LUNGSIM LEH NGAIHTUAHNA A THUPIPEN KHRIST HISAK DING
(Dan. 1:8; Matt. 5:8; 12:33-37; Sam 51:6, 7)

Thumapi: I Saptuam in “Diktatna a Kilamthakna” chih poimohsa in thupi in kum nih hial i na paipihta a, gah leng gahsuah hi a i theihman in, kipahhuai ka sa hi. Kum dang in i Saptuam in “Amen, hongpaita in Toupa Jesu” chih thupi in i zang ngeita hi. Huai lai in Toupa Jesu hong pai bang hileh, a ngaklah a a samsamte kiman loupi na hiphing ding i hi ve ka chi sim hi. Tua bang deuh in, Diktatna i gengen lai in hiai chiang ah i dinglai ua, gennawn louh hun hong tung leh bang dinmun ah i ding diam chih dotna lianpi lungsim ah hong om sek hi. Ngaihtuahna a om dia deihhuai khat ahihleh, Diktatna a kigen chiang in gingtu Khristiante’ diktat zohlouh dan leh ginglou (Khristian hilou) te’ diktat zawk dan gen ding om tuaktuak hi. Pathian mitmuh leh vaihawmna mai a diktatna thamani i ngah ma inleng mihinpihte toh kal ah lungsim leh ngaihtuahna, thilhih nasep pansan mah in taksa lam diktatna lunggulh a nei a, tuntheihna chiang nei i hihna limsaklou i bang uhi. Thudang in gen leng diktatna lam nih a pai ahi i chi thei hi, huai tuh: (i) Mihing leh Pathian’ kikal, leh (ii) Mihing leh mihing’ kikal.
Hiai nihte tuntheihna chiangchiang sepkhiak ding ahi. Kuapeuh thilhoih hih ding thei napi a hihtuanlou tuh amah ading in khelhna ahi. –Jakob 4:17.

I. Lungsim leh Ngaihtuahna sung a Saptuam mite lak a Khelhna omte:

1. Leitung thilte ngaihsanna – Mihinpihte a ding laksak a, muhtheihna lam chiteng a kaihkhawm hauhsakna, neih-le-lam, gou-le-gam, sepna (Govt. kaam, Innmun plot, etc) kia lunggulh a nei a, Pathian nutsiatna (Materialism).

2. Pil huntawk kisa a, mahni thuneihna leh thahatna (power) toh hon siamtu Pathian nuainung zaw bang a ngai a, mihinpihte tung a thutanna/thutawp pethei dan a kikoih gigena (Rationalism).

3. Nambing leh namtom lungput, inkuan leh beh, tanau leh kou khosuak mite chi-a kigen tuam gige sawm a kihui tuam pibawl gigena (Sectarianism).

4. Deihsaktuam leh angvanna, kihuaituam luatna lungput hiden, eilam a pang ahikei uh kichihtuam nilouhna, lungsim leh ngaihtuahna langpang gige (Favoritism/Nepotism).

5. Hon siamtu Pathian omlou bang a koih a, utleh dah a om a, mahni theih dandan leh ngaihsangte kia pansan a deihtelna zalen takmai a zangte (Existentialism).

6. Thilhoih bawl ding a panlakna taisan a nek-le-dawn a noptalna leh zu-le-sa leh khamtheih-guihtheih teng guktakna toh sa-utna leh a nuam lam kia hoihsa a, a haksa deuh liai thilsia dan a ngaihna (epicureanism).

7. Sadan a mihinpih kuate hiam guptuam luat leh paihtuam luat neih gigena khelhna ahi (Biasm).

8. Numei/pasal ut dandan a kithuahna – Jeremia in “Ka mite’ tanu gitlouhna gawtna, Sodom’ khelhna gawtna sang in a thupi zaw” a chih phukha thei i hita uh. – Kah. 4:6.

II. Mihing’ lungsim, ngaihtuahna leh gamtatna a thuneipen hiding in:

1. Danial in a lungtang in a tum tinten: Danial Laibu in Pathian lungtang pen bangkim tung a thunei ahi chih a taklang hi. Danial mahleng saltang in om mahleh – melhoih, kizen, kumpipa nasem ding a chinna nei ahi, himahleh deihteltheihna lungsim leh ngaihtuahna a neihte a huntak in a zangdik ngal hi (v.5 – Kumpipa’ ann leh dawn uain akipan kum 3 vakthau a om ding).

Danial in Kumpipa’ ann hiam, a dawn uain hiam a kihihnitlouh a tum tinten hi. Aziak tuh, Danial ngaih in, sahkhua thusamte (rites) a suknit a om ahi chi’n ngai hi. Idol worship bang in a ngai (Exo 34:15); v.12 – Na sikhate ni 10 sung enkhia in, huaichiang in na ma ah ka mel uleh Kumpipa’ ann nete tuailaite mel…?

Dan. 1:12, 13 – Na sikhate ni sawm sung enkhia in, k’on ngen hi, nek ding in anteh louhing leh dawn ding tui hon pia uhen, huaiching in na ma ah ka mel uleh amau Kumpipa’ anne tuailaite’ mel et hi hen.

Danial leh a lawmte’ thiltuah – hamphatna dinmun ah tulai gingtute lungsim leh ngaihtuahna chiimtak zang in Khrist thuneipen di’n Kumpi hihna i-awn ngam taktak diam? Amaute hamphatna tan dinmun itunma nangawn a pukse zelte kihi a maw…! Solkal a hamphatna khatpeuh ngahna ding ahih nakleh Pastor, Upa, gingtu hihna nuse geihgeih zel i hi kha di ee…! Hiai bang hun leh mun khawng ah Khrist kumpipa’n mimal’ lungsim leh ngaihtuahna a thuzoh ding kul hi.

Dan. 6:5, Daria solkal milian te’n Danial demna ding bangmah a mukei uhi. Nang demna bangzah na ngahta a?

2. Goubawm hoih akipan thilhoih (Matt. 12:33): Jesu’n thilhoih leh thilsia a tehkakna thu ah sing hoih in gah hoih a suang a, sing sia in gahsia a suang a chih in a gennop tak tuh Deihteelna ahi. Mihing’ lungsim leh ngaihtuahna ah deihteltheihna thupukna a om chiat hi. Mihing lungsim leh ngaihtuahna ah Jesu Khrist a thupipen, thuneipen ahih ding ahi. Mark 7:20-23 – Mihing’ lungsim a kipan hong pawt mihing hihniin nakte chi 12 i mu thei hi.
Isai 59:2 – Na thulimlouhnate uh noumau leh na Pathian kal ua kia in hon khen, na khelhnate un a mai a liahsak. Hiai lungsim leh ngaihtuahna goubawm sung a gah chi tuamtuam omte Khrist thuneihna sung a gah kilawm leh manpha ahih ding ahi. Matt. 9:4 – Jesu’n a ngaihtuahte uh a thei a, “bang dia na lungtang ua gilou ngaihtuah na hi ua?”, a chi hi.

3. Lungsim a sianthouna (I Peter 1:15, 16): Nou hon sampa a sianthou bang in na omdan uah siangthou un. Lungsim a sianthouna Pathian toh kimuhna ahi. Mi’n lungtang in a gingta ua, diktatna a mu nak uh; kam in a gum ua, hotdamna leng a mu nak uhi (Rom 10:10).

Jesu Khrist gingta-te bel Kha Siangthou in Khrist pumpi kahiang hiding in Khrist sung ah hon baptist lut a, tua in Khrist hihna khempeuh eite’ hihna hong suakkiksak nawn hi. A sihna a sikhawm a, kivuina a thohkikna-a thoukikkhawm, hinkhaw thak a hing a, dinmun kikhekna hongsuak hita i hi (Rom 6:5-9).

4. Kisik tuntunna/Kha khasia (Sam 51:6): Ngai in, sunggil lam apan takna na deih ngal a. Toupa’n lungtang khasia-te a naih zel a, lungsim a kisik peuhmahte a hondam zel hi (Sam 34:18). Hiai bang lungsim leh ngaihtuahna a poimoh petmah hi. A khente’n, kisik tuntun dan a kingai in khelhna poisa chi in poisak tan ah om thei uhi; poisak ban ah tawpsanna a omlai hi. Khelhna kiphawk na pi a khial teitei chih mahmah leng buaihuai hi. A khente’n khelhna poisa a kap zawzen, lah hih zomzel. Khelh tawpsanna kichi kisikna diktak ahi. Khelh tawpsanna tuh kithoihna ching ahi.

Thukhupna: Deihtakte aw, gilou mi omdan ching kenla, ahoih ching zaw in, thilhoih hihmi tuh Pathian a pan ahi; thil gilou hihmi’n Pathian amu ngeikei (3John 11). Khrist toh kinaih lou a, Amah heutu a bawllou hial a, lapawl zil, Saptuam adia pang, nam it, a gam adia pang, diktatlouhna gahkhe zel i hihkhak ding lauhuai hi.

Thilhoih hih ding a Khrist Jesu a siam a om, Amah khutsuak i hi uh. Huai thilhoih hih i khosak dan ding in Pathian in a bawl khol ahi (Eph. 2:10). Pathian thu zuih neilou in piangthak kichi a om thei kei; Pathian itna tuh a thupiak i zuihna ahi (I John. 5:3). Rome 10:3, 4 Pathian’ diktatna theilou in amau diktatna lamkhiak a tum ua, Pathian’ diktatna ah a kipelut kei uh. Khrist bel a gingta peuhmahte adi’n diktatna a muh theihna ding ua Dan tawpna ahi. 2Peter 2:21, 22 Diktatna lampi pen theih nung a, thupiak siangthou a kiang ua kepsak nungngatsan sang in, diktatna lampi theilou hile uh amau ading in a hoih zaw ding hi. Ui amah luak ah a kiknawn a, vokpi kisil siangsa leng buannawi ah kisil ding in a kiknawn chih paunak diktak amau tung ah a tungta hi. 