Thumapi:
I Laisiangthou tangtel in gingtute sehtuam siangthou hih ding Pathian deihlam hi a, tuabang ding a numei-pasal kal nitna apan kikem siangthou ding leh numei-pasal ki-enlah lou ding in hon hilh hi.  Tuaban ah Laisiangthou sung mun tampi ah numei-pasal ki-etlahna leh kilunggulhna thanghuaite apan kikem leh kiveng ding in (siangthou ding in) hon sinsak hi. Tuabang ahihleh banghang a hibang thil a kikep siangthou kul hihiam chih thu saulou in sut leng chi ihi. 1. Kilunggulh theihna (chisuan theihna) Pathian in mihing adia vualzawlna apiak masakpen ahi:
Gen. 1:28 ah Pathian in mi masa Adam leh Evi tenupa hong ‘CHIPHA UN’ chi in  a vualzawl chih i mu hi. Laisiangthou sui miten hiai a ‘CHIPHA’ kichi paubul ah chisuan theihna ahihkeileh chisuan theihna tha (power of procreation) genna ahi a chi uhi. Hiai ‘chisuan theihna tha’ pen hunbi neilou (non seasonal) ahihman in pilvangtak a kep siangthou poimoh ahi. Huan ah Pathian thilgel hong pung a leitung dim ding leh nuaisiah ding chih hih buchinna ding vanzat dia vualzawl ahi. Tuaziak a a pepe Pathian in zatdik leh kep siangthou ding deih hiding ahi hon chisak hi. 2. Siangthou lou a mawkzat ding Siamtu in phallou hi:
Dan bangtak a kitenna sung loungal a hiai vualzawlna zat ahih ding Pathian in phallou a, tuabang a zangte thah ding ahi chi in thu na pia hi (Lev. 20:10-21). Thukhun thak hun ah leng hiai thil a thangzatte leh paktatte mawhtan sak leh gawt a om ding leh Pathian kumpigam luahlou ding uh ahi chi a hilh in i om uhi (Gal.5:13-21; 2 Pet. 2:14-17; Juda 4). 3. Mahni pumpi tung a khelhna ahi:
Khelhna dangte pumpi pawlam ah hi a, kingaihna niin leh paktatna bel mahni pumpi tung mahmah a khelhna ahi chi in Laisiangthou in a hon hilh hi (1Kor.6:18-20). Eimah pumpi tung a khial ding zah dong a ginomlouh chih bel a khawk law mahmah khelhna leh ginomlouhna ahi peuhmah hi. Tuazah a i khelh nakkhem ziak ua midang muang leh gingta theilou zong i hikha thei uhi. Tuaban ah mahni pumpi tung nangawn a takhial ngam bel thildang a ginom ding haksa kha ding hi. Mahni pumpi kem siangthou zoute mah lah mi ginom leh chitakte ahi zel uhi. Tuabang ding a Pathian in hon deih ahi. 4. Siangthou louh leh zatkhelh gah a zangtu tungmah tu ding ahi:
Sawltak Paul in numei-pasal kal itna a bualte leh paktatten a tatsiat man uh a satung uah a muta uh chi in Rome mite kiang ah a na gelh hi (Rom.1:24-27). Kumpipa David tung ah leng amah hih bangbang leh tua a thilhih selna dia a hihte amah inkuan (David inkuan) tung ah tungsak hi (2Sam.12:9-12). Hiai thilpen David a ding in thuaknop chi liailou hi. Tuni a eite tung a zong tuabang tung ahi kha mai diam a chih huai sim mahmah hi. 5. Siangthou a i zatna apan chi siangthou hong om ding Pathian in deih hi:
Nitna leh Paktatna tellou a numei-pasal siangthou a kigawmna tungtawn a amah limsak chisuan Pathian in zong ahi (Mal.2:15). Hiai in Pathian in vualzawlna chisuan theihna thanei hon piak pen Amah Pathian limsak mi leitung luahdim ding a a om ding a deihna a hon piak hiding ahi hon chisak hi.  Tua man a kikep siangthou mah zaw kul ahi chithei i hi. Tuaban ah ei a ding a hoih a, Pathian lampi totna leng hi ahi (Sam 128:1). Hiai ban ah Pa Pathian vualzawlna i insung, zi leh ta tung leh i damsung teng nopsakna muhna ding a Pathian thil thawnpiak ahi (Sam 128:2-6). Pathian a ut peuh leh bangteng hon pethei a, bangmah in dal zoulou lah ahi ngal a. Thukhitna:
Pathian hehna leh thil hoihloute i pumpelh theih a, Pathian vualzawlna namkim i tan theihna ding in numei-pasal kal nitna apan kikem siangthou thei chiat ding in simtu kuapeuh Pathian mah in theihsiamna hon pia hen aw.