(Ephesa 4:15-16) Thumasa: Diktatna a kilamthakna toh kisai kum 2 sung phial i genta ua, khenkhatte ading in zak chimtakhuai leng ahihtaak a ginhuai hi. Ahi alah gen-gen napi a huchi hehu a masawnna om phalou abang hi. Banghang hiding ahia? A theih hak mahmah hi. Tuin i kilamthak sawmna a i theih dia poimoh mahmah hi a ka geel bang zahhiam i en ding. Diktatna a kilamthakna i gen-gen lai in i kilamthakna a i vanzat dingte houh theichian lou, muchian lou pi a kilamthak ding a Slogan kia samsam i hi kha diam? chih bang i etkik poimoh hilou hiam chih in a om hi. RCC Building lam ding in sik, suang, cement leh piaunel lou in kilam theilou hi. Huai mah bang in eite’n leng i kilamthakna ding a i vanzat ding i zat khak keileh kilamthak zoulou ding i hi. I van zat ding tuh “Diktatna Jesu a om itna” a hih ding ahi. Jesu telloupi a kilamthak sawm sawm i hih khak leh poi mahmah ding ahi.

Thukhun lui i et leh akipatna leng mihingte kilamthak sawmna ah akipan a, kilamthak sawmna tampite lak ah 4 i en ding:

1. Genesis 3:6: Hiai ah Eden huan a Evi kilamthak sawmna i mu hi. Hiai kilamthak sawmna a thiltup a se het kei hi. Mit vakna nei ding, Pil ding, Pathian bang ding chihte a sia a om het kei hi. Himahleh a kilamtouhna vanzat uh Pathian in “Ne ken” a chih nekna a kilamthak a hihziak in Eden huan a pat hawlkhiak ban-ah asuan akhakte uh mikhial i himai hi. I kilamthak sawm dan Pathian chih louh dan ahihkhak ding pilvan kul mahmah hi. Abiik in saptuam i kilamthak sawm dante bang a pilvanhuai sem hi. Building leh property-te khawng pibawl lua a, mihingte mangngilh khak bang om thei ahi. Khovel khangtou zel a khosa i hihman un hiaite leng poimoh mahmah chih bel i thei a, hileleng hiai thilneih (neih-le-lam) sang in mihing a poimoh zaw hi. I thil neihte tuh Jesu a om itna toh i theih ahikei a, i mihinpihte bel huai itna a i ki-ittuah poimoh ahi.

2. Genesis Bung 11 i et nawn leh kilamthakna chikhat i mu hi. Hiai tuh Noa tate kilamthakna ahi. Noa tate’n tuichim a lauhuai dan theichian mahmah ua, hileleng Pathian thu kam khat tuichim tung nawnlou ding (Gen 9:11-13) chih chiamteh lou in, a thiltuahsate uh kia thei ua, tuichim tung nawn leleng abitna ding un insang lam uhi. Tulai mite leng Noa tate toh kibang sim i hi uhi. Pathian chih sang in ei apan suak ngaihdan bang i pibawl zaw sek uhi. Noa tate kilamthak sawmna leng a se hetkei, hileleng Pathian chihdan ahikei zel, i thiltup leh i year plan khawngte Toupa chihdan toh a kituah kei leh a poi ding hi.

3. I Samuel 8 i etleh Israel-te kilamthak sawmna i munawn hi. Huai hunlai in Israel gam kim-le-kiangten kumpi nei vek ua, Israelte bel Pathian a kumpi uh hi in Samuel makaihna nuai ah kivaihawm ua, hichi in hon ngaihtuah uhi. “I kim i kiang gamte uh kumpi nei a kivaihawm vek ua, en kumpi neilou hiai puteek Samuel chih ningniang deih khop khang” chidan uh ahi. Pathian a pitu uh ahihlam theilou in pitu hoih leh dinmun lunggulh uhi. Huai bang in eite’n leng, Salam leh khalam a i khosa i lamtouhna uah Pathian pan na’ng awnlou a, a pil asiam leh a standard chihte i hah etleh i lak a Pathian talou kha thei hi. Etsakna ding in i minam lak ua a hausa deuh, a laisiam deuh, a officer deuhte bang in a van neih/ i programmete khawng a hong pang ding in Upa gen louh hon bialtu Pastor-te sang a a milian lamte deih zawdeuh ching khawng i om zeuhzeuh hi. Hiaite zaw, khovel vaihawmna a Minister/ DC/SDOte hihdan i zuihna ahi maithei, Pathian mah pitu in Israelte’n nei hileuh kumpi chihte a kul kei hi. Pathian in Samuel zang a api amau adin a hun hi. Himahleh Kumpi a hon nei ua, mite a hong bat uleh Khalam a puk siatna uh a hong hi maimah hi. I kilamthakna uh khovel etdan a kinga hilou in Khrist a om itna a kinga a, hiai itna mah i kilamthakna vanzat in zang leng chi i hi.

4. 2 Samuel 15:1-6 sung i etnawn leh Absalom kilamthakna i mu leuleu hi. Vaihawmtu leh Kumpi hih a ut ziak a a kamsiam dan, lamka thuam khawng a a pa’ mite a na zawl dante i et leh tulai hun a politics hi in saptuam lam ah hitatleh hiai Absalom hihdan a hih kiching mahmah hi. Mite deih i hihtheihna ding kia en a, gen dingte bang genlou daidide, thudik leng genkhe khollou a mite lungkimna ding kia en, a mite deihsak lua hileng tuh hoih thousam ding, a mite deihsak leng hikhollou a i tunung ding gel a khosa i tam lua uh a bangta. Absalom leng a tunung ding gel in a hong gamta a, lohchinna chiang nei mahleh leng a kilamtouhna Pathian deihdan ahihlouh man in a khan sihloh hi (2 Samuel 18:15). I kilamthak sawm dan lungput kivel thak ni hang.

Thukhitna: I Laisiangthou tangtel ah “Itna a thutak gen a, bangkim a Amah lupen Khrist ngei a i khanlet zawk ding uh” ahi. “Amah akipan pumpi tengteng, kizopna chiteng sepziak a, lemtak a suktuah leh kizomkhawm a, hiang chih in sep ding dan bang tak a sep chiang in pumpi a khang a itna ah amah leh amah a kilamtou hi.” Tua ahihman in, unaute aw, salam, khalam a i kilamtouhna ding uah, kilamtouhna dik Jesu a om itna suangphum tung ah Jesu a om itna vante in kilamtou ni hang. Tuabang hi ding in Toupan hon vualzawl hen.