Thupatna: Vualzawlna hih ding ut-huailua ahi. Gen thanop huailua ahi. Himahleh, vualzawlna hihna ding in eilam pang ah ngiat a om hi. Vualzawlna mutaak leh vualzawlna mutaaklou om hi. Vualzawlna hihtheihna ding in condition om a na hi a, Genesis 12 sung a Abraham sapna apan in i en ding. Vualzawlna hih ding – vualzawlna muh ding leng i kideihsak thu i gen masa hi.

1. Nutsiat Ngamna:
1) Abraham in Pathian’ sapna a zathei sese hi. Pathian in Abraham a samtuam sese chihtheih leng abang hi. Abraham in Pathian’ sapna a zaktheih leh a zaak hun chih khawng ngaihtuah huailua abang hi.
2) Abraham’ pianna pa, milim bawl a pathian loupi Pathian ahi chi a mite kheem a nekzong ahi a kichi hi. Abraham in diksa theilou, nuam leeng sa theilou, tua ban ah milim bia innkuan ahi uhi. Abraham in Pathian hing Jehovah Pathian om ding ahi chih gingta tinten hi. Hiaite’ ziak in Pathian’ sapna a zathei sese hi chih ngaihtuah diing ahi.
3) Pathian in Abraham’ hih ding a gen a, a nutsiat ding, Pathian’ gamchiam Kanan gam zuan a a kipatkhiak ding chih ahi. Thil 3 (thum) a nutsiat ngamleh thil 6 (guk) a vualzawl a om ding Pathian’ apan thuchiam a mu ngal hi. Abraham in tuateng a nuse ngam a, a kipankhe ngam a, Kanan gam zuan in a paita hi.
4) Vualzawlna ding in nutsiat ngamna poimoh hi. Pathian’ deihlouh kampau, omdan, nasep i chihte i nutsiat ngam poimoh hi. A hoihlam/Pathian’ deihlam, Pathian’ thuman, Amah limsakna manoh a kalsuan ngai ahi.

2. Kikhenkhiak Ngamna:
1) Vualzawlna hihna ding in kikhenkhiak ngamna poimoh hi. Abraham in a paneu’ tapa mi minthang Lot a kikhenkhiak pih ngam hi. Taksa dan ah ngaihnat huai leh kikhen theilou himahle uh, vualzawlna hihna ding in Abraham in Lot a kikhenkhiak pih poimoh hi.
2) Lot ahihleh, khovel mi mahmah mai hi. Abraham bel, Pathian’ gingta mi ahi. Abraham in, Lot toh kikhenkhiak ngeingei poimoh sa in, gam, mun adeih a teelsak masa hi. Huchi in Lot in a deihna laaitak Sodam phaizaang a teelta a, Abraham toh ahong kikhenta uhi.
3) Vualzawlna hihna ding in kikhenkhiak pih ngamna poimoh hi. Khovel toh kichimat a, kikhenkhe zouloupi bangchi in vualzawlna na hithei mawk di’a? Khovel toh kikhenkhe phot inla, Pathian’ gam delh masa in. Huchi in Vualzawlna na hitheipan ding hi.
4) Abraham in Pathian’ gamchiam Kanan gam bawngnawi leh khuaizu luanna gam zuan a hong pai zeellai in, Sekem ah Pathian’ ading in maitam hon doh hi. Pathian’ a ding a maitam bawl ngeilou, thilpiak pe ngei khollou na hihleh, pephal inla, Pathian’ a ding in maitam bawlngam inla, huchi in vualzawlna na hithei ding hi.
5) Khovel toh kikhenkhiak ngamna, huaihamna, sum deih luatna, diklou tak a muh khawksak louhna, hazatna, kisaktheihna kichite khawng khovel thupina ahi a, tuabangte toh kikhenkhiak ngam ngai ahi. Huchi na hihleh, Abraham bang in vualzawlna na hithei ding. A it mahmah Lot tuh Abraham in a kikhenpih ngam hi chih ngaihtuah vengveng inla, vualzawlna hi ding in kisa inla, kipankhia in.

3. Piakkhiak Ngamna:
1) Abraham in a tapa neihsun Isak, Pathian’ a ding in a pekhe ngam hi. Pathian’ ading in pephal inla, pe ngam inla, it ke’n. Huchi in vualzawlna na hithei ding hi.
2) Mi’ tate lohching uh chih na thei a, tate’ lohchinna di’a nu-le-pate’n bangchi bang a panla uhiam chih leh, a panlakdan uh ngaihtuah tham ching ding hi. Nang’ tate’ lohchinna ding in bangchi bang in pan na la a… chih ngaihtuah nawn in. Bangmah sep-le- bawl, panlakna neiloupi bangchi in nang’ tate a lohching ding ua… chih bang ngaihtuah vengveng ding ahi.
3) Tua mah bang a, vualzawlna hi ding in panlakna’ nasepna poimoh hi. Pathian adi’a ginna thuchiam, sawm-a- khat piakna leh piakdan ah, midangte awlmohna nasep a na panlak dan, na hihdan, na lungsim put ngaihtuah in. Vualzawlna hitaak leh mutaak na hina hiam?
4) Muhtheihte’ a ding, muhtheihlouhte’ a ding hita ve, ahi hi hitaleh, piakkhiak ngamna, phal ngamna, nasep tha leh zung, Pathian’ a ding a phal ngamna, huaituh vualzawlna hihna ding ahi.
5) Vualzawlna hihna ding in ei lampang a ngiat a om ahi chih thei a, bangmah hihkhiak sepkhiak neiloupi vualzawlna hi ding a kikoih hithei mawklou ding ahi chih thei ni. Huaiziak in, vualzawlna hihna ding in piakkhiak ngamna poimoh mahmah ahi.

Thukhitna: Vualzawlna hihna ding in Abraham bang a Pathian’ sapna zathei ding hinkhua poimoh hi. Nutsiat ngamna, kikhenkhiak ngamna, taisan a delh ngamna poimoh hi. Tua ban ah, piakkhiak ngamna, midangte awlmohna, hehpihna neihna poimoh hi. Tua ding a panla a semzuite vualzawlna hithei diingte ahi uhi. Tuabang ding in kisa in, Toupa’n a hon vualzawl ding a, huchi in vualzawlna na hithei ding hi. Simtute Toupa’n hon vualzawl hen. Amen.