LIA LEH TANG HINKHUA AH AWLE…!
(Luka 1: 26-36, 46) Tuailai – Lia leh Tangte aw, Ei a’ ding in OCTOBER Kha pen kha laklak a amanpha, a chituam sitsetna leh a thupina tak khat tuam om vilvel hi. Aziak bel i PIANNA Kha uh ahihna ah amanpha tuanse a, thathoutak leh ngaklahtak a, tung zok leh chi-a ei sapsap or kuamah i ngaihsang tuan diak louh leh i enlouhna kha Pu Donald Trump in bang meh a meh de aw, Wayne Rooney-te khawng in a Goal khum zah leh dangka bangzah a neita de aw, chih khawng themthem i ngaihtuah louhna kha uh ahih ban a ei leh ei i kiphungvuh tuah seuhseuh hun laitak in; hiai thu mawlchik kon gelh zual hi. Hibang gelh thei ding a hamphatna hon pia heutute tung ah kipahthu ka gen hi.

Nungak khat leh Tangval khat ki-first love tuak uh le himaithei chih nophuai. Kichimat leh lungsim tawng, kimutuah a huthe lou hial-a a kingaih laitak un (Lk.1:26-38,46), a nungak Mari kiang ah Gabriel va lengla inchin deihsakna chibai va buk, thutam simtak houlimpih hi. Amah bel mitampi in nungak ahihna zia hoihtak a theihna ua a theih chiat uh, a nih tuak ua mi ginom leh lungsim siangthou hi nemnum lou, mi kichian mahmah hinalai uh. Khotang nangawn in zong a pahtaak, a phat leh deihsak hikha mohlou ding hi. Amau mahmah in zong mite leh Pathian ma ah kisuanlahna, lauhthawngna leh thawmhauna khawng bangmah gukneih selou uhi. Tulai in bel a guktak a kisuanlahna, lauhthawngna leh thawmhauna kineisim chiat. Pu Nehru in a tanu Indira Gandhi a vaikhah a thuhilhna “Min hon theih khiak hun chia na zumna ding bangmah hih ken” chi hi.

A houlimna tungtang thu uah, Mari in Awle chipah theilou ahingei ding a, a Lengla pa’n thutung thupawt di ah amah Mari a’ dile genpih kawm thou in Pathian apan thute a genpih hi.

# A nungak leh a hong lenglate leh Tongsan khawng ah bang thute khawng a i gen sekte uh kha! Ei zil a min hon houlimpih uh le a na hihdan himawk ve aw! Pathian’ deihdan a kingate kiang ah Pathian’ Angel kikum hi, Kana khua a kitenna ah leng.
# Eite mahmah le, utdang, tupdang, itdang, deihdang hoihtak leh kiptak a i neih laitak Khrist in hon kun, hon ngen, hon chial ahi. A huchih laitak in thupukna bawlpah haksa kisa sim chiat. Haksa sim mah lezong hon hihnok chi tuamtuam tampite (Heb.12:1-4) paikhia, nusia a Lia leh Tangte tungtawn a a kilawmna langsak a, nna thupitaktak tampi a sep khiak ut laitak ahih lai in. Awle, a chi masa hih ding kituh in, Pathian adia kipiakkhiak thak souhsouhna kha hiding in kiman le maw!

Tua i tup, i deih, i it chihte khawng Khrist ziak a tan ding, minsiat, mindai di chihte i ngap suk hialkei sekna ua, a poimoh ahi. Huchi kawmpi a hithei kuitung zoulou sek mah hi. Tua ahihman in bangpeuh i ngap a i surrender uh ngai mah ahi. Nungak Mari in pilvang siamtak in thunung thuma di leh amah a di lam mahmah le a kingaihtuah ngiungeu a, a tan dite a tuahpah dite leh adangdang, ban a thildang tampi omdite amah a’ ding in thunamai hilou ding chih ahai khol hetlou nungak kichian mahmah khat lungtang leh a ngaihtuahna a luah mahmah hi. A tawp in AW LE, na chih bang bang hileh a kei dia, thildang dangte zaw ahi hi hita ve! chi in tangtawn daih ding kisik huailou thupukna a bawlta hi. A bawl theihna ziak bel, amah utdan, deihdan, tupdan leh lemgeel dante a koihkhiak ngam ziak in thupukna detdou a bawl ngam hi. A ginom tuaktuakna uleh a kipiaknate uh ziak mah in Pathian tangtawn thilgel sepkhiakna in pang uh a, Lia leh Tang manpha mahmah hiden uhi.

# Tulai in Eipawl bel Nulla guam khan kha geuh hang a, vuah zuk chiang a azuk sungteng a kuang dim a luang zuahzuah, nin om tengteng nangawn taisiang zawzen hilezong ahong theu chia kangpah mai, den a atuite koilam tungta ale, bang chidan ale, chih a om maimah! Mite’n zaw thupukna a bawl uleh Tangtawn daih ding thupukna ahih kia le hilou in, a hihna uleh a nuntakna tengteng uah kilang, mite zalzohpih inle om uhi. Eite’n thupukna i bawl leh bang chi? “A tanngamte’n tanlou - a tanngamloute’n tan uh” chih na experience kha mah hilou hia maw?

KHRIST ZIAK IN 10TE
1. Ngaihdam di, Ngaihdam nget le ngap di.
2. Val ngam di, Val di poisaklouh, lauh louh di.
3. A hai zong hihsuk ngap di leh a thring lua hih zong poilua saklouh di.
4. Vuallel hih suak ngap di.
5. Ei a’ kia mah chih tentun louh.
6. Pilna sang a Khalam a kipi zawk leh Khalam lunggulh zawk.
7. Thuneih ut luat sang a ahimaw chih zawk.
8. A style leh a standard-te khawng sang a Jesu poimoh zaw.
9. Eilam gel leh ngaihdante sang a Laisiangthou in bangchi chih zawk.
10. Sang a upa zawte leh Upa-te leh Pastor-te zahtak ding.

Hiaite asia hilou napi in:
1. Pathian toh kithuah manlou, Mobile, TV., Football, Entertainment leh Program tuamtuamte ah i lungsim leh i hun uh kipetam.
2. Pathian nasemte hi in Gingtu kuapeuhte’n khamangthang lam leh khalam hinkhua vai lam buaipih manlou project, year plan, meeting, gam, building leh program tuamtuamte ah i lungsim leh a dangdangte zongsang den gawpta uh.
3. Setan in pil chalaktak a nnasem in Khrist a pawtham a gintakna tan hoihtak in lampi hon sialpih a, hile zong Amah thumanna, nungzuihna, kipah sakna, thuk seem a Amah adia kipiakna leh A nasep taktak ding hon phal lou hive aw. En zong Jesu i ginna zang in kitung khe velvul mai le maw, Tuailaite aw!
4. Thumna hun nei man nawnlou, Laisiangthou sim man nawnlou leh Biakinn kai man nawnlou phial phial a kibuaisak, ei leh ei kipom lemsiam a nna a poimoh bang in a nna neipa Amah poimoh seem.
5. Pathian adia hun, ni, tha leh zung, hihtheina tuamtuam i neihte leh i hinna pia a anung zuih ding, biakin kai a Laisiangthou tawi, kigin nitak a kikhop di chih khawngte thringta lua nidanglai vai lua chih bawlta.
6. Tulai vai chi in facebook, whatsapp leh internet khawng buaipih den a, changkang kisa a hoih hun kisakna mun, munzang nuamtak khat ah setan in honpilut ta ve, hong paikhia in, na changkang zaw ding.
Toupa’n a kilawmna leh hoihna a ut bangbang a a latsak nopna mite hi di’n …

“Toupa kei hiah ka om” chi ut, chithei di’n hon vualzawl chiat hen!!