I Saptuam in thupi ding in, “Diktatna a Kilamthakna” chi in a bawl a, i gen zel a, a mipi lam ah kilamdanna muh ding a tawm in, khelhna leh gitlouhna in punlam a manoh hiaihiai a bang maimah hi. Huai ziak in i phawk thak dia hoih sa in “mihing lam a i sualnate” chih thulu a zang in article khat ka hon gelh hi.

1. HINNA SUAL: Sia leh pha nangawn i theih ma in khelhna leh hihkhelh i neihma in Pathian in mikhial in hon na puang khinta hi (Rom 3:10&23). Gul pen a tui sung a gul chi a kipan in gul ahi khinta hi. Theihai leng a kung om kei mahleh a gah kia leng theihai ahikhin veve hi. Huai bang in mihing hinna leng sual a na hikhin sa ahi.

2. LUNGSIM SUAL: Hinna sual in lungsim sual a tuun khawm a tua lungsim bel suallom ahi hi. Mihing a sual bulpi pen lungsim ahi (Mk. 7:21, Jer. 17:9). Huai ziak in mihing hu, kha, lungsim leh pumpi nangawn lungsim thunuai a om ahi. Pathian sang a mihing hon neitu pen sual ahi hi.

3. THILHIH SUAL (Diut. 30:19; Jos. 12:48): I sualna kilatkhiakna pen thilhih ah ahi hi. Evi leh Adam leng a thilhih leh deihtelna (free-will) un a sualna uh pulak ahi. Lungsim a ngaihtuahna sual a hong kipan khia in, tualthahna, guktakna, kingaihna, kidouna leh adangdang hoihloute hong pawt ahi uhi. Tua mah hihsual i chih ahi uhi.

4. HIHLOUH SUAL: Thilhih sualna lam a i dim nung in, hih ding hihlouhna ah i sual nawn a, hiai hih ding hihlouh sual in lungsim lam a i hihlouhte a huam vek hi. Hihlouh sual mohpawtu leng i lungsim a deihtelna akipan ahi uhi. Gul pen koipeuh ah om lehleng gul ahi veve bang in, Khasiangthou tenchilh, thuneih khumlouh mihing pen sa deihna apan in hihsual leh hiding hihlouh sual in hon kan veve hi (Jn. 5:29; Eph. 2:10). Thilhoih hih ding theih a hih tuanlou tuh sual ahi (Jak. 4:17).

5. DIKTATNA SUAL (Rom. 10: 2-3; 8:4): Diktatna dik, Khrist diktatna lak apan i sihkhit tak ziak in, mihing apan diktatna om tengteng sual dongkholh, Khrist liahtu a hong suak zel hi (1Kor. 1:30). I hinna in Khrist suan pen a a neihna ding in Pathian in ei diktatna hihlum in a tapa Jesu Khrist hon pia ahi zaw hi.

6. HOIHNA SUAL: Mihing a zoh haksa penpen, “Hoihna sual” ahi. Khristian piangthak sa kichi lak ah leng 99% ten lungsim suallam kahiang kia a dou ua, hoihlam kahiang pen dou naksang in Jesu nungzuihna ding in i zang uhi. Hoihna sual i chih lel in leng i lainat a, i hehpih un pammaih i sa sek uhi. Jesu tellou a hon dou teitu pen leng hoihna sual mah ahi a, hong lungkim saktu pen leng ahi hi (Lk. 5:31). China-te’n Doctor hon kiphamoh sak bang in, i sualnate’n Pathian hon naih sak a, i hoihnaten Pathian phawkna leh naihna hon dal uhi. Phawk sang in Pathian tellou a hon lungkim sak, khamuang saktute a na hi uhi.
I itna, i nunnemna, i doh theihna, i kingaihniamna leh migentheite tung a i hoihnate melmapan Jesu lim hon chiin sakna hinuam mahmah hi. Vaite, pathian gingloute nasan in migitna ganhing leh thilsiamte tung ah gingtu kichite sang in hau zaw uh i chi thei ding. Ahihhang in tuabang hoihnate ah Pathian i tung a lungkim hilou in, A tapa hon piak i ginna ziak zaw in i tung a Pathian lungkim ahi hi.

I hoihna i chih “Toupa huhna ziak ahi” kam a i chih kun kun lai in leng i hoihna liah ah dawimangpa’n bu sep in, duhamna, huaihamna, kidiksakna, ching kisaknate a na opsak zengzung lai hi. I hoihna liah ah sual in busep in, nou tampipi a na nei zel hi. Huai ziak in hoihnate nasan doungai a hong suak zel hi.
Huai ziak in hiai a tung a thulu neu guk tak i gente apan in khalam a halhna, hatna thak, Toupa a suak i neih theihna ding in ka lungmuanna koi akipan hiam, ka hoihna koi a kipan hiam, ka diktatna koi a hong kipan hiam chih zong in, i suan ding tak i suan theihna ding in kivelpha leng chih i thudeih ahi. Job 4:5 tua bangzah a mi ginom leh hoih, Pathian nangawn in “Ka mi ginom” a na chih hial in leng Amah a hong kitheihtel chiang in Pathian in a phut bang in, “Bil zakna in ka hon zata a, himahleh tuin ka mit in kon muta a; huaiziak in ka kikih a, leivui leh meivu ah ka kisik hi” a chi hi. Huchi bang in Pathian ma ah kisik a thupha tawina ding i na nei lai kha ding, kingaihtuah ni. Toupa’n hon vualzawl hen. 