Articles | KTZ | EBC

    KTZ
    Article

    Jesu Lalna

    Saptuam lutang Jesu Khrist toh kisai a saptuamte ni poimoh i neihte zatdan kibang vek kei mahleh, i zatna ziak pen kibang tangpi ding in a ginhuai hi. Himahleh, Palm Sunday pen i zatdan leh i zatna ziak ni poimoh dangte toh tehkak in chiang lolou i
    hikha ding hi.

    Palm Sunday hun in hiai ni a thiltung toh kisai Laisiangthou thute apan sinding tampi om ding hi. Lampi a kikou mipite omdan toh kisai bang, mipi kikoute khou a tha-it mahmahte toh kisai bang, mihing hilou sabiltung apan nasan inleng sinlai a om ding hi. Hiaite tung ah, Jesu apan i sin ding tampi om ding a, huaite lak ah a kingaihniamna bang khat hitham ding hi. Himahleh, a kingaihniamna khenlam ah Jesu Kumpi ahihna tutung in enkhawm leng chi i hi.

    Jesu leitung a hong pailai in Kumpi in hong piang a (Mathai 2:2) huai dungzui in Judate’n a Kumpi hihna na pi bawl mahmah uhi. Himahleh a Kumpi hihna dan theikhial mahmah uh a Jesu’n a kihepkhiaksan poimoh hial hi (Johan 6:15; 18:36). Huai bang sim in tulai saptuam te’n ahihleh Jesu Kumpi ahihna dan kitheikhial in a Lalna kingaihsak zoulou a bang hi. Judate’n Rome ukna apan khovel gamthu vai a suahtakpih ding a lamen in lamen khial uh a, tulai saptuamte lak a tampi tak in ahihleh hun hong tung ding a van mun a om gam khat a Kumpi ding dan lel a ngaihtuah a tu damsung a Kumpi ahihna phawk banlou kiom hi. Hiai bang a theihkhelhna in hotdamna toh kisai ban ah Khrist nungzuihna a sianthouna toh kisai a hoihlou lam in sukha thei ding hi.

    Palm Sunday ahihleh, Judate simdan ah Nisan kha ni 10na, Paikan belam ding sehkhiat ni ma geih ahi. Tulai a i simdan in, Thohkikna Nipi (Resurrection Sunday) leh Jesu sihni (Good Friday) ma a Pathian ni pen ahi. Hiai ni in ahihleh hun dang bang lou in, Jesu ki-im hetlou in kisakkhawlna hoihtak toh (Mathai 21:1-2) Kumpi ahihna a langtang in hiai bang in taklang hi.

    • Sabiltungnou tung a a tuang in Zakaria 9:9-10 a Messia Kumpi toh kisai genkholhna thugen amah ah tangtung ahihna taklang hi (Mt 21:1-5).
    • Temple hahsiang in Isai 56:7 a Pathian Lalgam toh kisai thugenna bang a hiai nna sem in Kumpi ahihna kilang sak hi (Mt 21:12-13).
    • Mittawte leh khebaite hihdam in Isai 35:4-6 a hong pai ding Kumpi Messia kigen pen ahihna taklang hi (Mt 21:14). Baptistu Johan in Jesu kiang a Messia ahi hia chih a kansak lai in hiai mah gen in a Messia a hihna na hilhta hi (Mt 11:4-5).
    • Jerusalem suahlam a Olive mual kiim a om Bethphage apan Bethany tawn a David Khopi lam zuan a a pai lai un Sam 8:1-2 a kigen bang in naupangte apan “Toupa min a Kumpipa hongpai” chi a phatna thu kisam hi (Mt 21:9; Lk 19:38). Hiai phatna thu siampu liante leh laigelhmite’n a ngaihdah ua tai dia Jesu a hilh lai un, Jesu’n ‘hiaite a daih uleh, suangte bek a kikou ding’ chi a dawnna ah aman leng Kumpi ahihna im nawnlou a pom ahihdan kilang hi (Mt 21:15-16).

    Hiai mun a Jesu’n Kumpi ahihna a taklat pen mun dang a hiai bang muh ding om louh, a zenzen thu a kigen hiam kigelh hilou in Jesu thusinsak tampen leh a thugen laili ahi hi. Jesu’n nasep a pat tung in, “Khaw dang a leng Pathian gam Tanchin Hoih ka hilh ding ahi, huai ding a sawl ka hi ngal a” chi hi (Mt 10:7; Lk 9:2; 10:9).

    Mipi lak a Jesu’ thugen masak pen mah leng, “Kisik un, Van (Kumpi) gam a naita” chih ahi (Mt 4:17). Leitung a nasem a a om lai in, a nungzuite thugen ding a hilh in, “van (Kumpi) gam a naita, chi in, thu genzel un” chi hi. Nungzui dia kisa himahleh a pa vui masa phot ding chipa kiang ah, “Misi in a misi uh vui uhen; nang Pathian (Kumpi) gam thu va gen zaw in” a chi hi (Lk 9:60). Hiai Kumpi gam Tanchin Hoih thu mah “nam tengteng” leh “khovel tengteng” a hilh in om ding chi lai hi (Mt 24:14). A thohkik khit leitung a ni 40 hun a zat in, a “Pathian (Kumpi) gam thu a gen hi” kichi lai hi (Nasepte 1:3).

    Jesu Kumpi hihna toh kisai a kigen a Kumpi gam chi a kigengen pen Jesu’n Mathai 19 a a genna ah hiai thumalte zangpolh in khat bang in gen hi. Tangtawn hinna (t16), vangam (t23) leh hotdam (t25) leh Pathian Lalgam (t24). A thumal pen Hebrew leh Greek ah leitang gam/mun chih lam hilou in “ukna (vaihawmna), thuneihna, deihdan” gen hizaw hi. Pathian Kumpi-gam kichi Pathian Lalna chi in “Pathian ukna nuai a om a, amah deihdan kithuneihkhum sakna ahi” chi leng kigen khiallou ding hi.

    Mathai 4:17 ah Jesu’n hiai Pathian Lalna (Kumpi hihna) pen “naita” chi a, Mathai 12:28 ah “na kiang uah a hong tungta” chi hi. A nungzuite thuum dan a siansak in, “Na gam (lalna)...deihdan...lei ah kihihhen” chi in sinsak hi. Hiai Lalna hun hongtung ading a, van a munkhat a Jesu Kumpi a om ding chih lel hilou hi. Tulel leitung hinkhua a Jesu ukna nuai a om a, amah deihdan kithuneihkhum sakna ahi hi (Col 3:17). Huaiziak in Jesu’n, “A gam (Lalna) leh a diktatna zong (nilouh) masa zaw un” chi hi (Mt 6:33). Hiai bang a gingtute hinkhua a Jesu Khrist Tou/Lal ahihna ziak a thilhih bangkim a Jesu deihdan zuihna pen Khristian diktakte om ding dan leh kitheihtupna ahi (Mt 7: 21).

    Ahi a, Jesu Khrist Kumpi hihna pen a bukimna leh a tawpkhawk hun hongtung ding a omlai ngei ding hi (Lk 19:11-12). A Lalna pen leitung a hong paikik chiang in phawkna kim a phawk in a om ding hi (Mt. 26:64; 2 Thess. 1:7–10; Kil. 19:11–16).

    Huai hun chiang in “KUMPITE KUMPIPA leh TOUPATE TOUPA” chih a om in a mai ah “khuk khempeuh a khukdin” ding hi (Phil 2:10).

    Tu zahngaihna hun a Jesu Lalna nuai a kitahlut a hondampa a sangte mah sabiltungnou tung hilou sakol tung tuang a vaihawm ding a hongpai chiang a bit dingte ahi. Huaiziak in, tu ahun lai in Jesu ei ding in i bang a hia chih ngaihtuah thak chiat ni! Kumpi Jesu, Hosanna!