Ahun ngaihtuah in zaw heutu hikhinta hial le uchin kilawm hiven, Pathian thubulte hilh kiphamoh nawn neive ua, ann gum hilou nawitui kiphamoh n’ong hita uhi. Nawitui ne peuhmah in diktatna thu ah theihna a neikei ua, naungek ahih ziak un. Ann gum piching ading ahi, huaite’n a zat gige ziak un sialehpha theichian ding in a theihtheihnate uh a sin zongsangta uhi. Hebrute 5:12-14.

Thupatna: I gam in Thutakna leh Diktatna in taksap luat ziak in saptuam in kumpuan thupi ding in “Diktatna a Kilamthakna” chih kumnih vingveng thupi in i neihloh hial ua, saptuam khangthu ading in thupi kibang a kum kizom a i neih masakna uh ahilai hi. Tuailaite lak mahmah ah leng Diktatna toh kibulphuh thakna leh kilamtouhna poimohsakna a om man in tualam toh kisai mah thupi ding a nei in kihanthawnna lam chituamtuam ah i na neita uhi. Ahi a, i kidot kikkik ding ua poimoh i sak ahih leh banghang a i gam a diktatna thu hichi hah gen ngai ahia, bang ding a diktatna thu gen leh zuih haksa sa i hia? chih ahi. Diktatna leh sianthouthouna i chih tusawngteng a ading a hong poimoh diak hilou in, Khristian te ading a hunteng a i poimoh leh i taksap uh ahi. Huai ziak in Laisiangthou in, “Diktatna lunggulh a gilkial a dangtakte a hampha uh, tai ding ahi ngal ua,” a na chi hi (Mat. 5:6).
 
Saptuam, khotang leh Minam vai ah i ki-et chiang in tulel a om khang in DIKTATLOUHNA ziak a om KINEKSIATNA gah setak i at lellel uh hi’n a muhtheih hi. Thuneihna a kineksiatna i tuak ua, Sum leh pai a kineksiatna leh nasepna a ginomlouhna a uang mahmah hi. Misiamte suidan in i gam a i kineksiat dan uh ahihleh SYSTEMATIC CORRUPTION (a pilpi a kineksiatna) ahi chih ahi. Tua ahihman in, ut in ut kei leng michih koihiam a ki-awk kha chiat hi. Kineksiatna in i gam leh khotang ah zung thukpi (deep rooted) a na khak khit tak man in, kineksiatna a kiguizopna a na sau mahmah ta hi. Huai ziak in saptuam ten Laisiangthou pansan a hiai kineksiatna zungpi bulkalh a, thutak leh diktatna toh kineksiatna guipi i sattan a Diktatna a i kilamthak uh a na poimoh mah ahi. Tuading lunggulhna hangmah a DIKTATNA THU thupi a nei i hi uh chih ka pomdan ahi. Adiak in, Khristian tuailaite hiai thutak a i kibulphuh thak a i kilamthak kei leh saptuam, khotang leh i minam maban ding uh ngaihngam huai lou ahi. I gam ah bang lam peuh a diktatna i tasam uhi. Khotang vai ah, gamsung vai ah, siamsinna leh nektak zonna ah leh saptuam i kimakaihna tanpha ah diktatna a kilamthak a kul vek hi. Huai ziak in Diktatna mah delh pipen in nei ni.

1. Thutak leh Diktatna Dinpih Ngam ni: Jawlnei Nathan in thutak a dinpih ngam man in Kumpi David hinkhua kisegawp ding lai bawldik thak in a om hi. Tuahun lai in sihding a lauh man un kuaman kumpite’ khelhna pulak in genngam kei uhi. Himahleh, kumpi David in Uriah zi Bethseba khelhpih a pasal Uriah a thahna thu ah, zawlnei Nathan in hangsantak in sihding laulou in thutak dinpih in David khelhna a va pulak hi. David a khelhna kiphawk a kisik in Pathian kiang ah thuphatawina nei in a hinkhua a bawlphathak thei hi. David tapa Solomon hunlai in gamsung ah Siampu tampi om napi in, Nathan bang a thutak dinpih ngamding a omkei hi. Solomon in Pathian thu sang in a zite thu a zui in milim biakna ah a puklut pih hi. Solomon khelhna leh diklouhna mu gige, thei gegu napi in kuaman a pulak ngam kei ua, Pathian hehna kuangzak in Israel gam akitamkham sak hi.

Saptuam pichinna leh khantouhna i kitehna ding diktak tuh sum leh pai hiam budget hiam himasa lou in Diktatna leh Siangthouna (Khamitna) lam ah ahihding ahi (Heb.5:12-14). Khristian tampiten thudik dinpih ngam lou in, kim leh kiang a thil paidan i zui khanak uhi. Pathian nasem leh thaunilhna tangte nangawn in pulpit tung nasan ah thudik gen sang a heutute maipha muhna ding, mihaute kipahna ding, mipite lungkimna ding thute lel khong gen i hihkhak ding lauhuai mahmah hi. Mi i nuihsak a i kipahsak zohpeuh leh genfuh kisa maimah, mipite’n leng thugentu in a thutak lamsang a chiamnuih lam a gentam phot leh pakta zaw, thu gen siam chidan a chiamteh i hihkhak ding uh lauhuai hi. A thutak pen sang a kimaitang phatna khong lel lunggulh i hihkhak leh kingaihtuah ni. Hiaite khong ziak ahi diam saptuam sung nangawn-a kipuahphatna, kilamthakna muh ding a om theih louh. Saptuam in zuatatna leh kineksiatna pen a hiding mah dan in kikoih tamai hileh kilawm abang hi. Bangmah a phatuam ding om kei chia diktatna thu i gen peih nawnlouh khak ding uh lauhuai ka sa hi. Saptuam masate sung ah leng kineksiatna leh zuautatna toh kisai Pathian in a mawk koih kei chih Anania leh Sapphira-te nupa a bawldan apan in i mu thei uhi. Kineksiatna leh diktatlouhna thu i gen chiang in midangte mohsa leh dem a amaute tung a thukhen (judge) hilou in diklouhna om pen kihilh i hi zaw uhi (2 Tim. 3:16). I gam in zawlnei Nathan tampi i poimoh uhi. Huai ziak in tuailaite Thutak leh Diktatna a kilamtou a diklou te diklou chi a, mahni mimal leng kikem siangthou a thutak lampi i zuih ngeingei ding uh ahi.

2. Diktatna mah toh siamna leh sepna zong ni: Bangchiklai hiam a kipan in i gam a mi tang a exam sak, certificate lei thoh leh bawl tawm zang a sepaih kikhum leh sepna kizonsak, kileisak chihte i na ching ngei uhi (tutan a hiai dan ching i om diam chih bel thei khang). Huai kia leng hilou in certificate bawltawm zang a Laisiangthou sin bang leng omphial ding a gintak huai ahi. Tuate khong ziak mah in i gam ah tuailaite lak ah siamsinna lam ah kiakniamna ahong uang mahmah hi in i thei uhi. Laisim sang a sum neih poimoh sak zawkna leh degree neih sang a mi neih poimoh zaw sakna ahong lian hiaihiai a, tunitan in i siamna a lohkhiak hilou kuatehiam kam/sepna piaksa khong sem a kikhamisak mahmah bang leng i om ding un a gintak huai hi. Sepna mun a omlou, sepna bang nih leh thum nei zawmah, semlou a loh la in saptuam ading bang a phatuam ngai zawzen. Mi kuahiam khat sum tamlou chik khawng pia a guai in eitang a semsak, na hoih sem leh mi panpihna dan bang a ngai in kisaktheihpih zawmah, sawlloute sang in ka hih hoih zaw chi nuam zawmah lai. Unaute, mihing maipha hia i zon Pathian kipahna!

Hichibang dinmun a sialepha theihna kise dimdem khang a i om man in Tuailaite’n Pathian mel i zon thak ua, Laisiangthou toh kituak a Thutak leh Diktatna a i kilamthak uh poimoh ahi. I nu leh paten bawi aw, na kam ding leini a hon chih khak zenzen uleh leng “Pa, Nu ka kam ding leilou ding, Pathian hon piak pilna leh siamna toh ka hon zong ding a, ka muh zoh het kei leh khut leh khe hon pia Pathian in khut nasep in kong vak na ding” chingam ding in kipanthak ni. Mi gam a saltanna mun uah Daniel, Sadrak, Messak leh Abednego ten Pathian a masapen a a koih ziak un Pathian in pilna leh siamna pia in a gamsung ki-ukna ah dinmun sangtaktak nei in a om uhi.

3. Diktatna mah toh hauhsak leh nopsak sawm ni: Unau kuate hiam in “Hau nuam selua siphot” a chihdan un hauhsakna sum leh pai deihna a letluat ziak in diktat leh thutak a hin haksa i sa uhi. Mi masa i pu leh pate uh sum leh pai zonna ah chitaktak in na anasem ua, luvun kolh zen in palbawm pua in a tha mahmah uh toh a na loh khia uhi. Hauhsak khelhna a hikei a, himahleh hauhsak i sawm dan khelhna hi nuam mahmah ahi. Midangte hauhna in khang tampi adaih lai in ei hauhna in khang khat leng daihlou ahih khak ding lauhuai hi. Paunakte 15:6 na in, “Mi diktat in ah gou tampi a om: himahleh mi gilou summuhna buaina ahi” a chi hi. Sum muhna ding ahih nak leh poisak chih om lou, akilawm kilawmlou chih leng khual selou, zu leh khamtheih zuak a kilamtou, thilkham tuamtuam zang a khosakna bawlsawm, nekguk poisalou, paulam tuamtuam bawl a kidik sak vek zel. A kilawmsakna dan a i gari-te, i innte khawng a Pathian thu hoih taktak kisuanlahna tel hetlou a takkhe lihliah. Koi pawl hiam khat a panna i neih leh i zi leh tate leh i innkuanpihte’n sepna muh loh, hauhsakloh maimah chihte i Khristian khangthu ua mite hon chiamtehna hita. Sum kong a i dinkhak nak leh mutpuak bang a puak khe pah leiloi mai, zumna dan leng theilou zawmah, kisathei zawmah laite i hi uhi. Heutupa Rev. Dr. Khaizakham in “Sum leh pai lamtam sang in sakmin hoih mahpha zaw e chih la hoih i sa mahmah ua himahleh sum kong a i hong dinkhak chiang in kuaman i sa nuam nawn kei uh” a chih dik mahmah le kilawm hi. Jer. 17:11 na in, “Mi, kilawmlou a hong hausa bel vengkeng, amah tui loupi keuhsak dia opkhum bang ahi, a dam laiin amah a tuamsan ding ua, atawptawp in mi hai a honghi maimah ding” a na chi hi.

Unaute hauhsakna tengteng vualzawlna hipah lou a zawnna tengteng leng hamsia hikhin lou ahi. Paul in Jesu Khrist a neih ziak in zawndan leh hauhdan ka siam a na chithei hi. Pathian tellou a hauhna in siatna atun hi chih thei kawm in Diktatna mah toh kilamtou chiat ding in Laisiangthou ah kiknawn ni. Diktatna toh tawmchik a hoihzaw diklouhna toh summuhna thupi sang in (Pau. 16:8). Punna a duhgawl in amah inn a hihbuai a: himahleh kuapeuh thilpiak hua a hing ding (Pau. 15:27). Toupa vualzawlna in, hauhsakna a bawl a, huan huai ah lungkhamna a behlap kei hi (Pau. 10:22) chihte ngaihsun kawm in Thutak leh Diktatna ah kilamtou chiat ni.

4. Diktatna mah toh thuneihna zong in vaihawm ni: I gam a i siat dimdemna leh i khanmawk bawk khat uh tuh thuneihna zatkhelhna (power abuse) ahi. A hat-hat dik chih gintakna khovel a i omkhak man un, thuneihna kituh in i buai gawpta ua, diktak a hih chih sang in thuneihna let theihna ding ahih nakleh dikloutak a hih leng poisaklouhna gam i suak uhi. Thuneihna i zatkhelh khak man un Dikna sum a leitheihna gam i suah ua, sum zang a thuneihna i tawisang luatman in dik a vaihawmna a omthei kei hi. Heutu tuh Pathian seh ahi a, heutute thu man ding ahi chih i kisinsak dan uh ahi. Hiai thu a dik mahmah laiin heututen Pathian seh a ka om bang in mipite ading in bang ka sem a chih i ngaihtuah ding ua hoih ahi. Heutu Pathian seh mi in a mipite nek ding tang teng ne in, khantouhna ding toh kisai a nasep om tengteng a ma sakhau ah a guang vek thei diam? I vaihawmna ah Pathian a tellou louh luat man in Pathian thangpaihna i tuak lellel uhi. Amos 5:11- 12 “Nouten mizawngte zohthawhna toh sikden uchin a, amaute apan phutluih a buhhumte ne hi uteh. Suangpek hoih pipi in innte lamkhin mahle uchin, asung a tenglou ding hi uteh. Mi diktatte gimsak uchin a, golhguknate ne uchin a, kawngpi a mizawngte ading a dik a vaihawmna kaikawi hi ve uchin.” Martin Luther in, “Zuauthu toh vualzoh sang in diktatna toh vuallelh a manpha zaw” a na chi a, Bob Jones in, “Zuauthu toh milianpi khat ka suah sang in, diktatna toh bangmah lou hih ka ut zaw” a na chi hi.

Laisiangthou in “Midiktatte a let chiang ua, mite kipak mahmah a, migiloute’n vai a hawm chiang a bel mite thum a mau hi” (Pau. 29:2) a na chi hi. Huai ziak in khangthak Khristian Tuailaite’n Pathian phawk leh laukawm a diktatna toh thuneihna leh vaihawmna i gam a i tunding thak uh poimoh ahi. Laisiangthou in, Vaihawmna bel tuite bang in leh diktatna luilian bang in luang hen; Diktatna in nam a pahtawi a, khelhna in bel nam khatpeuh daisak hi. (Amos 5:24; Pau 14:34) a na chi hi.

5. Innsung chiat a thutakna leh diktatna chi tuh thak ni: I gamsung leh khotang siatna hong kipatna taktak innsung ahi. I gam Khristian hinkhua i velvel chiang in innsung a Khristianna (Christian Values) a omlouh luat man ahi chileng genkhial din i kigingta kei hi. I Khristianna uh inkuan a Khristianna (Family focus Christian) sang a biakinn a Khristianna (Church-focus Christian) pen i na pibawlluat khak ziak uh ahidiam ahon chisak hi. Kikhop louh ding chi i hikei a, himahleh biakinn tan a gingtu hoihtak hi a, innsung a gingtu hihna muh ding omlou ahihkhak ding lauhuai sa i hi. Atangpi in kuapeuh biakinn tan a i hoih un i kizen chiat ua, innsung a hong hih chiang in bel i taise sim chiat uhi. Tuailaite leng Biak inn a Lapawl saktan a i hoih ua, himahleh innkuan biakna ahih chiang in i lunglut zou kei khanak uhi. Huai ziak in innsung a chi diktak tuh a i ta leh naute leh tuailaite Pathian deihna bang a i pi a i sinsak uh kisam mahmah hi. Tulel a i dinmun uh ahihleh tuma kum 20/30 paisa a innsung a i chi tuh toh kisai a gahlou i hilel uhi. Huai ziak in, tuni a i chituh mah tunung chiang a at ding eite mah i hi uhi. Eikhang a i at louh tawp in i tu leh tate’n hon at thouthou ding uh ahihman in chi hoih leh chi diktak, ki-itna, kingaihniamna, kithumanna, kizahtaktuahna leh diktatna leh thutakna chite tuh tam ni (Gal.6:7; Sam 37:25).

Thukhitna: Nidang leh hundang a leng i na awlmoh leh vei gige i gamsung ah kikhekna hoih a om ding chih ahi. Tuabang a hoih lam a kikhekna a om theihna ding a khitui tampi toh thumna i na neih lai in Pathian in tukhang a om Tuailaite, kikhekna ding in hunlem a hon bawl sak zenzen a i kipak mahmah hi. TUHUN KAN A I GAMSUNG A DIKTATNA LUNGGULHNA ZIAK A DANGTAKNA LEH KHANLOHNA THUPI ZAW A OM NAI KEI HI. Himahleh a lauhuai mahmah khat om bel bang hiam i chih leh, Pathian in kikhekna hon patsak nung a kikhek nuam lou a i om leh mangthang ngeingei ding hihang. Huai ziak in Khristian tuailaite thouni in eimah mimal hinkhua leh innkuan sung chiat apan kikhekna kipan khesak in, Saptuam leh khotang bawl hoih leh sunuamtu hiding in Thutak leh Diktatna a kilamtou Tuailai hihsawm chiat ni.
Upa paunak in “thudik gen leh sazang kap a val” a na chimahleh Khrist ziak a val ngam leh Diktatna ziak a tanngam hiding in kihanchiam thak ni. Daniel leh a lawmte thum, pitu Mosi ban ah Joseph te’n Thutak a dinpih ngam ziak un nawlkhinna leh simmohna a na tuak uhi. Himahleh Pathian in a mangngilh kei a a huntak in a veh a, dinmun sangtaktak ah a laamsang veve hi. Ditatna ziak a thuakna leh supngamna ah vualzawlna leh hamphatna a om teitei ahi (Mat. 5:10-12; 1Pet. 3:14). Toupa’n hon vualzawl chiat hen aw. 