Thupatna: Tukum thupi “Nang vualzawlna hi in” Gen 12:2 kichi kua genna a hia? chih kidong masa lehang, Abraham genna ahi, a chih theih pah ding hi. Ahihleh hiai thupi dia nei i hihman in ‘Nang’ kichi pen eite genna leng ahi chih sawm i hingei ding. Abraham mah bang a eite leng vualzawlna hiding a Pathian in hon koih taktak mah a diam? chih pen lungluthuai
sa i hi.

Laisiangthou a muhtheih mi thupi tampite lakah Abraham in tungnunna nei ahi chilehang khial khollou ding in gintakhuai hi. A hinkhua a thiltuah leh Pathian toh akisukkhak dan hiai bang in kimuthei hi;
(i) Pathian sapna: Pathian aw mahmah za in sapna a ngah hi.
(ii) Pathian thuchiam: Pathian in Abraham tung-a a sepsuah ding thuchiam a nei hi.
(iii) Ginna ziak a siamtang: Abraham in Pathian thu a zak ginlahna neilou in thu a mang a, huaimah tuh a diktatna a sehsak ahi.
(iv) Ginna a hing: Abraham in Pathian thupawt a gingta in, a lenkip a ahinpih hi.

Pathian toh kithuahkhawm a hing: Abraham amah lemgel leh deihdan a khosa lou in a hinna bei dong in Pathian toh a tonkhawm den hi.

A. ABRAHAM BACKGROUND: Abraham tenna mun Kaldai gam Ur khua ahi masapen hi. Abraham hun lai in, Mihingte’n Pathian a puksan uh a, Pathian lungsim nasak mahmah uhi. Pathian a puksan dan uh atangpi in chi li in a khentheih ding.
(i) Mihingte’n Pathian helsan, limsak lou, phawk lou himhim in khosa uhi.
(ii) Mihingte’n amau pilna zang in leh a khutsuakte ua kitoudelh in Pathian poimoh kisalou uhi.
(iii) Mihingte’n teklei hoihtak bawl in, insangpi lamtou in amau leh amau kihihthupina ding in Babel insang bawl uhi (Gen. 11:3-4).
(iv) Mihingte’n Pathian taisan in bawltawm pathian bia uh a dawi biakna toh leng kizui hi (Josh 24:2). Hichibang khovel khalam a mialtak leh lungzin huaitak hun tuh Abraham hunlai ahi.
1. Abraham sapna masa: Huchih hun lai in, Toupa Pathian in Abraham a sam a, na kholam leh na chite lak akipan pawt inla, gam kon etsak ding lam ah pai in a chi hi (Nasep 7:3). Huai hun hi Ur khua a omlai ahi. Laisiangthou sutmi khenkhate’n hiai sapna Abraham in a sangthei pah kei a, huchih laitak in Pathian in a pa Terah kiang ah leng theisak ahi chi uhi. Huchi in a inkuan un a khua leh tui Ur apan leh a tanaute pawtkhiak san in Haran ah a teng uhi. Terah sihtan dong huai mun ah a teng uh a, Haran ah a pa a vui hi (Gen. 11:31-32; Nasep 7:4).
2. Abraham sap nawnna: Haran a a omlai uh, a pa sih khit nung in, a nihveina ding in Pathian in Abraham a sam nawn a a khua akipan leh tanaute akipan pawtkhe ding a chinawn hi (Gen. 12:1). A nihvei sapna ah, Pathian in Abraham kiang ah a muanhuaina thuchiam sagih a bawl hi. Huai thuchiam sagihte hiaite ahi:
(i) Chi thupi mahmah in kon bawl ding,
(ii) Ka hon vualzawl ding,
(iii) Na min ka hih thupi ding,
(iv) Nang vualzawlna na hiding,
(v) Nang hon vualzawlte ka vualzawl ding,
(vi) Nang hon hamsiatte ka hamsiat ding,
(vii) Nang ah lei a namchih vualzawl in a om ding.

B. PATHIAN THUCHIAM IN A TUPTE:
1. Abraham Nam thupi tak a bawl ding: Gen 12:2 ah Pathian in Abraham kiang ah, chi thupi mahmah in kon bawl ding a chi, Abraham chi akipan nam thupitak hong kilamtou ding ahihdan gen ahi. Huai tuh Pathian lalgam tundingna ding kipatna Nam thupitak hiding-a hon bawl ding ka hi chihna ahi. Huai Pathian lalgam tunding nopte hun thum a gen in om hi. Hun khatna, Abraham tungtawn in Thukhun lui ah Israel nam thupitak bawlkhiak in a om khinta ahi. Pathian in a nam bawlte a mitnauta bang a enkol in, a vualzawl a, melma laka a humbit a, a puk chiang un leng a tungding nawn zel hi. Hun nihna, Abraham khanggui hong kizom toutou David chiang suan sawmleli, David apan Babulon sal a pitan suan sawmleli, Babulon sal a pi apan Jesu Khrist tan suan sawmleli apha hi (Mat. 1:17). Huai Abraham suan Jesu Khrist in a sapum leh sisan a lei in Thukhun thak Saptuam thupitak a bawl hi. Khrist suangpi kip tunga kilamtou Thukhun Thak Saptuamte adia i heutupa Jesu Khrist khang kipatna Abraham ahi. Hun thumna, Abraham suan David tutphah akipan in hun hong tung ding kumsang lalgam ah Jesu Khrist in vai a hawm ding, huai hun chiang in a gam in beini nei ngei nawnlou ding hi. Abraham suan, Jesu Khrist Zan leh Tuni leh Tangtawn a kidang ngeilou in, Van thak leh leithak a bawl a tangtawn daih ahiding hi.
2. Abraham vualzawl ding: Pathian in Abraham vualzawlna thuchiam a pia (Gen 12:2). Hiai in a tup ahihleh Pathian in a thilsiamte vualzawlna leh hotkhiakna ding a mihingte vanzat a zang nuam ahihdan genna ahi. Atung in, Pathian in a thilsiamte hoihsa mahmah in a kemtu ding in mihing a bawl a thuneihna a pia hi. Himahleh mihingte’n khelhna ziak Pathian thilsiamte kem thei nawnlou, sing leh lou, ganhingte itna leng neilou in suksiat ding kia in enta hi. Pathian in lah a thilsiamte a it in hoih a sa mahmah ngal a, huaite kem a, tungding thak a thilsiamte tung a vualzawlna hiding a Abraham suante bawl nuam ahi. Sadan a Abraham suan Jesu Khrist tungtawn in Khalam mitvakna leh vualzawlna i tante Abraham kiang a thuchiam paitou zel ahi (Gal 3:14). Jesu Khrist ziak in Pathian namtelte i hong hitheita, Abraham kiang a vualzawlna thuchiamte eite a leng a hong hita hi. Pathian in a namtel a tatsa mite a mitnauta bang in hon kem a hon veng gige in tupnei in hon tungding nuam hi. Pathian thiltup mangngilh ngei kei ni!
3. Abraham leh a suante mi tengteng lak ah vualzawl ding: Pathian in Abraham vualzawl ding kia tup a nei hilou in a suanteng a inkuante, a namte tengteng leng vualzawl ding chi ahi. (Gen 12:3; 22:18). Laigelhtu khat Witness Lee kichi in hichin a gen hi, “Pathian in Abraham a sapna lai in, mi masa Adam apan Abraham kikal anung et zual a Adam suante a tawpsan hi. Himahleh a thuchiam Abraham ah hong kipan thak in Abraham suan tengteng a vualzawl hi.” Abraham a hong kipan thak vualzawlna in Adam suan mihing tengteng, nam tengteng kiang ah Jesu Khrist tungtawn in vualzawlna a pia hi (Gal. 3:14,16). Pathian in Abraham kiang a vualzawlna thuchiam a bawlsa pen mah, Jesu Khrist tungtawn in Jentelte tung a hong tung a, kuamah khentuam lou in, a min gingta tengteng kiang ah Pathian tate hihtheihna a peta hi.

C. ABRAHAM LEH EITE:
Pathian min lou ai thum chiang in Abraham Pathian, Isak Pathian, Jakob Pathian, Koute Pathian i chizel hi. Abraham hihna leh a thiltuahte hoihtak a i ngaihtuah leh a Pathian pen eite’ Pathian chihsam ding a koppih ngam huai taktak ding mah hia hon chisak hi. Abraham kua hi a, kei kua ka hia chihdan a i ngaihtuah khak leh, Jesu Khrist tellou a, eimah kia ki-et in tuh koppih ngam ding vual ahikei hi. Himahleh Jesu Khrist ziak in Abraham Pathian koppih ding a kilawmlou mite’n kisuanlah huai hetlou in i koppih theita hi. Pathian in Abraham kiang a vualzawlna a piaksa leh thuchiam a bawlsa Jesu Khrist ziak in eite ading a hong hita, huaiziak in, “Nang vualzawlna hi in” chih thu eite kiang ah leng gen ahi mahmah hi. Pathian in ei gingtute midangte adia vualzawlna hiding in hon bawl a; thilsiam tengteng kemtu hiding hon koih hi, sing leh lou, ganhingte, azu avate melma hilou ding in a hon deih hi.
Thukhitna: Abraham mah bang a Pathian in eite leng vualzawlna hiding a hon koih taktak mah ahi diam chih thupatna a i gen pen adawnna bawl in zou leng chi i hi. Pathian a muanhuai a, Abraham kiang kia hilou in, nam tengteng, mihing tengteng leh a thilsiamsa tengteng tung ah a hoih in a ginom hi. Pathian in eite leng a vualzawlna luanna hiding a hon bawl taktak mah ahi chih gingta in pomkip lehang deihhuai i sa mahmah hi.