Ei ding in naupang a hong piang a, Tapa piak in i omta; vaihawmna a liangzang ah a tuang ding a; a min “Lamdang,” “Lemthei,” “Pathian Hat,” “Tangtawn Pa,” “Lemna Lal” a chi ding uhi (Isai 9:6).

Munchih a om Khrist sisan a tatsa Saptuamte, Lemna Kumpi Hong Piang i hondampa Jesu Khrist min in, Khristmas Chibai! Tukum Khristmas program bawl a hun manpha zang dia i kisakkholh lai in naungek hong piang ‘Lemna Kumpi’ ahihna phawk thak leng uthuai sa in “Lemna Kumpi Hong Piangta” chih thupi di’n ka hon tel hi.

Khovel in Lemna leh muanna a poimoh mahmah hi. Gam khat leh gam khat kal a lemna, Pawl khat leh pawl dang kikal a lemna, Nam leh nam kal a lemna, Invengte toh kal a lemna, Inkuan sung a kilemna, Saptuam sung a kilemna, mimal khat leh mimal khat kikal a lemna, eimah leh eimah kilemna chihte mi teng in i poimoh mahmah uhi. Lemna leh muanna a om louh chiang in khantouhna leh masawnna taktak om thei lou hi. Buaina leh haksatnate’n kiakniamna hon tun zaw uhi. Huaiziak in, lemna leh muanna a om theihna ding in kuapeuh in chiklaipeuh a panlak ding ahi. Aman tampi piak ngai zawmah ding hi. Laisiangthou in, Lemna zong unla, a delh in delh un, chi hi (Sam 34:14). Hiai zahtak a lemna leh muanna khovel in a poimoh lai in makai leh heutu khenkhatte’n mahni angmasialna leh hazatna ziak in lemna leh muanna susia uh a, hiamgamna leh mulkimna bei in huham tak in gamtang sek uhi. Thuneihna leh vaihawmna khiaklah ziak bang in leng Gam khenkhat ah lemna leh muanna suksiat dimdem in om hi.

Hichi bang khovel buaihuai a i omlai in gingtute’n ‘Lemna Kumpi’ nei i hihlam phawk thak in hiai Lemna Kumpipa’ vaihawmna nuai ah kitulut thei chiat leng uthuai i sa mahmah hi. Huchi a, i tenna leitung a, lemna leh muanna tunding a hong om a Pathian’ min tawisang semsem a hong om theihna ding in. Lemna Kumpi, i hondampa leh Toupa Jesu Khrist in, bangchi bang lemna hon puak hiam chih saulou in i ensuk ding-

1. Pathian leh mihing kal a lemna- Jesu Khrist in Pathian leh mihing kal ah lemna hon bawlsak hi. Khelhna ziak in mihingte Pathian apan khenkhiak i hi. Pathian toh i kizop nawn theihna ding in mihingte’n hihtheih bangmah kineilou hi. Huchihlai in, Pathian in a siamsa mihingte hon it ziak in a Tapa tang neihsun Jesu hiai leitung ah hon sawl hi (Jn.3:16). Khros tung a hong sihna leh thohnawnna tungtawn in Pathian leh mihingte kal ah lemna tunding in om hi. Hiai kilemna nasep manpha leh thupi hong sepkhiak ziak in Jesu tuh ‘Lemna Kumpi’ chih in om hi. Amah tuh ‘Lemna Kumpi’ hi taktak hi. Hiai bang kilemna nna sepkhiak ahihtheihna ding in Jesu’n aman hong pia hi; i) vanmun nusia a, ii) Pathian toh kikim a om thil khiaklah ding in simlou a, iii) mihing melpu in, iv) si ding khop in leng thumang a, v) Khros ah sihna hong thuak hi. Huaiziak in, Pathian in min laklak a min tungnungpen a peta. Lemna leh muanna tunding ahih theihna ding in aman tampi piak kul hi. Jesu’n aman hon piak khitsaktak man in Pathian toh mihingte kilem in i om thei uhi. A hamphat huai ngei e! Hatna, pilna, siamna, sum-le-pai, neih-le-lam, leh thuneihnate’n a lei theihlouh Pathian leh mihing kal a lemna Jesu Khrist tungtawn in i nei theita hi. Tuni’n Pathian toh kilem in i om hia? Lemna Kumpi i nei taktak hia? chihte kivel thak tuak mahmah hi. Lemna Kumpi neilou pi’n bangchi’n lemna leh muanna i tungding thei dia?

2. Eimah sunglam a lemna- Kilem louhna lak-a buaihuai mahmah khat tuh eimah leh eimah kilem lou, kithutuak lou, chih ahi. Bangchi dan a ei leh ei kithutuak lou thei ding? Thugentu minthang Joyce Meyer in, “mihingte lungsim tuh kidouna phualpi ahi,” chi hi. Huai ah hoihsak ding leh hoihsak louh ding bang, ut ding leh utlouh ding bang, deih ding leh deihlouh ding bang kisual gige uhi. Hun tamtak ah eimah leh eimah kithutuak loute i hi uh a, i hih louhna lamlam lunggulh leh deihtel dia kisa sekte i hi uhi. Duh-am kha naksek, huai-ham kha pahpah, kideihkhop kha pahpah, kisathei zomah, midangte bang musit khasekte i hi. Midangte sang-a phat loh zaw leh pahtak loh zaw ding a kikoih sekte i hi. Huchih louh kal a mahni kingaise pahpah, midangte tung-a vui man zel, hoihlou pumlum leh zatna bei kisa lua, enna leh hazatna kia toh kidimte i hi uhi. Lauhna leh thawmhauna kia toh ahoih lou teng kipekhop, ei a hoihna himhim mukhe zoulou sekte i hi. Hichi bang hinkhua tuh lemna leh muanna taksapna ahi. Mother Teresa in, “zawnna lak a huaise penpen tuh thawmhauna ahi,” chi hi. Setan in i kilawmna tengteng hon lak mangsak a, huaiziak a Pathian thupina tang zouloute i hi (Jn.10:10). Huchihlai in, Jesu Khrist in Khros ah i hoihna leh kilawmna tengteng hon pekiknawn a, Pathian toh kilem in hon bawlta hi (Rom. 3:23-24). Kei leh kei ka kimuh dan leh theih dan, leh lunggulh dan hinawn lou in Jesu Khrist ginna ziak a Pathian’ Ta ka hihna ah keimah leh keimah kilem in ka om theita hi. Pathian’ Ta hihna manphatna leh hamphatna hinpih in midang toh kitehkakna hinkhua ka nuse theita hi. Hiai tuh suahtakna thupi tak ahi a, eimah sunglam a lemna tundingna ahi. Jesu Khrist ziak in eimah leh eimah kilem in i om theita hi.

3. Midang toh kal a lemna- Midang toh kilem theihlouhna tuh thil poi mahmah ahi. Johan laikhak ah, “Mi’n Pathian ka it, chi’n, a unau ho ngalleh, amah tuh zuau thei ahi; a unau a muhsa bawn a it ke’n, Pathian a muh ngeilouhpi bangchi’n a it thei dia?” chi hi (1 Jn.4:20). Mi’n midangte a itna ah Pathian it ahih dan suklat in om sek hi. Huchimah bang in, Pathian toh kal a lemna diktak nei mite’n midang toh kal ah leng kilemna nei thei zel uhi. Khat leh khat i ki-it tuahna ah mite’n Khrist nungzui i hihna hon mu thei ding uhi (Jn.13:35).

Mihinpihte it thei hetlou, pawl dangte it thei hetlou, nam dangte it thei hetlou, invengte it thei hetlou, inkuanpihte it thei hetlou chih tuh Pathian it louh latsakna ahi. Huchimah bang in, mihinpihte toh kilem theilou, kuamah toh kilem theilou, gingtu hihpihte toh leng kilem theilou lai chih tuh Pathian toh kilem louhna gah ahi. Jesu Khrist neite ading in bel, Amah i Kumpipa ziak in, i melmate nangawn it theihna a om hi (Mat. 5:44). Hiai itna Pathian apan ahihman in midangte toh kilem in i om thei hi (1 Kor.13:4-7). Kuahiam kilempih louh i nei zenzen hia? Kuahiam ngaihdam theihlouh leh ngaihdam utlouh i nei hia? Huchibang i neih a om intuh ‘Lemna Kumpi’ i poimoh mahmah chihna ahi. Ephesate 4:32 ah, “Pathian in Khrist a nou a hon ngaihdam bang in, noumau leng kingaidam tuahchiat un,” chi hi. Lemna Kumpi, i hondampa Jesu Khrist kiang i zuan ding uh.
Tuni a i gen “Lemna” (peace) thumal ahihleh Hebru pau shalom apan kilasawn ahi a, huai tuh bukimna (completeness), bitna (security), kituahna (harmony) chihte genna ahi. Mihing’ hoihna tungtawn a hong piang ding hilou in Pathian apan ngah ding ahi zaw hi. Pathian thawnpiak ahihziak in (Isa.45:7; Lev.26:6; Jn.14:27). Huaiziak in, ‘Lemna’ tuh Pathian vualzawlna leh ompihna kilatna ahi. Migilou ading in bel lemna a om kei hi (Isa. 48:22). Thukhun Thak a Greek thumal eirene kichi shalom toh kibang a zat ahi a, huai tuh tawldamna genna ahi. Jesu Khrist, eite’ ‘Lemna Kumpi’ ahi a, Amah ah bukimna, bitna, kituahna, leh tawldamna a om hi. Tu’n kumtawp ah kum khat sung anuam leh haksa pal galkai ding in i kisa chiat uh a, tamtakte’ adi’n haksatna kum, lohsapna kum, zahlakna kum, vuallelhna kum, lamet beina kum, lungkham mahmahna kum, dam theihlouh kum leh tawl dimdem kum ahi kha ding. Huchih lai in leng Pathian in A’mah apan lemna leh muanna toh kum kai ding in hon deih hi. Amah kiang i zuan ding uh, Amen.