Thupatna: Khrist a ka unaute, i Toupa Jesu Khrist min in Chibai! Naupangte’ Nipi Ni Message gelhthei ding a damna hon pia i Toupa leh hamphatna hon pia Editorial Board memberte tung ah lungdam thu ka gen masa hi. Tukum saptuam’ thupi lakkhiatna Laisiangthou pansan in “Vualzawlna” toh kisai saulou i ensuk ding:

Huan, TOUPA’N Abram kiang ah, “Na khua a kipan leh na tanaute a kipan leh na pa inn a kipan pawt inla, kon etsak ding gam ah pai in. Chi thupi mahmah in kon bawl dia, vual ka honzawl dia, na min ka hih thupi ding, Nang vualzawlna na hi ding. Nang hon vualzawlte ka vualzawl dia, hon hamsiat peuhmah ka hamsiat ding. Nang ah lei a namchih vualzawl in a om ding uh” a chi hi. (Genesis 12:1-3)

Jehovah Pathian in, tu masiah a kithei ngeilou, Abram kiang ah a tung a Laisiangthou sung-a i muh bang in thu na gen hi. Abram kua hi a, bang nasem a, bangziak a Toupa’n tuabang a na houpih hiam chih bel a kigelh kei. Abram hihna leh dinmun a poimoh louhdan hon musak pah hi. Tua kia hilou in, Pathian’ thugente leh Abram toh kisai ahihna kigen lang sunsun leng kituak hetlou hi. Tua bel, “Chi thupi mahmah in kon bawl ding” chih leh “Sarai (Abram’ zi) a ching a, ta himhim a nei kei (Gen. 11:30)”. Sa lam et a chitna nei Pathian in zong hileh Abram a teel hetkei ding. Khovel’ tehdan a mipil lua leng ahih chi hetkei: Ama’ hinna humbit nading in a zi ka sanggam ahi chi in Pharo a khem. Tangzang tak a a omna mun pawtsan thei mi leng ahih chi sam kei: ompihte, gantate, puanbukte tampi nei a khosa mi ahi. Bangziak a Toupa’n Abram kiang a hizahta a thupi thu va tun ahia leh? Nang leh kei hihna leh chitna, dinmun leh neih-le-lam in thu paw kha hetlou hiveh aw.

Anihna ah, Abram kiang a Toupa’ thugen i sim suksuk chiang in hibang i muthei hi: Abram in a zuih ding thupiak bangzah hiam a bawl a, tuakhit chiang in Pathian in Abram a piak ding THUCHIAM bangzah hiam a bawl hi. “Chi thupi mahmah in kon bawl dia, vual ka honzawl dia, na min ka hih thupi ding, Nang vualzawlna na hi ding. Nang hon vualzawlte ka vualzawl dia, hon hamsiat peuhmah ka hamsiat ding. Nang ah lei a namchih vualzawl in a om ding uh” chihte avekpi in thuchiam ahi hi. Tua ahihleh, Abram in ama’ hihtheihna leh siamna pansan a hih thuchiam sepkhiat a sawm ding ahi diam? Ahihkeileh, Abram in hih thuchiamte semkhe zou takpi mah ding ahi diam? A omdan bel, Abram in Toupa’ thupiak a zuih leh Toupa’n Abram tung ah a gensa teng tungsak ding chih hizaw hi. Tua ahihleh, vualzawlna nak omsun bel Thumanna ahi chih a chiang mahmah hi.

A thumna ah, chang 4 na ah hibang in kigelh hi: Toupa’n a kiang a, a gen bang in Abram a kuankheta a; Lot in a zui hi. Hih chang tellou in a tung a Toupa thugen teng Abram adi’n bangmahlou ahi. Toupa’ thupiakte Abram in a sel kei a, hichi zaw deuh leh a chi kei a, khol phot dih a chi kei, a gen bangbang in a zui zaw hi. Tua mah ahi Abram vualzawlna ahihtheihna. Nidang a theihtaaklouh pa bel tuin Namte’ Pa ahong hita hi. Toupa’n Abram apan a ngiat omsun bel A thu a man ding ahilel hi. Tua kia hilou in, hih thu bel Pathian in Abram kiang a a gen ahi a, Lot kiang a a gen ahikei hi. Lot in Abram a zui a himahleh Toupa’n Lot tung ah Thuchiam a tungsak hetkei. Lot tawpna i theihchiat ahi: a tanute’n a luppih ua Moab leh Amon namte ahong piang khia uhi.

Vualzawlna, Abram kiang a Toupa’ chiam zaw leitung apan ahikei a van thil ahi. Mihing’ sepsuah vual ahikei a, Pathian’ thuchiam ahizaw hi. Theihtawp suah in vualzawlna hihsawm lehang leng, hiai vualzawlna bel i semkhe zou ngeikei ding. Ahi, khovel’ muh in bel vualzawlna i hi tham ding, himahleh Abram kiang a chiam, Pathian apan suak vualzawlna ahituan kei ding. Ahihleh tu thukhuntak hun ah eite bangchi’n vualzawlna i hithei dia? Khrist Jesu i ginna tungtawn kia in i hi thei hi. Tua mah ahi Pathian’ tangtawn thilgel i manna leh i zuihna. Tua in Pathian’ ta ahong hisak a, Pathian’ ta i hihleh Abraham suan, thuchiam bang a gouluah dingte i hi uhi (ref. Galatiate 3:26-29). Pathian’ ta hih kan a vualzawlna thupi zaw bang a om dia? Pathian’ ta i hihna mah ahi midangte adia vualzawlna i hihna. Tua bel, Khrist Jesu Tanchinhoih i genna ahipah ahi. Nang leh kei’ nuntakna tungtawn a mi khat in Khrist Jesu a muh leh tua khup ding vualzawlna hihtheihna dang a omkei. Saptuam’ nasepte mi’n a et a Khrist Jesu mel a muh leh saptuam midangte adia vualzawlna i hi takpi hi. Lot in ama’ mimal deihdan lel a ahih bang a eite’n leng ei deihdan toh kituak huntawk lel a i nuntak leh bel vualzawlna hih sang mah in hamsiatna kilukhuh i hi zaw ding hi.

Tukum Naupangte’ Nipi Ni Message hiai ahi: Naupangte midangte’ adia vualzawlna ahih theih nading un ei, a piching sate, naupangte’ adi’n vualzawlna himasa chiat ding in hanchiam ni. Khovel a hong bei ding a, tua hun chiang in Pathian’ Thuchiam bang a vualzawlna hi taktakte ahong kilang ding hi. Pathian in hon vualzawl chiat hen.