan, nopsak dan chih hilou in hon sampa deihdan zuih kul hi. Tua hon sampa’ sapna bangzahta a haksa himahleh gah kipahuaitak in zui zel ahi chih theithak chiat ni. Unau, Toupa hon sapna bang in ginomtak in a nungzui leng, Pathian in i nasepte a thawn a koihlou ding a, midangte adia vualzawlna hi thei ding i hi.

III. Bangziak a Pathian in Abram Vualzawlna hi ding a sam ahia?

Abram sampa Pathian tuh thilsiam tengteng omsakpa ahi (Gen. ١:٢٦-٢٨; ٢:١٥, ١٩). Huai thilsiamten leng chi tampi suang ding gentu Pathian mah ahi (Gen. ١:٢٤). Gen. ١-٢ a thilsiamte gahsuahna genna in “vualzawl” chih thumal thuahthum kizang hi (١:٢٢,٢٨; ٢:٣). Pathian in vualzawlna/ gahsuahna hi ding chih himahleh Gen. ٣-١١ sung ah vualzawlna toh kilehbulh “hamsia” chih thumal nga (٥) vei kimu hi (Gen. ٣:١٤, ١٧; ٤:١١; ٥:٢٩; ٩:٢٥). Hiai in a gen nop tuh hinna nei gahsuangtheite adia khovel ah lauhuai pung deuhdeuh ahihna taklang hi. Pathian tup-le-ngim lohsam thei ahih man in Abram tungtawn a hotkhiatna kipatna hi ding in sam hi. Tua toh kiton in Abram tungtawn a hotkhiatna kipan ding chih taklatna in “hamsia” chih thumal zah Abram sapna ah “vualzawl” chih kimu hi (Gen ١٢:١-٣).

Pathian in Abram a sapna ah sepkhiat/hih ding a chih tengteng thumal giat (٨) pha hi. Hiaite lak ah Abram hih ding nih (٢) pha: “kuan/pawt” leh “hi in” (go, be); Pathian hih ding nga (٥): “bawl” “vualzawl,” “thupitak a bawl,” “vualzawl,” “hamsiat” (make, bless, make great, bless, curse) pha hi. Hiai ah Pathian leh Abram hih ding a kigawm in sagih (٧) pha hi, huai tuh Pathian sapna bukim ahih chetna ahi. Pathian leh Abram nasepna in leitung a mite tengteng ading a gahsuahna tun ding ahi chih chetna ahi. Hiai tungtawn a chiangtak a i muh theih tuh Abram in ginna gah tampi suang ding a sap a om ahi chih i thei thei hi.

Application: Unau, Abraham sampan nang leng na innkuan, insak-inkhangte kiang a ginna gah suang ding a hon lam-en ahi. Pathian hon lam-etna a lohsap leh lohchin nang deihtelna ahi. Bang na chi dia? Nang vualzawlna hi in chi ahi.

IV. Bangziak a Pathian in Abraham min thupitak a bawl ding chi ahia?

Gen. ١٢:٢c a Abram “min” hih thupi ding kichi in Gen ١١:٤ a Sinar phajang miten “min thangsak ding” tup in a nei uh chih hon thawn/khawngtou (echo) hi. Huai ban ah, Gen ١٢:٢c a “thupi” chih in Sinar phaijang miten a lamsawm uh “innsang” thawn hi (١١:٥). Hiai ah “innsang” leh “thupi” kichi thumal a paubul ah a kibang in kizang hi (“גָדֹל”, “gadol,” thupi, “מִגֶדָּל”, “migdal,” innsang). A thu paidan tuh Sinar phaijang miten amau minthanna tup a nei in Innsang lamkhiat ding hon gel uhi. Tua kia hilou in leitung pumpi a kithehdalh ding a lauh ziak ua mun khat kia a om theihdan hon sawm uhi. Hiai in Pathian vualzawlna masa “chi tampi suang…lei luah dim unla” chih kalhkha a na hi hi (Gen. ١:٢٨). Hiai ziak mah a Pathian in Abram sam in MIN thupitak a bawl ding chiam hi.

Sinar Phaijang miten amau adia minthanna ding in innsang thupitak leh kho kulhnei bawl uhi. Pathian in a thiltup uh deihlou in a nasep uh a tawpsan theihna ding un a pau uh suk lamdangsak hi. Hiai in Pathian thiltup Abram min hih thupi ding a chih kia lohching ding chih leh, minam or mimal minthanna delh a taite Pathian in dal ahi chih i muthei hi. Gen ١١ leh Gen ١٢ a Sinar Phaijang mite leh Abram kibatlouhna muh theih tamlou om hi. Sinar phaijang miten kithehdalh ding lau, kipumkhatna kepbit leh, mun khat a kituaktak a kulhbang nei khopi a tenkhop ding chih ahi. Himahleh Abram in Pathian sapna zui a theih ngeilouhna gam a pai, a chipihte leh innkuante toh kikhen dia kimanna ahi. Sinar phaijang miten a theihsa uh mi leh mun a pan tuam-om ding lau uhi. Himahleh mun-le-mual leh mi-le-sa theihsa apan kalsuan khiat tuh Abram ading thuchiam toh kidim kalsuanna ahi. Abram in mite lauh huaimah zui dia a kisak ngamna tuh muhtheih louhpa a muh ziak ahi.

Gen ١٢:٢ ah Abram vualzawl a om ding ahihdan leh, Gen. ١٢:٣ ah amah mite ading a vualzawlna hi ding chih i mu hi. Tang nihna ah Pathian in Abram bangchi bang a vualzawl ding hiam chih i mu hi. Tang thumna ah Pathian leh Abram ban ah mi pawl thumna (Third Party) hong kigen hi. Hiai pawl thumnaten vualzawlna leh hamsiatna tang thei tuaktuak uhi. Amaute tuh a hihna (identity) uh ziak hilou in, Abram toh a kizopna (relation) uh tungtawn in vualzawlna leh hamsiatna a tan ding uh a kinga lian mahmah hi (١٢:٣). Gen dan dang ah, Pawl thumnate toh Abram kizopna tuh vualzawlna leh hamsiatna tungtawn a kizopna ahi. Abram vualzawl peuhmah vualzawl a om ding, Abram ngaineu/simmoh peuhmah hamsiat a om ding ahi uhi.

I zil ding (Application): Pathian in i sep i bawl khempeuh ah thupina a tan ding a deih ahi. Pathian deihdan hilou a kalsuan in hamsiatna leh siatna hon tun phet ahi chih hiai apan in sinlai la leng ka chi hi. sep-le-bawl khempeuh ah Pathian in thupina a tan ding i tup pen ahih gige ding ahi. Hiai theithak leng ka chi: Vualzawlna tengteng kipatna tuh Pathian ahi. Jesu Khrist tungtawn a vualzawlna leng i hihna (identity) ziak hilou in i kizopna (relation) tungtawn a khalam vualzawlna tang ding i hi.

V. THUKHITNA: Hiai a tung a i etkhawm thute apan in Pathian’ thiltup kiteltak a i muhtheih tuh Abram tungtawn a miten vualzawlna a tan ding uh ahi. Hiai vualzawlna miten a tan ngeingei uh Pathian deih ahih ziak in Abram simmoh/ngaineu peuhmah hamsiat ding chi hial hi. Nam chih ading a vualzawlna leh hamsiatna tuh Abram toh a kizopna ah kinga lian mahmah hi. Tua bang in, nang leng midangte ading a vualzawlna na hih theihna ding in Jesu toh kizopna hoihtak a poimoh hi. Pathian tuh na hihna (identity) ah a lunglut masa kei a, amah toh na kizopna (relation) a ngai poimoh zaw hi. Huchi ahih ziak in: Jesu toh na kizopna bang a chi a? Midangte ading in vualzawlna hi in na kithei hia? Hiai theithak ni: Pathian in vualzawlna dongtu [kia] hilou a vualzawlna nak hidia a hon sap i hi (We are called, not to be a container of blessing, but a channel of blessings).

{NOTE: Hiai thugelh Laibu tuamtuam (Commentaries, Study Bible, M Th. Class Notes etc.) leh Lai Siangthou pansan a gelh ahi. Simtuten i phattuampih ka lam-en hi: Laigelhtu}.