"…Vual ka hon zawl dia... Nang vualzawlna na hi ding” (Gen. 12:2).
Pathian in Abram a sap lai in, Kaldai gam a Ur khua a, a om lai in sam a, a kiang ah thuchiam a na pia hi. Abram in a khua leh tuite, a inkuante, a tanaute leh a lawmte nusia in ginna in a tunung hun ding thei kei mahleh Pathian sapna sang in a na paikhia hi. Pathian thuchiam muang in ginna a akal suan khiak ziak in, ginna a pa chih hial a na loh hi. Pathian in vualzawlna tang ding kia hilou in vualzawlna leng hi ding in sam ahih dan
tamlou in kikum leng i chi hi.
I. Sapna: Laisiangthou sung a sapna thumal kizatdan tamlou te: 1. Mi/thilmin: “Pathian in vak, “Sun” a chi a, mial “Jan” a chi hi (Gen. 1:5) “…Ganhing chiteng a min uh Adam in a na phuah a min uh ahi den hi” (Gen. 2:19) 2. Thumna a Toupa Min lohna: “…Huai a kipan mite’n TOUPA min a lou pan ta uhi (Gen. 4:26) “Honsam lechin, k’on dawng ding a…” (Jer. 33:3) 3. Nasem ding a sapna: “En in, Juda nam a Hur tapa, Uri tapa Bezaleel a min in ka samta hi” (Exo. 31:2). “Hiai ni’n hichi ahi ding a, ka sikha Eliakim, Hilkiah tapa, kas am ding a…” (Isai. 22:20).
4. Chialna lam toh kisai a
sapna: “..Mi kuahiam in nitak in Ankuang thupi a lui a, mi tampi a sam hi; annek hun in, a misapte kiang ah, Hong paita un, bangkim a manta, chiding in a sikha khat a sawl hi” (Lk. 14:16-17). 5. Kisik a hotdam ding a sapna: “Midiktatte sam ding a hong pai ka hi kei a, mikhialte kisik ding a sam dia hong pai ka hi zaw” (Lk.5:32).
II. Pathian Sapna: Pathian sapna ngah masapen Adam ahi (Gen. 3:9). Toupa’n, “Na nau Abel kaw om ahia?” chi’n Kaina sam hi (Gen. 4:9). Mosi in a pu Jethro belamte Horeb a a chin lai in pawn a meikuang lak pan in TOUPA’N Mosi sam hi (Exo. 3:4). Samuel naupang, zan a a lup lai in Toupa’n sam hi (ISam. 3:4) Amos, Pathian in ganhon venna akipan in Israelte kiang thugen ding in sam hi (Amos 7:14). Simon, Andru, dil a len pailai a mu a, Toupa’n sam hi. A lente uh leh a longte uh nusia in Toupa a zui uhi (Mat.4:18-22, Mk.1:16- 20). Levi, siahpiakna mun a tu a mu a, “Hon zui in” chiin sam a, a thou a a zui pah hi (Mk.2:14). Pathian in Abram a sap in a omna khua, a tanaute leh a pa inn a kipan pawt a, gam a etsak ding lam a pai ding in sam hi (Gen. 12:1-3). Pathian in tu hun nanung ah a Tapa tung tawn in mikhialte sapna bawl hi (Heb.1:1). Mi tengteng muh ding in Kross ah theihsakna’n azang (Kol.2:15). A Tapa a hon sapna, sapna nanung ahi.
III. Pathian in a Laisiangthou pan in honsam hi: Paul in “ka Tanchinhoih un nou a honsam hi… (II Thes.2:14) a na chi hi. Toupa Jesun “Laisiangthou tuh ka Tanchin theihpihna ahi… (Jn.5:39) a na chi. Genesis apan Kilakna Laibu sung tengteng Pathian in mihingte a sapna laibu ahi. Pathian in mihingte it ziak in sapna bawlden hi. IV. Pathian in Haksatna tungtawn in honsam hi: Pathian sapna aw nemtak zanuam lou leh za utloute, Toupan haksatna, lungkhamna, natna, tuahsiatna leh sihna tanpha in honsam thei hi. A hinna i kop pih theihna ding leh a deihdan leh a thu i mantheihna ding ahih leh Toupan, haksatna, melhemna leh damlouhna i tung a a tun a phal hi (Mat.18:8-9). Kumpi David in “Na thusehte ka zil theihna ding in hihhaksat a ka na om a hoih ahi” a na chi hi (Sam.119:71). “Hih haksat a ka om ma in ka vakmang a, tun zaw na thu ka zuita hi” (Sam 119:67) Sam gelhtu’n a chi hi. Haksatna a Toupan a hon sap leh a hon it mahmah ziak ahi, I hoihna ding deihna ziak ahi a, diktatna tak sianthouna gah khiakna ding ahi (Heb.12:11). Absalom in Joab lou a halsak leh kintak in a kiang ah a hoh pah hi (II Sam.14:20-33).
V. Pathian in mi tengteng kisik a hotdam ding in sam hi: Pathian in mi tengteng kisik ding thu a peta hi (Nas.17:30). Pathian hoihna in kisikna a nang honpi ding in a om (Rom. 2:4). Toupan, “Hongpai unla, ngaihtuah khawm dih ve ni, na khelhnate uh san-au bang in om mahleh vuk bang in a om ding; sandup bang in om mahleh belam mul bang in a om ding” chi in hon sam hi (Isai 1:18). Toupan, “Gennop leh thumang a na om uleh, na gam thilhoihte uh na ne ding uh; ahih hang in na utkei ua na hel uleh, namsau nek khit in na om ding uh; Toupa kam in huai tuh a genta hi” (Isai 1:19-20).
VI. Pathian in mikhialte sam hi: Pathian sapna tang masapen tuh Adam ahi. Toupan a khelhna leh Pathian a kibuksanna apan in sam hi (Gen. 3:9). Jesu’n “Midiktatte sam ding a hong pai ka hikei a, mikhialte kisik ding a sam dia hong pai ka hi zaw” a chi hi. Laisiangthou Pathian in mikhialte a sapna bu ahi chileng i chi khial kei ding hi. Genesis a kipan Kilakna laibu tan ah Toupa’n mikhialte a sapna i mu hi. Pathian in nang leh kei, a kiang lam zuan ding in hon sam hi.
VII. Pathian in Nungtolhte a sam: Nungtolh kichite tuh piangthaksa himahleh Pathian a kipan vakmang, khovel deihdan leh salam deihdan bang a om mite ahi. Hichibang polam a alat khiakma in hun sawttak a lungtang a nungtolh khin hi. Nungtolhmi amah leh amah lampite ah dimsak in a om a na chi hi (Paunakte 14:14). Lota, Abraham apan tuam om in, Sodom lam ah a puanbuk a suan nai hi (Gen. 19:1-22). David in Uria zi, Bethseba toh takhial uhi (II Sam. 11:1-5. Cf. Sam 51:1-19). Jonah, Tarshis lam zuan in longsung nung ah ihmu hi (Jonah 1,2,3). Peter in Jesu thumvei kitheihmoh bawl a, anung in ngaman ding in kuan nawn hi (Mat.26:69- 75.& Jn.21:15-19 ).
VIII. Pathian in a nna sem ding mi sam hi. Pathian in mi thadah leh nasem peihloute a na sem din sam lou hi. A sap mite mi chitak, ginom, leh nasem a buai mahmah mite ahi bik deuh uhi. Gideon, in buh a vuaklai tak in sap ahi (Vai. 6:12). Mosi in belam a chinlai tak in Pathian sapna tuak hi. Simon, a unaupa Andrew-ten a lente uh adenlai un Toupan sam hi (Mk.1:16- 22). Jakob leh Johan ten a lente uh bawlpha a a omlai tak un Toupan sam hi (Mk. 1:19- 20). Mathai (Levi) siah piakna a nasem a omlai tak in sap in om hi (Mk. 2:13-14). Pathian in nasep a ginom, nasep a muanhuai leh thanuam mite sam hi.
IX. Pathian sapna ah haksatna/nuam, nutsiat ding om hi: Pathian sapna dawn ding Abram adin thil baih ahi kei hi. Abram hiai hun in kum 75 mi ahita, nu leh pa, Inkuan hoih tak ittu nei, insak inkhang toh ki-it tak a teng khawm ahi. Pathian in na inkuante, na tanaute leh na tenna gam nusia in gam ka hon etsak ding lam ah pai in chi hi. Pathian in a paina ding lam leng kichian tak in a gen kei hi. Hiai bang teng ban ah a paina lam ah haksatna tuak ding ahih dan gen in “nang hon hamsiatte ka hamsiat ding” (Gen. 12:3). chi hi. Pathian sapna a man leh a tenna gam, khua-le-tui, unau sanggam te tangtawn adia mangpha a khak a ngai hi. Hiai bang teng tuak ding himahleh Abram in Pathian thu mang in “Kanaan gam a teng ding in a pawtta” hi (Gen. 12:5). Vualzawlna tang ding leh vualzawlna hih theihna ding in eilam ah tanna/supna omlou in vualzawlna hih theih ahi kei hi.
Jesun “kuapeuh ka kiang a hong pai in, a pa, a nu, a zi, a tate, a unau a sanggamnu leh amah hinna nangawn a huat kei leh ka nungzui ahi theikei ding. Kuapeuh a Kross pua a hon zuilou ka nungzui ahi theikei ding” a chi (Lk. 14:26). Vualzawlna na ngahna dia nutsiat dingte bang bang ahia? “Huchi in noumau a leilam thildeihna omte that un, kingaihna, nitna, hukna, utna gilou, huaihamna; huaihamna milim biakna ahi. Huai thilte ziak in Pathian thangpaihna thumanglou tate tung ah a tung nak ahi” (Kol. 3:5-6).
X. Vualzawlna tang di’n honsam hi: Pathian in amah adia a hon sap chiang in a hon sapna mang din a hehpihna kiching a hon pia hi. Pathian sapna bang a nutsiat ding/pawtsan ding a pawtsan leh a vualzawlna piak Pathian thuchiam om hi. “Chi thupi mahmah in ka hon bawl ding, vual ka hon zawl ding, na min ka hih thupi ding” chih ahi. Hiaite ban ah- Nang vualzawlna na hi ding chih thuchiam ah thil 3 piak in om a- nang hon vualzawlte ka vualzawl ding, nang hon hamsiat peuhmah ka hamsiat ding, nang ah lei a namchih vualzawl in a om ding” chihte ahi (Gen.12:2-3). Hiai vualzawlna thuchiam teng teng Abram in leitung a a damsung in avek in mu kei mahleh, Pathian, athuchiam a zuaulou in, avek in athuchiam tangtung sak hi. Nang vualzawlna na hi ding chih leh Nang ah lei a namchih vualzawl in a om ding chih thuchiam thupi petmah ahi a, hiai thuchiam Abraham suan a piang, Jesu Khrist, khovel Hondampa ah tangtung hi. Pathian in namchih hondampa ding a na chiam, Abram chi suan, Jesu Khrist chih louh ngal ah Jentelte ading in lametna omkei hi. Paul in hichiin na chi hi “Huan Laisiangthou in, Pathian in ginna ziak in Jentelte siamtang sak ding in a kisa chih theikhol in, nang mah ah namte vualzawlsak in a om ding uh chi in, Abraham kiang ah Tanchinhoih a na genkholta hi.” (Gal. 3:8). Pathian in mi a sap chiang in, a poimoh sang ua tam vualzawlna a pia hi. Pathian in Abram, a gam, a Inkuan, a tanaute nusia a pawtsan leh “Kon vualzawl ding… kon vualzawl ding…”chi in thuchiam a na pia hi. Jesu nungjui dia thilteng nusia ngamte kiang Jesu’n “chihtaktak in k’on hilh ahi, kuapeuh keimah ziak leh Tanchinhoih ziak a inn, unaupate, unaunute, nu, pa, tate leh gamte paisan, tu damsung mahmah in, innte, unaupate, sanggamte, nute, tate, gamte alehza in, sawinate toh, hun hongtung ding a tangtawn hinna toh mulou ding mahmah omkei hi” chi hi (Mk. 10:29-30). Pathian sapna na dawn ziak a na taan tengteng Pathian in aleh tampi in hon din kik ding hi. Abram in Pathian thuchiam tengteng tangtunna muman lou in si mahleh, a thuchiam tangtawn ading ahi chih lamen in “Ginna in gamchiam ah mi gam a tam bang in a na tam nilouh a, thuchiam kikhat gouluahpih ding… Khopi suangphum nei, Pathian geel (architect) leh lam (build) a ngak nilouh hi.” (Heb.11:9-10). Hiai khovel tan kia adia lametna nei na hihleh Khristian diktak na hikei ding hi. Paul in “Tu damsung kia a Khrist tung a lametna i neih in zaw mi tengteng lak a mi hehpihhuai pen i hiding hi” (IKor.15:19) a na chi hi. Himahleh i Pathian Tangtawn Pathian ahih leh tu damsung a amah nungjuihna ziak a haksatna i tuahte thupina ngah ding toh tehpih tak in ka sim kei (II Kor. 4:17) Paul in a na chi hi.
XI. Vualzawlna hi din hon sam hi: “Nang vualzawlna hi in, Nang ah lei a namchih vualzawl in a om ding” chih Abram suan apiang Jesu Khrist ah tangtungta hi. Jesu Khrist jiak in khovel mangthang a di’n Abram vualzawlna thupitak ahong hita. Jesu Khrist ginna tungtawn in, eite Abraham tate, gouluah pih ding, Abraham toh vualzawl sak a om i hita uhi (Gal. 3:7,9). Hiai vualzawlna thuchiam Jesu Khrist ginna ziak a neitute, hiai vualzawlna ei tan a khawl lou a, midang khovel a namchihte dia vualzawlna hi din Toupa’n thupiak a hon pia hi. Huai thupiak gol tuh “Namchih apan nungzuite bawl un” (Mat. 28:19) chih ahi. Pathian hotdamna vualzawlna tang na hihleh, hotdamna ngah nailou mite dia vualzawlna luan khiakna dia mohpuakna nei na hi. Vualzawlna na tan, nang a tan a a khawl leh hih diklou na hi. Samaria kulh pawlam a om phak lite’n Suria Camp a nek senglouh ann, silh senglouh puan, sana dangka amau deihkhop asel khit un, hihkhial ahih dan uh hong kiphok in, “I hihdik het kei, Tuni Tanchin kipahhuai tunni ahi a, eite i daihdide ua, khovak i ngak uleh gawtna i tuak ding uh, huaiziak in, kisa ni, kumpipa inkawte i vahilh ding uh” chi uhi (2Kum.7:9). Huchi in a va hilh ua, Samaria khua adin hinna, vualzawlna ahi uhi.
Pathian in hon sam a, na dawng a, a vualzawlna bukim a hon peta hi. Himahleh vualzawlna nang mah kia a dia khawl khawm na hihleh hih khial na hi kha ding hi. Suria sepaihte taidalh saktu Pathian ahi. Phak lite thawm sepaih thupitak a theisak Pathian ahi. Toupan Samaria mite kial apan hun khia dia a vanzat ahi. Vualzawlna, hamphatna a ngahte uh amau ading kia a a piak ahi kei, Samaria mite adia Pathian lemgel ahi zaw hi. Phak lite mah bang a vualzawlna hi dia Pathian hon lemgel na hi thei hi. Pathian in salam vualzawlna a hon kepsakte a lalgam a midangte pilutna dia a hon kepsak ahi kha ding. Midangte dia a vualzawlna hi din Pathian in a hotdamna vualzawlna a hon peta. Abram bang in vualzawlna hi din nutsiat ngaite nusia in, Pathian sapna dawng in ginna in na kalsuan ngam hia? Kingaihtuah in.