NU HIHNA A MIDANGTE ADIA VUALZAWLNA (Nasepte 9:36; Pau 31:1-29)

Thumasa: Simtute, i Toupa Jesu Khrist min in Dorcas Day leh Nute ni chibai kon buk masa hi! Tukum leh tukha a Dorcas Day leh Nute Ni i zatni ding toh kisai a Article gelh ding a KTZ Editorial Board in hamphatna hon piak man in ka kipak hi. Tukha i saptuam thupi ding a kiguang “Nu hihna a midangte adia Vualzawlna” chih leh Dorka Pawl thupi khennenna “Na Innkuanpihte adi’n Vualzawlna hi in” chih ahi. Hiai thupite toh kisai in tamlou kon gelh hi.

1. MOTHER’S DAY KIPATNA
Nute zahna piak, Greek leh Roman-te hunlai apan a ana zatsek uh ahi. Himahleh, khovel in tuhun a ‘Nute Ni’ chi a kizang pen ahihleh, America nungak Anna Jarvis in ana patkhiak ahi. Marie Reeves Jarvis kichi tuh, Anna Jarvis pianna Nu ahi. Amah, social worker (khotang hoihna dia nasem) khat ahi. Aman Nu’ phattuamna leh manphatna thupilua ahihdan theichian in, a tanu Anna Jarvis kiang ah, khatvei beek Nute tengteng, a sikhintate leh a damlaite pahtawina leh zahtakna piak diing hoih a sak thu ana gensek a, Anna Jarvis inleng a Nu’ thugente lungtang a vom gige ahihman in mangngilh hetlou hi.
1905 kum in a Nu’n sihsan hi. A Nu’ sihnung in Anna Jarvis in, a Nu’ lunggulh gige ‘Mother’s Day’ neih a ut mahmah taksuah diing in theihtawpsuah in panla hi. Apatna ding in Anna in, Grafton Saptuam, West Virginia a kikhopna program khat ah carnations paak a Nu zahna diing in ana khak hi. Carnations paak pen a Nu’ paak deihpen ahi a, aman le hiai paak in Nute’ itna siangthou ensak hi-a a theih ziak in hiai paak zang hi. Huchi in, anung sawtlou in, Anna Jarvis leh amah support-tute’n a gam vaihawmtu leh thuneite kiang ah laigelh in, ‘Mother’s Day’ pen government in official a suti ni-a phuang diing in ngen uhi. A nasep kuhkalna un gah hon suang in, 1911 in US gam tamzaw ah ‘Mother’s Day’ zat in ana omta hi. May 8, 1914 in President Woodrow Wilson in, May kha a Pathiani ni nihveina pen ‘Mother’s Day’ a zat ding in thuphuan ana bawl hi. Huchi in, America leh gam tuamtuam ah ‘Nute ni’ zat hong kipan a, Khristiante kia hilou in, khovel pumpi in ‘Mother’s Day’ a thupi theipen in ‘Nute pahtawi ni’ kizang hi.

2. DORKA PAWL KIPHUHKHIAK TOH KISAI
Dorka Pawl phuhkhiak toh kisai tamlou i en ding: Thupina gam a hon na paisanta Pi Nianzanem, Zenhang Lamka in a pa uh phamta Pu V Tunvum in Numeite awlmoh leh vei mahmah in, Pu H Nengzachin kiang ah “Pu Chin aw, i numeite’n ankuang kikhopna bek hon huhtheihna ding un, numei pawl phutkhe zok ni” chiin a vanoh sek hi. Pi Nem in “i makaite a lunglut thei mahmah ua, houlimna pen in anei ua, kou a zite unlah huchipi in ka kuppih thei khol kei uh” a chi hi.
Dorka Pawl minphuak – I heututen Numei Pawl phut khe ding hileh a min dia bang hisak ding chiin a kikum ua, Pu Rosted zi Pi Ro a dot uleh Bible a numei fel mahmah Dorcas a om vele huai min la un a na chi hi. Huchin heutu masaten Nasepte 9:36 pansan in 1950 kum in Dorka Pawl na phutkhia ua, amau Dorka Pawl sum ding ana thohkhawm in Rs. 5/- toh abul a na pan ua, tuni chiang in Pathian in Dorka Pawl thupitak in hon phungvuh in na hoih tampi semkhe thei ding in hon tungding a Pathian min i phat hi. Pathian in i heutu masate Dorka Pawlte ading in Vualzawlna hiding in hon zatsak hi.

3. MIDANGTE ADIA VUAL-ZAWLNA I HIHTHEIHNA DING IN
Atung a point khatna ah midangte adia vualzawlna ana hi; Nute Ni ana pankhete leh Dorka Pawl a na pankheten maban saupi mu in midangte leh Dorka Pawlte deihsakna, awlmohna leh veina lianpi neikawm a a na sepkhiakte un midangte adia vualzawlna thupitak hon tun hi. Amaute bang a maban saupi mu kawm a awlmohna leh veina nei i poimoh uhi. I innkuan, i kim leh kiang a i kisukkhakpihte adia vualzawlna i hihtheihna ding in angsung khuallou a midangte awlmohna leh veina i neih poimoh hi. Dorka pawl in tukum May leh June kha a i thupi dia i guante saulou in i en ding:
i. Na nu-le-pa, na sanggamte, na pasal leh na tate adia vualzawlna hihtheihnate:
Pathian in Adam a bawlkhit in amah kia a om hoihsa lou in a kituahpih ding amah panpihtu ding Numei ka bawlsak ding chi in Numei bawl hi (Gen. 2:18). Pathian in Numei a bawl in midangte adia vualzawlna hiding in bawl hi. Pathian in zite/nute, nu-le-pa, sanggamte, pasal leh ta-le-naute leh midangte adia vualzawlna hon hihsak ut hi, hamphathuai mahmah ahi.
Pau 31: 1-9 sung ah Lemuel nu’n a tapa a thuhilh a a kiang ah, Numei pasal kal thangtatna a kihellou ding, Zu leh Khamtheih thilte hihlou ding leh migenthei, gumtu ding leh gensaktu ding neiloute adia pang ding in na sinsak hi. A nu’n a tapa a neulai/ kumpi a apan ma a kipan a hichibang sinsakna hoih leh manpha toh a na etkol ziak in atapa Lemuel in Pau. 31:10 ah “Numei hoih kuan a mu dia amah lah Rubi suangtung lam pek a om ahi” chi hial hi.
Innsung mite adia vualzawlna manpha leh thupi zaw sum- le- pai, inn-mun lou-mun, neih-le-lam hiam, gou manpha taktak tampi kinutsiat chihte sang in Lemuel nu bang a taten a letnung ua leng a pialsanlouh ding uh sinsakna piak ka’n a manpha omlou hi.
Innsung a nektak bawltu ading in nektak bawlte a nete adia a limthei tawp a bawl tuh vualzawlna na ahi hi. Insung tawldamhuai leh siangthou tak a i omsak leh a sung a teng i innkuanpihte leh lenglate ading inleng vualzawlna hipah hi. Huaiziak in, vualzawlna hihtheihna ding lampi zaw thupilua leh haksalua hilou in thil neuchikchik a leng vualzawlna hihtheih ahi.

ii. Na innsak innkhang, kiim leh kiangte adia vualzawlna hi-in.
Dorka hihna Nasepte 9:36 ah “Dorka in thilhih hoih leh thilpiak a hau mahmah hi” chi hi. Pathian in numeite panpihtu leh huhtu hiding a hon bawl ahih dungzui in, innsung paihoih ding laite pisetu leh fuihsetu hilou a, Dorka bang a ase ding leh hoihlou dingte hihhoihtu ding a Pathian in hon siam leh bawlte i hi chih phawkthak ni. Inkuan sung damlou leh kise thei dingte bawlhoihtu ding in Pathian in hon deih in hon siam hi. Huai ziak in, na inkuansung mite ading a Vualzawlna hi ding leh insung a thil hih hoihtu hi ding in Toupa’n nang hon zang ut hi. Toupa tupna Amah toh pang in hihpichin sawm in.

iii. Na kisukkhakpih peuhmahte adia vualzawlna hi in.
Anna Jarvis in Mother’s Day ana pat tungtawn in khovel pumpi a nute adin Vualzawlna tun hi. Dorka in a kim-le-kiang a tagah genthei leh meithaite khotuah in a silh a ten ding tanpha uh ngaihtuahsak ahi chih Dorka a sih a Peter hong tun in a luangbul a tu meithaiten a damlai a amaute adia a puankhuisakte ana lak in kah uhi. Dorka tuh a kim-le-pam a om mite adia vualzawlna ahih bang in i kim-le-kiang a omte adi’n vualzawlna i hi hia?
Houchik a midangte adia vualzawlna hihtheihna lam tuamtuam om hi. Innkiim innkiang hahsiang leh nin paihdan ah leng kiim leh kiangte adia vualzawlna hihtheih ahi. Zan miallak a innkiim, innkiang a meivak tansak tungtawn in midangte ading a vualzawlna hihtheih hi. Tuikai ahihkeileh tuikhuk (well) neite ading in innkiim leh inkiang a tuineiloute tawisak, tui piaksawn chihkhawng adawngtute adia vualzawlna thupi mahmah ahi. Lampi a kuahiam a khe a pai gim mahmah na muh a na gari a na tuansak leh huai leng amah ading in vualzawlna ahi hi.

Thukhitna: Tagah Genthei leh Meithaite khotuah a ittu, a sihni tanpha a meithaite itpen a om Dorka min pansan a kiphutkhia Dorka Pawlte leh mimalmalte tagah, genthei, meithai leh liangvaite adin vualzawlna i hihiam chih kivelthak lehang uthuai i sa hi. Dorka tuh thilhih hoih leh thilpiak a hau ahih bang in Saptuam leh Pawl tuamtuam a numeite, Saptuam Pawl sung, khotang leh innsung a thil hihsetu leh buaina bawltu hilou a, Pathian in panpihtu muanhuai hi ding a A hon bawl bang a, siatna tunthei ding thilhoihlou pankhiatu hilou a ahoihlou dingte hihhoihtu hi ding leh, na hoihsem a midangte adia vualzawlna hiding in Pathian in hon vualzawl chiat hen.