Sonora Smart Dodd-te unau a neupen a pian in a nu’n sihsan a, a pa uh William Jackson Smart in naungek tel in a tate 6 haksatna tampi toh kem in Khristian innkuan bawlpih hi. Kum 1909 in Spokane Biakinn, Washington, USA a Nute’ Ni a nute pahtawina piak ahihlai in Mrs Dodd in a pa itna leh gimnate ngaihtuah in Pate’n leng zahtakna leh pahtawina phu mahmah uh ahihdan phawkkhia hi. Aman Spokane Ministerial Association te kiang ah “Kumteng a Pate’ zahtakna leh pahtawina ni khat neihding” in ngetna a na pia hi. A ngetna hoihsa in kum 1910 apan in June Pathianni Thumna pen Pate’ Ni a zat in hong om hi. Kum 1924 in President Calvin Coolidge in kumteng a hiai ni inkuan chih in pate zahtakna leh pahtawina a piak theih nading in National Holiday in puang hi. President Lyndon Johnson in kum 1966 in Pate’ pahtawi di leh kum 1972 in President Richard Nixon in Permanent Holiday ding in suai kai ua tuin khovel mun tuamtuam ah Pate’ Ni zat in omta hi.
PATE’ NI ZATDAN:
Pate’ Ni a kizat masak in Spokane biakinn a kikhawm pa’ dampihlaiten rose paksan leh pa’ sihsantaten rose pakngou pate itna leh phawkna in baat chiat uhi. Dodd ngial in a tapa ngeklai pua in sakol kangkalai in a khosung ua innsungpa muanhuaite kiang ah rose pak vahawm hi. Tuni chiang in mun tuamtuam ah pate zahtak leh pahtawina in thilpiak tuamtuam – cards, cakes, gifts te piakzel in om hi. Saptuam in leng hihtheih dandan in Pate’ Ni kilawm a, thilpiak tuamtuam toh pate’ manphatna leh ithuainate gen in pate pahtawina ni in kizang a manpha i sa hi. Pa hitate ading in hiai ni ngaklahhuai pen asuak hi. Mun khenkhat ah manphat sem ding deihna in pate tai ni leh thuhilhna ni a zangkha bang om a, manpha veve i sa hi.
PATE’ KIVELNA DING:
I zi-le-taten pa’ chi a a theihtawp ua thupi a zahtakna leh pahtawina honpiaklai un ei amau adia paching taktak i hina hiam chih ngaihtuah vungvung tuak i sa hi. WJ Smart bang in innkuan leh tate i kem taktak na hiam, ahihke’h amauten honkep ding kia uh lamen i hikha diam chih ngaihtuah tham hi. Kholak a fel mahmah insungpa hikhalou in ji-le-tate nop-le-dah leng phawkbanlou pa’ hihkhak theih hi. Pa’ thuneihna thei tentun in mohpuakna mangngilh khak theih hi.
PATE PILVANNA TUAK:
Pate tuh gamkuan, office kai, khualzin leh polam a kalsuan zodeuh ahih man in duhthusam zah a ji-le-tate ompih manlou tampi i om chih i thei hi. India in Mahatma Gandhi a pahtak mahmah lai in a innkuan un thuak mahmah in “Gandhi namte’ pa chih in om mahleh a ji-le-tate ading in pa hoih leh pasal hoih himanlou” kichi hi. William Carey “Khangthak Missionarite Pa” chih a om himahleh a innkuanten a thuaknak mahmah uhi. I heutu masaten innkuan liamloh hial khop a ana pan ziak un tun azar i zou uhi.
Tulai in innkuan limsak ding leh ji-le-tate adia hun tamtheipen peding in i kisinsak sek uhi. Mi thupi tampiten ka hun paisa samkik thei hileng ka innkuan ading in hun tamsem ka peding a chihte bang uh kisinsakna in i nei tangpi uhi. A palsate thugen ahih man in adik hi ding in i pom a, sel ding dan in i koihkei hi. Ahi a MK Gandhi omlou hileh India in zalenna amu diam? William Carey omlou hileh India ah Khristian hiai zah a om diam? I heutu masate a na hichi pan tellou hile-uh hiai tan i tung diam? Amau inkuan in thuaklua bang mahle uh gam-le-nam, khosung leh saptuamte adia pa lohching ahi mai di uam hon chisak hi.
PATE’ NGAIHTUAH ZOM TUAK:
Pa tamtakte buaina tuh innkuan lohching hih lah ut nasepna a leng ginom leh diktat hihleng ut, anih a kopkhawm zoulou chih ahi. Etsakna in khualzin mun ngai, nitha kiloh, dawrkai, night duty nei, school ginatlouhna mun a posting khate ading in khalam-salam a tate enkai a ompih gige haksa ding hi. Sepna tawp a tate enkol phot di chi le’ng kuan nekzong ding! Tate itna ziak a gin-omlou deuh a sem mai di maw?
Hiai mi tampite buaina ahi chih i thei a bang i loh dia le? Ki-surrender mai ding maw bangchi panlak ding? Hezekia bang a innkuante om dingdan gelfel sak poimoh hi (Isai 38: 1). Sapten hun kiching (quantity time) i piaktheih keileh leng hunmanpha (quality time) pia in a chih uh theisiam poimoh ding hi.
PATE PANLAKNA DINGTE:
Innkuan maban di gel ding pate khut a kinga ahih man in panlak natuak tamlou en ni.
Kemtu (Stewardship): Tate ei a himawklou a Toupa apan kipahman hon kepsak ahih man in ei deihdan hilou in Toupa deihdan a kep poimoh hi (Sam 127: 3-5; Eph. 6: 4). Pa khenkhatte’n tate khualvang in sepna a ginom zoulou zen in kem ua, a tate un tuate amau ziak ahihlam theilou in pa ginomlou nei kisa uhi. Huaiziak in hon pe pa Pathian deihdan zong masa zaw ni (Matt. 6: 33).
Thudik (Absolute Truth): Hiai postmodern leh multicultural khovel ah naupangten thudik pumlum chih pom haksa sa mahmah uhi. Thudik ichih a’tehna a zir (relative) ahi chi in bangmah hinpih leh sihpih tham taktak mulou in, ‘nang ngaihdan/ kei ngaihdan’ chilel uhi. Huaiziak in aneu lai ua kipan in Pathian leh Laisiangthou thudik pumlum ahihlam apom teitei uh poimoh hi (Jh.8: 32; 14: 6).
Thil etdan (World view): I thil etdan leh muhdan in i deihtelna, thupi i sak, dik leh diklou khennate thuzoh ahih man in tate thil et didan dik zilsak poimoh mahmah hi. Hiai duhthusam khovel (utopianism), a gahsuah dan (pragmatism), vanthakte zatsiam dan (technocratic) khovel ah i taten Khristian sinsakna a kingak haksa sa mahmah uhi. Jochebed bang a tate ngaih thupi di leh thil etdan dik sinsak poimoh hi (Heb. 11: 23-27).
Gingtu dik (True Christianity): Tumlam gamten Post-Christian era a chih uh i gam hong tungta in tamtakten Pathian thu hinpih-sihpih taak sanawnlou uhi. Amau sahkhuate lak a khat (religious pluralism) a ngai in hindan chikhat (way of life) leh kalsuanna khat (movement) lel sa in Khristian chituamna (exclusiveness) pen lungsim neuna sa uhi. I tate’n Jesu Khrist hinpih tak leh sihpih tak ahidan a pom ngeingei ding uh ahi (Phil 1:10-21).
Tangtawn Hinna (Eternal Life): Khatvei tei siding i hihman in apoimoh pen tuh i tate’n tangtawn hinna aneih ngeingei ding uh ahi (Heb. 9:27; Dan 12:2-3). Tulai mihingte poimohna (human centric) leh hiai leitung a nopna kia en a tangtawn vangam-gawtmun chihte gengen louh ding chih sinsakna (secular humanism) i tate’n valhthei mahmah uhi. Apoi mahmah tuh a lamet bang uh hong hihlouh chiang in kingaisia (depressed) in sih ut pahpah mawk uhi. Za utkei sim mahle uh i tate’n gawtmun lauhuai dan leh vangam om taktak ahihdan a sin teitei uh kisam hi.
THUKHUPNA: Pate’ Ni manpha thei pen a zang i hihna ding in i innkuan maban ding gelkhawl thak ni. I tate’n hinkhua a a kingakna uh hinsan velpih ni. Innsung khual vang a hunteng a ompih theilou i hihtak leleng ei omlouh aleng a hinpih ding uh philosophy of life velpih a sinsak thak ding in Pate i kihanthawn hi. Toupan Pa manpha hiding in hon vualzawl hen. TAKKHEH.