Billy Graham “Icon of the 20th Century” chih hial a om, kum zabi 20na hun sung a Pathian mizat thupi penpen tanchin a theisaute’n gelh senglouh ding khop nei himahleh theihna kimlou tak in mi gelhsa khenkhat lakhawm in tawmchik ka hon taklang hi.
A NAUPAN LAI LEH INKUAN BAWLNA:
Billy Graham Nov. 7, 1918 in a pa William Franklin Graham Sr. leh a nu Morrow Coffey Graham te goutan hiding in North Carolina ah piang hi. A nu-le-pa nasep Bawng khoi ahih man in a neu apan Bawng khoina Farm ah nasep a pan a, Bawngnawi zuak a inkuan kivak ahi uhi. Saptuam lam ah Associate Reformed Presbyterian Church ah tel uhi. A naupan lai hun hi America gam a kidouna ziak a nek leh tak haksat hun laitak ahih man in farm ah nasem in ahahpan thei mahmah hi. A naseppihte’n sapduatna ding a Billy achih sek uh paisuakpih in Billy Graham chih a theih a hong hita hi. A naupan lai in farm a nasem kawm in laibu tuamtuam tampi a sim a, na a hahsep ziak in nasep manphat dante a thei mahmah hi.
A pianthakna: Billy Graham tangval dekpan dawng thitthet lai vel in a nu-le-pate sahkhua mi mahmah le uleng Amah chu khovelmi tak in a om hi. Huchihlai in a farm a nasemtu Albert Mc Makin in a awlmoh mahmah a, Charlotte khua a Chialpina neilel Evangelist Mordecai Ham thugen ngaikhe din Billy a chial hi. Billy leng huai Crusade a vatel in kum 16 ahih 1934 in Mordecai Ham chialpina ah piangthak hi.
Laizilna leh nasep kipatna: Kum 1936 May kha in Sharon High School apan graduate in, Bob Jones College ah kai zom a, kum khat khit in Florida Bible Institute ah kisuan hi. Florida Bible Institute a a zillai in a sermon masapen genna a nei hi. Huai hun lai mah in a naupan lai a Baptisma a tan mawk pen lungkim thei lou in a tangthak a, Southern Baptist Convention ah kipia hi. Kum 1939 in Southern Baptist Convention in Peniel Baptist Church, Palatka Florida a sem ding in Pastor Ordination pia uhi.
A zi toh kimuh khak dan: Kum 1940 in Wheaton College ah Anthropology zil ding in a lut a 1943 in a zilna zou hi. Wheaton College a a kai sung in a zi Ruth Bell Graham toh kitheikha in 1943 in kiteng uhi. Ruth Bell Graham ahihleh Presbyterian Missionary, China a sem L. Nelson Bell’ tanu ahi. Amah a nu-le-pate’ mission field China a kum 17 sung om Wheaton College a kai nungak feltak leh mel hoihtak ahi.
Goutan ta-le-nau neih zah: Billy leh Ruth te nupa in Pathian vualzawlna goutan 5 nei uhi. Amaute: Virginia Leftwig Graham, Anne Graham Lotz, Ruth Graham, Franklin Graham, Nelson Edman Graham ahi. Amaute ban ah tu 19 leh tusawn bangzah hiam a nei hi. Billy leh Ruth tenupa kingaina mahmah leh ki-it mahmah nupa ahi tou den uh. Billy Graham in a zi tung a ginomna leh numei apan khemna a tuahlouhna ding in Numei dang himhim toh a tuam in hun a zangkhawm ngeikei hi. Counselling neih a poimoh hun inleng midang muhlouh in room sung ah numei toh a nei ngeikei hi.
A NASEP TUAMTUAMTE:
Wheaton College a graduate zoh in First Baptist Church, Western Spring Illinois ah 1943 – 44 sung Pastor na a sem hi. Hiai hun in Radio program nasepna “Songs in the night” chih sum taksap ziak in niamkiak chih thu a lawmpa Torrey Johnson in a hilh hi. Hiai Radio Ministry a Director na Jan. 2, 1944 apan sem in Radio Program pukse ding lai tunding nawn in om hi.
Youth for Christ International: Pathian nasepna a gahsuah leh manpha tak-a a kizat ziak in a lawmpa Torrey Johnson in Youth for Christ International a tel ding in chial hi. Billy in YFC pen nasepna zazaw a kizat theihna a ngai in YFC full time evangelist masapen ding in kipia hi. Hiai nasepna in North America leh Europe gam tanpha nawkkha in mun tamtak ah a nasepna in masawn deuhdeuh hi.
Huchi bang a a kizat zel lai in kum 1948 in North-western Bible College, Minneapolis ah President nasem ding a chial in a om hi. 1948 – 1952 sung a sem hi. YFCI leh NBC a a sep sung in Pathian in Billy Graham seppih ding lawm hoih tampi a bawlsak a, hiai hun sung hi amah a ding in leitung pumpi huap a akizatna ding a training-na mun poimoh tak a suak hi.
Leitung pumpi huap nasepna (kum 1960 malam): Nasepna zazaw a pattung a Crusade masapen Sept. 13 – 21, 1947 amah kum 29 lel a naupang ahih lai in Civic Auditorium, Grand Rapids Michigan ah mi 6000 valte lak ah thu gen hi. A nasepna a mi pung zel ahih man in mun lian zaw Stadium, Park leh konglai ah thu gen a, mipite lak ah Jesu Lal leh Hondampa a sang ding in chialna bawl zel hi. Huai hun lai a a sepkhawmpihte soloist George Beverly, Choir Director Cliff Barrows, Associate Evangelist Grady Wilson chihte ahi.
Billy Graham nasepna hong minthan khiakna masapen tuh kum 1949 a Los Angeles khopi a “Christ for Greater Los Angeles Campaign” a nasepna ahi. Hiai Crusade kal 3 sung zat ding a bawl himahleh a lohchin mahmah ziak in Crusade program bei theilou in kal 8 sung zang uhi Sept. 25 – Nov. 20 1949 sung ahi. Hiai Crusade a tel mipi 3,50,000 val pha zou a, Billy Graham nasepna US gam pumpi ah minthang mahmah a mun tuamtuam ah chial in omta hi.
BGEA hong kipat dan: Billy Graham hong minthan mahmah ziak in sum leh pai a hong tam mahmahta a, demna tuamtuam leng a tuak hi. Huchi in sum leh pai a muhte zang a nasepna lian zaw leh mumal tak neih poimoh sakna hong piang hi. Kum 1950 in tuni tan a lohching leh minthang mahmah Billy Graham Evangelistic Association (BGEA) kichi a zi Ruth Graham leh a seppihte Cliff Barrows, Grady Wilson, George Wilson toh hon pankhia uhi.
BGEA kiphuhkhiak kum Nov. 1952 in Billy Graham in amah sum seng in Radio Program ah “Hour of Decision” chi in Nipini zing teng in thutak genna nei gige hi. Khovel mun tuamtuam a radio station 600 val in ngaikhe gige uhi. Huai toh kiton in “My Answer” chih laibuta gelh in US gam sung mun tuamtuam ah hawm dalh zou gige hi.
Kum 1954 vel apan in BGEA nasepna hong tangzai deuhdeuh a US, Africa, Asia, Europe leh South America ah crusade lian taktak a nei hi. Hiaite lak a chiamteh tham chingte Greater London Crusade 1954, New York Crusade 1957 hiai pen ah kha 4 sung mahmah neizom uhi. Kum 1956 in India mun tuamtuam Madras, Kottayam, Palamcottah, New Delhi leh Calcutta ah Crusade hong nei uhi.
Billy Graham in a nasep sung a Crusade lian pente, Asia ah, kum 1973 a Yoido Plaza, Seoul South Korea ah a nei hi. Hiai crusade ah khatvei kikhop in mi Maktaduai khat phazou zel uh a, Billy Graham inleng mipi pungkhawm a tamdan lamdang sa mahmah hi. North America ah September 1989 a The Great Lawn, New York Central Park a Crusade a neih lai un hun khat ah mi 2,50,000 kikhawm zel uhi. June 24 – 26, 2005 a New York khopi a Flushing Meadow ah Crusade a neih nanung pen ahita hi.
BGEA nasep poimoh tak khat ahihleh leitung pumpi a Evangelist-te, Pastor-te, Missionary-te hihhatna ding in Amsterdam ah khawmpi thupitak avangkim in neihpih zel uhi. US a Local saptuam tamtak in muanna a neih ziak un BGEA nasepna ding ahih nakleh thilpiak a pang ding mi tampi omsa ahih man in BGEA sum sen in hiai bang khawmpi lian neizou uhi. Amsterdam khawmpite ah North East India apan inleng mi tamtak vatel kha in phattuampih mahmah uhi.
A HUN NANUNG LAM:
Billy Graham in sapte lak-a natna common mahmah Parkinson’s disease 1992 vel apan a nei a; upat dung zui in natna dangdang Hydrocephalus, Bronchitis, Pneumonia chih a nei a, a tawp in Prostate Cancer nei a muhkhiak ahi. Amah hatlouhna in boh mahleh a nasepna pen a tapa Franklin Graham leh a tupa William Graham leh BGEA makaite toh pang in kisunzom tou zel hi. North East India ah Billy Graham hatlai 1972 in Nagaland ah crusade hong nei a, a tupa William Graham in 2013 in Aizawl ah Crusade hong nei hi.
Billy Graham in a nasep sung in gam 185 val, mihing Maktaduai 215 val zak in Pathian itna thu a gen hi. Midang maktaduai bangzah hiamte’n TV, Radio, Video, Internet leh Magazine tungtawn in Pathian itna thu za uhi. Crusade 417 vei sang-a tamzaw a neihna ah Maktaduai 3.2 sang a tamzaw in maitam sapna sang in Jesu kiang zuan uhi.
Billy Graham in a sih chiang a thil om dingdan a genlawkna ah “ka sih chiang in Angelte’n hong tonpih ding ua, huai ni thupi leh lamdangtak ah chikmah a ka theih ngeilouh kipahna ka nei ding” chi hi. February 21, 2018 in Pathian kiang a tawldamta ding in thupina gam ah paita hi. Billy Graham luangtung a mi tuamtuam thugente thuhoih chiamteh tham tamtak a om huaite lak ah 3 kia i taklang ding.
Jean Graham (a sanggam nu): – February 21, 2018 in Van hong kumsuk in ka sanggampa hong pikhia hi. Ni khat ni chiang in kei ding inleng van a hong kumsuk sam ding. Huai ni chiang in aman nang ading inleng van hong kumsuk in a honpi samta ve hon chi ding chih ka thei.
Ruth Graham (a tanu): – Ka pa Pathian ahikei, himahleh Amah ah Pathian mizia akilang. Huai ahihleh, i khelhna, i lohsapna, i thuakgimna, i siatgawp dimdemna toh a kiang i naih chiang in Aman hon na pom hi.
Franklin Graham (a tapa): – Billy Graham TV a kilang zel, Billy Graham Stadium a kilang zel pa mah kou insung ah leng ka mu uh. Billy Graham nih a om kei, a ngeimah ahi. Huaipa mah Jesu Khrist kiang ah a omta hi.