Numei manpha
RUTH BELL GRAHAM

Thumasa: Kum zabi 20na sung a Pathian mizat Evangelist thupi pen Dr Billy Graham nasepna lohchinna thuguk leh panpihtu poimoh pen a zi ahi chi leng khial lou ding in i kigingta hi. Kha lui in Billy Graham tanchin i gen a thupi mahmah i saklai in a zi Ruth Bell Graham tanchin tellou a beimai dia phalhuai lou hi in i ngaihtuah hi. Amah Ruth hi June 14, 2007 in a taksa upat kum 87 pha in hiai khovel nusia hi, tu’n bel a pasal toh Jesu kiang ah nuamsa tak in omta uhi.
A pianna leh hun masa: Ruth Bell Graham, June 10, 1920 in China gam Qingjiang, Jiangsu mun ah piang hi. A pa Dr L. Nelson Bell leh anu Virginia Meyers, nupa a China gam a missionary nasem ahi uhi. Tulai a North Korea Khopi minthang mahmah Pyongyang ah siamsinna bul a pan hi. Laisiam thei mahmah ahihman a sangzaw sem sin ding in a gam uah pai a Montreal, North Carolina apan in graduate hi. Huai hun lai a tup leh lunggulh ahihleh Tibet gam a missionary a kuan ding chih ahi.

A pasal toh kitheihkhakna: Kum 1938 in siamsinna sang zaw sin ding in Wheaton College ah kikhumlut hi. Kum 1940 in Wheaton College a Anthropology zil ding a valut Billy Graham toh hong kimeltheih kha in kihip geihna khat hon nei uhi. A kitheihna masapen uh ahihleh College Lapawl “Halleluiah Chorus” a zillai uh ahi a, mi tampi omkhawmte lak ah amaugel in kingaihnatna tuam riau nei ahihtuak uh. Ruth Bell hi missionary tanu ahih ban ah laisiam, mel hoih leh mifel tak ahihman in lar mahmah hi. Billy Graham leng feet 6.2 a sang, tangval mel hoihtak ahihban ah pastor ordain sa ahih zawkmah toh a lunglutna uh kituak in kingaina mahmah ua college sung a program omte ah kizang khawm gige uhi. Ruth Bell lungsim Billy Graham in luahdim zou mahmah a hong omtak in Pathian kiang a thum in “Toupa hiai Billy Graham toh na nasemkhawm ding a na hon phal leh ka hinkhua a ka utpen ahi chih in ka pom ding” chi in a thum hi. Hiai lawmtate lungsim pindan sung a midang in mun nei nawnlou ahihman in August 13, 1943 in kiteng uhi.

Numei kingainiam: A kitentung lai un ngaihdan kikalh zek a neih ziak un bangtan hiam khauhpai sim tuak uhi. Ruth Bell in a naupan lai apan Tibet gam a missionary dia sapna ngah ka hi chi; Billy Graham in lah America gam a Evangelist dia sapna ngah ka hi chi. Huchi a ngaihdan kikalh a bangtan hiam a om nung un Ruth Bell hong kingainiam thei a, Bible in Numei lutang pasal ahi chi hiven nang makai inla na nung ah kon thuap ding chi in thupukna a bawl hi. Khatvei tuh Ohio mun ah Crusade program a Billy Graham thugenna ding toh kituak in a zi Ruth in Hospital lutngai khop a damlouhna a tuak hi. Huchipi inleng Billy Graham in Ohio Crusade a thugen ding in zinkhiak san thouthou hi. Telegram tungtawn in a zi tanchin dong zel a, Ruth in hichin a ngaihtuah hi “Ka pasal in nasepna sang a ngaih poimoh zawk thildang bangmah neilou ahi” chi hi. Khasiatna, vuina leh lungkim louhna in a zang kei.
Numei, lamdik hilhtu: Kum 1943 in Western Spring Baptist Church a pastor nasem ding in Billy Graham chial in om a, huai hun in Ruth Bell in a pasal kiang ah, pastor hihna len a local saptuam na kep aleh Evangelist nasepna semthei lou ding na hi chi in a khou hi. Billy Graham in US President tuhding a chialna a muh masak pen lai in Pathian sapna ahimai dia aw chi in kingaihtuah mahmah hi. Huai hun laitak in a zi’n “Pathian in Evangelist thupitak hiding a hon sam a, gam khat President maimai ding in na kiphahniam tel dia hia?” chi in a awilouh thu gen hi. A zi tungtawn in Pathian sapna theihchet thakna a nei hi.

Numei, insung limsak: Billy Graham in Youth for Christ ah full time Evangelist in sem a, US leh Europe gamte ah khualzinna dia hun tamzaw a zat ziak in inkuante toh hun zang tawm mahmah hi. 1945 in Virginia ah a tamasa pen a piang a, a kipah dingdan leh ta masa melmuh kal ngaklah mahmah ding ahih lai nangawn inleng inn ah om manlou in khualzin hi. Ruth Bell in a pasal in Pathian na a sep theihna ahih phot leh chi in haksa tampi thuak in innlam ah theihtawp in na pang charchar hi. A tate uh hong tei mahmahta chih hun in Ruth in a pasal nasepna ah zui zel a counselling ngaite a na enkai a apoimoh dangdangte ah leng panpih gige hi. Huchih hunlai in Billy Graham in thugentu minthang Billy Sunday in a nasepna ah a zi toh kizui gige a omlai ua a tate gawtmun lam a paita mai uh ahihdan a Ruth hilh hi. Ruth Bell inleng a pasal thugen a pom siam mahmah a a tate etkolna ah theihtawp a panla in a pasal leng zalentak in thugen in kuan sak zel hi. Ruth Bell in tate etkolna theihtawp a suah ban ah a pasal in program a neihlouh kal in tawldam tak a om theihna ding innsung feltak in a bawl hi. Huchi in Billy Graham nasepna hong lian deuhdeuh a mikhual bang a hau thei mahmah ua, Ruth in huai tengteng enkai in a buai thei mahmah hi.

Numei, panpihtu hoih: America mipite’n Billy Graham a ngaisang ua a hong lar deuhdeuh ziak in US President-ten khalam pitu (spiritual adviser) ding in muangngam tak in a zang ua aman leng awlmoh huai a sa hi. Huchih hun lai in Ruth Bell in Politics leh Christianna kopkhawm in a lunglut lawkha ding chih bang a lauhsak mahmah hi. Ruth hi Pathian kiang a thum gige mi ahih ziak in Pathian aw hia a theihte a pasal toh kikum in thupukna poimoh taktak bawl khawm zel uhi. US President tuhding a chialna a om mun luat ziak in Ruth Bell in, a pasal kiang, Pathian nasep a tawpsan aleh aman leng paisan ding a hihdan gen in, “US mipite’n pathawi President a deih kei ding uh” chikhe hial hi. Huai nung sang President dia chialna a muh chiang in Ruth toh kikum masa in “Kei chu Pathian in Evangelist dia hon sap ka hi” chih in a dawng thei zelta uhi. Ruth Bell in a pasal Pathian mizat thupitak hithei ding in a bawl zou mahmah hi. A pasal nasepna a kithuahpih man chiang in Pathian thutak zang in haksatna thuakte, jail tangte, tualthatte nangawn kiang ah Jesu Khrist itna thu gen in theihtawp suah in pang hi.
Numei, pahtawi tak: Billy Graham Evangelistic Association (BGEA) in media tungtawn a nasepna a pattung lai in radio program ah “Hour of Decision” chih min phuak in a khualtai a pang in buaipih tou den hi. 1966 in “Ruth and Billy Graham Children’s Health Care” chih North Carolina ah a pankhia ua Ruth intekna in lohching mahmah uhi. Billy Graham nasep lohching mahmah ahihlai in a nung-a ding gige a zi ahihdan phawkpihna in 1996 in US Capitol Rotunda, Washington DC ah Ruth Bell Graham kiang ah Congressional Gold Medal piak in om hi.

Numei, pasal lungtang kipahna: A pasal toh a damkhawm lai ua Billy Graham in a zi tungtang a gen khenkhatte hiaite ahi. (i) Ruth Bell hi ka lungtang tawng thukpen in ka it a, amah ka lawm hoih pen ahi. (ii) Ruth Bell toh kum 65 paisa a Wheaton College a ka kitheih khak tunglai sang mah un ka ngaina deuhdeuh hi. (iii) Ruth Bell toh pumkhat hi ding leh Pathian nasemkhawm ding a sap ka hi uh. (iv) Ka nasep lohchinna ding a a guhgel poimoh pen leh a laizang taka om gige Ruth ahi, a hasotna leh panpihna tellou hileh ka nasep ah lohchinna hiai zahta ka mukei ding. Billy Graham seppih T.W. Wilson inleng “Ruth Bell omlou hileh Billy Graham thupina tuni a i theih bang in i thei kholkei ding uh” chi hi.
A sihna leh hun nanung: Kum tamtak nupa a Pathian nasem khawm, a tate leh tute’n leng a nasepna uh kithuahpih tou zel a om lai un Ruth Bell upata ahih ban ah natna tuamtuam neih ziak in thupina gam ah 2007 in pai masa hi. A pasal in a damkhawm lai un a sih nung chiang ua Billy Graham Library kiang a kivui tuak ding a chih bang in huai mun ah vui in om hi. Billy Graham sih inleng a zi ittak kiang ah kivui hi. Billy Graham in a damkhawm lai un, Ruth Bell hi ka lungtang tawng thuktak in ka it a, ka lawm hoih pen ahi, ka kiang a om lou ding ka ngaingam kei chi hi.

Thukhitna: Billy Graham, Evangelist thupi pen khamangthang million a sim Jesu khebul a piluttu leh inkuan sung tate etkolna a lohching mahmah, a sih nung inleng a nasepna khawltuan lou in a tate leh tute’n sunzom den uhi. A tapa Franklin Graham in “Samaritan Purse” kichi nasepna thupitak mai leh gahsuah tak a patkhiak kawm in BGEA a pa sulnung enkai den hi. A tupa William Graham s/o Franklin Graham leng Evangelist thupitak hi in, 2013 in Aizawl ah thugen in hong kuan ngeita hi. Huchi ahihlai in a zi panlaknate omlou hileh bang a chi dia? Numei hoih manpha hina lawmlawm e.