Thupatna: Khristian Kalendar a Pentikos Ni i chih pen Khasiangthou leh Saptuam hong pianni a chiamteh ahihman in poimoh mahmah hi. Hiai ni a kipan in Khasiangthou in Jesu gingtu khempeuhte teenchilh in vaihawmna ni ading in a bil-at hi [Efes 4:30]. Nasepte laibu a kimu bang in Pentikos ni in Jesu nungzui milip 120te midang 3000 in behlap ua, tuni tan in kibehlap touzel lai hi. Pathian in hunbi a sehna ah khial lou a, omzia neitak in khovel khangthu tung ah vaihawm in thunei hi.

A hun thu ah: “Pentikos” a kichi pen Judate kumteng Ankuang Luina hun, Nipikalte Ankuanglui zong a kichi hi [Pem 34:22; Danp16:10]. Paikan Kut ni nihni apan a sim kal 7 zoh a nipini ahi. Pentecost Kut pen Israel mite adia Kut poimoh mahmah 3te lak a sim tel ahi. Kumthak hun a Vei Thillat a latni uapan a ani 50na. Pawltak Kut toh kituak a a zat ngeingei ding ua thupiak ahi uh. Juda mite ni poimoh tak ni in ahi Khasiangthou Jesu gingtu masate kiang a ahong tun. A hun leh ni a kituahdan in a poimohna hihlang hi.
Israelte sal apan suakta a, Aigupta a nutsiat nung uh ani 50na ah Pathian in Mosi tungtawn in Sinai Tang ah Dan Thupiak a pia hi. Hiai ni mah ahi nungzui masate’n Khasiangthou a ngahni uh. Dan a talekte, dan zuizouloute adia Ama mi-le-sa, tanu-tapa hihtheihna ding lampi hong sialsak a khelhna thu ahte, diktatna thu ahte, vaihawmna thu ahte khovel a siamlouhdan theisak ding [Johan16:8] a Khasiangthou piak ni ahi.

Jesu hunlai in “Pentikos” in Judate ading in poimohna thum a nei hi. Khatna ah, Mosi tungtawn a Sinai tang a Dan 10 a ngah hun uh phawkna hun. A nihna ah, Lou-hai kaihkhawm hun kipahhuai zatna kut leh a thumna, Gah masa latna hun [Pem 23:16-17; Siamp 23:15-21; Kisim 28:26-31]. Huai ziak in hiai ni poimoh zang ding in mipi tampi petmah Jerusalam ah hong zinkhawm uhi.

Amun ah: Khasiangthou thilhihtheihna a thop ahih masiah uh Jerusalem nusia lou dia thupiak ahi uh [Luka 24:49]. A thohnawn nung ni 40 sung a nungzuite sinsakna tuamtuam a piakzoh in Van ah paisan hi. Tuabang a a nutsiat nung ni 10 khawng hipan in, Inndan tungnung ah Jesu nungzui 12 leh midang, a vek ua mi 120 vel “Pentikos Ni” zang ding a omkhawm hihtuak uhi [Nasep 1:13]. Hiai mun pen Suahlam kongpi bul, Temple toh kigamla lou a om hi ding dan ahi. Pentikos zang ding a gam tuamtuam apan a Juda namte hong paikhawmte kisuktuahna mun tak ah Jesu’n a nungzuite Khasiangthou in hong buak in tua inndan sung a omte khempeuh khasiangthou a luahdim in om uhi. Khasiangthou in a omsak bangbang leh a pii bangbang in om uhi.

Bang kikheekna a hon tun a? Pa’n a tapa Jesu tungtawn a, a thuchiam “Khasiangthou na tung ua a hongtun chiang in thilhihtheihna na nei ding ua, Jerusalem ah, Judia leh Samaria ah, leh leimong dong in Kei adia theihpihtute na hi ding uh” chi a a gen tangtunna masa pen Pentikos Ni in Jerusalem khua ah, nungzui 120te tung ah, gam tuamtuam apan hong paikhawm mi tampite muh leh theih in ahong om hi. Hiai hun a thiltung chiamteh tuak mahmahte:
• Khasiangthou leh a nnasep haih vual ahi kei. Pentikos ni in huihpi nung bangmai in ahong kilang.
• Dantan tungnung a om mi 120te Khasiangthou in hong lawng in Khasiangthou in a dim vek uhi.
• Kha in a pausak bangbang in paudang in a pau uhi.
• Hangsan tak a Jesu adia theihpihtu hihna om in Peter in Pathian thu a tangkou pih.
• Pathian thu zate kiang ah khelh kiphawkna thupitak a tung.
• Gingtu kibehlapna a piang, 120 te gingthak 3000 a behlap in a om uhi.

Eite toh i kisaikhakna: Kum 2000 khawng a pailiam na nung ah Jesu’n a hon nutsiat Thupiak Gol kemte i hi. Eimah hatna a sep ding hilou in, Khasiangthou thopna toh i sep ding ahi. Pentikos ni a nungzui masate tung a thupitak a Khasiangthou sunbuak a om bangbang koimah ah a om nawn kei. Himahleh tua Khasiangthou sunbuak a om pen ginna a Jesu sangte khempeuh ading in kiningchingtak in khelh kiphawk a, a hotdamna sangte tung ah thilhihtheihna bukim toh piak ahi [Nasep 5:32; 8:17; 9:17;10:44]. Tua ahihman in gingtu hinkhua a Pathian nna sepna pen Khasiangthou thopna lou in muh ding om lou hi.
Hiai Khasiangthou tungtawn a thilhihtheihna bel ama adia theihpihtu hihna ding a piak ahi. Nungzui masate kiang a a piak Thupiak Gol [Mathai 28:19-20] sepsuahna ding ah panpihtu poimoh pen ahi. Tuni a eite hon panpih a, hun tawp dong a hon ompih ding Pa leng ahi. Khasiangthou vuak in nna semthei lou a, gingtute tungtawn in sem zel hi. Tua ahihman in nang leh kei tua Khasiangthou toh ki-zawl a pangkhawm kha i hiam chih ki-ettel poimoh mahmah hi.

Gingtute sung a Khasiangthou nna sepdan:
Pathian toh i kizopna omsun tuh khasiangthou ahi. Khasiangthou gingtute ah om a, zaleenna i piak zahzah in gamtang in nna sem hi. A lompi a gen in khasiangthou in gingtute tawn a a nasep chinih in khentheih hi. Amasa in Kha thilthawnpiak piakna ahi. Thawnpiak chituamtuam a om a, a petu bel khat ahi [1Kor. 12:4]. Sawltak Paul in a gelhna ah Saptuam ah thawnpiak leh nasep tuamtuam 19 khawng chiamteh theih hi [1Kor. 12:8-10; Efesa 4:11 leh Romte 12:6-8]. Saptuam/khua thum a laikhak a gelhte ah thawnpiak a gente kikhat lou hi. Tua in a hon hilh nop khat thawnpiak leh nasepna tuamtuam pen apoimohna bangbang in mun tuamtuam ah kibangkhin lou a, a kiphatmoh bangzel zaw in Khasiangthou thawnpiak piak in ki-om hi [1Kor. 12:11]. Tua ahihman in Gingtu masate kiang a piak leh tuni a eite kiang a piakpen a Piatu kibang himahleh i poimoh pen a hun zir a kibanglou ahihna ah kibang nawnlou hi.

Gingtu tengteng in Kha thilthawnpiak nei tek hi hang. Tua thawnpiak i tantek uh i zat khiat chiang un i vek ua dia phatuam hong suak hi. Khrist pumpi Saptuam lamtouhna ding a piak ahihman ahi. Himahleh, kha thawnpiak toh kisai theihkhelhna in Saptuam chidamna susia a, kikhenzakna tun sek hi. Hiai ah kikum man kei mah leng chiamteh tuak i sak man in a dawk pha diakte tamlou i taklang ding: mihing pianpih hihtheihna leh kha thilthawnpiak khenkak louhna, kha thawnpiak khenkhat ngaihsang luatna leh a dang khenkhat ngaihnepna leh kha thawnpiak kiphawkpih louhnate ahi. Hiai bang a kha thawnpiak toh kisai theihkhelhna a om chiang in Saptuam ah liamna om a, a kilamtou ding lai kinengniam tuah in chimkik thei maimah hi hang.

Gingtute hinkhua a Khasiangthou nna sepdan dang bel kha a omna i chih ahi [Gal. 5:16]. Mi kuapeuh ahong pianthak chiang in siamthak in a om a [2Kor. 5:17] Toupa nei a hong hita hi. A toupa bel Jesu Khrist ahi. Jesu in amah ate chiamtehna in Khasiangthou pia hi [Johan 14:16]. Johan gelh ah, “Khamuanpa dang” chih in om a, aman tua Jesu tou-a neitu pen tangtawn a ompih ding a chiam hi. ‘Khamuanpa’ kammal pen Greek ah PARACLETOS ahi. A khiatna ‘kiang nai a panpihtu dia sap’ chihna ahi. Thukhunthak ah Johan kia in zang hi. Jesu’n leitung a Amah gingtute panpihtu dia ahon nutsiat ahi. Tua Khasiangthou in a omna pa/nu hinkhua ah gah suah in, muhtheih nunzia kilawm leh manpha pawkhia hi.

Mi kha a a om chiang in mihing thahatna leh hoihna in ahih vuallouh kha-gah: itna, kipahna, lemna, thuaktheihna, migitna, hoihna, muanhuaina, nunnemna, kidektheihna khawng a hinkhua ah muh theih in om hi. Kha-gah tuh mihing pianpih khelhna ‘sa thilhihte” [Gal. 5:19-21] toh omkhawm theilou ahi. Jesu a hitate’n amah a om sa tuh alunggulhna leh duhgawlnate toh a kilhdenta hi. Khovel a teng himahle hang, khovel mite bang lou a, ei hon neitu Jesu honpiak khasiangthou piina i zuih tinten ding ahi. Kha a omna in kha-gah suang a, tua in Pathian thupina a pia hi [Johan 15:8].

Thukhupna: Pentikos ni a Khasiangthou hong tun hun leh hong tun dan in gen nei mahmah a, Pathian tangtawn thiltum kichiantak khat om ahi chih hon theitel sak hi. Pathian nam Israelte tungtawn in Jerusalem khopi pansan in Khasiangthou piak in i om uhi. Hiai ni a kipan tuni dong in Khasiangthou i lak a teeng in amah ngai peuhmahte khamuan in panpih hi. A hong paikiik dong a hon ompih dia Jesu’n ahon nutsiat neite i hihdan leh a hamphathuai dan phawk thak leng uthuai i sa mahmah mai. Saptuam pumpi lamtouhna ding leh theihpihtu muanhuai i hihtheihna dia gah manpha suahtheihna thuguk tuh kha-a omna ahi.