MISSIONS TUNGTAWN A VUALZAWLNA “Huchi in, na kithadahsak kei ding ua, ginna leh kuhkalna ziak a thuchiamte gouluah khin khawngte entonte na hi zaw ding uhi.” (Heb.6:12)
Thumasa: Simtu itte, missions nna kum 50 val bang sem thei dia hamphatna honpia a, khovel pum huap-a nasempawlte laka kihel thei dia honpi i biak Pathian min in Missionary Day Chibai ka honbuk hi! OMF ten South East Asia (SEA) gamte a a sepna uh laka Singapore leh Thailand a Vision Trip hon neihpih na uah mite’n Pathian gam nasep a awlmoh dan uh, a kipiakzoh dan uh ban ah ei (EBC) tellou a le semtu buaipih senglouh nei ahih dan uh vamuh in om hi. I kizattheihna tawm mahmah ahihlai a sepkhawm a lunglut uh hiai gam mite toh mel-le-puam, nek-le-dawn a kilamdanna neilou bangmai i hih ziak uh adiam chih in om hi. Gamdang tanpha Toupa’n missions nasep theihna honpiak lai in kei Ieh ka inkuanten bangchi’n ka sem ua chih kivel deihna in Missionari-te Pa’ chih a om Abraham hinkhua apan i enkhawm ding.

ABRAHAM ZUIH DIA PATHIAN’ THUPIAKTE:
1. Nutsiat Ding: Abraham kiang ah Toupa’n, “Na khua a kipan leh na tanaute a kipan leh na pa inn a kipan pawt inla, k’on etsak ding gam ah pai in,” a chi (Gen.12:1). Chi thupi hih ban ah vualzawl a om ding leh vualzawlna hiding in a ngaihhuai leh khiaklahhuai tampi nutsiat ding Pathian’ thupiak ahi. A samtu Pathian a muanngamna leh A thupiakte a zuihngapna tehna leng ahipah hi. Hiai thupiak zuihna toh kisai Hebrute laikhaktu in, “Ginna in Abraham in sap a omlai in a gouluah ding mun a lut ding in paikhiak ding thu a muta hi; a paina ding lam theilou in a paikheta” (11:8) a chi! Tulai saptuamte paidan bang a ‘missions principle’ leh ‘philosophy’ hoihtak nei masa a kalsuan bel ahihet kei chih i mu. A paina ding leh manoh gam theiloupi a paikhe top ahihna ah. Ginna a kalsuanna leh Pathian thuman tuh i maban ding chiangtak muhkholh ziak a piak, sep leh kuankhiak himasa lou in, i kichimatpih, i khamuanpihte mi leh thilte nutsiat ngamna, haksa bangkim thuak dia kimanna ahizaw. Evan. H Thangkhansiam in “Tun-le-zua mubang ngai ing, kholhpih vual leh laizomte; Inn leh lou tuangnungsiah ding zaitha neem e…” a chih Abraham dinmun koppihna khat ahi ding hi. A kuan theilou, a sawlkhetute ding inleng thilpiak leh thumna te a theihtawpsuah a panlak ding hon daltu leitung toh honkichimat sak nutsiat kul tampi om veve hi (Inn-le-lou, mun-le-mual, sum-le-pai, dinmun, sa-utna, mit-utna, tep-le-muam, adg.).

Tulai Missions Organization tamtakte’n missionary a kuan ding mite laisiamna (Academic/ Theological Degree) sangmah in ‘Khamangthangte lainatna, Kipiakzohna leh Ginna a kalsuanna’ a poimoh masapen a koih in, loh ding leh hamphatna muhtheih ding omte taklang masa utlou uhi. Pathian nasemtute’ nek ding, dawn ding, silh-le-ten ding toh kisai in Jesu’n, “A gam leh a diktatna zong masa un, huchiin huai tengteng a honpiak behlap ding” a chi hi (Mat.6:33). Saptuam leh mimalten a masa dipen nanungzaw sak kha dekdek i diam chih kivel tuak ahi. Abraham kuankhiak dan tuh Pathian’ thupiak zuihna leh ginna a kalsuanna diktak ahi.

2. Latkhiak Ding: Pathian thuchiam ngahna ding leh Insung chidamna ding in Abraham in latkhiak ding nei hi.
2.1. Anaupa Tapa’ Lot: Vualzawlna gantate ziak a Abraham leh Lot kal a kilemlouhna omte hihveng na ding in a kikhen uh akul hi. Hiai thil ah Abraham in Lot deihtelna masa pia in buaina om lai dingte hihveng ahita. Saptuam sung, semtute’ kal, insung leh khawtang chidam deihna ziak a mahni hamphatna, minhoihna leh dikna luikhiak ngam tuh “Gilou paisanna; lemna zong a delh a delhna” ahi (Sam 34:14). Pawl leh thil khatpeuh a ‘buaina tuntu’ hilou a ‘a hihdamtu’ hih tuh Pathian a muanna leh ginna koih Abraham batna ahi.
2.2. Hagar leh Ishmael: Pathian thuchiam ngakzou lou a mihing’ lemgel a Sarai sikhanu Hagar a piang Ishmael tuh buaina kipatna a suak hi. Pathian thuchiam diktak Isak gouluahtu ahihtheihna ding in Hagar leh Ishmael te nuta hawlkhiak ding chih ahi. Ishmael tuh Abraham adia a tapa mahmah ahih man in amah ngaih in hiai thu thilhoihlou tak himahleh Pathian thupiak bang in a hawlkhia hi (Gen.21:9-21). Report hoih deihna ziak a piangthak loupi leh mahni gahsuah (convert) hiloute huailut mawk tuh Ishmael piansakna ahih man in buaina tuntu hizaw sek hi. Ishmael leh a nu Hagar hawlkhiak tuh Abraham ding in thil nuamchiam ahikei ding. Kha Siangthou Pathian in na hinkhua a thuneihna leh lalna atan nading in na lainat tuntun himahleh hawlkhiak ngai bangbang om dia?
2.3. Gouluahtu Ding Isak: Abraham tapa neihsun, a teknung ta, a ittak, haltum thillat a lan dia phutluih ahi. Hiai thu ah Abraham in Pathian a selkalhna i mu kei a, huai sangsik in hiai thupiak sepsuah ding kilawp lua bangmai in ‘beltak in a thou’ chih i mu zawsop! (Gen.22:2,3). Pathian thupiak zuihna ah mahni zohthoh leh ngamtawk tan lel hilou in, i it tuntun, i duh tuntun, i lungkimna leh kinepna pen tanpha phunlou a piakkhiak leh luikhiak ngam ding ahi. Nam chih kiang a Tangthupha gen ding gingtu teng mohpuakna ahihlai in nang leh na inkuante ‘Missionary Vakna’ piak in na khateng budget a sawkbuai pha hia? Tu dinmun a pe tampente khaloh tam pen, muhna hau pen, chidam pen leh khosakna zangkhai pen ahi tuan kei uh. Hiai nna sem dia thupetu Jesu Khrist’ ngaihdamna ziak a a kipahna in kiphalna leh kithalawpna aneisakte ahizaw uh. Jesu’n, “...a khelhna tampi ngaihdam in a omta; aman nakpi’n a it hi; Himahleh, ngaihdam tawm in neuchik in a it” a chi (Luk.7:47). Thilpiak leh Pathian nasep a thasial leh haksa sa guiguiten Jesu Khrist ngaihdamna tang nailou ahih hial kei leleng tangtawm tuh hi peuhmah chihna ahi.

British-te Cricket siam a minthang CT Studd China gam ah missionary a kuan in China mite bang in va khawsa hi. A pa apan gou muh ding zah a theih ma in George Muller’ tagahkepna ading in tampi check a gelhsa in koih hi. Kum 25 a chin in a pa’ gou piak $ 1,45,000 (Rs.96 Lakh vel) phazou hi. Laisiangthou sim a thumnate a neih nung Pathian gam nasepna dia piakkhiak vek ding thupukna la hi. Tagahte kepna dia a piak bang omlaite a hawmkhiak nung Rs. 4 Lakh (vel) omlaite a zi ding Priscilla Livingstone Steward kiang a kitenna thilpiak dia apiak leh amah leng na duaisamlou in, “neihsa omlou a kiten ding” chi in huai sumte hawmkhe vek uhi (migentheite’ tan di, asi-amangte’ luangman, meithai-tagah hih ziak a muh di, Kum upat ziak a muh di, adg. omte saikha hih ziak a hamphatpih tum a tuh tuntun, eukhe guigui te toh chu kikhe mahmah uhi!). Hiai toh kisai CT Studd in a genchetna ah “Jesu Khrist kichi Pathian’ Tapa hi a kei dia hong si ahihleh, kei lamah Amah dia kiluikhiakna thupi lua chih om theilou ding ahi” (If Jesus be the Son of God and died for me, then no sacrifice can be too great for me to make for Him) a chi hi. China ban ah India, Africa gamte ah missionary in kuan a, EBC in partnership i neihpih WEC/IMM (Worldwide Evangelization for Christ / International Missions Mobilization) phutkhetu in pang hi. Aman 1878 lai a khovel muh dan leh a hinna thununtu a genna kampau “Hinna Khat Keleu, Beimang Pah Ding” (Only One Life, 'Twill Soon Be Past) a chih leh “Khenkhatte Biakin dak zak phakna a ten a ut uh; ke’n meidil huangsung a ‘Hotkhiakna Dawr’ hon uthuai ka sa” a chihte tuni tan a mite hinkhua choutu leh a kigen sawnsawn kampau ahi. Unau it, Pathian mu taktakte’n leitung hauhna leh nopsakna khelah lou in tangtawn daih thilte a kikhual na in zang uhi. Na khaloh leh income ah bang percent tangtawn sukha di nasepna’n a pang a?

Thukhitna: A tung a kigensate ban ah Abraham hinkhua ah gingtute sinlai lakna ding tampi om hi. Nam thupi a bawl ding, vualzawlna dong ding leh midangte dia vualzawlna hi dia sapkhiak himahleh khovel et in ‘bangchidan ale’ chih di’n a om. Khodet leh munkip neilou in, mikhual bang a kivial suan in puanbuk peuh ah Isak leh Jakob te toh a om uhi (Heb.11:9). Kial ziak a pem in Aigupta gam ah mikhualpi in va teng uhi (Gen.12:10). Ginna hattak toh kalsuan himahleh a zi ziak a sih ding lau in zuau nihvei bang a genkha hi (Gen.12:13; 20:2). Abraham chitlahna taklat sawm i hi kei a, Pathian in a thumangte a ompih dan leh hun haksa a leng ompih ahih dan i gen nop ahi. Tulai gingtute lak ah Pastor leh missions nasemte’ tate hoih deuhse ding, vualzawlna dong tuanse ding ua koihna leh amau mah inleng huaibang dia kilametna om khasek hi. Pathian in bel vualzawl thei tham a, himahleh huai lametna ziak a sep thildik ahihlouh ban ah A ngaih poimoh pen himasa lou hi. Pathian poingaih tuh Paul in, “I Toupa Jesu Khrist Pa leh Pathian phat in om hen. Aman vanmunte ah khalam vualzawlna chiteng in eite Khrist ah a hon vualzawlta hi” a chi (Eph.1:3). Khalam vualzawlna kan a hamphathuai leh lunggulhhuai omlou hi.

Abraham in mihing hatna leh lemgelsiamna in Aigupta leh Philistia kumpite lak ah a zi humbit zoukei mahleh Pathian in a humbit sak! Zuau a kihumbitsawmna ah lohsam mahleh Pathian in salam vualzawlna tampi muhna in a zatsak zomah! Pathian deihbang in i hing zoukei a, i diktat bukim zoukei chihle i thei. Himahleh, Pathian thupiak theihtawp a zui in, dongdong leh phunphun lou in, sawl a i omna a pai in, piak di kichite pia in, sep dite sem in thumna hunte a kihel in thumang phot peuhmah le’ng, i hihkhelhte nangawn Ama’n vualzawlna naak suaksak thei ahi. Tangthupha phuanzakna nasep ah a Kuankhetu, a Sawlkhetu leh a Thumtu muanhuaite lak-a khat hi ding in kisathak ni. Hiai nna a kigolhna ziak a Khalam leh salam vualzawlna dongtu’ leh pekhetu’ hi ding in Toupa’n hon vualzawl hen.